އިންސާނާގެ އުފަން ތާރީޚުން އޭނާގެ އުމުރު އެނގުނު ކަމުގައި ވިޔަސް، ހަށިގަނޑުގެ ހާލަތު ބުނެދެނީ މުޅިން ތަފާތު ވާހަކައެކެވެ. ސިއްޙީ މާހިރުން މިކަމަށް ކިޔަނީ “ބަޔޮލޮޖިކަލް އޭޖް” ނުވަތަ ހަށިގަނޑުގެ ދިރުންތަކުގެ އުމުރެވެ. މިއީ މީހާގެ ދިރިއުޅުމުގެ އާދަކާދަތަކާއި، ހަށިގަނޑުގެ ވަރުގަދަކަމާއި، އާންމު ސިއްޙަތަށް ބިނާކޮށް ހަށިގަނޑުގެ ގުނަވަންތައް މަސައްކަތްކުރާ މިންވަރު ވަޒަންކޮށްދޭ މިންގަނޑެކެވެ.

މޭޔޯ ކްލިނިކުން ހާމަކުރާ ގޮތުގައި، ދިރިއުޅުމުގެ އާދަކާދަތައް ހުންނަ ގޮތުން، އިންސާނާގެ ބަޔޮލޮޖިކަލް އުމުރު އޭނާގެ ކަލަންޑަރު އުމުރަށްވުރެ އަވަސް ނުވަތަ ލަސްވެދާނެއެވެ. ދިރާސާވެރިން ބުނާ ގޮތުގައި ހަށިގަނޑުން ފެންނަ އާދައިގެ ބައެއް ނިޝާންތަކުން ތިމާގެ ހަށިގަނޑުގެ ހަޤީޤީ އުމުރު ހުރި ހިސާބު ދެނެގަނެވިދާނެއެވެ.

ސަމާލުކަންދޭންޖެހޭ މުހިންމު 5 ނިޝާން

ހާވާޑް ހެލްތު ޕަބްލިޝިން ފަދަ އިތުބާރު ހުރި ސިއްޙީ މަސްދަރުތަކުން ފާހަގަކުރާ ގޮތުގައި، ހަށިގަނޑުގެ އުމުރު ދެނެގަތުމަށް ބަލާނެ ފަސް ކަމަކީ:

1 – އަތްތިލަ: އަތުން އެއްޗެއްގައި ހިފަހައްޓާލުމުގެ ބާރު ނުވަތަ ގްރިޕް ސްޓްރެންތަކީ މަސްތަކާއި ހިތުގެ ދުޅަހެޔޮކަން ހުރި މިންވަރު އަންގައިދޭ ކަމެކެވެ.

2 – ފައި: އަތުގެ އެހީއާ ނުލައި ކޮޅަށް ތެދުވުމުގެ ޤާބިލުކަން ހުރުމަކީ ހަށިގަނޑުގެ ބެލެންސް ހިފެހެއްޓުމާއި ހަށިގަނޑުގެ މެދުބައިގެ ވަރުގަދަކަން ދައްކުވައިދޭ ކަމެކެވެ.

3 – ކޮނޑު: ކޮނޑު ފަސޭހަކަމާއެކު ހަރަކާތްތެރިކުރެވޭ މިންވަރަކީ ހުޅުތަކާއި ހަށިގަނޑުގެ ޓިޝޫތަކުގެ ދުޅަހެޔޮކަން ހުރި މިންވަރު އަންގައިދޭ ނިޝާނެކެވެ.

4 – އުނަގަނޑު: އުނަގަނޑު ވަށައިގެން އިތުރުވެފައި ހުންނަ ސަރުބީއަކީ މެޓަބޮލިޒަމް ބަލިކަށިވެ، ހަށިގަނޑު މުސްކުޅިވުމަށް މަގުފަހިވާ ކަމެކެވެ.

5 – މައިބަދަ: ހަށިގަނޑު ތެދަށް ބެހެއްޓޭ މިންވަރަކީ ކަށީގެ ވަރުގަދަކަމާއި މަސްތަކުގެ ހަމަޖެހުން ހުރި މިންވަރު ހާމަކޮށްދޭ ކަމެކެވެ.

ނޭޝަނަލް އިންސްޓިޓިއުޓްސް އޮފް ހެލްތުން ފާހަގަކުރާ ގޮތުގައި، އުމުރުން ދުވަސްވުމާ ގުޅިގެން މަސްތަކުގެ ބާރު ދެރަވުމަކީ ހަށިގަނޑު އަވަހަށް މުސްކުޅިވާން މެދުވެރިވާ އެންމެ ބޮޑު އެއް ސަބަބެވެ.

މި ނިޝާންތަކަކީ ހަމައެކަނި ބޭރުފުށުން ފެންނަ ސިފަތަކެއް ނޫނެވެ. މިއީ ހަށިގަނޑުގެ ގުނަވަންތައް މަސައްކަތްކުރާ ފެންވަރެވެ. މަސްތައް ބަލިކަށިވުމާއި، ހަށިގަނޑު ތެދަށް ނުބެހެއްޓުމާއި، އަދި އިތުރުވެފައި ހުންނަ ސަރުބީގެ ސަބަބުން އަނިޔާވުމުގެ ފުރުސަތު ބޮޑުވެ، ދާއިމީ ބަލިތަކަށް މަގުފަހިވެއެވެ. އަދި އުމުރުން ދުވަސްވާއިރު އެހެން މީހުންގެ އެހީތެރިކަމަށް ބަރޯސާވާންޖެހޭ މިންވަރު އިތުރުވެއެވެ.

މާހިރުން ބުނާ ގޮތުގައި މީގެ ޖަވާބަކީ އާނއެކެވެ. ޤަވާއިދުން ކަސްރަތުކުރުމާއި، ސިއްޙަތަށް ފައިދާހުރި ކާނާ ބޭނުންކުރުމާއި، އަދި ދުވަހުގެ ތެރޭގައި ހަރަކާތްތެރިވެ އުޅުމަކީ މަތީގައި ބަޔާންކުރެވުނު ނިޝާންތައް ރަނގަޅުކޮށް، ހަށިގަނޑުގެ ބަޔޮލޮޖިކަލް އުމުރު ދަށްކޮށްދޭނެ ކަންކަމެވެ.

މުސްކުޅިވުމަކީ ހަމައެކަނި އުމުރުން ގުނާ އަހަރުތަކެއް ނޫނެވެ. އެއީ ތިމާގެ ހަށިގަނޑު މަސައްކަތްކުރާ ފެންވަރެވެ. ހަށިގަނޑުން ފެންނަ މިފަދަ އާދައިގެ ނިޝާންތަކަށް ސަމާލުކަން ދިނުމަކީ، ދިގު މުއްދަތަކަށް ދުޅަހެޔޮކަންމަތީ، ވަރުގަދަކޮށް އަދި އަމިއްލަ ފައިމައްޗަށް ތެދުވެ އުޅުމަށް އެހީތެރިވެދޭނެ ކަމެކެވެ.