ސުވަރުގޭގެ އަނެއް ފަރާތް

އަހަރެންގެ ނަމަކީ މިރްޒާ ޤަފޫރުއެވެ. 37 އަހަރުވީއިރު, ގިނަ މީހުންނަށް އަހަންނަކީ ކާކުކަން ވަރަށް ރަނގަޅަށް އެނގޭ ކަމަށް ހީވެދާނެއެވެ. ފަހަރެއްގައި އަހަރެންގެ ނަން ކޮލަމްބޯގެ ކްލަބެއްގެ ތެރެއިން ސިއްރުސިއްރުން އިވިފައި އޮވެދާނެއެވެ. ނުވަތަ އަގުބޮޑު ބުއިމެއްގެ ތެރެއިން، ނޫނީ މީހަކަށް ދަރާފައިވާ މީހަކު ދައްކާނެ އިތުރު ބަހަނާއެއް ނެތިގެން ބިރުން އުޅެނިކޮށް އަހަރެންގެ ނަން އިވިފައި އޮވެދާނެއެވެ. ބައެއް ފަހަރު ކްލަބެއްގެ ކަނެއްގައި ހުރި މޭޒެއްގެ ކައިރީގައި، އެންމެން މަޖާކުރުމުގައި މަސްއޫލުވެ އުޅޭއިރު، އަހަރެން މުޅި މާހައުލަށް ފާރަވެރިވާން އިންދާ ފެނިފައި އޮވެދާނެއެވެ. ނުވަތަ އެތަނުގެ ވެރިއެއް ފަދައިން، ބާރު ހިނގުމެއްގައި ހިނގާފައި ދަނިކޮށް ފެނިދާނެއެވެ. ނަމަވެސް އަހަރެންނަކީވެސް އަތުގައި ބުއިމެއް ހިފަހައްޓައިގެން ހުރި އާދައިގެ ކަސްޓަމަރެއް ފަދަ މީހެކެވެ.

ބައެއް މީހުންނަށް މިއީ އަމިއްލަ ރަށުގައި ކުރަން ނުކެރޭ ފަދަ ކަންކަން ކުރުމަށް ފަސޭހަވެގެންދާ ތަނެކެވެ. ކޮލަމްބޯގެ މިފަދަ މާހައުލުތަކަކީ ދިވެހިންގެ ތެރެއިން ބައެއް މީހުންނަށް ވަރަށް އާދައިގެ ތަނަކަށް ވަނީ ވެފައެވެ. އެއީ ރޭގަނޑުގެ މަޖާ ދިރިއުޅުމެވެ.

އަހަރެން އެ ވަޢުދުވީ އޭގެ ސަބަބުން ދައްކަންޖެހޭނެ އަގު އޭރު މިހާ ނުރާއްކާވެފައި ބޮޑު ވާނެކަމަކަށް ހީކޮށްގެނެއް ނޫނެވެ. އަހަރެން ބޮޑުވި މާހައުލަކީ މުޅިން ގޯސް ތަނެއް ނޫނެވެ. ނަމަވެސް އެއީ މައުސޫމު ތަނެއްވެސް ނޫނެވެ. އެތަނުގައި ރަނގަޅު އާއިލާތަކާއި، ބުރަ މަސައްކަތްކުރާ ފިރިހެނުންނާއި، އަވަށްޓެރިންގެ ދަރިން ބަލައިދޭ އޯގާތެރި އަންހެނުން އުޅުނެވެ. ނަމަވެސް އެއާއެކު، އެކި ކަހަލަ މައްސަލަ ހޯދަން އުޅޭ ފިރިހެން ކުދިންނާއި، ނުބައި ގޮތްގޮތުން ފައިސާ ހޯދާ މީހުންނާއި، އެމީހެއްގެ ނަން ބުނުމުން މުޅި ތަން ހިމޭންވާ ފަދަ ނުފޫޒުގަދަ މީހުންވެސް އުޅުނެވެ.

އަހަރެންގެ ހަނދާނުގައި ހުރީ އެތަނުގެ ނަމަށްވުރެ ބޮޑަށް އެތަނުގެ މާހައުލެވެ. މިއުޒިކުގެ އަޑު ގަދަވެފައި، ފަނޑު އަލިތައް މުޅި ތަނަށް އެޅިފައި އޮތްއިރު، މޭޒުތައް ކައިރީގައި ތިބީ މާދަމާގެ އިރު އަރާނެކަން ހަނދާން ނެތިފައިވާ ފަދަ ބައެކެވެ. އޭގެ ތެރޭގައި ފަތުރުވެރިންނާއި، ވިޔަފާރިވެރިންނާއި، ބޭރު ޤައުމުތަކުގެ މީހުންގެ އިތުރުން ރޭގަނޑުގެ މަޖާ ނަގަން އައިސްތިބި ޒުވާނުން ހިމެނެއެވެ. އެމީހުންގެ ތެރޭގައި ދިވެހިންވެސް ތިއްބެވެ. ބައެއް މީހުންނަކީ މާލޭގައި ތިބޭއިރު އެމީހުންގެ އާއިލާއަށް އެނގިއްޖެނަމަ ލަދުގަންނާނެ ފަދަ ހާލަތްތަކުގައި އަހަރެން ދެކެފައިވާ މީހުންނެވެ.

އެ މީހުން ތިބޭނީ ވަރަށް ނަލަވެލައިގެން، ބާރަށް ހީނ، އަތުން ބުއިމެއް ހިފަހައްޓައިގެންނެވެ. ފުރަތަމަ އެ މީހުންނަށް އަހަރެން ނޭނގިދާނެއެވެ. ނޫނީ ނޭނގޭކަމަށް ހަދާނެއެވެ.

އަހަންނަށް މި ވިޔަފާރި އެނގެއެވެ. މަޖާކޮށްލަން އަންނަ މީހަކަށް، އެމީހުންގެ ނާޒުކުކަން ދެނެގަންނަން ދަންނަ މީހުންގެ މަޅީގައި ޖެހިދާނެކަން އަހަންނަށް އެނގެއެވެ. އެކަނިވެރި މީހަކު އެކުވެރިކަމުގެ ނަމުގައި މަޅީގައި ޖެއްސިދާނެއެވެ. އާ ކަންކަމަށް ޝައުޤުވެރިވާ ޒުވާނަކަށް އާ މަސްތުވާ އެއްޗެއް ތައާރަފު ކުރެވިދާނެއެވެ. ނަފްސާނީ މައްސަލަތަކާ ކުރިމަތިލާ މީހަކަށް، ވަގުތީ އުފަލެއް ހޯދައިދޭން ދޭ އެއްޗަކީ ފަހުން ބޮޑު މައްސަލައަކަށް ވެދާނެއެވެ. އަދި މި ހުރިހާ ކަމެއްގެ ފަހަތުގައި ތިބީ ފައިސާ ހޯދާ މީހުންނެވެ. އަހަރެންނަކީ އޭގެ ތެރެއިން އެކެކެވެ. އަހަރެން ނަޝްރާއާ ކައިވެނި ކުރިއިރު އުމުރަކީ ފަންސަވީސް އަހަރެވެ.

އޭރު ނަޝްރާ އިނުމުގެ ކުރިން ވަރަށް ސީރިއަސް ސުވާލެއް ކުރިއެވެ. އަހަރެން އެއަށް ޖަވާބެއް ދިނީމެވެ. އެއީ އެންމެ ފުރިހަމަ ޖަވާބެއް ނޫނެވެ. ނަމަވެސް ހުރިހާ ވާހަކައެއް ކިޔައިނުދީ އަހަންނަށް ދެވޭނެ އެންމެ ފުރިހަމަ ޖަވާބަކީ އެއީއެވެ.

“އަހަންނަށް އެނގޭ އަހަރެން ކުރަނީ ކޮންކަހަލަ ކަމެއްކަން.” އަހަރެން ބުނީމެވެ.

އޭނާ އަހަރެންގެ ލޮލަށް ބަލަހައްޓައިގެން ހުއްޓެވެ. “އަހަރެން ކަންބޮޑުވަނީވެސް އެހެންވެ.” އޭނާ ބުންޏެވެ.

އަހަރެމެން ކައިވެނި ކުރީމެވެ. އަދި ކައިވެނީގެ ސަބަބުން އަހަރެން ބަދަލުވާނެކަމަށް އޭނާވެސް އަދި އަހަރެން އަމިއްލައަށް ގަބޫލުކުރީމެވެ. އަހަރެން ބޭނުންވީ އަމާން ގެއެއް، އަހަންނަށް އިތުބާރުކުރާ އަނތްބެއް އަދި ބައްޕައާމެދު ފަޚުރުވެރިވާނެ ދަރިންނެވެ.

އަހަރެން ހީކުރީ އަހަރެންގެ ދިރިއުޅުމުގެ ދެ ފަރާތް ވަކިކޮށް ބެހެއްޓޭނެ ކަމަށެވެ. ގެއިން ބޭރުގައި ހިނގާ ކަމެއް ގެއަށް ނުވަންނާނެ ކަމަށް ހީކުރީމެވެ. ނަމަވެސް އަހަރެންގެ މުޅި ކެރިއަރު ބިނާވެފައި އޮތީ ބޭރު ދުނިޔެ އަހަރެންގެ ފަހަތުން އައުމަށް ފުރުސަތު ދިނުމުގެ މައްޗަށެވެ.

އެއީ ކޮލަމްބޯގައި ހުރި އެންމެ ބޮޑު ނުވަތަ އެންމެ ޚާއްސަ ތަނެއް ނޫނެވެ. ނަމަވެސް ވަކި ފަންތިއެއްގެ ދިވެހިންގެ މެދުގައި އެތަން ވަނީ މަޝްހޫރުވެފައެވެ. މިއުޒިކު ގަދަވެފައި، ބުއިންތަކުގެ އަގު ބޮޑެވެ. އަދި ރޭގަނޑުގެ ވަގުތަށް ބަލައި އެތަނަށް އަންނަ މީހުން ބަދަލުވެއެވެ. ބައެއް ރޭރޭ އަންނަނީ ވަޒީފާ އަދާކުރާ މީހުންނާއި ފަތުރުވެރިންނެވެ. އަނެއްބައި ރޭރޭ މަޖާކޮށްލަން ދިވެހިރާއްޖެއިން އަންނަ ޒުވާން ފިރިހެނުންނާއި އަންހެނުން އެތަނަށް އެއްވެއެވެ. އެތަނުގެ މުވައްޒަފުންނަށް އަބަދު އަންނަ މީހުން ވަކިކުރަން އެނގެއެވެ. އަދި ސިއްރު ހިފެހެއްޓުމަކީ ޚިދުމަތުގެ ބައެއްކަން މެނޭޖަރުންނަށް އެނގެއެވެ. އަހަރެން އެތަނަށް އެތައް ފަހަރަކު ގޮސްފީމެވެ. ނަމަވެސް އެރޭ އަހަރެން ދިޔައީ މިއުޒިކް އަޑުއަހާކަށް ޕާޓީކުރާކަށް ނޫނެވެ.

*****

އެ މީހާ ހުރީ ހަރަކާތް އަވަސްވެ މާޔޫސްވެފައެވެ. “ފަޒީލު ބުނި ކަލެއަށް އެހީވެވިދާނެ ކަމަށް.”

“ފަޒީލަކީ ވަރަށް ގިނަ ވާހަކަ ދައްކާ މީހެއް.”

އެ މީހާ އިސްޖަހާލިއެވެ. އެ މީހާ ކުއްލިއަކަށް އޭނާގެ ކައިރީގައި ހުރި ބުއިމަށް ސަމާލުކަން ދޭން ފެށިއެވެ. ދެން އޭނާގެ އަޑު މަޑުކޮށްލާފައި “އަހަންނަށް އެނގޭ މިތަނުގައި ފުރުސަތުތައް ހުރިކަން. ދިވެހިން އަބަދުވެސް ކޮލަމްބޯއަށް އާދޭ. ބައެއް މީހުން ބޭނުންވަނީ މަޖާކޮށްލަން. އަނެއްބައި މީހުން ބޭނުންވަނީ ރާއްޖެއިން ފަސޭހައިން ނުލިބޭ ކަންކަން ކުރަން. ރަނގަޅު މީހުން އެނގޭނަމަ މިއީ ފައިސާ ހޯދަން ރަނގަޅު ކަމެއް. އަހަރެން އިންވެސްޓު ކުރާނަން.”

އަހަރެންގެ ހިތަށް ނުތަނަވަސްކަމެއް ލިބުނެވެ. އޭނާ އެ ބޭނުންވަނީ އާދައިގެ އެއްޗެއް ނުވަތަ ކަމެއް ނޫންކަން އަހަރެންނަށް އެނގެއެވެ.

އެވަގުތު ފަހަތުން އިވޭ ޓްރެފިކްގެ އަޑު ފިޔަވައި އެހެން އަޑެއް އަހަންނަކަށް ނީވެއެވެ. “އިބްރާހީމް.” ހަ އަހަރު ފަހުންވެސް، އޭނާގެ ނަމަކީ އަހަރެންގެ ވަށައިގެންވާ މާހައުލު ބަދަލުކޮށްލުމުގެ ބާރު ހުރި ނަމެކެވެ. އޭނާ މަރުވި ރޭގެ ހަނދާންތައް އާވިއެވެ. އެރޭގެ ހަޅޭކުގެ އަޑާއި، ހާސްކަމާއި، މީހުން އެކި ދިމަދިމާއަށް ދުވި މަންޒަރެވެ. އަދި ކަމެއް ވަރަށް ބޮޑަށް ގޯސްވެއްޖެކަން އެންމެންނަށް އެނގުމުން ވެރިވި ބިރުވެރި ހިމޭންކަމެވެ. އެތަނުގައި ވެއްޓިފައި އޮތް ފޯނު އަހަރެންގެ ހަނދާނަށް އައެވެ. އޭގެ ސްކްރީން އޮތީ ހަލާކުވެފައެވެ. އަދި އަހަރެން އެ ފޯނު ނެގިއިރު، އޭގައި ރެކޯޑިންގް ކުރިއަށްދާކަން ދައްކާ ކުޑަ ނިޝާނެއް އިންކަން ހަނދާންވިއެވެ. އަދި މި ރެކޯޑިންގް އަހަރެންނާއި އަހަރެންގެ އާއިލާ މި މަސްތުގެ ދުނިޔެ ތެރެއަށް އިތުރަށް ގަންބުވާލާނެ ކަމަކަށް އަަހަރެން ތައްޔާރެއްނުވަމެވެ.

*****

“އަހަރެމެންގެ ދަރިފުޅު އެދަނީ ބޮޑުވަމުން.” ނަޝްރާ ކުރިއަށް ގެންދިޔައެވެ. “އޭނާ އުޅެނީ ކަލޭގެ ހަރަކާތްތަކަށް ބަލައިގެން. އޭނާ ހީކުރަނީ ކަލޭ ކުރާ ކޮންމެ ކަމަކީ ރަނގަޅު ކަމެއް ކަމަށް. އެއީ އޭނާއަކީ ކުޑަކުއްޖަކަށް ވެފައި، ކަލެއަކީ އޭނާގެ ބައްޕައަށް ވީތީ. މީގެ މާނަ ކަލެއަށް ވިސްނޭތަ؟”

“ވިސްނޭ.”

“އެހެންވިއްޔާ އެކަން އަމަލުން ދައްކާ.”

އަހަރެން ކޮރިޑޯއާ ދިމާއަށް ބަލައިލީމެވެ. ދަރިފުޅުގެ ކޮޓަރީގެ ދޮރު ހުރީ ކުޑަކޮށް ހުޅުވިފައެވެ. އޭނާ އޮތީ ނިދާފައެވެ. ދޮރު ކައިރީގައި އޭނާގެ ސްކޫލް ދަބަސް ހުއްޓެވެ. އަދި ފާރު ކައިރީގައި އޭނާގެ ކުޑަ ދެ ފައިވާން ފަރުވާކުޑަގޮތަކަށް ބަހައްޓާފައި ހުއްޓެވެ. އެއީ ހާދަ އާދައިގެ ކަންކަމެވެ. އަހަރެން އަމިއްލައަށް ބިނާކުރި ނުބައި ދުނިޔެއާ އެއްވެސް ގުޅުމެއް ނެތް މައުސޫމު ދިރިއުޅުމެއްގެ ހެކިތަކެވެ.

“އަހަރެން އެކަން ހަމަޖައްސާނަން.” އަހަރެން ބުނީމެވެ. ނަޝްރާ ބޯ ހޫރާލިއެވެ.

ފަހަރެއްގައި، މީހަކު ރަނގަޅު މީހަކަށް ނުވަތަ ނުބައި މީހަކަށް ވަނީ އޭނާ ނިންމާ ނިންމުންތަކުގެ ސަބަބުންކަން ދަރިފުޅަށް އެނގެން އަހަރެން ބޭނުންވާން ޖެހޭނެއެވެ. އަދި މީހަކު ހަލާކުކޮށްލާފައި ހޯދާ ފައިސާއަކުން، އެ ހަލާކުކޮށްލި ކަންކަން ދުވަހަކުވެސް މަރާމާތު ނުކުރެވޭނެކަން އޭނާއަށް ވިސްނައިދޭން ޖެހޭނެއެވެ. އެނދު ކައިރީގައި ހުރި މޭޒުމަތީގައި އޮތް އަހަރެންގެ ފޯނު ވައިބްރޭޓް ވިއެވެ. ނަޝްރާއަށް ހޭނުލެވޭނެހެން އަހަރެން ވަރަށް ސަމާލުވެގެން ފޯނު ނެގީމެވެ. އެއީ ނުދަންނަ ނަންބަރަކުން އައިސްފައިވާ މެސެޖެކެވެ. ސަލާމެއް ނެތެވެ. ތަފްސީލެއް ނެތެވެ. އޮތީ އެންމެ ޖުމްލައެކެވެ. “ކަލޭ އިބްރާހީމްގެ ފޯނު އޮތްތަނަށް ދޫކޮށްލިނަމަ މާ ރަނގަޅުވީސް.”

އަހަރެން އެ މެސެޖު އެއްފަހަރު ކިޔައިލީމެވެ. އަދި ދެވަނަ ފަހަރަށްވެސް ކިޔައިލީމެވެ. އަހަރެންގެ އާއިލާ ސްރީލަންކާއަށް ބަދަލުކުރީ، ދުރުމިނުގެ ސަބަބުން އާ ދިރިއުޅުމެއް ލިބޭނެ ކަމަށް އުންމީދުކޮށްގެންނެވެ. އަހަރެންގެ މާޒީ ދަންނަ މީހުންނާއި ތަންތަނާ ދުރުގައި އާ ގެއެއް ބިނާކުރެވޭނެ ކަމަށް ހީކޮށްގެންނެވެ. ނަމަވެސް އަހަރެން ވަރަށް މުހިންމު ކަމެއް ހަނދާން ނެތުނީއެވެ. މީހަކަށް އޭނާގެ ރަށް ދޫކޮށްލެވިދާނެއެވެ. އެޑްރެސް ބަދަލުކުރެވިދާނެއެވެ. އެހެން ޤައުމެއްގެ މަގުތަކާއި އެތަނުގެ ރޭގަނޑުގެ ދިރިއުޅުމަށް ފަރިތަވެވިދާނެއެވެ. ނަމަވެސް އަމިއްލައަށް އިޚްތިޔާރުކުރި ދިރިއުޅުމުގެ ކިބަޔަކުން އެމީހަކަށް ސަލާމަތެއް ނުވެވޭނެއެވެ. އަހަރެން ކަނޑު ހުރަސްކުރީމެވެ. އަހަރެންގެ މާޒީވެސް އަހަރެންގެ ފަހަތުން ކަނޑު ހުރަސްކޮށްފިއެވެ. އަދި މިހާރު އެ މާޒީ އަހަރެންގެ ގެއާ ހަމައަށް ފޯރައިފިއެވެ.

(ނުނިމޭ)