ވޭތުވެދިޔަ އެތައް އަހަރެއްގެ ތެރޭގައި، ހިތުގެ ބަލިތަކާ މެދު ކަންބޮޑުވާ މީހުން ބޭނުންކުރުން ރަނގަޅު ނޫން އެއްޗެއްގެ ގޮތުގައި ބިސް ވަނީ ލޭބަލްކުރެވިފައެވެ. ނަމަވެސް، މިހާރުގެ ހޯދުންތަކުން މިކަން މިގޮތަށް ސާބިތެއް ނުވެއެވެ. އެމެރިކާގެ 2025-2030 ގެ ކާނާގެ މިންގަނޑުތަކުގައި ކޮލެސްޓްރޯލް ބޭނުންކުރަންވީ ވަކި މިންވަރެއް ކަނޑައަޅާފައެއް ނުވެއެވެ. އޭގެ ބަދަލުގައި އިރުޝާދު ދީފައިވަނީ ދުވާލަކު ބޭނުންކުރާ ކެލޮރީގެ ތެރެއިން ސެޗުރޭޓަޑް ފެޓް ނުވަތަ ނުރައްކާތެރި ސަރުބީ ހުންނަ މިންވަރު 10 އިންސައްތައަށް ވުރެ ދަށްކުރުމަށެވެ. އަދި ބިހަކީ ބޭނުންކުރުމަށް ރަނގަޅު ޕްރޮޓީންގެ ބާވަތެއްގެ ގޮތުގައި މިހާރު ވަނީ ހިމަނާފައެވެ.
2025 ވަނަ އަހަރުގެ ޖުލައި މަހު އެމެރިކަން ޖާނަލް އޮފް ކްލިނިކަލް ނިއުޓްރިޝަންގައި ޝާއިޢުކުރި ދިރާސާއަކުން މިކަމަށް އިތުރު ބާރެއް ލިބިގެންދިޔައެވެ. އޮސްޓްރޭލިއާގެ ދިރާސާވެރިން، އެލް.ޑީ.އެލް (ނުރައްކާތެރި ކޮލެސްޓްރޯލް) މަތި 48 މީހުން ބޭނުންކޮށްގެން ކުރި މި ދިރާސާއިން އެނގުނު ގޮތުގައި، ކޮލެސްޓްރޯލް މަތިވަނީ ބޭނުންކުރާ ސެޗުރޭޓަޑް ފެޓްގެ ސަބަބުންނެވެ. ބިހުން ލިބޭ ކޮލެސްޓްރޯލްގެ ސަބަބަކުން ނޫނެވެ.
ދިރާސާއިން ފާހަގަވި މުހިންމު ކަންތައްތައް
ސެޗުރޭޓަޑް ފެޓް މަދު ކާނާއާ އެކު ދުވާލަކު ދެ ބިސް ކެއި މީހުންގެ އެލް.ޑީ.އެލް ކޮލެސްޓްރޯލް، ހަފުތާއަކު އެންމެ ބިހެއް ކެއި ނަމަވެސް ގިނައިން ސެޗުރޭޓަޑް ފެޓް ހިމެނޭ ކާނާ ބޭނުންކުރި މީހުންނަށް ވުރެ ދަށްވިކަން ފާހަގަކުރެވުނެވެ. މީގެ މާނައަކީ ލޭގެ ކޮލެސްޓްރޯލް މަތިކުރަނީ ކާނާގައި ހުންނަ ކޮލެސްޓްރޯލަށް ވުރެ ބޮޑަށް އޭގައި ހުންނަ ނުރައްކާތެރި ސަރުބީ ނުވަތަ ސެޗުރޭޓަޑް ފެޓް ކަމެވެ.
މި ދިރާސާއަށް ޚަރަދުކޮށްފައިވަނީ އެގް ނިއުޓްރިޝަން ސެންޓަރުން ކަމުގައި ވިޔަސް، މި ހޯދުންތަކަކީ ކުރީގެ ދިރާސާތަކާ ވެސް އެއްގޮތް ހޯދުންތަކެކެވެ. ހާވަޑް ހެލްތުން 2025 ނޮވެމްބަރުގައި ޝާއިޢުކުރި ރިޕޯޓެއްގައި ވެސް ބަޔާންކޮށްފައިވަނީ، ހަށިގަނޑުގައި ކޮލެސްޓްރޯލް އުފެއްދުން އިތުރުވަނީ ކާނާގައި ހުންނަ ކޮލެސްޓްރޯލްގެ ސަބަބުން ނޫން ކަމަށާއި، އެއީ ކާނާގައި ހިމެނޭ ސެޗުރޭޓަޑް ފެޓް އަދި ޓްރާންސް ފެޓްގެ ސަބަބުން ކަމަށެވެ.
ބިހާއެކު ކެވޭ އެހެނިހެން ބާވަތްތަކުގެ މުހިންމުކަން
ބޮޑު ބިހެއްގައި ގާތްގަނޑަކަށް 1.5 ގްރާމް ސެޗުރޭޓަޑް ފެޓް، 6 ގްރާމް ޕްރޮޓީން އަދި ހަށިގަނޑަށް ފައިދާހުރި މާއްދާތައް ކަމަށްވާ ކޯލިން، ލޫޓީން އަދި ވިޓަމިން-ޑީ ހިމެނެއެވެ.
ހިތަށް ގެއްލުން ލިބެނީ ބިހުގެ ސަބަބުންނަށް ވުރެ ބޮޑަށް، ބިހާއެކު ކެއުމުގައި ބޭނުންކުރާ ތަކެތީގެ ސަބަބުންނެވެ. ބޭކަން، ސޮސެޖް، ބަޓަރު، ޗީޒް ފަދަ ތަކެއްޗަކީ ސެޗުރޭޓަޑް ފެޓް ގިނަ ތަކެއްޗެވެ. އެލް.ޑީ.އެލް ކޮލެސްޓްރޯލް މަތިކުރުވަނީ ބިހުގެ ބަދަލުގައި މިދެންނެވި ތަކެތީގެ ސަބަބުންނެވެ.
ބޭނުންކުރުން އެންމެ ރަނގަޅު މިންވަރު
ޢާންމުކޮށް ޞިއްޙަތު ސަލާމަތުން ހުރި މީހަކު ދުވާލަކު ބިހެއް ކެއުމަކީ މިހާރުގެ އިރުޝާދުތަކުން ހުއްދަކުރާ ކަމެކެވެ.
އެމެރިކަން ހާޓް އެސޯސިއޭޝަނުން ލަފާދެނީ ހިތުގެ ބަލި ނެތް މީހުން ދުވާލަކު ބިހެއް ކެއުމަށެވެ. އަދި ހިތުގެ ބަލި ހުންނަ ނުވަތަ ކޮލެސްޓްރޯލް މަތި މީހުން ހަފުތާއަކު ގާތްގަނޑަކަށް ހަތަރު ބިހުގެ ގޮބޮޅި ބޭނުންކުރުމަށެވެ. ނަމަވެސް ބިސް ކެވޭ މިންވަރު ކަނޑައަޅަންވާނީ އެ ދުވަހަކު ކެވޭ އެހެނިހެން ސެޗުރޭޓަޑް ފެޓް ހިމެނޭ ބާވަތްތަކަށް ބަލައިގެންނެވެ.
ޚާއްޞަ ސަމާލުކަން ދޭންޖެހޭ ފަރާތްތައް
މި އިރުޝާދުތަކަކީ އެންމެންނަށް އެއްގޮތަށް އޮތް ކަމެއް ނޫނެވެ. ޓައިޕް-2 ހަކުރުބަލި ހުންނަ މީހުން ގިނައިން ބިސް ކެއުމުން ހިތުގެ ބަލިތަކަށް ކުރާ އަސަރު ތަފާތުވެދާނެއެވެ.
އަދި އާއިލީ ގޮތުން ކޮލެސްޓްރޯލް މަތިވުމުގެ މައްސަލަ ހުންނަ މީހުން، ކާނާގައި ހުންނަ ކޮލެސްޓްރޯލަށް މާ އަވަހަށް އަސަރުކުރެއެވެ. އެހެންކަމުން، މިފަދަ ބަލިތައް ހުންނަ މީހުންނާއި ކޮލެސްޓްރޯލް ދަށްކުރާ ބޭސް ބޭނުންކުރާ މީހުން، ބިސް ބޭނުންކުރާނެ މިންވަރާ ބެހޭގޮތުން ޑޮކްޓަރެއްގެ ލަފާ ހޯދަންވާނެއެވެ.
ޚުލާޞާއަކީ، ކުރިން ދެމުން އައި އިންޒާރުތަކާ ޚިލާފަށް ބިހަކީ ޢާންމުކޮށް ކެއުމުގައި ބޭނުންކުރެވިދާނެ ރަނގަޅު އެއްޗެއް ކަމެވެ. ނަމަވެސް ބިހާއެކު ކާން ބޭނުންކުރާ ބޭކަން ފަދަ ސަރުބީ ގިނަ ތަކެއްޗާ މެދު ސަމާލުވުން މާ މުހިންމެވެ.
