ހޮރްމުޒް ކަނޑުއޮޅީގެ ނުތަނަވަސްކަމާ ގުޅިގެން އެމެރިކާ އާއި އީރާނާ ދެމެދު އަލުން ހަމަލާ ބަދަލުކުރަން ފެށުމުގެ ސަބަބުން، ތެޔޮ ސަޕްލައި ކުރުމަށް ބުރޫއަރައިފާނެ ކަމުގެ ބިރު ހީވެ، ހޯމަ ދުވަހު ދުނިޔޭގެ ބާޒާރުގައި ތެލުގެ އަގު 4 އިންސައްތައަށް ވުރެ މައްޗަށް އުފުލިއްޖެއެވެ. މި ހަމަލާތަކުގެ ސަބަބުން މިހާރު އޮތް ނާޒުކު ސުލްހައިގެ އެއްބަސްވުމުގެ މުސްތަގުބަލާ މެދު ވަނީ ސުވާލު އުފެދިފައެވެ.
މެދުއިރުމަތީގައި މި ހަމަލާތައް އަލުން ފެށިފައިވަނީ، މިދިޔަ ހަފުތާގައި ބަދަލުކުރެވުނު ހަމަލާތަކަށްފަހު، މުހިންމު މަގަކަށްވާ ހޮރްމުޒް ކަނޑުއޮޅި ހުޅުވާފައި ބޭއްވުމަށްޓަކައި ދާއިމީ ސުލްހައިގެ އެއްބަސްވުމަކަށް އައުމަށް މަންދޫބުން މަސައްކަތް ކުރަމުންދަނިކޮށެވެ.
އާދިއްތަ ދުވަހު އެމެރިކާގެ އަސްކަރިއްޔާއިން އާ ހަމަލާތަކެއް ދޭން ފަށާފައިވަނީ، ކަނޑުގެ އެ ސަރަހައްދުގައި ހިނގި ހަމަނުޖެހުންތަކެއްގައި ވޮޝިންޓަންގެ ބައެއް ގަލްފު ބައިވެރިންނަށް އަމާޒުކޮށް ހަމަލާތަކެއް ދިނުމާ ގުޅިގެންނެވެ.
ސުލްހައިގެ އެއްބަސްވުން އިޢުލާނުކުރުމާއެކު އަގު ދަށަށް ދިޔަ ތެލުގެ މައިގަނޑު ދެ ބާވަތުގެ އަގުވެސް ވަނީ 4.5 އިންސައްތައަށް އުފުލިފައެވެ. މީގެ ސަބަބުން، ހަނގުރާމައާ ގުޅިގެން މިހާރުވެސް މަތީގައި ހުރި އިންފްލޭޝަން އިތުރަށް މައްޗަށް ގޮސް، މަރުކަޒީ ބޭންކުތަކުން އިންޓަރެސްޓް ރޭޓް ބޮޑުކުރަން ޖެހިދާނެ ކަމުގެ ބިރު ވަނީ ބޮޑުވެފައެވެ.
އަލުން ހަމަލާތައް ފެށިފައިވަނީ އާދިއްތަ ދުވަހުގެ ކުރީކޮޅު ހޮރްމުޒް ކަނޑުއޮޅިން ދަތުރުކުރި ވިޔަފާރި އުޅަނދަކަށް އީރާނުން ހަމަލާދިނުމާ ގުޅިގެންނެވެ. އެ އުޅަނދުގައި ރޯވުމުގެ ސަބަބުން ފަޅުވެރިން ވަނީ އުޅަނދު ދޫކޮށްލާފައެވެ.
އީރާނުގެ ދައުލަތުގެ ނިއުސް އެޖެންސީ “އިރްނާ” އިން ރިޕޯޓްކޮށްފައިވާ ގޮތުގައި، އެ ހާދިސާއަށްފަހު އީރާނުގެ ރިވޮލިއުޝަނަރީ ގާޑްސްއިން ބުނެފައިވަނީ “އެމެރިކާއިން މި ސަރަހައްދަށް ވަންނަމުންދާ ދިއުން ނިމުމަކަށް އަންނަންދެން ހޮރްމުޒް ކަނޑުއޮޅި ބަންދުވާނެ” ކަމަށެވެ. ނަމަވެސް، އެމެރިކާގެ ސެންޓްރަލް ކޮމާންޑުން އެކްސްގައި ބުނެފައިވަނީ ގާނޫނީ ގޮތުން ދަތުރުކުރަން ބޭނުންވާ ހުރިހާ އުޅަނދުތަކަށް އެ ކަނޑުއޮޅި ހުޅުވިފައިވާ ކަމަށެވެ.
ފޮރެކްސް ޑޮޓް ކޮމްގެ މާކެޓް އެނަލިސްޓެއް ކަމަށްވާ ފަވާދު ރަޒަކްޒާދާ ވިދާޅުވި ގޮތުގައި، މި ހާލަތު ވަރަށް އަވަހަށް ގޯސްވެގެން ހިނގައިދާނެ ކަމަށް ބެލެވެއެވެ. “މީގެ ކުރިންވެސް މިފަދަ ހާލަތްތަކުގައި ބަހުގެ ހަމަލާތައް މަޑުޖެހިފައި އެބަހުރި. އެކަމަކު މިވަގުތު ވިޔަފާރިވެރިންނަށް މަޖުބޫރުވެފައިވަނީ އެންމެ ގޯސް ހާލަތަށް ތައްޔާރުވާން،” އޭނާ ވިދާޅުވިއެވެ.
ހަމަނުޖެހުންތަކާއެކު ތެލުގެ އަގު އުފުލުނު ނަމަވެސް، އައި.ޖީ އެނަލިސްޓް ފޭބިއަން ޔިޕް ގަބޫލުކުރައްވާ ގޮތުގައި ފެބްރުއަރީ 28 ގައި އެމެރިކާ-އިސްރާއީލުން އީރާނާ ދެކޮޅަށް ފެށި ހަނގުރާމައަށްފަހު ތެލުގެ އަގު އުފުލުނު މިންވަރަށް މިފަހަރު އަގު އުފުލުމަކީ ނާދިރު ކަމެކެވެ.
އޭނާ ލިޔުއްވާފައިވާ ގޮތުގައި ޖޫން މަހު ތެލުގެ އަގު ހަނގުރާމައިގެ ކުރީގެ މިންވަރަށް ތިރިވީ، އެމެރިކާ އާއި އީރާނުގެ މެދުގައި އޮތް ނާޒުކު އެއްބަސްވުމާ މެދު މާކެޓުން އުންމީދު ބޮޑުކުރުމުންނެވެ. ނަމަވެސް މިހާރުގެ ހަމަނުޖެހުންތަކުން އެނގެނީ އެ އުންމީދުތަކަކީ ވަރަށް ބަލިކަށި އުންމީދުތަކެއް ކަމެވެ. ކުރިއަށް އޮތް ތަނުގައި ތެލަށް އޮތް ޑިމާންޑް މަޑުމަޑުން ނޫނީ އިތުރުނުވާނެތީ އާއި، ބާޒާރަށް ނެރޭ ތެލުގެ މިންވަރު އިތުރުވަމުންދާތީ، ކުރީގެ މިންވަރަށް އަގު އުފުލިދާނެ ކަމަށް ނުބެލެވޭ ކަމަށްވެސް އޭނާ ފާހަގަކުރެއްވިއެވެ.
ހިއްސާގެ ބާޒާރުގެ ހާލަތު
ހިއްސާގެ ބާޒާރަށް ބަލާއިރު، ސޯލްގެ ބާޒާރު ވަނީ އެއް ފަހަރާ 9 އިންސައްތަ ދަށަށް ގޮސްފައެވެ. މި ބަދަލު އައީ ޓެކްނޮލޮޖީ ކުންފުނިތަކުގެ ހިއްސާ ވިއްކުން އިތުރުވުމާ ގުޅިގެންނެވެ. ވަކިން ހާއްސަކޮށް، ޗިޕް އުފައްދާ އެސް.ކޭ ހައިނިކްސްގެ ހިއްސާ 15 އިންސައްތައަށް ވުރެ ބޮޑަށް ދަށަށް ދިއުމަކީ ސޯލްގެ ކޮސްޕީ އިންޑެކްސްއަށް ލިބުނު ބޮޑު ލޮޅުމެކެވެ. މީގެ އިތުރުން ސަމްސަންގްގެ ހިއްސާވެސް ވަނީ 10 އިންސައްތައަށް ވުރެ ބޮޑަށް ދަށަށް ގޮސްފައެވެ.
ޓޯކިޔޯ، ޝަންހާއީ، ސިންގަޕޫރު، ވެލިންގްޓަން، މެނީލާ، މުމްބާއީ އަދި ޖަކާޓާގެ ބާޒާރުތަކުންވެސް ގެއްލުންތަކެއް ފެނިފައިވެއެވެ. ނަމަވެސް ހޮންކޮންގް، ތައިޕޭ އަދި މެނީލާގެ ބާޒާރުތައް ވަނީ ކުރިއަރާފައެވެ. ލަންޑަނުގެ ބާޒާރު ކުރިއެރުމަކާއެކު ހުޅުވުނު ނަމަވެސް، ޕެރިސް އަދި ފްރެންކްފަޓްގެ ބާޒާރުތައް ވަނީ ކުޑަކޮށް ދަށަށް ގޮސްފައެވެ.
ދުނިޔޭގެ ބާޒާރުގައި ޑޮލަރުގެ އަގު ވަނީ އުފުލިފައެވެ. އެއީ ރައްކާތެރި އިންވެސްޓްމަންޓެއްގެ ގޮތުގައި ޑޮލަރު ގަންނަ މިންވަރު އިތުރުވުމާއި، ހަނގުރާމައާ ގުޅިގެން އުފުލޭ އިންފްލޭޝަން ކޮންޓްރޯލް ކުރުމަށް ފެޑަރަލް ރިޒާވުން މި އަހަރުގެ ތެރޭގައި އިންޓަރެސްޓް ރޭޓް ބޮޑުކުރާނެ ކަމަށް އިންވެސްޓަރުން ގަބޫލުކުރާތީއެވެ.
މި ހަފުތާގެ މުހިންމު ތަފާސްހިސާބުތައް (0715 ޖީއެމްޓީ އާ ހަމައަށް):
– ވެސްޓް ޓެކްސަސް އިންޓަމީޑިއަޓް: ފީފާއެއް 74.26 ޑޮލަރަށް (4.0 އިންސައްތަ މަތި)
– ބްރެންޓް ކްރޫޑް: ފީފާއެއް 78.83 ޑޮލަރަށް (3.7 އިންސައްތަ މަތި)
– ސޯލް – ކޮސްޕީ: 6,806.93 (9.0 އިންސައްތަ ދަށް)
– ޓޯކިޔޯ – ނިކޭ 225: 67,242.73 (1.9 އިންސައްތަ ދަށް)
– ހޮންކޮންގް – ހޭންގް ސެންގް: 24,193.10 (0.1 އިންސައްތަ މަތި)
– ޝަންހާއީ – ކޮމްޕޮސިޓް: 3,913.79 (2.1 އިންސައްތަ ދަށް)
– ލަންޑަން – FTSE 100: 10,529.17 (0.3 އިންސައްތަ މަތި)
– ޔޫރޯ/ޑޮލަރު: 1.1404 ޑޮލަރަށް (ހުކުރު ދުވަހު އޮތީ 1.1415 ގައި)
– ޕައުންޑް/ޑޮލަރު: 1.3384 ޑޮލަރަށް (ހުކުރު ދުވަހު އޮތީ 1.3397 ގައި)
– ޑޮލަރު/ޔެން: 162.24 ޔެންއަށް (ހުކުރު ދުވަހު އޮތީ 161.72 ގައި)
– ނިއުޔޯކް – ޑޯ: 52,637.01 (0.3 އިންސައްތަ މަތި)
