ދުޅަހެޔޮ ސިއްޙަތެއްގައި ހުރުމަށްޓަކައި ހަށިގަނޑަށް ބޭނުންވާ މިންވަރަށް ފެން ބުއިމަކީ މުހިންމު ކަމެއް ނަމަވެސް، އާދައިގެ ފެނަށްވުރެ ބޮޑަށް ހަށިގަނޑު ހައިޑްރޭޓްކޮށްދޭ ބުއިންތަކެއް ހުންނަކަން ދާދިފަހުން ކުރި ދިރާސާއަކުން ހާމަވެއްޖެއެވެ. ވޯގް މަޖައްލާގައި ޝާއިއުކޮށްފައިވާ ރިޕޯޓެއްގައި ބަޔާންކޮށްފައިވާ ގޮތުގައި، އިނގިރޭސިވިލާތުގެ ލަފްބަރާ ޔުނިވަރސިޓީން ކުރިއަށްގެންދިޔަ މި ދިރާސާއިން ވަނީ ހަށިގަނޑުގައި ފެން ގިނައިރު ހިފަހައްޓައިދޭ 4 ބުއިމެއް ފާހަގަކޮށްފައެވެ.
މި ދިރާސާގެ މައިގަނޑު މަޤުސަދަކީ އެކި ބާވަތުގެ ބުއިންތަކުން އިންސާނާގެ ހަށިގަނޑަށް ކުރާ އަސަރު ދެނެގަތުމެވެ. އެގޮތުން، އެންމެ ފުރިހަމައަށް ހައިޑްރޭޓްކޮށްދޭ ކަމަށް ދެއްކި 4 ބުއިމަކީ:
1 – ކިރު (ފެޓް މަދު އަދި ފުލް ކްރީމް ކިރު): ކިރުގައި ހިމެނޭ އިލެކްޓްރޯލައިޓްސް، ލެކްޓޯޒް (ހަކުރުގެ ބާވަތެއް)، އަދި ޕްރޮޓީންގެ ސަބަބުން، ބަނޑުގައި ކާނާ ހަޖަމުވުމުގެ ސްޕީޑް ލަސްކޮށްދެއެވެ. މީގެ ސަބަބުން ހަށިގަނޑުން ފެން ބޭރުވުން ލަސްވެ، ގިނަ ވަގުތު ހައިޑްރޭޓްވެފައި ހުރެއެވެ.
2 – އޯރަލް ރީހައިޑްރޭޝަން ސޮލިއުޝަން (އޯ.އާރު.އެސް): މިއީ މަދު މިންވަރަކަށް ހަކުރާއި، ލޮނު، ޕޮޓޭސިއަމް އަދި ސޯޑިއަމް އެކުލެވޭ ބުއިމެކެވެ. މިއީ ހަށިގަނޑުގެ ސެލްތަކަށް އަވަހަށް ފެން ދަމައިގަތުމަށް އެހީތެރިވެދޭ އެއްޗެކެވެ.
3 – އޮރެންޖު ޖޫސް: މި ބުއިމުގައި ހިމެނޭ ޕޮޓޭސިއަމް އަދި ކާބޯހައިޑްރޭޓްސްގެ ސަބަބުން ހަށިގަނޑުގައި ގިނައިރު ފެން ހިފަހައްޓައިދެއެވެ.
4 – ކާށި ފެން (ކުރުނބާ ފެން): އިލެކްޓްރޯލައިޓްސް މުއްސަނދި މި ބުއިމަކީ ކުޅިވަރު ކުޅޭ މީހުންނަށާއި، ހޫނު ގަދަ މާހައުލުތަކުގައި އުޅޭ ފަރާތްތަކަށް ވަރަށް ފައިދާހުރި ބުއިމެކެވެ.
ދިރާސާ ކުރި ޓީމުން ފާހަގަކުރި ގޮތުގައި، އާދައިގެ ފެނަކީ ހަށިގަނޑަށް ނުހަނު މުހިންމު އެއްޗަކަށް ވީނަމަވެސް، ފެން އެކަނި ބުއިމުން ކުޑަކަމުދާ އެއްޗެހީގެ ޒަރީއާއިން އަވަހަށް ހަށިގަނޑުން ބޭރުވެއެވެ. ނަމަވެސް، ކުޑަ މިންވަރަކަށް ކާބޯހައިޑްރޭޓްސް، ފެޓް ނުވަތަ ޕްރޮޓީން އެކުލެވޭ ބުއިންތަކުގެ ސަބަބުން، ހަށިގަނޑުގެ ތެރޭގައި ފެން ހުންނަ މުއްދަތު އިތުރުވެގެންދެއެވެ.
އެހެންކަމުން، ޚާއްސަކޮށް ހޫނުގަދަ މޫސުމުގައާއި ކަސްރަތު ކުރުމަށްފަހު ވަރުބަލިކަން ފިލުވައިލުމަށް، ފެނުގެ އިތުރުން މިފަދަ ބުއިންތައް ބޭނުންކުރުމަކީ ހަށިގަނޑުގެ ހައިޑްރޭޝަން އެންމެ އެދެވޭ މިންވަރެއްގައި ބެހެއްޓުމަށް އެހީތެރިވެދޭނެ ކަމެކެވެ.
