ހަށިގަނޑުގެ ބެލެންސް ނުވަތަ ހަމަހިފެހެއްޓުމާއި ފްލެކްސިބިލިޓީ ރަނގަޅު ކުރުމަށްޓަކައި ހަރަކާތްތެރި ބެލެންސިންގ ސްޓްރެޗްތަކަކީ ވަރަށް މުހިންމު ކަސްރަތުތަކެކެވެ. މިފަދަ ޑައިނަމިކް ސްޓްރެޗްތަކަކީ އެއްފަހަރާ ގިނަ މަސްތަކެއް ހަރަކާތްތެރިކޮށްދޭ، ކޮންޓްރޯލް ކުރެވިފައިވާ ހަރަކާތްތަކެކެވެ. މި ކަސްރަތުތައް ދިރިއުޅުމުގެ އާދައަކަށް ހެދުމުން ހަށިގަނޑުގެ ބައްޓަމާއި، އެކި ގުނަވަންތަކުގެ ގުޅުމުގެ އިތުރުން ޖުމްލަ ޖިސްމާނީ ދުޅަހެޔޮކަމާއި ކުޅިވަރުގެ ހުނަރު އިތުރުވެގެންދެއެވެ. މިއީ އެތުލީޓުންނާއި، ކަސްރަތަށް ލޯބިކުރާ މީހުންގެ ހުނަރު އިތުރަށް ތަރައްޤީ ކުރުމަށް ނުހަނު ބޭނުންތެރި ކަސްރަތުތަކެކެވެ. ތިރީގައި މިވަނީ މިގޮތުން ފަސޭހައިން ކޮށްލެވިދާނެ 5 ސްޓްރެޗެކެވެ.
1 – ޓްރީ ޕޯސް ސްޓްރެޗް
ޓްރީ ޕޯސް އަކީ ހަށިގަނޑުގެ ބެލެންސް ރަނގަޅުކޮށްދީ، ބަނޑާއި ބުރަކަށީގެ މައި މަސްތައް ވަރުގަދަކޮށްދޭ މޮޅު ކަސްރަތެކެވެ.
އެއް ފައިމައްޗަށް ކޮޅަށް ހުރެ، އަނެއް ފައިގެ ތިރީބައި، ކޮޅަށް ހުރި ފައިގެ ފަލަމަސްގަނޑުގެ އެތެރެފަރާތުގައި ނުވަތަ ކުޑަކަޅުވާގައި ވިއްދާލާށެވެ.
ދެއަތް ޖޯޑުކޮށް މޭމަތީގައި ބަހައްޓާށެވެ. ނުވަތަ އިތުރަށް ފުރިހަމަކޮށްލުމަށްޓަކައި ބޮލުން މައްޗަށް ދެއަތް ނަގާށެވެ.
މި ގޮތަށް 30 ސިކުންތު ވަންދެން ހުރުމަށްފަހު، އަނެއް ފަޔަށް ބަދަލުކޮށްލާށެވެ.
2 – ވޮރިއަރ III ޕޯސް
މި ކަސްރަތަކީ ހަށިގަނޑުގެ ބެލެންސާއި، އެއްވަރެއްގައި ހިފެހެއްޓުމުގެ ގާބިލުކަން އިތުރުކޮށްދޭ ކަސްރަތެކެވެ.
އެއް ފައިމައްޗަށް ކޮޅަށް ހުރެ، މަޑުމަޑުން ހަށިގަނޑުގެ މަތީބައި ކުރިއަށް ލަންބާލަމުން އަނެއް ފައި ސީދާވާނޭހެން ފަހަތަށް ދަމާލާށެވެ.
ހަށިގަނޑު ހަމަހަމަކޮށް ބެހެއްޓުމަށްޓަކައި ދެއަތް ކުރިއަށް ދިއްކޮށްލާށެވެ. ނުވަތަ ހަށިގަނޑުގެ އަރިމަތީގައި ބަހައްޓާށެވެ.
މި ހާލަތުގައި 20 ސިކުންތު ހިފަހައްޓައިގެން ހުރުމަށްފަހު އަނެއް ފަޔަށް ބަދަލުވާށެވެ.
3 – ސިންގަލް-ލެގް ޑެޑްލިފްޓް ސްޓްރެޗް
މި ކަސްރަތުން ފައިގެ ފަހަތު މަސްތަކާއި، ފޫކޮޅުގެ މަސްތައް އަދި ބެލެންސް ވަރުގަދަކޮށްދެއެވެ/
އެއް ފައިމައްޗަށް ކޮޅަށް ހުރެ، ކަކޫ ކުޑަކޮށް ލަންބާލާށެވެ.
އުނަގަނޑުން ކުރިއަށް ގުދުވަމުން އަނެއް ފައި ސީދާކޮށް ފަހަތަށް ދަމާލާށެވެ. ހަށިގަނޑު ބިމާ އެއްވަރަށް (ޕެރެލަލްކޮށް) ހުންނަންވާނެއެވެ.
ދެން މަޑުމަޑުން އަނބުރާ ކޮޅަށްހުރި ހާލަތަށް އަންނާށެވެ. ކޮންމެ ފަޔަކުން 8 ފަހަރު މިކަން ތަކުރާރުކުރާށެވެ.
4 – ފްލެމިންގޯ ޕޯސް ސްޓްރެޗް
މި ސްޓްރެޗަކީ ފައިތިލައިގެ ކުޑަހުޅުގެ ހަމަހިފެހެއްޓުން ރަނގަޅުކޮށް، ހަށިގަނޑުގެ ތިރީބައިގެ މަސްތައް ވަރުގަދަކޮށްދޭ ކަސްރަތެކެވެ.
އެއް ފައިމައްޗަށް ސީދާވެލައިގެން ހުރެ، އަނެއް ފައި ފަހަތަށް ނަގައި ފައިތިލަ ފުރަގަހާ ދިމާއަށް އުފުލާލާށެވެ.
އަމިއްލައަށް ހަމަހިފަހައްޓަން އުނދަގޫނަމަ، ހަރު އެއްޗެއްގައި ހިފަހައްޓައިގެން ހުރެވިދާނެއެވެ. ބެލެންސް ކުރެވޭކަމުގެ އިޙުސާސް ވުމުން ހިފަހައްޓައިގެން ހުރި އެތިން ދޫކޮށްލާށެވެ.
ކުޑަ ވަގުތުކޮޅަކު އެގޮތަށް ހިފަހައްޓައިލުމަށްފަހު، މަޑުމަޑުން ފައި ތިރިކޮށްލާށެވެ.
5 – ސައިޑް ލެގް ރެއިޒް ސްޓްރެޗް
މި ކަސްރަތަކީ އުނަގަނޑުގެ އަރިމަތީ މަސްތަކަށް އަމާޒުކޮށް، ހަށިގަނޑުގެ އަރިމަތީގެ ބެލެންސް ވަރުގަދަކޮށްދޭ ކަސްރަތެކެވެ.
އެއް އަރިއަކަށް އޮށޯވެ، އަތުން ބޯ ހިފަހައްޓާލާށެވެ.
މަތީގައި އޮތް ފައި، ސީދާކޮށް ބަހައްޓައިގެން މައްޗަށް ވީހާވެސް އުސްކޮށް އުފުލާލާށެވެ.
ސިކުންތެއް ވަރު އެގޮތުގައި ހިފަހައްޓާލުމަށްފަހު، މަޑުމަޑުން ފައި ތިރިކޮށްލާށެވެ.
މަސްތައް އެއްވަރަކަށް ވަރުގަދަކުރުމަށްޓަކައި، ކޮންމެ ފަރާތަކުންވެސް 8 ފަހަރު މި ކަސްރަތު ތަކުރާރުކުރާށެވެ.
މި ފަސޭހަ ސްޓްރެޗްތަކަކީ ކޮންމެ ދުވަހެއްގެ ތާވަލުގައިވެސް ފަސޭހައިން ހިމަނައިލެވިދާނެ ކަންކަމެވެ. މީގެ ސަބަބުން ހަށިގަނޑަށް ލުއިކަން ލިބި، ދުވަހުން ދުވަހަށް ކުރާ މަސައްކަތްތަކުގައްޔާއި ކުޅިވަރުތަކުގައި ހަށިގަނޑުގެ ބެލެންސް ހިފެހެއްޓުމަށް ބޮޑު އެހީއަކަށް ވެގެންދާނެއެވެ.
