“އަބަދަށްޓަކައޭ ބުނީމަ ޔުމާންއަށް މާނަކުރެވެނީ ކީކޭ؟”
ޔުމާން އެ ސުވާލާ މެދު ވިސްނާލިއެވެ. “އަހަންނަށް ހީވަނީ އަބަދަށްޓަކާ އަކީ ނިމުމެއް ނެތް ދުވަސްތަކެއް ލިބުމެއް ނޫންހެން. އެއީ ތިމާ މި ދުނިޔެ ދޫކޮށް ދިޔުމަށްފަހުވެސް، އެހެން މީހެއްގެ ހަނދާނުގައި އަބަދުވެސް ދިރިހުންނާނެ ފަދަ މާނަހުރި ގޮތެއްގައި ކޮންމެ ދުވަހެއް ހޭދަކުރުން.”
ޒޭނާގެ މޫނުމަތީގެ ކުލަވަރު ބަދަލުވިއެވެ. އޭނާ އަމިއްލަ އަތަށް ބަލައިލިއެވެ. “އެ ލޯބިވާ މީހާ ކައިރީގައި ނެތް ދުވަހަކުވެސް ތި ގޮތަށް ޤަބޫލުކުރާނަންތަ؟”
ޔުމާން އޭނާއާ ދިމާއަށް އެނބުރުނެވެ. “ކީއްވެ ތިހެން ތި އެހީ؟”
ޒޭނާ ބޯ ހޫރާލިއެވެ. “ކަމެއް ނުވޭ. ހަމަ އަހާލީ.”
އޭނާގެ އަޑުގައިވި ހިތާމައިގެ އަސަރު ޔުމާންއަށް ފާހަގަކުރެވުނެވެ. ނަމަވެސް އިތުރަށް ސުވާލުކޮށް އުނދަގޫކުރާކަށް ބޭނުމެއް ނުވިއެވެ.
ދިގު ހިމޭންކަމަކަށްފަހު، ޔުމާން އަނެއްކާވެސް ވާހަކަ ދެއްކިއެވެ. “ޒޭނާ، ވަރަށް ގިނަ ދުވަސްތަކެއް ވަންދެން އަހަރެން ބުނަން ބޭނުންވެފައި އޮތް ވާހަކައެއް އެބައޮތް.” ޒޭނާ ޔުމާންއަށް ބަލައިލިއެވެ. “އަހަންނަށް ހީވަނީ އަހަންނަށް ޒޭނާދެކެ ލޯބިވެވިއްޖެހެން.”
އެ ބަސްތައް އެދެމެދުގައި ގުގުމައިގެން ދިޔައީ ނާޒުކު، އެހެނަސް ރީތި ގޮތަކަށެވެ. ޒޭނާގެ ލޮލުން ކަރުނައިގެ ވިދުން ފެންނަން ފެށިއެވެ.
“ޔުމާން..”
ޔުމާން އޭނާގެ މަޑުމައިތިރި އަޑުން ކުރިއަށް ގެންދިޔައެވެ. “މުސްތަޤުބަލުގައި ވާނެ ގޮތެއް އަހަންނަކަށް ނޭނގެ. ބޮޑު ގަނޑުވަރެއް ނުވަތަ މުއްސަނދި ދިރިއުޅުމެއް ދޭކަށް އަހަރެން ވަޢުދެއް ނުވަން. އެކަމަކު އަހަރެން ވަޢުދުވަން، އަހަރެން ޒޭނާއަށް އިޙުތިރާމް ކުރާނަން. އަބަދުވެސް ކައިރީގައި ހުންނާނަން. އަދި ތި ދެކޭ ހުވަފެންތަކަކީ އަގެއް ނެތް އެއްޗެއް ކަމަކަށް ދުވަހަކުވެސް އިޙުސާސް ވިޔަކަ ނުދޭނަން.”
ޒޭނާގެ ކޯތާފަތްމައްޗަށް ކަރުނަތިއްކެއް ވެއްޓުނެވެ.
“އަހަރެން އެންމެ ބިރުގަންނަނީ ކޮން ކަމަކާކަން އެނގޭތަ؟” ޒޭނާ އެހިއެވެ.
“ކޮން ކަމަކާ؟”
“ދުވަހަކުވެސް މީހަކުދެކެ މާ ބޮޑަށް ލޯބިވެވި، އެމީހަކު ގެއްލިއްޖެނަމަ އަހަރެންގެ މުޅި ދުނިޔެ ބިމާ ހަމަވެގެން ހިނގައިދާނެތީ.”
ޔުމާންގެ ހިތުގައި ރިއްސައިލިއެވެ. “އެހެންވިއްޔާ މާދަމާއާމެދު ބިރުގަތުމުގައި އަހަރެމެންގެ ދިރިއުޅުން ބޭކާރު ނުކުރަމާ. މިއަދު މި ލިބުނު ނިޢުމަތަށް ޝުކުރުވެރިވަމާ.”
ޒޭނާ އަނެއްކާވެސް ކަނޑާ ދިމާއަށް ބަލައިލިއެވެ. “އަހަރެންވެސް ޔުމާންދެކެ ވަރަށް ލޯބިވޭ.”
ހަވީރުގެ ފިނި ރޯޅި ގޮނޑުދޮށަށް ޖެހެމުން ދިޔައިރު، އެމީހުންގެ ބޯމަތީގައި ހުރި ރުއްތަކުގެ ފަންތައް ހެލެމުން ދިޔައެވެ. އަދި އަރަމުން އައި ހަނދުގެ ފަނޑު އަލީގެ ދަށުގައި، އެ ދެ ޒުވާނުން ވީ ވަޢުދަކީ ހުރިހާ ކަމަކަށްވުރެ ދެމިގެންދާނެ ވަޢުދެއް ކަމުގައި އެމީހުން ޤަބޫލުކުރިއެވެ.
އެރޭ އެތައް ކަމެއްގައި އެމީހުންނަށް ކުށްހީތަކެއް ކުރެވުނެވެ. ނަމަވެސް، އެމީހުންގެ ލޯތްބާމެދު ކުރެވުނު އިތުބާރަކީ ކުށެއް ނޫނެވެ.
*****
ޖެހިގެން އައި ހަފުތާތަކަކީ އެ ދެ ޒުވާނުންގެ ޙަޔާތުގައި އައި އެންމެ އުފާވެރި ދުވަސްތަކެވެ. ޔުމާން އޭނާގެ މައިންބަފައިންނަށް ޒޭނާގެ ވާހަކަ ކިޔައިދިނެވެ. އަބަދުވެސް ދަރިފުޅަށް ހެޔޮލަފާ، އިޚްލާޞްތެރި ބައިވެރިއަކު ލިބުމަށް އެދިއެދި ހުރި މަންމަ އިންތިހާއަށް އުފާވިއެވެ.
ރޭގަނޑުގެ ކެއުން ތައްޔާރުކުރަން ހުރެ މަންމަ ބުންޏެވެ. “އެއީ ވަރަށް ރަނގަޅު ކުއްޖެއްހެން ހީވަނީ.”
“އާނ މަންމާ. އެއީ ހަމަ އެކަހަލަ ކުއްޖެއް.”
“އެހެންވިއްޔާ މާ ގިނަ ދުވަސް ނުކުރާތި. ރަނގަޅު މީހުންނަށް އިންތިޒާރުކުރުވުމަކީ ރަނގަޅު ކަމެއް ނޫން.”
އަނެއްކޮޅުން، ޒޭނާވެސް އޭނާގެ މަންމައަށް ޔުމާންގެ ވާހަކަ ކިޔައިދިނެވެ. ދަރިފުޅުގެ ދިރިއުޅުމަށް ބަދަލުތަކެއް އަތުވެއްޖެކަން ޒޭނާގެ މަންމައަށްވެސް އޮތީ އިޙުސާސް ކުރެވިފައެވެ.
“އެއީ ޒިންމާދާރު ޒުވާނެއްހެން ހީވަނީ.” މަންމަ ބުންޏެވެ.
“އާނ މަންމާ. ހަމަ އެހެން.” ޒޭނާ ޖަވާބުދިނެވެ.
“އެހެންވިއްޔާ ﷲ ތިޔަ ދެކުދިންގެ ކަންކަން ފަސޭހަކޮށްދެއްވާށި! އާމީން!”
ދުވަސްކޮޅެއް ފަހުން ދެ އާއިލާ ބައްދަލުކުރިއެވެ. ގޭގައި ތައްޔާރުކުރި ސުފުރާމަތީގައި، ދެކުދިންގެ ކައިވެނީގެ ވާހަކަތައް ދެކެވުނެވެ. ހުރިހާ ކަމެއްވެސް ދިޔައީ އުއްމީދުކުރި ފަދައިން ވަރަށް އޮމާންކޮށެވެ. ނަމަވެސް، ދިރިއުޅުމަކީ އެއްވެސް އިންޒާރަކާ ނުލައި އުފާތަކަށް ހުރަސްއަޅާ އެއްޗެކެވެ.
ބުރާސްފަތި ދުވަހެއްގެ ހެނދުނު، ސިއްޙީ މަރުކަޒުގެ ތެރެއަށް ޒޭނާ އަނބުރައިގަނެގެން ވެއްޓުނެވެ. ފުރަތަމަ އެންމެންވެސް ހީކުރީ ވަރުބަލިވީ ކަމަށެވެ. އެތައް ހަފުތާއެއް ވަންދެން ބޮލުގައި ރިއްސުމާއި، އާދަޔާ ޚިލާފު ވަރުބަލިކަމުގެ ޝަކުވާ އޭނާ ކުރަމުން ދިޔައެވެ. ވުމާއެކު، ފުރިހަމަ ޓެސްޓުތަކެއް ހެދުމަށްޓަކައި މާލެ ދިއުމަށް ޒޭނާގެ މަންމަ ބާރުއެޅިއެވެ.
ފުރަން ދިޔަ ހެނދުނު، އާއިލާއާއެކު ޔުމާން ބަނދަރަށް ދިޔައެވެ. ބޯޓު ކައިރީގައި ހުރި ޒޭނާގެ މޫނުމަތިން ފެންނަނީ މާބޮޑު ފަނޑުކަމެކެވެ.
“ތިހާ ކަންބޮޑުވެފައި ނުހުރެބަލަ.” ޒޭނާ ޔުމާން ގާތު ބުންޏެވެ. “ތި އިމްތިޙާނު ކަރުދާސްތައް މާކުކޮށް ނިމުމުގެ ކުރިން އަހަރެން އެނބުރި އަންނާނަން.”
ޔުމާން ހިނިތުންވެވޭތޯ މަސައްކަތް ކުރިއެވެ. “އަހަރެން ކަރުދާސްތައް ނުބަލައި މަޑުކޮށްލާނަން.”
ޒޭނާ ހީނލިއެވެ. އެހެންނަމަވެސް އެ އަޑުގައި ވަރުބަލިކަން ވިއެވެ. “ޔުމާން؟”
“ކީކޭ؟”
“ކޮންމެ ގޮތެއް ވިޔަސް، އަހަންނަށް ވަޢުދުވޭ އަބަދުވެސް ލިޔާނެކަމަށް.”
“ކޮން އެއްޗެއް ލިޔަންވީ؟”
“އަހަރެމެންގެ ވާހަކަ.”
ޔުމާންގެ ނިތްކުރިއަށް ރޫގިނަވިއެވެ. “ތިހެން ތި ބުނީ ކީއްވެ؟”
ޒޭނާ ނަޒަރު ވަކިކޮށްލިއެވެ. “ހަމައެކަނި ވަޢުދުވޭ.”
ޔުމާން ބޯޖަހައިލިއެވެ. “އަހަރެން ވަޢުދުވަން.”
ބޯޓު ނައްޓާލައިގެން ދިޔައެވެ. ދުރު ހޭޅިފަށުން ބޯޓު ގެއްލެންދެން ޔުމާން ޖެޓީމަތީގައި މަޑުކުރިއެވެ.
ތިން ދުވަސް ފަހުން، ޔުމާންގެ ފޯނު ރިންގުވާން ފެށިއެވެ. ގުޅީ ޒޭނާއެވެ. އޭނާގެ އަޑު އިވެނީ ވަރަށް މަޑުކޮށެވެ.
“ޔުމާން، އަހަރެން އެނބުރި ރަށަށް ދަނީ.”
“ވަރަށް އުފާވެރި ޚަބަރެއް! ޑޮކްޓަރުން ކީކޭ ބުނީ؟” ހިމޭންކަން ވެރިވިއެވެ.
“ޒޭނާ؟”
ޒޭނާ ފުން ނޭވާއެއް ދޫކޮށްލިއެވެ. “އެމީހުންނަށް ކަމެއް ފާހަގަވެއްޖެ.”
ޔުމާންގެ ހިތް ނުތަނަވަސްވިއެވެ. “ކޮން ކަހަލަ ކަމެއް؟”
“ބައްޔެއް.. ވަރަށް ބޮޑު ބައްޔެއް.”
ޒޭނާ އެ ބުނި ބަސްތަކާއެކު ޔުމާންގެ މުޅި ދުނިޔެ ހުއްޓުނު ފަދައެވެ. ޑޮކްޓަރުންނަށް ފެނުނީ ކެންސަރުގެ ނުރައްކާތެރި ހާލަތެއް ކަމަށާއި، އިތުރު ޓެސްޓުތަކާއި ފަރުވާ ބޭނުންވި ނަމަވެސް، ސަލާމަތްވުމުގެ އުއްމީދު ކުޑަކަމަށް ޒޭނާ ކިޔައިދިނެވެ.
ޔުމާން އެނދުގެ އަރިމަތީގައި އިށީނދެލިއެވެ. ބުނާނެ އެއްޗެއް ނޭނގުނެވެ.
“ތިތާ އެބަހުރިންތަ؟” ޒޭނާ އެހިއެވެ.
“އާނ.”
“ޕްލީޒް، ކޮންމެވެސް އެއްޗެއް ބުނެބަލަ.”
ޔުމާން ކަރުނަތައް ހިފަހައްޓަމުން ބުންޏެވެ. “އަހަރެމެން އެކުގައި މިކަމާ ހަނގުރާމަކުރާނަން.”
ޒޭނާއަށް ރޮވިއްޖެއެވެ. “އަހަރެން ވަރަށް ބިރުގަނޭ، ޔުމާން.”
ޒޭނާ ދަންނަ ދުވަހުން ފެށިގެން މިއަދާ ހަމައަށް، އޭނާއަށް ހިތްވަރު ދޭނެ ބަހެއް ޔުމާންގެ ދުލަށް ނައީ ފުރަތަމަ ފަހަރަށެވެ. އޭނާ ސިއްރުސިއްރުން ބުނެލިއެވެ. “އަހަރެންވެސް ބިރުގަނޭ. އެކަމަކު، މިކަމާ އެކަނި ކުރިމަތިލާކަށް ޒޭނާއަކަށް ނުޖެހޭނެ.”
*****
ޒޭނާ ފޮނަދުއަށް އެނބުރި އައެވެ. އޭނާގެ ދިރިއުޅުން ބަދަލުވެގެން ދިޔައީ ހޮސްޕިޓަލަށް ދިއުމާއި، ބޭސްތަކާއި، ހިތްދަތި ވާހަކަތަކާއި، މާލެއަށް ކުރަންޖެހޭ ދަތުރުތަކުގެ ބުރެއްގެ ތެރެއަށެވެ.
އޭނާގެ އިސްތަށިގަނޑު ތުނިވާން ފެށިއެވެ. މޫނުމަތީގެ ތާޒާކަން ގެއްލި، މުޅި ގޭތެރޭގައި އެއްއިރެއްގައި ގުގުމި މަޖާ ހިނިތުންވުންތައް މަދުވާން ފެށިއެވެ. އެހެންނަމަވެސް، ކުދިކުދި އުފާތަކުން ހިތްހަމަޖެހުން ހޯދުމަށް އޭނާ އަޒުމް ކަނޑައެޅިއެވެ. އޭނާ ބޭނުންވީ ގޮނޑުދޮށުގައި އިށީނދެލާށެވެ. ގޭގެ ބޭރުގައި ކުދިން ކުޅޭ އަޑު އަހާށެވެ. ކޮންމެ ދުވަހެއްގެ ހަވީރު މަންމަ ތައްޔާރުކޮށްދޭ ސައި ބޯށެވެ. އަދި ހުރިހާ ކަމަކަށްވުރެ ބޮޑަށް، ޔުމާން ދެކިލުމަށެވެ.
ހަށިގަނޑުގައި ކުޑަކޮށްވެސް ވަރު ހުންނަ ދުވަސްތަކުގައި، އެމީހުން ޒޭނާގެ ގޭގެ ކުޑަ ބަގީޗާގައި އިށީނދެ ތިބެއެވެ. އެ ބަގީޗާގައި ރަތް އަދި ފިޔާތޮށި ކުލައިގެ ކުލަގަދަ ކާރުނޭޝަން މާތައް ފޮޅިފައި ހުއްޓެވެ.
އެއްދުވަހެއްގެ ހަވީރު، ޔުމާން ފޮތެއް ހިފައިގެން އައެވެ.
“މީ ކޮން އެއްޗެއް؟” ޒޭނާ އެހިއެވެ.
“އަހަރެމެންގެ ވާހަކަ.”
ޒޭނާ އެ ފޮތް ހުޅުވާލިއެވެ. ފުރަތަމަ ޞަފުހާގައި އަތުލިޔުމުން ލިޔެފައިވާ ޖުމްލައެއް އޮތެވެ. “ބައެއް މީހުން ތިބާގެ ޙަޔާތަށް އަންނަނީ ކުޑަ ހިނދުކޮޅަކަށެވެ. އަނެއްބައި މީހުން ވެގެންދަނީ ދިރިއުޅުމުގެ ހަޤީޤީ މާނަ ވިސްނައިދޭ ސަބަބަށެވެ.”
ޒޭނާގެ ލޮލުން ކަރުނަ ފާއްދާލިއެވެ. “ހަނދާން އެބަހުރި ދޯ.”
“އަހަރެން ވަޢުދުވީމެއްނު.”
ޒޭނާ ޞަފުހާތައް އުކަމުން ދިޔައެވެ. އެންމެ ފުރަތަމަ ބައްދަލުވި ދުވަހާއި، ވަޔާ އުދުހުނު ކަރުދާސްތަކާއި، ކުތުބުޚާނާގައި ދެއްކި ވާހަކަތަކާއި، ހަނދުވަރުގެ އަލީގައި ހޭދަކުރި ރޭތަކުގެ ހަނދާންތައް ޔުމާން ވަނީ ރައްކާތެރިކަމާއެކު ލިޔެފައެވެ.
“އަހަރެން ހުންނަ ވަރަށްވުރެ މާ މޮޅު މީހެއްގެ ގޮތުގައި ތި ލިޔެފައިވަނީ.” ޒޭނާ ބުންޏެވެ.
“އެއީ ޒޭނާއަށް ތިމާގެ އަމިއްލަ ޚާއްސަކަން ނޭނގޭތީ.”
ޒޭނާ ހިނިތުންވެލިއެވެ. “މި ވާހަކަ ނިންމާނަންތަ؟”
“އާނ، ޔަޤީނުންވެސް.”
“އަހަރެން މި ވާހަކައިގެ ނިމުން ކިޔަން ނެތް ނަމަވެސް؟”
ޔުމާންގެ މޫނު ބަނަވިއެވެ. “ތިހެން ނުބުނެބަލަ.”
“ޔުމާން، ޕްލީޒް. އަހަރެން މި ވާހަކަ ދައްކަން ބޭނުން.” ޔުމާން އަނެއް ފަރާތަށް އެނބުރި، އޭނާގެ އިޙުސާސްތައް ކޮންޓްރޯލްކުރަން މަސައްކަތް ކުރިއެވެ.
ޒޭނާ މަޑުމައިތިރިކަމާއެކު ކުރިއަށް ގެންދިޔައެވެ. “އަހަންނަށް ބާކީ އޮތީ ކިހާ ވަގުތެއް ކަމެއް ނޭނގެ. އަދި ހުރިހާ ކަމެއް ރަނގަޅު ކަމަށް ހެދިގެން، ބާކީ އޮތް ވަގުތުތައް ބޭކާރުކޮށްލާކަށް އަހަރެން ބޭނުމެއް ނޫން.”
ޔުމާން ފޮތަށް ބަލަހައްޓައިގެން ހުރެ ބުންޏެވެ. “ޒޭނާ ނެތި އަހަރެން ދެން ހަދާނީ ކިހިނެއް؟”
ޒޭނާގެ ދެލޯ ކަރުނުން ފުރިގެން ދިޔައެވެ. “ދިރިއުޅޭނީ.”
“އެއީ ޖަވާބެއް ނޫން.”
“އަހަރެންގެ އަތުގައި އޮތް ހަމައެކަނި ޖަވާބަކީ އެއީ.”
ޔުމާން ބޯހޫރާލިއެވެ. “އަހަރެން ބޭނުންވީ ޒޭނާއާ ކައިވެނިކުރަން. އަހަރެން ބޭނުންވީ އެކުގައި ގެއެއް ބިނާކުރަން. މޫސުމާމެދު ޒޭނާ ޝަކުވާކުރާ އަޑު އަހަމުން މުސްކުޅިވާން.”
ޒޭނާ ކަރުނައިގެ ތެރެއިން ހީނލިއެވެ. “އަހަރެން ކޮންމެ ދުވަހަކުވެސް ޝަކުވާ ކުރީމުސް.”
“އަހަންނަށް އެނގޭ.”
“އަދި ބޯން ބޭނުން ނުވިޔަސް، ގަދަކަމުން ސައިވެސް ބޯން ދިނީމުސް.”
“އެކަންވެސް އަހަންނަށް އެނގޭ.”
ހިނދުކޮޅަކަށް އެ ދެމީހުން އެކުގައި ހިނިތުންވެލިއެވެ. ދެން ޒޭނާ ބުންޏެވެ. “އަހަރެން ކުރިން ވަކިވެގެން ގޮސްފިނަމަ، އަހަންނަށް ކަމަކަށް ވަޢުދުވޭ.”
ޔުމާން ފޮތް ލައްޕައިލިއެވެ. “ކޮންމެ ކަމަކަށްވެސް.”
“އަހަރެންގެ ހަނދާނަކީ ހަމައެކަނި ހިތާމައެއް ކަމުގައި ނަހަދާތި.”
ޔުމާނަށް ޖަވާބެއް ނުދެވުނެވެ. ޒޭނާ ބަގީޗާއާ ދިމާއަށް ބަލައިލިއެވެ. ހަވީރުގެ އަވި މާތަކުގެ މައްޗަށް އެޅިފައި ހުއްޓެވެ.
“ވައިރޯޅި އައިސް ކަރުދާސްތައް ޖަހައިގަތުމުން ހީނގަތް އަންހެން ކުއްޖާ ހަނދާންކުރާތި. އަބަދުގެ އަބަދަށް ލޯބިވާނެ ކަމަށް ޤަބޫލުކުރި އަންހެން ކުއްޖާ ހަނދާންކުރާތި.”
ޔުމާން އިސްދަށަށް ޖަހައިލިއެވެ. “އަދިވެސް އެމީހަކުދެކެ އިންތިހާއަށް ލޯބިވާ މީހަކަށް އަލްވަދާޢު ކިޔާނެ ގޮތެއް އަހަންނަކަށް ނޭނގެ.”
“އެހެންވިއްޔާ މިއަދު އަލްވަދާޢު ނުކިޔާ.” ޔުމާން ޒޭނާއަށް ބަލައިލިއެވެ. “މިއަދު ހަމައެކަނި އުފަލުގައި ތިބެމާ.”
އެހެންކަމުން، އެ ހިމޭން ހަވީރުގެ އުޑުދަށުގައި، ފޮތްތަކާއި، ކުޑައިރުގެ ހަނދާންތަކާއި، އެކުގައި ދެކެމުން އައި އާދައިގެ މުސްތަޤުބަލުގެ ވާހަކަތައް ދައްކަން އެމީހުން ތިއްބެވެ. އެއިން އެކަކުވެސް އިރުއޮއްސޭކަށް ބޭނުމެއް ނުވިއެވެ.
(ނުނިމޭ)
