އިންސާނުންގެ އިޖުތިމާއީ ގުޅުންތަކުގެ ބަދަހިކަން ބިނާވެފައިވަނީ އެކަކު އަނެކަކަށް ކުރާ އިޙުތިރާމާއި، އެކަކު އަނެކެއްގެ އިޙުސާސްތައް ދެނެގަތުމުގެ މައްޗަށެވެ. ނަމަވެސް، ނަފުސާނީ މާހިރުން ފާހަގަކުރާ ގޮތުގައި “އިމޯޝަނަލް މެޗޫރިޓީ” ނުވަތަ އަމިއްލަ އިޙުސާސްތަކާއި އަމަލުތައް ބަލަހައްޓަން ނޭނގޭ މީހުންގެ ކިބައިގައި ހުންނަ ބައެއް އާދަތަކުގެ ސަބަބުން، އެހެން މީހުން އެފަދަ މީހުންނާ ދުރުވާން މަޖުބޫރުވެއެވެ.
ނަފުސާނީ ދިރާސާތަކަށް ބިނާކޮށް “ޔޯ ޓެންގޯ” މަޖައްލާގައި ޝާއިއުކޮށްފައިވާ ރިޕޯޓެއްގައި، އިމޯޝަނަލް މެޗޫރިޓީ ނެތް މީހުންގެ ކިބައިން އާންމުކޮށް ފެންނަ 4 އާދައެއް ވަނީ ފާހަގަކޮށްފައެވެ.
1. ކުށް ޤަބޫލުނުކުރުމާއި އެހެން މީހުންގެ ބޮލުގައި އިލްޒާމް އެޅުވުން
މިފަދަ މީހުންގެ އެންމެ ބޮޑު އެއް އާދައަކީ ތިމާގެ އަތުން ކަމެއް ގޯސްވުމުން އެކަމުގެ ޒިންމާ ނެގުމުގެ ބަދަލުގައި، އެހެން މީހެއްގެ ބޮލުގައި އެކަން އެޅުވުމެވެ. މިއީ އެހެން މީހުން އެ މީހަކާމެދު އޮންނަ އިތުބާރު ގެއްލި، ގުޅުންތައް ހީނަރުވާ މައިގަނޑު ސަބަބެކެވެ.
2. އަބަދުވެސް ތިމާ ބޭނުންވާ ގޮތަށް ކަންކަން ކުރަން އުޅުން
އިމޯޝަނަލް މެޗޫރިޓީ ނެތް މީހުންނަށް ދެބަސްވުންތަކާއި ކުރިމަތިލާކަށް ނޭނގެއެވެ. އެހެންކަމުން، އެފަދަ ހާލަތްތަކުގައި އެހެން މީހުންގެ ޚިޔާލަށް އިޙުތިރާމް ކުރުމުގެ ބަދަލުގައި، ގަދަކަމުން ނަމަވެސް ތިމާ ބޭނުންވާ ގޮތް ހާސިލުކުރަން މަސައްކަތް ކުރެއެވެ.
3. އަޑުއެހުމުގެ ބަދަލުގައި ވާހަކަ ދެއްކުމަށް އިސްކަންދިނުން
މުއާމަލާތް ކުރުމުގައި އަނެކާ ބުނާ އެއްޗަކަށް ސަމާލުކަން ދިނުމުގެ ބަދަލުގައި، މިފަދަ މީހުން ބަލާނީ ހަމައެކަނި ތިމާގެ ވާހަކަ ކުރިއަށް ގެންދެވޭތޯއެވެ. މީގެ ސަބަބުން ގުޅުންތަކުގައި އޮންނަންޖެހޭ “ދޭދޭ މުއާމަލާތް” ގެއްލި، އަނެކާއަށް ތިމާގެ އަގު ވަޒަންނުކުރެވޭ ކަމުގެ އިޙުސާސް ކުރެވެއެވެ.
4. ކަންކަމުގައި މާ އަވަހަށް ރުޅިގަދަވުން ނުވަތަ އިޙުސާސްތައް ކޮންޓްރޯލް ނުވުން
ކުޑަކުޑަ ކަމަކާ ގުޅިގެން ވެސް މާ ބޮޑަށް ރުޅި އައުމާއި، ނަފުސު ކޮންޓްރޯލް ނުކުރެވުމަކީ މިފަދަ މީހުންގެ ސިފައެކެވެ. މިކަމުގެ ސަބަބުން އެހެން މީހުން އެފަދަ މީހުންނާ ވާހަކަދައްކަން ޖެހިލުންވެ، ދުރުހެލިވެއެވެ.
މި އާދަތަކަކީ ގިނަ ފަހަރަށް އަމިއްލައަށް ނޭނގި ނަމަވެސް ކުރެވޭ ކަންކަމެވެ. ނަމަވެސް، ދިރިއުޅުމުގެ ގުޅުންތައް ދެމެހެއްޓުމަށްޓަކައި މިފަދަ އާދަތަކުން ދުރުވެ، އަމިއްލަ ނަފުސު އިސްލާހު ކުރުމަކީ މުހިންމު ކަމެއް ކަމަށް ނަފުސާނީ މާހިރުން ލަފާދެއެވެ.
