ދިރިއުޅުމުގެ ބުރަ މަސައްކަތްތަކާއި، އަދާކުރަންޖެހޭ ޒިންމާތަކުގެ ތެރޭގައި އުޅެމުންދާއިރު، ވަރަށް އާދައިގެ ނަމަވެސް ނުހަނު މުހިންމު ކަމެއްގެ މަތިން އަހަރެމެން ގިނަ ފަހަރަށް ހަނދާން ނެތެއެވެ. އެއީ ގާތްމީހުން ގާތު “ލޯބިވެޔޭ” ބުނުމެވެ.
އަހަރެމެންގެ ދުވަސްތައް މިގޮތަށް ވޭތިވެގެންދާއިރު، އަބަދުވެސް އިތުރު ފުރުޞަތެއް ލިބޭނެކަމަށް އަހަރެމެން ހީކުރަމެވެ. ފޯނުން ގުޅާލުމަށް ނުވަތަ ޝުކުރު އަދާކުރުމަށް، ނުވަތަ މަޢާފަށް އެދި ގުޅުންތައް ރަނގަޅުކުރުމަށް އަދި ވަގުތު އޮތްކަމަށް ދެކެމެވެ. ނަމަވެސް، ދިރިއުޅުމަކީ އަބަދު އަހަރެމެން ބޭނުންވާ ވަގުތަށް މަޑުކުރާ އެއްޗެއް ނޫނެވެ. އަދި މާދަމާއަކީ އެއްވެސް މީހަކަށް ޔަޤީންވެގެންވާ ދުވަހެއް ނޫނެވެ.
ލޯބިވާކަން ނުވަތަ ޝުކުރުވެރިވާކަން ހާމަކޮށްލާ ކުޑަ ބަހަކުންވެސް ވަރަށް ބޮޑު އަސަރެއް ކުރެއެވެ. އެއީ ހިތްތަކަށް ޝިފާ ލިބި، އުފާވެރިކަން ގެނެސްދޭނެ ކަމެކެވެ. އަދި އެމީހުންގެ އަގު ވަޒަންކުރާކަން އިޙުސާސްކޮށްދޭނެ ކަމެކެވެ. ގިނަ ބަޔަކު ހިތާމަތަކާއި ހިމޭންކަމާއެކު ކުރިމަތިލަމުންދާ މި ދުނިޔޭގައި، ތިޔަ ބުނެލާ ބަސްތަކަކީ އެހެން މީހަކަށް އެންމެ ބޭނުންވެފައިވާ ހިތްހަމަޖެހުމަށް ވެދާނެއެވެ.
އިސްލާމީ ނަޒަރަކުން ބަލާއިރު، މިފަދަ ކަންކަމުގެ އަގު މާ ބޮޑެވެ. އިސްލާމްދީނުގައި ކޮންމެ ކަމެއްވެސް ބިނާވެގެންވަނީ ނިޔަތުގެ މައްޗަށެވެ. އަދި ހިތުގެ އިޙުސާސްތަކަށް ބޮޑު އަހައްމިއްޔަތުކަމެއް ދީފައިވެއެވެ. ﷲ އަށްޓަކައި މީހަކުދެކެ ލޯބިވުމާއި، އޯގާތެރިވުމާއި، މަޢާފްކުރުމަކީ އަޅުކަމެކެވެ. އަދި އެކަކު އަނެކަކުދެކެ ލޯބިވާކަން ހާމަކުރުމަށް ކީރިތި ރަސޫލާ (ޞައްލަﷲ ޢަލައިހި ވަސައްލަމަ) ވަނީ ބާރުއަޅުއްވާފައެވެ. އެއީ މީސްތަކުންގެ މެދުގައި އޮންނަ ގުޅުން ބަދަހިވެ، އިޚްލާޞްތެރިކަން އިތުރުވާނެ ކަމެކެވެ.
އެހެންނަމަވެސް، ހިތާމަވެރި ހަޤީޤަތަކީ، އަހަރެމެން ގިނަފަހަރަށް މީހެއްގެ ހުރި މާތް ސިފަތަކާއި އެމީހަކު އަހަރެމެންނަށް މުހިންމުވި މިންވަރުގެ ވާހަކަ ދައްކަނީ އެމީހަކު މިދުނިޔެ ދޫކޮށް ދިޔުމަށްފަހުގައެވެ. އެވަގުތު، މާކުރިން އެވާހަކަ ބުނެވުނުނަމައޭ ނުވަތަ އިތުރަށް އޯގާތެރިވެވުނުނަމައޭ ހިތަށް އަރާ ހިތާމަކުރަން ޖެހެއެވެ.
ލޯބި ފާޅުކުރުމަކީ ހަމައެކަނި ޚާއްޞަ މުނާސަބަތުތަކަށް ރައްކާކޮށްފައި ބާއްވަންޖެހޭ އެއްޗެއް ނޫނެވެ. އެއީ ދުވަހުގެ ކޮންމެ ވަގުތަކުވެސް ފާޅުކުރަންޖެހޭ އިޙުސާސެކެވެ. ފޮނުވާލާ ކުރު މެސެޖަކުން، ބުނެލާ އޯގާތެރި ބަހަކުން، ނުވަތަ އެމީހެއްގެ އަގުވަޒަންކުރާކަން ހަނދާންކޮށްދިނުމުންވެސް އެކަން ފުދެއެވެ.
ސަބަބަކީ، ކޮންމެވެސް ދުވަހަކުން “ފަހުން” ނުވަތަ “ދެން އަންނަ ފަހަރަކުން” ކުރަން ބަހައްޓާ ކަންކަމަށް ދެވަނަ ފުރުޞަތެއް ނުލިބިދާނެތީއެވެ.
އެހެންކަމުން، މިއަދު މަޑުޖެހިލާށެވެ. ގާތްމީހުންނާ ގުޅުން ބަދަހިކުރާށެވެ. އޯގާތެރިކަމާއެކު ވާހަކަދައްކާށެވެ. މުހިންމު ވާހަކަތައް ބުނެދޭށެވެ. ﷲ އަށްޓަކައި އެމީހުންދެކެ ލޯބިވާކަން ހާމަކުރާށެވެ. މާދަމާއަކަށް ނޫނެވެ. މިއަދެވެ.
