ކެއުން ހުއްޓާލަންވީ ވަކި ޚާއްސަ ގަޑިއެއް ނެތެވެ. އަދި ޒުވާންކަންމަތީ ބަހައްޓައިދޭނެ ވަކި ޖާދުވީ ކާނާއެއްވެސް ނެތެވެ. މީގައި އޮތީ ހަމައެކަނި ދިރިއުޅުމުގައި ހަރުލާފައިވާ އާދަތަކެވެ.
އަހަރެމެންގެ އުމުރުން ދުވަސްވަމުންދާ ވަރަކަށް، ޒުވާންކަން ދެމެހެއްޓުމަށްޓަކައި އަމަލުކުރަންވީ އާ ޤަވާއިދުތަކެއް ކޮންމެ ހަފުތާއަކުހެން އިންޓަނެޓުން ފެންނަން ހުރެއެވެ. އިރުއޮއްސި 6 ގެ ފަހުން ނުކެއުމަށާއި، ރޭގަނޑު 8 ޖަހާއިރު ކެއުން ހުއްޓާލުމަށާއި، ކާބޯހައިޑްރޭޓްސް މަދުކުރުމަށާއި، ހެނދުނުގެ ނާސްތާގެ ކުރިން ވަކި އެއްޗެއް ބުއިމަށާއި، ނިދުމުގެ ކުރިން ވަކި އެއްޗެއް ބޭނުންކުރުމަށް އިރުޝާދުދެއެވެ. ހީވާގޮތުންނަމަ، އުމުރުން ދުވަސްވުމަކީ ފުރިހަމަ ތާވަލަކާއި ގިނަގުނަ ހިސާބުތަކެއް ބަލަންޖެހޭ ކަމެކެވެ. ނަމަވެސް، ދުޅަހެޔޮކަމާއެކު އުމުރުން ދުވަސްވުމަކީ މިއަށްވުރެ މާ ސާދާ ކަމެކެވެ.
މިއީ ހަމައެކަނި ފުރިހަމަ އެންމެ ޤަވާއިދަކަށް ތަބާވުމެއް ނޫނެވެ. ނުވަތަ އުމުރު ފަހަތަށް ޖައްސައިދޭނެ ޖާދުވީ ކާނާއެއް ހޯދުމެއްވެސް ނޫނެވެ. މީގެ އަސްލަކީ އަހަރެމެން ތަކުރާރުކޮށް ކުރާ އާދައިގެ ކަންތައްތަކެވެ. މިކަންކަމީ އާދައިގެ ކަންތައްތަކަށް ވާތީ، ގިނަ ފަހަރަށް މީގެ މުހިންމުކަން އަހަރެމެންނަށް ވަޒަންނުކުރެވެނީއެވެ.
މޭވާއާއި، ތަރުކާރީއާއި، ގޮދަނުގެ ބާވަތްތަކާއި، ސިއްޙަތަށް ފައިދާހުރި ތެލާއި، އެކަށީގެންވާ މިންވަރަށް ޕްރޮޓީން ހިމެނޭ، ބަދަލުތައް ގެނެސްފައިވާ ކާނާ މަދު ހަމަހަމަ ކެއުމަކީ އުމުރުން ދުވަސްވާއިރު ހަށިގަނޑަށް ބޭނުންވާ އެހީތެރިކަން ފޯރުކޮށްދޭނެ ކަމެކެވެ. މަސްތައް ވަރުގަދަކޮށް ބެހެއްޓުމަށް ޕްރޮޓީން މުހިންމުވާއިރު، ތަފާތު ބާވަތްތައް ހިމެނޭ ކެއުމަކުން ހިތާއި، ސިކުނޑިއާއި، ކަށިތަކުގެ ދުޅަހެޔޮކަމަށް ބޭނުންވާ ނިއުޓްރިއަންޓްސް ލިބިދެއެވެ. ހަމައެއާއެކު، ގިނަ އަދަދަކަށް ހަކުރު އެކުލެވޭ ކާނާއާއި އާޓިފިޝަލްކޮށް ތައްޔާރުކޮށްފައިވާ ކާނާ ބޭނުންކުރުމަކީ ދުޅަހެޔޮ ކެއުމެއް ދެމެހެއްޓުމަށް ހުރަސްއެޅޭ ކަމެކެވެ.
ދެން އޮތީ ހަށިގަނޑު ހަރަކާތްތެރިކޮށް ބެހެއްޓުމެވެ. ޖިމްތަކުގައި ބުރަ ކަސްރަތުތަކެއް ނުވަތަ މީސްމީޑިއާގައި ފެންނަ ވަރުގަދަ ޕްރޮގްރާމްތަކެއް ފުރިހަމަކުރުން މަޖުބޫރެއް ނޫނެވެ. ހިނގުމާއި، ފަތަން ދިއުމާއި، ނެށުމާއި، މަސްތައް ވަރުގަދަކުރުމުގެ ކަސްރަތުތަކާއި، ގައިދެމުން ފަދަ ތިމާއަށް ކުރިއަށް ގެންދެވޭނެ ކޮންމެ ހަރަކާތަކީވެސް ފައިދާހުރި ކަމެކެވެ. ޤަވާއިދުން ހަރަކާތްތެރިވެ އުޅުމަކީ ހިތުގެ ދުޅަހެޔޮކަމަށާއި، މަސްތަކުގެ ވަރުގަދަކަމަށާއި، ހަށިގަނޑުގެ ބެލެންސް ހިފެހެއްޓުމަށް އެހީތެރިވެދޭ ކަމެކެވެ. މިއީ އުމުރުން ދުވަސްވާ ވަރަކަށް އޭގެ ބޭނުންތެރިކަން ބޮޑުވާނެ ކަންކަމެވެ.
ނިދުމަކީވެސް ހަމަ އެހާ މުހިންމު ކަމެކެވެ. ފެންވަރު ރަނގަޅު، އެކަށީގެންވާ ނިދި ލިބުމަކީ މީހާގެ މޫޑަށާއި، ވިސްނުމަށާއި، ހަށިގަނޑުގެ މެޓަބޮލިޒަމަށް ފައިދާކުރާ ކަމެކެވެ. އަދި ހަށިގަނޑަށް ބޭނުންވާ މިންވަރަށް ފެން ބުއިމަކީ ގުނަވަންތަކުގެ މަސައްކަތްތައް ރަނގަޅަށް ހިނގުމަށް ބޭނުންތެރި ކަމެކެވެ.
ދެން އޮތީ “ވަކި ގަޑިއެއްގެ ފަހުން ނުކެއުމުގެ” މަޝްހޫރު ޤަވާއިދެވެ. ގިނަ މީހުންނަށް، ކާނާއަކީ ސިއްޙަތަށް ނުރައްކާތެރި އެއްޗަކަށް ބަދަލުވާނެ ވަކި ކަނޑައެޅިފައިވާ ގަޑިއެއް ނޯވެއެވެ. ކާ ގަޑިތައް ބިނާވަނީ ތިމާގެ ދިރިއުޅުމުގެ ތަރުތީބަށާއި، ބަނޑުހައިވާ މިންވަރަށާއި، ސިއްޙީ ބޭނުންތަކަށާއި، ބޭނުންކުރާ ބޭސްތަކުގެ މައްޗަށެވެ. މުހިންމީ ކެއުމުގެ ފެންވަރާއި މިންވަރެވެ. އަދި އެއީ ތިމާއަށް ދާއިމީކޮށް ކުރިއަށް ގެންދެވޭނެ ގޮތެއްތޯ ބެލުމެވެ.
އެހެންކަމުން، ދުޅަހެޔޮކަމާއެކު އުމުރުން ދުވަސްވުމަކީ އުމުރުން ދުވަސްވާތީ އަމިއްލަ ނަފްސަށް އަދަބު ދިނުމެއް ނޫނެވެ. އޭގެ ބަދަލުގައި، މިއީ ތިމާ ދަމަހައްޓަން ބޭނުންވާ ކަންކަން ހިމާޔަތްކުރުމެވެ. އެއީ ތިމާގެ ހަކަތައާއި، ހަރަކާތްތެރިކަމާއި، ހިތުގެ ދުޅަހެޔޮކަމާއި، ސިކުނޑީގެ މަސައްކަތާއި، މިނިވަންކަމެވެ.
ކޮންމެހެން އެންމެ ފުރިހަމަ ކެއުމެއް ކާކަށް ނުޖެހެއެވެ. ނުވަތަ އެންމެ ފުރިހަމަ ކަސްރަތެއް ކުރާކަށްވެސް ނުޖެހެއެވެ. ކޮންމެ ކެއުމަކީ ނިއުޓްރިޝަންގެ އިމްތިހާނަކަށް ހަދާކަށްވެސް ނުޖެހެއެވެ. ބޭނުންވަނީ ހަމައެކަނި ސިއްޙަތަށް ފައިދާހުރި ގޮތްތައް އިޚްތިޔާރުކުރުމެވެ. އެއީ ތިމާގެ ދިރިއުޅުމުގެ ބަޔަކަށް ވާވަރަށެވެ.
ރޭގަނޑުގެ ކެއުމަށް ތަރުކާރީކޮޅެއް އިތުރުކޮށްލުމެވެ. އިށީނދެގެން އިތުރު ގަޑިއެއް ހޭދަކުރުމުގެ ބަދަލުގައި ހިނގާލަން ދިއުމެވެ. މަސްތަކަށް އެހީވުމަށް ޕްރޮޓީން ބޭނުންކުރުމެވެ. ފޮަނި ބުއިންތަކުގެ ބަދަލުގައި ފެން ބުއިމެވެ. ދުވާލުގެ ބައެއްގެ ގޮތުގައި މެންދަމު ހޭލާ ހުރުމުގެ ބަދަލުގައި ނިދަން ދިއުމެވެ.
މިއަދު މި ކުރެވޭ ކުދިކުދި ކަންތައްތަކުން ބޮޑު ބަދަލެއް ނުފެނިދާނެއެވެ. ނަމަވެސް މީގެ އަސްލު ފައިދާ ފެންނާނީ އަހަރުތަކަކަށް މިކަންކަން ތަކުރާރުވުމުންނެވެ. އުމުރުން ދުވަސްވުމަކީ އުފަންދުވަހެއް އައުމުން ތިމާ ފޭލްވާ ކަމެއް ނޫނެވެ. އެއީ ރަނގަޅަށް ކުރަން ދަސްކުރެވިދާނެ ކަމެކެވެ. ފަހަރުގައި އަހަރެމެންގެ މަޤުސަދަކީ އަބަދު ވިހި އަހަރުގެ ކުއްޖެއްގެ ސިފަ ހުރުމެއް ނޫނެވެ. އަސްލު މަޤުސަދަކީ، އަންނަން އޮތް ދިހަ އަހަރާ ކުރިމަތިލާއިރު، އެ ދިހަ އަހަރުގެ އުފާ ހޯދޭނެހާ ދުޅަހެޔޮކަމާއި، އެ ދިހަ އަހަރު ދިރިއުޅެވޭނެހާ ވަރުގަދަކަމާއި، އިންޓަނެޓުން ފެންނަ ކޮންމެ އާ ޤަވާއިދަކަށް އިތުބާރު ނުކުރާހާ ބުއްދިވެރިކަން ހުރުމެވެ.
