ސޯޔާ ބީންސް އިން ފެށިގެން ފްލެކްސް ސީޑްސް އާ ހަމައަށް، އާންމުކޮށް މި ބޭނުންކުރާ ކާނާތަކުގައި “ފައިޓޯއެސްޓްރޯޖަން” އެކުލެވިގެންވެއެވެ. މިއީ އަންހެނުންގެ ސިއްޙަތަށް ފައިދާހުރި މާއްދާތަކަކަށް ވީއިރު، މެނޯޕޯޒް ނުވަތަ އިއްދައިން ވަކިވުމުގެ މަރުހަލާގައި މީގެން ހަޤީޤީ އެހީތެރިކަމެއް ލިބިދާނެ ހެއްޔެވެ؟

އަންހެނުންގެ އުމުރުން ދުވަސްވަމުންދާ ވަރަކަށް، ހަށިގަނޑުގައި އެސްޓްރޯޖަން ހުންނަ މިންވަރު މަދުވުމުގެ ސަބަބުން ހަށިގަނޑު މާބޮޑަށް ދާހިއްލުމާއި، ރޭގަނޑު ފިނިވުމާއި، ހަށިގަނޑުގެ ބައްޓަމަށް ބަދަލު އައުމުގެ އިތުރުން ކަށީގެ ދުޅަހެޔޮކަން ކުޑަވުން ފަދަ ކަންކަން މެދުވެރިވެއެވެ. މީގެ ސަބަބުން، ހަށިގަނޑުގައިވާ އެސްޓްރޯޖަން ރިސެޕްޓަރތަކާ ގުޅިލާމެހިގެން މަސައްކަތްކުރާ ގަސްގަހާގެހިން ލިބޭ މާއްދާއެއް ކަމަށްވާ “ފައިޓޯއެސްޓްރޯޖަން” އަށް އޮންނަ ޝައުޤުވެރިކަން ވަނީ އިތުރުވެފައެވެ.

މިއަށް “ޕްލާންޓް އެސްޓްރޯޖަން” އޭ ކިޔުނު ކަމުގައިވިޔަސް، މިއީ އިންސާނާގެ ހަށިގަނޑުގައި ހުންނަ އެސްޓްރޯޖަންއާ އެއްގޮތް އެއްޗެއް ނޫނެވެ. އަދި މީގެ ސަބަބުން ހޯރމޯން ހުންނަ މިންވަރު ކޮންމެހެން އިތުރުވެގެންނެއް ނުދެއެވެ. އެހެންނަމަވެސް، މި މާއްދާތައް އެކުލެވޭ ވަކި ބާވަތްތަކުގެ ކާނާ ބޭނުންކުރުމަކީ، ޚާއްސަކޮށް އުމުރުގެ މެދުތެރޭގައާއި މެނޯޕޯޒްގެ ދުވަސްވަރު އަންހެނުންގެ ދުޅަހެޔޮކަމަށް އެހީތެރިވެދޭނެ ހަމަހަމަ ކާނާއެއްގެ ބައެއް ކަމުގައި ބެލެވިދާނެއެވެ.

ކެއުމުގައި ހިމެނުން މުހިންމު 5 ބާވަތެއް:

1. ސޯޔާ ބީންސް އަދި ސޯޔާގެ އުފެއްދުންތައް

ސޯޔާ ބީންސްގައި “އައިސޯފްލޭވޯންސް” އެކުލެވިގެންވެއެވެ. މިއީ ފައިޓޯއެސްޓްރޯޖަންގެ ބާވަތްތަކުގެ ތެރެއިން އެންމެ ގިނައިން ދިރާސާކުރެވިފައިވާ މާއްދާއެވެ. ޓޯފޫ، ޓެމްޕޭ، އެޑަމާމޭ އަދި ސޯޔާ ކިރަކީ ޕްރޮޓީންގެ އިތުރުން މި މާއްދާތައް ލިބިދޭ ބާވަތްތަކެކެވެ. ބައެއް ދިރާސާތަކުން ދައްކާގޮތުގައި ސޯޔާ ބޭނުންކުރުމުން މެނޯޕޯޒްގެ ދުވަސްވަރު މާބޮޑަށް ދާހިއްލުން ކުޑަކޮށްދިނުމަށް އެހީތެރިވެދެއެވެ. ނަމަވެސް މީގެ ނަތީޖާ މީހުންނަށް ފެންނަ މިންވަރު ތަފާތެވެ.

2. ފްލެކްސް ސީޑްސް

ފައިބަރު އަދި ގަސްގަހާގެހިން ލިބޭ އޮމެގާ-3 ފެޓީ އެސިޑްސް މީގައި ގިނަ އަދަދަކަށް އެކުލެވިގެންވެއެވެ. ފްލެކްސް ސީޑްސް މުގުރާލުމަށްފަހު ބަތްޕެން، ސްމޫތީ ނުވަތަ ޔޯގަޓަށް އަޅައިގެން ބޭނުންކުރެވިދާނެއެވެ. އެހެންނަމަވެސް، މެނޯޕޯޒްގެ އުނދަގޫތަކަށް މީގެން ސީދާ ލުޔެއް ލިބޭކަމުގެ ހެކިތައް އަދި އެހާ ސާފެއް ނޫނެވެ.

3. ސެސަމީ ސީޑްސް

ސެސަމީ ސީޑްސްގައި ހަށިގަނޑަށް ފައިދާހުރި ފެޓްސްގެ އިތުރުން މައުދަނީ މާއްދާތައް އެކުލެވިގެންވެއެވެ. ސަލަޑް ނުވަތަ ތަރުކާރީ ފަދަ ތަފާތު ކެއުންތަކުގެ މައްޗަށް ސެސަމީ ސީޑްސް ބުރުވައިގެން ބޭނުންކުރުމަކީ ކާނާގެ ބާވަތްތައް މުއްސަނދިކޮށްދޭނެ ކަމެކެވެ. އެހެންނަމަވެސް، އެސްޓްރޯޖަންގެ މިންވަރަށް ނުވަތަ މެނޯޕޯޒްގެ އުނދަގޫތަކަށް މީގެން ކުރާ ސީދާ އަސަރުތައް އަދި އެހާ ބޮޑަށް ކަށަވަރުކުރެވިފައެއް ނުވެއެވެ.

4. މުގުގެ ބާވަތްތަކާއި ބީންސް

ސަނާމުގު އަދި ބީންސްގެ ބާވަތްތަކުގައި ފައިޓޯއެސްޓްރޯޖަން ހިމެނޭ ގަސްގަހާގެހީގެ މާއްދާތަކުގެ އިތުރުން ޕްރޮޓީން، ފައިބަރު އަދި ކޮންމެހެން ބޭނުންތެރި ނިއުޓްރިއެންޓްސް އެކުލެވިގެންވެއެވެ. ޤަވާއިދުން މިތަކެތި ކެއުމަކީ ހަޖަމުކުރުމުގެ ނިޒާމާއި ހިތުގެ ދުޅަހެޔޮކަމަށް އެހީތެރިވެދޭނެ ކަމެއް ކަމަށްވާތީ، މިއީ އުމުރުގެ މެދުތެރޭގައި ސިއްޙަތަށް ފައިދާހުރި ކާނާއެކެވެ.

5. ހިއްކި މޭވާ

ހިއްކާފައި ހުންނަ އެޕްރިކޮޓް، ކަދުރު އަދި ޕްރޫންސްގައި ފައިބަރާއި މިނަރަލްސްގެ އިތުރުން ފައިޓޯއެސްޓްރޯޖަން އެކުލެވިގެންވެއެވެ. ޚާއްސަކޮށް ޕްރޫންސް ބޭނުންކުރުމަކީ ކަށީގެ ދުޅަހެޔޮކަމަށް އެހީތެރިވެދޭ ކަމެއްތޯ ބެލުމަށް ދިރާސާކުރެވެމުންދެއެވެ. ހިއްކި މޭވާގައި ހަކުރު ގިނަ އަދަދަކަށް ހުންނާތީ، މިއީ މިންގަނޑެއްގައި ބޭނުންކުރުން މުހިންމު ކާނާއެކެވެ.

މި ބާވަތްތަކުން އެސްޓްރޯޖަންގެ ބަދަލު ހޯދިދާނެ ހެއްޔެވެ؟

ނޫނެކެވެ. ފައިޓޯއެސްޓްރޯޖަން ހަށިގަނޑާ މުއާމަލާތްކުރާ ގޮތް އިންސާނާގެ އެސްޓްރޯޖަންއާ ތަފާތެވެ. އަދި މީގެ އަސަރު ބިނާވެފައިވަނީ ބޭނުންކުރާ މިންވަރާއި މީހާގެ އަމިއްލަ ހަށިގަނޑުގެ ހާލަތުގެ މައްޗަށެވެ. އެމެރިކާގެ ނޭޝަނަލް ސެންޓަރ ފޯ ކޮމްޕްލިމެންޓަރީ އެންޑް އިންޓެގްރޭޓިވް ހެލްތު އިން ބުނާ ގޮތުގައި، މެނޯޕޯޒްގެ އުނދަގޫތަކަށް މީގެން ކުރާ ފައިދާއާމެދު ކުރެވިފައިވާ ދިރާސާތަކުގެ ނަތީޖާތައް ހުރީ އެކި ގޮތްގޮތަށެވެ.

އާންމު މިންވަރަކަށް މިފަދަ ކާނާ ބޭނުންކުރުމަކީ ގިނަ މީހުންނަށް އެކަށީގެންވާ ކަމެކެވެ. ނަމަވެސް، ފައިޓޯއެސްޓްރޯޖަން އެކުލެވޭ ސަޕްލިމެންޓްތަކާއި ޤުދުރަތީ ކާނާއާ ތަފާތެވެ. ހޯރމޯންތަކަށް ނާޒުކު ބަލިތައް ހުންނަ މީހުން ނުވަތަ މިހާރު ކުރަމުންދާ ފަރުވާއަކާމެދު ކަންބޮޑުވުން ހުރި އަންހެނުން، މިފަދަ ސަޕްލިމެންޓެއް ބޭނުންކުރުމުގެ ކުރިން ސިއްޙީ މާހިރެއްގެ ލަފާ ހޯދަންވާނެއެވެ.

ދުޅަހެޔޮކަމާއެކު އުމުރުން ދުވަސްވުމަށްޓަކައި ހަމަހަމަ ކާނާ ބޭނުންކުރުމާއި، އެކަށީގެންވާ މިންވަރަށް ކެލްސިއަމް، ވިޓަމިން ޑީ އަދި ޕްރޮޓީން ހޯދުމުގެ އިތުރުން ޤަވާއިދުން ކަސްރަތުކުރުމާއި ރަނގަޅަށް ނިދުން މުހިންމެވެ. މެނޯޕޯޒްގެ އުނދަގޫތައް ބޮޑުވާނަމަ، ހަމައެކަނި ކާނާއަށް ބަރޯސާވުމުގެ ބަދަލުގައި ޑޮކްޓަރެއްގެ ލަފާ ހޯދުން ބުއްދިވެރިއެވެ.

ސޯޔާ ބީންސް، ފްލެކްސް ސީޑްސް، ސެސަމީ ސީޑްސް، މުގުގެ ބާވަތްތައް އަދި ހިއްކި މޭވާއަކީ ފައިދާހުރި ކާނާގެ ބައެއް ކަމުގައި ވިޔަސް، އެއްވެސް ވަކި ކާނާއަކަށް އެސްޓްރޯޖަންގެ މިންވަރު އަނބުރާ އިއާދަކޮށެއް ނުދެވޭނެއެވެ. އަމާޒަކަށް ވާންވީ ހޯރމޯންގެ މުއުޖިޒާތެއް ހޯދުމެއް ނޫނެވެ. އޭގެ ބަދަލުގައި، އުމުރުގެ ކޮންމެ މަރުހަލާއެއްގައިވެސް އަންހެނުންގެ ދުޅަހެޔޮކަމަށް އެހީތެރިވެދޭނެ ފަދަ ރަނގަޅު ކާނާ އިޚްތިޔާރު ކުރުމެވެ.