މާލެއަށް ވާރޭ ވެހެން ފެށިތާ ގާތްގަނޑަކަށް ގަޑިއިރެއް ވީތަނާ، އައިޝަތު ރާޔާއަށް އޭނާގެ ތިން އަހަރުގެ އަންހެން ދަރިފުޅު އޭނާގެ އަޑަށް އިޖާބަ ނުދޭކަން ފާހަގަކުރެވުނެވެ. އެއީ ސެޕްޓެމްބަރު މަހުގެ ބޯ ވާރޭގެ ތެރެއިން ރޭގަނޑުގެ ވަގުތެވެ. މަގުބައްތިތަކުގެ އަލީގައި ހަނި މަގުތައް ފެންނަނީ ވަރަށް އޮމާންކޮށް، ބަބުޅާފައެވެ. ސައިކަލުތައް މަޑުމަޑުން ފެންގަނޑުތަކުގެ ތެރެއިން ދުއްވަމުން ދިޔައިރު، ފުރާޅުތަކާއި ބެލްކަނީތަކަށް ވާރޭ އޮއްސާލާ އަޑު މުޅި މާހައުލުގައި ގުގުމަމުން ދިޔައެވެ.
ހުން މަޑުވެދާނެ ކަމަށް އަމިއްލަ ނަފްސަށް ވިސްނައިދޭން ރާޔާ ވަރަށް މަސައްކަތް ކުރިއެވެ. އެރޭ ކުރިން ކްލިނިކުން ދިން ބޭސް ކުޑަ އިނާޔާއަށް ދީ، ތެތް ފޮތިކޮޅަކުން ނިތްކުރި ބޮނޑިތާންކޮށް، ތެތް ހެދުން ބަދަލުކޮށް، ހެންވޭރުގައި ހުރި އެމީހުންގެ ކުޑަ އެޕާޓްމަންޓްގައި ރާޔާ އޭނާގެ ދަރިފުޅު އަތްދަނޑިމަތީ ބާއްވައިގެން އިނެވެ. ނަމަވެސް ހުން ދިޔައީ ގަދަވަމުންނެވެ.
ދެން ފެށުނީ ނޭވާލާން އުނދަގޫވާށެވެ. ފުރަތަމަ ނޭވާލާލެއް އާދައިގެ ވަރަށްވުރެ ކުޑަކޮށް އަވަސްވީއެވެ. ނަމަވެސް މާގިނައިރުތަކެއް ނުވެ ބިރުގަންނަ ދަރަޖައަށް އެކަން ދިޔައެވެ. އިނާޔާގެ ކުޑަކުޑަ މޭމަތި ރާޔާގެ އަތުގައި ޖެހިގެން އޮވެ ވަރަށް ބާރަށް އަރާފައި ތިރިވަމުން ދިޔައެވެ. ކޮންމެ ނޭވާއެއް ލަނީ ވަރަށް ބޮޑު ހިތްވަރެއް ލައިގެންނެވެ.
“މަންމީ މިހުރީއޭ.” ދަރިފުޅުގެ ހޫނުވެފައިވާ ނިތްކުރީގައި ބޮސްދެމުން ރާޔާ މަޑުމަޑުން ބުންޏެވެ. “ބިރުނުގަނޭ ދަރިފުޅާ. މަންމީ މިދަނީ ހޮސްޕިޓަލަށް ދާން.”
ދަބަސް ހިފައިގެން، އިނާޔާ ޝޯލެއްގައި އޮޅާލައިގެން އަވަހަށް ތިރިއަށް ފޭބިއެވެ. އަވަށްޓެރިއަކު އެހީތެރިވާން އުޅުނު ނަމަވެސް ރާޔާ އެކަމަށް އިންކާރު ކުރިއެވެ. އެއްވެސް އެއްޗެއް ކިޔައިދޭނެ ވަގުތެއް ނެތެވެ. ބިރުގަންނާނެ ވަގުތެއްވެސް ނެތެވެ. އޭނާގެ ހުރިހާ ސަމާލުކަމެއް ހުރީ ހަމައެކަނި ދަރިފުޅަށެވެ.
ހޮސްޕިޓަލުގެ އިމަޖެންސީ ދޮރުމަތިން ނަރުހަކު ވަގުތުން އޭނާއާ ބައްދަލުކުރިއެވެ. “ކިހިނެއްވީ؟”
“ވަރަށް ބޮޑަށް ހުންގަދަވެފައި.. ނޭވާލާން އުނދަގޫވަނީ.” ރާޔާއަށް ބުނެވުނެވެ. “އޭނާގެ އުމުރަކީ ތިން އަހަރު.”
ނަރުސް ކުއްޖާއަށް ބަލާލުމަށްފަހު އެހީތެރިކަމަށް ގޮވާލިއެވެ. މަދު މިނެޓުކޮޅެއްގެ ތެރޭގައި ރާޔާ މެޑިކަލް ޓީމެއްގެ ފަހަތުން އަލިގަދަ ކޮރިޑޯއަކުން ހިނގާފައި ދިޔައެވެ. އޭނާގެ ތެތް ބުރުގާ މޫނުގައި ތަތްލާފައި ހުރިއިރު، ހިތް ބާރަށް ތެޅޭ އަޑު އޭނާއަށް އިވެމުން ދިޔައެވެ.
“ކަންބޮޑުނުވޭ، އަޅުގަނޑުމެން ވަގުތުން ބަލާލާނަން.” ނަރުސް ކުއްޖާ އޭނާއަށް ހިތްވަރު ދިނެވެ.
ރާޔާ ބޯޖަހާލި ނަމަވެސް، އޭނާގެ ހިތުގައި އުފެދިފައިވާ ބިރުވެރިކަން ކުޑައެއް ނުވިއެވެ. އެއަށްފަހު ނަރުސް ކުއްޖާ ބަލިމީހުން ބަލާ ކޮޓަރިއެއްގެ ދޮރު ހުޅުވާލިއެވެ.
“ޑރ. ޒައްޔާން ބައްލަވާލައްވާނެ.”
ރާޔާ ހުއްޓުނެވެ. އެ ނަމަކީ އޭނާއަށް އެއްވެސް މާނައެއް ހުރި ނަމެއް ނޫނެވެ. މަދުވެގެން، އޭނާގެ އަމިއްލަ ނަފްސަށް ބުނެދިނީ އެހެންނެވެ. ޒައްޔާން ކިޔާ ވަރަށް ގިނަ ޑޮކްޓަރުން އުޅޭނެއެވެ. އޭނާ އިސްދަށަށް ޖަހައިގެން އެތެރެއަށް ވަނެވެ. ބަލިމީހުން ބަލާ އެނދު ކައިރީގައި މީހަކު ހުރެގެން ޓެބްލެޓަކުން އެއްޗެއް ކިޔަނީއެވެ. އޭނާ ހުރީ ހުދު ކޯޓެއްގައެވެ. އަތްކުރި ވަނީ ރީތިކޮށް އޮޅާލާފައެވެ. ކަރުގައި ސްޓެތެސްކޯޕެއް އޮތެވެ.
އެމީހުން އެތެރެއަށް ވަނުމުން އޭނާ އެނބުރުނެވެ. އެވަގުތު ރާޔާ ނޭވާލާންވެސް ހަނދާން ނެތުނު ކަހަލައެވެ. މަދު ސިކުންތުކޮޅަކަށް މުޅި ދުނިޔެ ހިމޭންވިއެވެ. ވާރޭގެ އަޑެއް ނީވެއެވެ. ނަރުހުންނެއް ނެތެވެ. ބައްތިތަކުގެ އަލި ފަނޑުވިއެވެ. ފެންނަން ހުރީ ހަމައެކަނި އޭނާ ތިން އަހަރު ވަންދެން ހަނދާން ނައްތާލަން މަސައްކަތްކުރި މޫނެވެ. ޒައްޔާން އެވެ. އޭނާގެ ފިރިމީހާއެވެ. އޭނާ ލޯބިވި މީހާއެވެ. މަރުވެއްޖެ ކަމަށް އޭނާ ގާތު ބުނި މީހާއެވެ.
އޭނާ ބަލިވެ އިންދާ ޒައްޔާން މަރުވިކަމަށް އޭނާގެ އާއިލާއިން ބުނި ދަރިފުޅުގެ ބައްޕައެވެ. އޭނާގެ ލޯބިވެރިޔާ ފަސްދާނުލެވިއްޖެ ކަމަށް ޤަބޫލުކޮށް، އޭނާގެ މަހާނަ ކައިރީގައި ކަރުނަ އެޅި އެ ޒައްޔާން އެވެ. ޒައްޔާން އޭނާއަށް ބަލަހައްޓައިގެން ހުއްޓެވެ. ރާޔާވެސް އޭނާއަށް ބަލަހައްޓައިގެން ހުއްޓެވެ. ދެމީހުންކުރެ އެކަކުވެސް ވާހަކައެއް ނުދައްކައެވެ. ދެން އޭނާގެ ޕްރޮފެޝަނަލް ސިފަ އިއާދަވިއެވެ.
“ބާއްޖަވެރި ރޭގަނޑެއް.” އޭނާ މަޑުމައިތިރިކަމާއެކު ބުންޏެވެ. “ކުޑަކުއްޖާއަށް ކިހިނެއްވީތޯ ބަލާލަމާ.”
ރާޔާގެ އަތުގެ ތެރޭގައި އިނާޔާ ބާރުކޮށްލިއެވެ. އޭނާ ހަޅޭއްލަވަން ބޭނުންވިއެވެ. އޭނާވީ ކޮންތާކުތޯ އަހަން ބޭނުންވިއެވެ. ތިން އަހަރު ވަންދެން ހިތާމައިގައި އޭނާ އުޅެން ދޫކޮށްލީ ކީއްވެގެންތޯ ސުވާލުކުރަން ބޭނުންވިއެވެ. އެއީ ހަޤީޤަތެއްތޯ ޔަގީންކުރުމަށް އޭނާގެ މޫނުގައި އެންމެ ފަހަރަކު ނަމަވެސް އަތްލާން ބޭނުންވިއެވެ.
އޭގެ ބަދަލުގައި އޭނާ މަޑުމަޑުން ބުންޏެވެ. “އޭނާގެ ހުން ވަރަށް ގަދަ.”
ޒައްޔާން ކައިރިއަށް ޖެހިލިއެވެ. “ނަމަކީ ކޮބާ؟”
“އިނާޔާ.”
އޭނާ އެ ކުޑަ އަންހެން ކުއްޖާއަށް ބަލާލިއެވެ. އޭނާގެ މޫނުމަތިން ބަދަލެއް ފެނުނެވެ. ހަމައެކަނި ވަގުތުކޮޅަކަށެވެ. އޭނާގެ ލޯ ހުރީ އެ ކުއްޖާއަށް ހުއްޓިފައެވެ. އިނާޔާގެ ހުން އައިސްފައިވާ މޫނު ރަތްވެފައި ހުރި ނަމަވެސް، އޭނާގެ ލޮލުގެ ބައްޓަމުން ވަރަށް ބޮޑަށް ފާހަގަކުރެވޭ ފަދަ އެއްގޮތްކަމެއް ހުއްޓެވެ. ޒައްޔާން ކުޑަކޮށް ހުއްޓުން އެރިއެވެ.
“އުމުރަކީ ކިހާވަރެއް؟”
“ތިން އަހަރު.”
އޭނާގެ ނަޒަރު ކުއްޖާގެ ކިބައިން ރާޔާއަށް ހުއްޓުނެވެ. “ތިން އަހަރު؟”
ރާޔާ ބޯޖަހާލިއެވެ. އޭނާ އެއްވެސް އެއްޗެއް ނުބުނެއެވެ. އޭނާ އިނާޔާ ބަލަން ފެށިއެވެ. ހޫނުމިނާއި، އޮކްސިޖަން ލެވެލްއާއި، ކަރުތެރެއާއި ނޭވާލުން ޗެކްކުރިއެވެ. ރާޔާ އެނދު ކައިރީގައި ހިމޭނުން ހުރެ، އެ އަތްތަކަށް ބަލަހައްޓައިގެން ހުއްޓެވެ. އެއީ އާޓިފިޝަލް ބީޗުގައި ހިނގާލަން ގޮސް އުޅޭއިރު، ވައިރޯޅިއަކުން އޭނާގެ އިސްތަށިގަނޑު މޫނުމައްޗަށް ވިހުރުވޭ ވަގުތު، ބުރުގާގެ ތެރެއަށް އިސްތަށިތައް ލައްވައިދިން އަތްތަކެވެ. އެ އަތްތަކުން މިހާރު އެ ބަލަނީ އެމީހުންގެ ދަރިފުޅެވެ. ނަމަވެސް އޭނާއަށް އެކަމުގެ އެއްވެސް މަޢުލޫމާތެއް ނެތެވެ. ނޫނީ އޭނާ އެކަމުގެ ހަޤީޤަތް ނޭނގޭ ކަމަށް ހަދަނީ ބާވައެވެ؟ އެ ޚިޔާލުން ރާޔާ ބިރުގަތެވެ.
“އޮކްސިޖަން ރަނގަޅު.” އިރުކޮޅަކުން ޒައްޔާން ބުންޏެވެ. “ކަރުތެރޭގައި އިންފެކްޝަނެއް ހުރީމަ ހުން އައީ. އެހެންވެ ނޭވާލާންވެސް އުނދަގޫވަނީ. އަޅުގަނޑުމެން ހުން މަޑުކޮށްފައި އޭނާ މޮނިޓަރ ކުރާނަން.”
ރާޔާ ބޯޖަހާލިއެވެ. “އޭނާ ރަނގަޅުވާނެތަ؟”
“އަޅުގަނޑުމެން އޭނާއަށް ފަރުވާދޭނަން.”
އެ ޖުމްލައިން ރާޔާގެ ހިތް ކުދިކުދިވާން ކައިރިވިއެވެ. އޭނާ އަބަދުވެސް ވާހަކަ ދައްކަނީ އެގޮތަށެވެ. މަޑުމައިތިރިކޮށް، ޔަގީންކަމާއެކުގައެވެ. ދުނިޔޭގެ ކޮންމެ މައްސަލައަކީވެސް އޭނާ އެހީތެރިވާން ހުރެއްޖެނަމަ ހައްލުވާނެ ކަމެއްގެ ގޮތުގައެވެ.
އިނާޔާ ބަލާ ނިމުމުން، ޒައްޔާން އަލުން ރާޔާއަށް ބަލާލިއެވެ. “އަޅުގަނޑުމެން ކުރިން ބައްދަލުވިތަ؟”
ރާޔާގެ ހިތް ހުއްޓުނު ކަހަލައެވެ. އޭނާ އިސްދަށަށް ޖަހާލިއެވެ. “އާނ.”
“ކޮންތާކުން؟”
“ކޮލެޖުން.”
ޒައްޔާން ނިތްކުރިއަށް ރޫއަރުވާލިއެވެ. “ކޮން އެއްޗެއް ކިޔެވީ؟”
“ނާސިންގް.”
ޒައްޔާން ވަރަށް ގިނައިރު ރާޔާއަށް ބަލަހައްޓައިގެން ހުއްޓެވެ. “އަޅުގަނޑު ހީކުރީވެސް އެހެން.”
ރާޔާގެ ތުންފަތް ތުރުތުރުލާން ފެށިއެވެ. “ހަނދާން އެބަހުރިތަ؟”
“އަޅުގަނޑަކަށް ނޭނގެ.” އޭނާ ބޮލުގެ އެއްފަރާތުގައި އަތްލިއެވެ. “މީގެ ތިން އަހަރު ކުރިން އަޅުގަނޑަށް ވަރަށް ނުރައްކާތެރި އެކްސިޑެންޓެއް ދިމާވި. ވަރަށް ގިނަ ދުވަހު ހޭނެތިފައި އޮންނަން ޖެހުނު. ފަހުން ޑޮކްޓަރުން ބުނީ ހަނދާން ނެތުމުގެ މައްސަލައެއް ހުރި ކަމަށް. އަޅުގަނޑުގެ ހަޔާތުގެ ބައެއް ދުވަސްތަކަކީ އަދިވެސް ސާފުނުވާ ކަންތައްތަކެއް.”
ކޮޓަރީގެ ހޫނުމިން ހުރި ނަމަވެސް ރާޔާއަށް ފިނިވި ކަހަލައެވެ. ތިން އަހަރެވެ. އޭނާ ޒައްޔާން މަރުވިކަމަށް ޤަބޫލުކޮށްގެން ހުރި މުއްދަތެވެ.
“އާއިލާގެ މަތިން ހަނދާން އެބަހުރިތަ؟” އަމިއްލަ ނަފްސު ހުއްޓުވުމުގެ ކުރިން ރާޔާއަށް އަހާލެވުނެވެ.
ޒައްޔާން އޭނާއަށް ބަލާލިއެވެ. “ބައެއް މީހުން.”
“ކައިވެނީގެ މަތިން؟”
އޭނާގެ މޫނުމަތީގެ ކުލަވަރު ބަދަލުވިއެވެ. “ކައިވެނި؟”
ރާޔާ އެ ސުވާލު ކުރެވުނީތީ ވަގުތުން ދެރަވިއެވެ. ޒައްޔާން ހުރީ އޮޅުންބޮޅުންވެފައެވެ. “ކައިވެނި ކުރި ހަނދާނެއް އަޅުގަނޑު ނެތް.”
ރާޔާގެ ހިތުގެ ކޮންމެވެސް ދިމާއަކުން ރޫޅިގެން ދިޔަ ކަހަލައެވެ. އެއީ އޭނާ މަތިން ހަނދާން ނެތުމުންނެއް ނޫނެވެ. ނަމަވެސް އެމީހުން ބިނާކުރި ދިރިއުޅުމުގެ މަތިން ހަނދާން ނެތުމުންނެވެ. އެމީހުން ވީ ވަޢުދުތަކެވެ. ދަރިފުޅަށްޓަކައި ރޭވި ރޭވުންތަކެވެ. އިނާޔާ އުފަންވުމުގެ ކުރިން ގަތް ހުދު ކުޑަ ހެދުމެވެ. އެމީހުން އެކުގައި އިޚްތިޔާރުކުރި ނަމެވެ. އޭނާ މުޅިން ހަނދާން ނެތުނީއެވެ. އަދި އެ ހަނދާން ނެތިފައިވާ ކަންތައްތަކުގެ ތެރޭގައި، މީހަކު ގަސްދުގައި އޭނާއަށް ސިއްރުކޮށްފައިވާ ހަޤީޤަތެއް ވާކަން ޔަގީނެވެ.
“ކޮބާ ނަމަކީ؟” ޒައްޔާން އެހިއެވެ.
ރާޔާ އޭނާއަށް ބަލަހައްޓައިގެން ހުރެ ބުންޏެވެ، “އައިޝަތު ރާޔާ.”
އޭނާ މަޑުމަޑުން އެ ނަން ތަކުރާރުކޮށްލިއެވެ. “އައިޝަތު ރާޔާ.” އޭނާގެ ލޯ ކުޑަކޮށްލިއެވެ. “އެ ނަން..”
“ކިހިނެއްވީ؟”
“ވަރަށް ފަރިތަ ގޮތެއް އެބަހުރި.”
ރާޔާ ވަރަށް ބަލިކޮށް ހިނިތުންވެލިއެވެ. “ފަހަރުގައި ކުރިން އިވިފައި ހުރީ ކަމަށް ވެދާނެ.”
“ވެދާނެ.”
(ނުނިމޭ)
