⏱️ ތައްޔާރުކުރުމަށް: 20 މިނެޓު
⏱️ ކައްކަން: 20 މިނެޓު
🍲 4 މީހުންނަށް

ބޭނުންވާ ތަކެތި:

ކްރިސްޕީ ޗިކަން ތައްޔާރުކުރުމަށް:

🍳 2 ކުކުޅު މޭމަތީ މަސް (ކޮށާފައި)
🍳 1 ޖޯޑު ބަޓާމިލްކް
🍳 1 ޖޯޑު ފުށް (އޯލް ޕާޕަސް ފްލާވާ)
🍳 ½ ޖޯޑު ކޯން ފްލާވާ
🍳 1 ސައިސަމުސާ ގާލިކް ޕައުޑަރު (ލޮނުމެދު މުގުރި)
🍳 1 ސައިސަމުސާ އަނިއަން ޕައުޑަރު (ފިޔާ މުގުރި)
🍳 1 ސައިސަމުސާ ސްމޯކްޑް ޕެޕްރިކާ
🍳 ½ ސައިސަމުސާ އަސޭމިރުސް
🍳 1 ސައިސަމުސާ ލޮނު
🍳 ކެއްކުމަށް ބޭނުންކުރާ ތެޔޮ (ތެލުލުމަށް)

ސެލަޑް ތައްޔާރުކުރުމަށް:

🍳 4 ޖޯޑު ލެޓިއުސް (ކޮށާފައި)
🍳 2 ޖޯޑު ކެބެޖް (ގާނާފައި)
🍳 1 މެދު ސައިޒުގެ ކިއުކަމްބާ (ބުރިބުރިކޮށްފައި)
🍳 3 ފިޔާ ފަތް (ކޮށާފައި)

ސްޕައިސީ ކްރީމީ ޑްރެސިންގ ތައްޔާރުކުރުމަށް:

🍳 ½ ޖޯޑު މެޔޮނޭޒް
🍳 2 ސައިސަމުސާ ސަވަރ ކްރީމް
🍳 1 ސައިސަމުސާ ސިރާޗާ ސޯސް (ނުވަތަ ކުޅި ސޯސް)
🍳 1 ސައިސަމުސާ ސްމޯކްޑް ޕެޕްރިކާ
🍳 1 ސައިސަމުސާ މާމުއި
🍳 1 ސައިސަމުސާ ލުނބޯ ހުތް
🍳 ½ ސައިސަމުސާ ގާލިކް ޕައުޑަރު
🍳 ރަހަލާވަރަށް ލޮނާއި އަސޭމިރުސް

👩‍🍳 ތައްޔާރުކުރާނެ ގޮތް:

1 – އެންމެ ފުރަތަމަ ކުކުޅުކޮޅު މަޑުކުރުމަށްޓަކައި ބަޓާމިލްކްގެ ތެރޭގައި 15-30 މިނެޓު ވަންދެން ބާއްވާށެވެ. އެއަށްފަހު ވަކި ތަށްޓެއްގައި ފުށް، ކޯން ފްލާވާ، ގާލިކް ޕައުޑަރު، އަނިއަން ޕައުޑަރު، ޕެޕްރިކާ، ލޮނު އަދި އަސޭމިރުސް އެއްކޮށްލާށެވެ. (ކޯން ފްލާވާ ބޭނުންކުރުމުން ކުކުޅުކޮޅު މާ ބޮޑަށްވެސް މުރަނަވާނެއެވެ.)

2 – ތަވައަކަށް ތެޔޮ އަޅައި، ގާތްގަނޑަކަށް 175 ޑިގްރީ ސެލްސިއަސްއަށް ހޫނުކުރާށެވެ. ކޮންމެ ކުކުޅުކޮޅެއް ކުރިން ތައްޔާރުކުރި ފުށްގަނޑުގެ ތެރެއަށްލައި، ފުށްތައް ރަނގަޅަށް ހަރުލާވަރަށް އޮބާލާށެވެ.

3 – ކުކުޅުކޮޅުތައް ތެލުގެ ތެރޭގައި 4-6 މިނެޓު ވަންދެން ތެލުލާށެވެ. ކުލަ މުށިވެ، ރަނގަޅަށް ރޯފިލުމުން ތެޔޮ ފޭބުމަށްޓަކައި ރެކެއްގެ މަތީގައި ނުވަތަ ޓިޝޫ މަތީގައި ބަހައްޓާށެވެ.

4 – ޑްރެސިންގ ތައްޔާރުކުރުމަށްޓަކައި ކުޑަ ބޯތަށްޓެއްގައި މެޔޮނޭޒް، ސަވަރ ކްރީމް، ސިރާޗާ، ޕެޕްރިކާ، މާމުއި، ލުނބޯ ހުތް، މުގުރި ލޮނުމެދު، ލޮނު އަދި އަސޭމިރުސް ރަނގަޅަށް އެއްކޮށްލާށެވެ.

5 – ހަތަރު ބޯތަށްޓަކަށް ލެޓިއުސް އާއި ކެބެޖް ބަހާލާށެވެ. އަދި ބޯތަށީގެ އަރިމަތީގައި ކިއުކަމްބާތައް އަތުރާލާށެވެ.

6 – ކޮންމެ ބޯތަށްޓެއްގެ މެދުގައި ތެލުލި ކުކުޅުކޮޅުތައް އަތުރާލުމަށްފަހު، އޭގެ މައްޗަށް ތައްޔާރުކުރި ޑްރެސިންގ އަޅާށެވެ. އަދި ސާވްކުރުމުގެ ކުރިން މައްޗަށް ކޮށާފައި ހުރި ފިޔާފަތްކޮޅު ބުރުއްސާލާށެވެ.

އިތުރު މަޢުލޫމާތު:

● ތެޔޮ މަދުކުރަން ބޭނުންނަމަ އެއަރ ފްރަޔަރގައި 200 ޑިގްރީ ސެލްސިއަސްގައި 10-12 މިނެޓު ވަންދެން ކައްކާލެވިދާނެއެވެ.
● ސެލަޑަށް އިތުރު ކުލައެއް ގެނައުމަށް ކެރެޓު ނުވަތަ ރަތް ކެބެޖްވެސް ބޭނުންކުރެވިދާނެއެވެ.
● ކުޅިކޮށް ކާން ބޭނުން ނުވާނަމަ ސްޕައިސީ ޑްރެސިންގްގެ ބަދަލުގައި ރާންޗް ޑްރެސިންގ ބޭނުންކުރެވިދާނެއެވެ.
● ކުކުޅުކޮޅު މުރަނަކޮށް ހުންނާނީ ތެލުލި ގޮތަށް އަވަހަށް ކާލުމުންނެވެ.