ސްކްރީނުން ފެންނަ އަންހެންމީހާ
ސްކްރީނުތަކުގެ ފަހަތުގައި އިން މީހާ ހިނިތުންވެލިއެވެ. އެއީ ފުޅާ އަދި ހައިރާންކަމެއް އެކުލެވިގެންވާ ހިނިތުންވުމެއް ނޫނެވެ. އެއީ ކަންތައްތަކެއް ރޭވިފައިވާ ގޮތަށް، އުންމީދު ނުކުރާ ފަދަ ފުރިހަމަކަމާއެކު ކަންކަން ހަމަޖެހުމުން، ހިތްހަމަޖެހިފައި ހުރި މީހެއްގެ މޫނުމަތިން ފެންނާނެ ފަދަ ލަސްލަސް ހިނިތުންވުމެކެވެ.
އޭނާ އިން ކޮޓަރި އޮތީ އަނދިރިކޮށެވެ. މުޅި ކޮޓަރި އުޖާލާވެފައިވަނީ ފާރުގައި ހަރުކޮށްފައިވާ މޮނީޓަރުތަކުގެ ފިނި އަލިންނެވެ. ތަފާތު އެންގަލްތަކުން ފެންނަ ކެމެރާތަކުން ދައްކަނީ ބާވެފައިވާ ގުދަނުގެ އެކި ބައިތަކެވެ. ވަންނަ ދޮރާއި، ހަނި ގޯޅިތަކާއި، ގުދަންކުރާ ކޮޓަރިތަކާއި، މުދާ އަރުވާ ބާލާ ސަރަހައްދާއި، ދަބަރު ޖަހާފައިވާ ދަގަނޑު ދޮރުތަކެވެ. އަދި އެންމެ ފާހަގަކޮށްލެވޭ ގޮތަކަށް ފެންނަނީ ކިޔާރާ ބަންދުކޮށްފައި ބެހެއްޓި ކޮޓަރިއެވެ.
އޭނާ ހުރިހާ ކަމެއް ބަލަމުން ދިޔައެވެ. ކޮންމެ ސިކުންތެއްމެއެވެ. އޭނާ ހޭލި ވަގުތެވެ. ހާސްވެގަތުމުގެ ބަދަލުގައި، ހިމޭނުން އޮތް ގޮތެވެ. އޭނާ އަޑުތަކަށް ސަމާލުކަން ދިން ގޮތެވެ. ކަންކަން ދެނެގަތް ގޮތެވެ. ކަންކަން ގުނަމުން ދިޔަ ގޮތެވެ. އޭނާ އޮތް ތަނެއް ނޭނގޭއިރުވެސް، އެތަނުގައި ތިބި ތިން ފިރިހެނުންގެ އަޑު ވަކިކުރަން އޭނާ ދެނެގަތް ގޮތެވެ. އަދި އެއަށްފަހު.. ސަލާމަތްވި ގޮތެވެ.
އެންމެ ނިޔަފަތި ފައިލެއް ބޭނުންކޮށްގެން އޭނާ ބަނދެފައިވާ ވާތައް މޮހާލި ވަގުތު، ސްކްރީން ދޮށުގައި އިން މީހާ ހިނިއައެވެ. އެ ފިރިހެނުންނަށް އޭނާގެ ފެންވަރު ވަޒަން ކުރެވުނީ ވަރަށް ކުޑަކޮށެވެ. ވަރަށް ބޮޑަށްވެސް އޮޅުނީއެވެ. ނަމަވެސް އޭނާ އެންމެ ބޮޑަށް ހައިރާންކުރުވީ އޭގެ ފަހުން ކަންތައް ވީގޮތެވެ.
އޭނާ ހަޅޭކެއް ނުލަވައެވެ. ބިރުން ފިލާކަށް ނުދުވެއެވެ. ބިރުގަނެގެން ހިތްވަރު އެލުވައެއް ނުލައެވެ. އޭނާ އެ ގުދަނުގެ ތެރޭގައި ހިނގަމުން ދިޔައީ ވަރަށް ފަރުވާތެރިކަމާއެކުގައެވެ. މަސްލަހަތު ވަޒަންކުރަމުންނެވެ. އަދި އެމީހުންނާ ކުރިމަތިލާން ޖެހުމުން، ބޮޑު ތިން ފިރިހެނުން ނުކުޅެދޭ މީހުންގެ ގޮތުގައި ބިންމައްޗަށް އުކާލިއެވެ.
މިހާރު އޭނާ އެއިނީ ބޭރުގައި މުދާ ބާލާ ސަރަހައްދުގައި ވަރަށް ހަމަޖެހިލައިގެން، އެމީހުންގެ ފޯނެއް ބޭނުންކޮށްގެން ފުލުހުންނަށް ގުޅާށެވެ. ސްކްރީނުތަކުގެ ފަހަތުގައި އިން މީހާ ގޮނޑީގައި ލެނގިލިއެވެ.
“ޝައުޤުވެރި ކަމެއް.”
އޭނާގެ ދެލޯ ހުއްޓިފައި ހުރީ ކިޔާރާގެ ތަަސްވީރަށެވެ. މި އަންހެންމީހާގެ ކިބައިގައި ދޫކޮށްލަން އުނދަގޫ ސިފަތަކެއް ހުއްޓެވެ. އޭނާއަކީ ހީކުރި ފަދަ މީހެއް ނޫނެވެ. ބަލިކަށި މީހެއް ނޫނެވެ. ފިނޑި މީހެއް ނޫނެވެ. ފަސޭހައިން ބިރުގަންނުވައި ހައްލާލެވޭނެ މީހެއް ނޫނެވެ. އަދި ހަމަ ޔަގީނުންވެސް އެހީތެރިކަމެއް ނެތް ނިކަމެތި މީހެއް ނޫނެވެ. އޭނާގެ ކިބައިގައި އެހެން ކަމެއް އެބަހުއްޓެވެ. މަދު މީހަކަށް ނޫނީ ލިބިފައި ނުވާ ފަދަ ކަމެކެވެ. އެއީ ފޮތަކުން ނުވަތަ ތަމްރީނަކުން ލިބޭނެ ފަދަ ކަމެއް ނޫނެވެ. އެއީ އޭނާގެ ތަބީއަތުގައި ހުރި ޤާބިލިއްޔަތެކެވެ.
ފިޔަވަޅެއް އެޅުމުގެ ކުރިން އޭނާ ކަންކަން ދިރާސާކުރެއެވެ. އަތުގައި އޮތް އެއްޗެއްގެ ބޭނުން އެންމެ ފުރިހަމައަށް ހިފައެވެ. ހާލަތަށް ހޭނެއެވެ. ބިރުގަނެފައި ހުރި ނަމަވެސްމެއެވެ. އެކަނިވެފައި ހުރި ނަމަވެސްމެއެވެ. ބިރުދައްކަން ތިބި ބައެއްގެ މެދުގައި ހުރި ނަމަވެސްމެއެވެ. އޭނާ ވަނީ ކޮންމެވެސް ގޮތަކުން މުޅި ހާލަތު އޭނާގެ ބާރުގެ ދަށަށް ގެނެސްފައެވެ. އަދި މިހާރު އޭނާ އެ ގުދަނުގެ ބޭރުގައި އެ އިނީ ކޮފީއަކަށް އަރައި އިން މީހަކު ފަދަ ހަމަޖެހުމެއްގައެވެ.
އެ މީހާ އަލުން ހިނިތުންވެލިއެވެ. “މިހާރު އަހަންނަށް ވިސްނިއްޖެ.”
އޭނާ އެހެން ސްކްރީނަކަށް ބަލާލިއެވެ. އެއީ ޒިމާންގެ ފޮޓޯއެކެވެ. ދެން އަނެއްކާވެސް ކިޔާރާއަށް ބަލާލިއެވެ.
“ކަލެއަށް ފެނުނީ މިއީތާ.”
މިހާރު އޭނާއަށް ވިސްނިއްޖެއެވެ. ޒިމާން އެހާ ބޮޑަށް މި އަންހެންކުއްޖާއަށް ސަމާލުކަން ދޭން ފެށި ސަބަބު މިހާރު އެނގިއްޖެއެވެ. އަބަދުވެސް އަމިއްލަ ނަފުސު ކޮންޓްރޯލްކޮށްގެން އުޅޭ ޒިމާން، އޭނާގެ އާދަކާދައާ ނުގުޅޭ ނިންމުންތައް ނިންމަން ފެށި ސަބަބުވެސް އެނގިއްޖެއެވެ.
މާ ފޮނުވަން ފެށީ ކީއްވެގެން ކަމެވެ. އަމިއްލަ ކާރު ފޮނުވީ ކީއްވެގެން ކަމެވެ. ޒިމާން އަމިއްލައަށް އޭނާގެ އިންތިޒާރުގައި ހުރީ ކީއްވެގެން ކަމެވެ. އެ ހުރިހާ ސުވާލެއްގެ ޖަވާބު އެހެރީ ސްކްރީނުން ފެންނާށެވެ. އެއީ ކިޔާރާއެވެ. އޭނާގެ ކިބައިގައި ހިތް ދަމައިގަންނަ ފަދަ ތަފާތު ސިފައެއް ހުއްޓެވެ. އެއީ ހަމައެކަނި އާދައިގެ ރީތިކަމެއް ނޫނެވެ. އެއީ ފައިސާއަށް ގަނެވޭނެ ފަދަ ނުވަތަ އަތްމަތިން ފަސޭހައިން ފެންނަ ރީތިކަމެއް ނޫނެވެ. އެއީ ބަޔާންކުރަން އުނދަގޫ ކަމެކެވެ.
މަޑުމައިތިރިކަމުގެ ތެރޭގައި ފޮރުވިފައިވާ ވަރުގަދަ ހިތްވަރެކެވެ. އޭނާއަކީ ބަލިކަށިނުވެ، ނިކަމެތިކަން ދައްކާލެވިދާނެ އަންހެނެކެވެ. އޭނާއަކީ ބާރު ކަނޑުވައިނުލައި، ބިރުވެރިކަމާ ކުރިމަތިލެވިދާނެ އަންހެނެކެވެ. އޭނާގެ ކިބައިގައި ހުރި ޝައުޤުވެރިކަމާމެދު އޭނާ އަމިއްލައަށްވެސް ޣާފިލުވެފައިވާ ކަހަލައެވެ.
އޭނާގެ ހެދުން ރީތިކޮށްލި ތަން އެ މީހާ ބަލަން އިނެވެ. އިސްތަށިގަނޑު ރީތިކޮށްލިއެވެ. ވަށައިގެން ބަލާލިއެވެ. ދެން އިށީނެވެ. ހާސްކަމެއް ނެތެވެ. އުނދަގުލެއް ނެތެވެ. އޮތީ ހަމައެކަނި ކެތްތެރިކަމެވެ. ސްކްރީނުތަކުގެ ފަހަތުގައި އިން މީހާ ކުރިއަށް ޖެހިލިއެވެ.
“ކިޔާރާ، ކަލެއަކީ ހާދަ ތަފާތު މީހެކޭ.”
އޭނާގެ މޫނުމަތިން ހިނިތުންވުން ފިލައިދިޔައެވެ. އަދި ފުރަތަމަ ފަހަރަށް އޭނާގެ މޫނުމަތިން ފުން ވިސްނުމެއްގެ އަސަރު ފެނުނެވެ.
“ޒިމާންގެ ހަމަޖެހުން ނަގާލެވޭނެ ފަދަ މީހަކު އޭނާއަށް ފެނިފައިވާނަމަ..”
އޭނާ ޒިމާންގެ ފޮޓޯ ހުރި ސްކްރީނަށް ބަލާލިއެވެ.
“އެހެންވީމާ މިއީ އަހަރެން ހީކުރި ވަރަށްވުރެ މާ ޝައުޤުވެރި ކަމެއް.”
*****
ކިޔާރާ އިރުގެ އަލީގެ ތެރެއަށް ނުކުތެވެ. އަލި ގަދަކަމުން އޭނާގެ ދެލޯ މަރާލެވުނެވެ. އަނދިރި ގުދަނެއްގައި އެތައް ގަޑިއިރެއް ހޭދަކުރުމަށްފަހު، އެ ގަދަ އަލިން ލޮލަށް އުނދަގޫވިއެވެ. އޭނާގެ އަތުން ލޯ ނިވާކޮށްލިއެވެ. އެއްވެސް ހަރަކާތެއް ނެތި ކުޑަ ވަގުތުކޮޅަކަށް ހުރެވުނެވެ. ބޭރު ދުނިޔެ ފެންނަނީ ވަރަށް އާދައިގެ ގޮތަކަށެވެ. މަގުމަތީގައި މީހުން ހިނގާބިނގާވެ އުޅެއެވެ. އުޅަނދުފަހަރު ދުއްވަމުން ދެއެވެ. ކައިރި ހިސާބަކުން ދޯންޏެއްގެ އިންޖީނުގެ އަޑު އިވެއެވެ. ފާލަން މަތިން މީހަކު އަނެކަކަށް ގޮވާ އަޑު އިވެއެވެ. މަސައްކަތު މީހުންތަކެއް އުޅަނދަކަށް ފޮށިތަކެއް އަރުވަމުން ދިޔައެވެ. ކަނޑުގެ ލޮނުވަހާއި، ތެލާއި، މަހުގެ ވަހުން މާލޭގެ މެންދުރުފަހުގެ ހޫނުވައި އެކުވެފައިވެއެވެ.
ކިޔާރާ މަޑުމަޑުން ވަށައިގެން ބަލައިލިއެވެ. އޭނާއަށް މިތަން އެނގެއެވެ. އެ ގުދަން ހުރި ސީދާ ދިމާ ނޭނގުނަސް، މި ސަރަހައްދުގެ ފާލަންތަކަކީ އޭނާއަށް އާ ތަނެއް ނޫނެވެ. މި ކުރެވުނު އިޙުސާސާއެކު އޭނާގެ ހިތަށް ކޮންމެވެސް ވަރެއްގެ ހަމަޖެހުމެއް ލިބުނެވެ. އޭނާ އަލުން އެނބުރި ދުނިޔެއަށް އަތުވެއްޖެއެވެ. އަލުން މާލެއަށެވެ. އަލުން މީހުންގެ ތެރެއަށެވެ.
އޭނާ ފުން ނޭވާއެއްލިއެވެ. ދެން އަނެއްކާވެސް ފުން ނޭވާއެއްލިއެވެ. އެތައް އިރަކު ބަނދެފައި ބޭންދުމުގެ ސަބަބުން އޭނާގެ ފައިގައި އަދިވެސް ހުރީ ރިހުމެވެ. ބުރަކަށީގައި ހުރީ ގަދަ ވޭނެކެވެ. މޫނަށް ސްޕްރޭ ކުރި އެއްޗެއްގެ ސަބަބުން، ބޮލަށް އަދިވެސް ހުރީ ބަރުވެފައެވެ. އެކަމަކު އޭނާ އެހުރީ ކޮޅަށެވެ. މިނިވަންކަމުގައެވެ. ސަލާމަތުންނެވެ. އޭނާ އަމިއްލަ ނަފުސަށް ބަލާލިއެވެ. ހެދުން އޮތީ ބޮނޑިވެފައެވެ. ކާޑިގަންގައި ވަނީ ހިރަފުހެވެ. އިސްތަށިގަނޑު އޮތީ މުޅިން ހޭވިފައެވެ. އޭނާ ފޫހިވެފައި ހުރެ ފުން ނޭވާއެއް ދޫކޮށްލިއެވެ.
“ވަރަށް ރީތި.” އޭނާ މަޑުމަޑުން ބުނެލިއެވެ.
އޭނާގެ އަތްކުރީގައި ހުރި ހިރަފުސްތައް ފޮޅާލިއެވެ. ދެން ޖީބުތައް ޗެކްކޮށްލިއެވެ. ފޯނެއް ނެތެވެ. އެއީ އޭނާ އުންމީދު ކުރި ގޮތެވެ.
ނަމަވެސް އެމީހުންގެ އަތުން އޭނާ އަތުލި ފޯނުތަކުގެ މަތިން ހަނދާންވިއެވެ. އޭނާ ޖީބުން ފޯނެއް ނެގިއެވެ. އޭގެ ލޮކް ވަނީ ނެއްޓިފައެވެ. ކިޔާރާ ކުޑަ ވަގުތުކޮޅަކަށް ސްކްރީނަށް ބަލަން ހުއްޓެވެ. ދެން ފުލުހުންނަށް ގުޅިއެވެ. އޭނާގެ އަޑުގައި ހުރީ ހައިރާންވާ ފަދަ ހަމަޖެހުމެކެވެ. އޭނާ ހުރި ތަނުގެ މައުލޫމާތު ދިނެވެ. ގުދަނުގެ ސިފަތަކާއި، ފާލަމާއި، ކައިރީގައި ހުރި ފާހަގަކުރެވޭ ތަންތަނުގެ ވާހަކަ ބުންޏެވެ. އެތެރޭގައި ތިބި މީހުންގެ އަދަދު ކިޔައިދިނެވެ. އަދި ވަންނަ ދޮރު ހުރި ގޮތްވެސް އޮޅުންފިލުވައިދިނެވެ.
“އާދެ، އަޅުގަނޑު މިހުރީ ސަލާމަތުން.” އޮޕަރޭޓަރު ސުވާލުކުރުމުން އޭނާ ޖަވާބުދިނެވެ.
ކުޑަ ހިނދުކޮޅެއްގެ ހިމޭންކަމަށްފަހު، “ނޫން، އެމްބިއުލާންސެއް ބޭނުމެއް ނޫން.”
އަނެއްކާވެސް ކުޑަ ހިނދުކޮޅެއް، “ކުޑަ ވަގުތުކޮޅަކަށް ހޭނެތުނު. އެކަމަކު މިހާރު މިހުރީ ހޭލާ.”
އޭނާ ގުދަނާ ދިމާއަށް ބަލާލިއެވެ. “އާދެ. އެތެރޭގައި ތިން މީހުން ތިބޭނެ.”
އޭނާ ކުޑަކޮށް ފަސްޖެހިލިއެވެ. “އޭގެ ތެރެއިން އެކަކަށް ފަރުވާ ބޭނުންވެދާނެ.”
ދެން، އިތުރު މަޢުލޫމާތުތަކެއް ދިނުމަށްފަހު ފޯނު ބޭއްވިއެވެ. އަދި އިށީނެވެ. ހަމަ އެހާ ފަސޭހައިންނެވެ.
(ނުނިމޭ)
