ފުރަތަމަ ފަހަރަށް ނިޝާއަށް އުއްމީދެއްގެ އަލިކަން އިޙުސާސްވިއެވެ. އެ އަޑު އެހެން ބަޔަކަށް އިވިއްޖެއެވެ. އެ މަންޒަރު އެހެން ބަޔަކަށް ފެނިއްޖެއެވެ. އަދި މިފަހަރު، މިއީ އޭނާ އަމިއްލައަށް ހަދައިގެން އުޅޭ ޚިޔާލީ ކަމެކޭ އެކަކަށްވެސް ނުބުނެވޭނެއެވެ.
*****
ލީނާ އެނބުރި އައީ އޭނާގެ ޓީމު ލީޑަރު، ޕްރޮފެސަރ ޝައުޤަތު އާދަމްއާ އެކުގައެވެ. އޭނާއަކީ ތަފާތު ހަކަތަތަކާއި ސައިންސަށް ނުބައްދަލު ހާދިސާތައް ދިރާސާކުރުމުގައި އެތައް އަހަރެއް ހޭދަކޮށްފައިވާ އެކްސްޕެރިމެންޓަލް ފިޒިސިސްޓެކެވެ. ޕްރޮފެސަރ ޝައުޤަތަކީ ޠަބީޢަތުގައި ކަންކަމާމެދު ޝައްކުކުރާ، ނަމަވެސް އާ ހޯދުންތަކަށް ވިސްނުން ހުޅުވިފައިވާ ބޭފުޅެކެވެ. އޭނާ ބާރުއެޅީ ކޮންޓްރޯލްކުރެވިފައިވާ މާހައުލެއްގައި ކަންކަން ދިރާސާކޮށް، ވަކިފަރާތަކަށް ނުޖެހި ހެކިތައް ރެކޯޑުކުރުމަށެވެ.
ދެ ދުވަހުގެ ތެރޭގައި އެ ޓީމުން ވަނީ ސަބަބެއް ނޭނގި ފިނިހޫނުމިން ކުއްލިއަކަށް ދަށްވުމާއި، އެއްވެސް މީހަކު އަތްނުލައި ތަކެތި އަމިއްލައަށް ހަރަކާތްތެރިވުމާއި އަދި އެތަނުގައި ތިބި އެއްވެސް މީހެއްގެ އަޑާ ދިމާނުވާ ބީރައްޓެހި އަޑުތަކެއް ރެކޯޑުކޮށްފައެވެ.
ނިޝާ ހޮސްޕިޓަލަށް ގެންދިއުމަށް އެއްބަސްކުރުވުމުގެ އުއްމީދުގައި ޑރ. ވަޙީދުވެސް އެނބުރި އައެވެ. އޭނާއަށް ފެނުނީ ސީލިންގުގައި އުފެދިފައިވާ ކަޅުކުލައިގެ ބޮޑު ލަފެއް ދިރާސާކުރަން ތިބި ރިސާޗަރުންނެވެ.
“ނިޝާ. އަހަރެން އަދިވެސް ޤަބޫލުކުރަނީ މިއީ ނަފްސާނީ ކަމެއްގެ ގޮތުގައި ވިސްނަންޖެހޭ ކަމެއް ކަމަށް.” އޭނާ ބުންޏެވެ.
ނިޝާ ސާބިތުކަމާއެކު އޭނާއާ ދިމާއަށް ބަލައިލިއެވެ. “އަދި އަހަރެން ދެކޭގޮތުގައި ޑޮކްޓަރަށް ކަމެއް ނުބައިކޮށް ވިސްނިދާނެ ކަމަށްވެސް ޤަބޫލުކުރަން ޖެހޭނެ.”
ޑރ. ވަޙީދަށް ޖަވާބެއް ނުދެވެނީސް ޕްރޮފެސަރ ޝައުޤަތު ކައިރިއަށް ޖެހިލިއެވެ. “އަހަރެމެންނަށް މިވަނީ މިވަގުތު ސައިންސުން ސިފަކޮށްނުދެވޭ ކަންތައްތަކެއް ރެކޯޑުކުރެވިފައި. އަހަރެމެން މިއީ ރޫޙާނީ ކަމެކޭ ނުބުނަން. އަހަރެމެން މި ބުނަނީ މި ހެކިތަކަކީ އިތުރަށް ދިރާސާކުރަންޖެހޭ ކަންކަމޭ.”
ޑރ. ވަޙީދުގެ މޫނުމަތިން ފެނުނީ ހިތްހަމަނުޖެހުމެވެ. ނިޝާ އޭނާއަށް ފުރަގަސްދިނެވެ.
ވިދިގެން އައި ދުވަސްތަކުގައި ގޭތެރެ އޮތީ އަމާންކޮށެވެ. ދެން ނިޝާގެ ގާތަށް ޒިޔާރަތްކުރީ އޭނާގެ ލޯބިވެރިޔާ އަޙްމަދު ރިޔާޒެވެ. ރިޔާޒަކީ މެކޭނިކެކެވެ. އޭނާއަކީ ކެތްތެރި، ނިޝާގެ ކުރީގެ ފިރިމީހާ ޙަސަންގެ މަޤާމު އަތުލަން ނޫޅޭ، އަދި ކުދިންގެ ދިރިއުޅުމުގެ ތެރެއަށް ގަދަކަމުން ވަންނަން ނޫޅޭ މަޑުމައިތިރި މީހެކެވެ. އޭނާ އައީ އާއިލާއަށް މޭވާ ހިފައިގެންނެވެ. އަދި އިޔާންގެ ހަލާކުވެފައިވާ ކުޅޭ ބޯޓު މަރާމާތުކޮށްދިނުމުގައި ވަގުތު ހޭދަކުރިއެވެ.
އެރޭ، ކުދިން ނިދުމުން، އޭނާ ނިޝާގެ ކޮޓަރީގައި މަޑުކޮށްލިއެވެ.
“ނިޝާ ވަރަށް ވަރުބަލިވެފައި ހުރިހެން ހީވަނީ.” އޭނާ ބުންޏެވެ.
“އާނ. އަހަރެން ވަރަށް ވަރުބަލިވެއްޖެ.”
“ހިނގާ މަގޭ ދައްތަގެ ގޭގައި ދުވަސްކޮޅަކު މަޑުކޮށްލަން. މިތާ ރިސާޗަރުންނަށް އެމީހުންގެ މަސައްކަތްކުރަން ދޫކޮށްލާ.”
“އަހަންނަކަށް އަބަދު ފިލައިގެން ނޫޅެވޭނެ.”
“މި ހަނގުރާމަ އެކަނި ކުރާކަށް ނިޝާއަކަށް ނުޖެހޭނެ.”
ޝުކުރުވެރިކަމާއެކު ނިޝާ އޭނާއަށް ބަލައިލިއެވެ. އެވަގުތު ކުއްލިއަކަށް ކޮޓަރީގެ ދޮރު ބާރަށް ޖެހުނެވެ. ރިޔާޒް ކޮޅަށް ތެދުވިއެވެ.
“އެއީ ކޯއްޗެއް؟”
ކޮޓަރީގެ ބޮކި ނިވި، އަނދިރިވިއެވެ. ރިޔާޒްގެ މޭމަތީގައި އެއްޗެއް ޖެހުނު ފަދައަކުން އޭނާ ފަހަތަށް ވިއްސައިގެން ދިޔައެވެ.
“ނިޝާ!”
ނިޝާގެ އުނަގަނޑުގައި މީހަކު ހިފައި، ގަދަކަމުން އެނދުމައްޗަށް ވައްޓާލިކަން އޭނާއަށް އިޙުސާސްވިއެވެ. އޭނާގެ ދެއަތް ގޮދަޑީގައި ތަތްކޮށް ފިއްތާލިއެވެ. މުޅި ކޮޓަރި ގަނޑުފެންކޮޅަކަށް ވެގެން ދިޔައެވެ.
ރިޔާޒް ދުވެފައި އެނދާ ދިމާއަށް އައެވެ. “އޭނާ ދޫކޮށްލާ!”
އޭނާ ނިޝާގެ ހަށިގަނޑު މަތީގައިވާ ހުސް ޖާގައަށް އަތްދިއްކޮށް ހިފެހެއްޓިއެވެ. އޭނާގެ އަތުގައި އެއްޗެއް ބީހުނެވެ. އެތަނުގައި ހަރު އެއްޗެއް ހުއްޓެވެ. ރިޔާޒް އޭނާގެ މުޅި ބާރުލާފައި ދަމައިގަތެވެ. ނަމަވެސް ނުފެންނަ ބާރަކުން އޭނާ ވިއްސައިގެން ގޮސް އަލަމާރީގައި ޖެހި، ބިންމައްޗަށް ވެއްޓުނެވެ.
ނިޝާ ބިރުން ހަޅޭއްލަވައިގަތެވެ. ބިޔަ ކަކުލެއް އޭނާގެ ދެފަރާތުގައި ވިއްދާލި ފަދައިން ގޮދަޑި އަޑިއަށް ދިޔައެވެ. ގަނޑުފެން ފަދަ ފިނި އިނގިލިތަކެއް އޭނާގެ ކަރަށް ފިތެމުން ދިޔައެވެ.
“ރިޔާޒް!” ނޭވާ ހާސްވަމުން ދިޔަ ހާލު ނިޝާއަށް ގޮވާލެވުނެވެ.
ރިޔާޒް ތެދުވެ އަނދިރިގަނޑުގެ ތެރެއަށް އަތުން ޖެހިއެވެ. އެވަގުތު އޭނާގެ މޫނުމަތީގައި ބާރު އެތިފަހަރެއް އެޅި، އަނެއްކާވެސް ވެއްޓުނެވެ.
ކުއްލިއަކަށް ކޮޓަރީގެ ދޮރު ހުޅުވިގެން ދިޔައެވެ. ދޮރުމަތީގައި ހުރީ އަތުބައްތިއެއް ހިފައިގެން ހުރި އިޔާންއެވެ. އޭނާއަށް ފެނުނީ އެނދުމައްޗަށް ފިތިފައި އޮތް އޭނާގެ މަންމައާއި، އޭގެ ކައިރީގައި ތެޅިފޮޅެމުންދިޔަ ރިޔާޒެވެ.
“މަގޭ މަންމަ ކައިރިން ދުރަށްދޭ!”
އިޔާން ކުރިއަށް ދުވެފައި ގޮސް، އަތުގައި އޮތް ބައްތިން ރިޔާޒްގެ ބޮލުގައި ޖެހިއެވެ.
“ހުއްޓާލާ!” ރިޔާޒް ހަޅޭއްލަވައިގަތެވެ.
އިޔާން ރޮމުން އަނެއްކާވެސް ޖެހިއެވެ. “މަންމަ ގައިގަ އަތްނުލާ!”
“އިޔާން، ހުއްޓާލާ!” ނިޝާ ބާރަށް ގޮވާލިއެވެ.
އެވަގުތު އެ ނުފެންނަ ބާރު ކެނޑިގެން ދިޔައެވެ. ނިތްކުރިން ލޭ ފައިބަމުން ދިޔަ ހާލު ރިޔާޒް ކަކޫމައްޗަށް ތިރިވިއެވެ. އިޔާން ބިރުން ފަހަތަށް ޖެހިލިއެވެ. “އަހަރެން ހީކުރީ..”
“އަހަންނަށް އެނގޭ.” ރިޔާޒް ސިއްރުސިއްރުން ބުންޏެވެ. އޭނާއަކަށް ނިޝާއާ ދިމާއަށް ބަލާކަށް ނުކެރުނެވެ.
ފަހުން، ހޮސްޕިޓަލުގައި ނަރުހަކު ރިޔާޒްގެ ޒަޚަމްތަކަށް ފަރުވާ ދެމުންދިޔައިރު، އޭނާ އިނީ ނިޝާގެ ކައިރީގައެވެ. ގިނައިރުތަކެއް ވަންދެން އެއްވެސް ވާހަކައެއް ނުދައްކައެވެ. އެންމެ ފަހުން އޭނާ ވާހަކަދެއްކިއެވެ.
“އަހަރެން ނިޝާދެކެ ލޯބިވޭ. އެކަމަކު އަހަންނަކަށް މިކަމެއް ނުވާނެ.”
ނިޝާގެ ހިތް ކުދިކުދިވި ކަހަލައެވެ. “ކަލޭ ހީކުރަނީ މިއީ އަހަރެންގެ ސަބަބުން ވާކަމެއް ކަމަށްތަ؟”
“ނޫން. އަހަންނަކަށް ނޭނގެ ވިސްނާނެ ގޮތެއްވެސް.”
“އެހެންވީއިރު ބިރުން އަހަރެން ދޫކޮށްނުލާ.”
އޭނާ ލޯ މަރާލިއެވެ. “އަހަރެން ބިރުގަންނަނީ އަހަންނަށް ސިފަކޮށްނުދެވޭ ކަމެއް ފެނުނީމަ. އަހަރެން އަތްލީ ހުސް ތަނެއްގަ، އެކަމަކު އެ އެތީގެ ބާރު އަހަންނަށްވުރެ މާ ގަދަ. އަހަންނަކަށް ނިޝާއެއް ރައްކާތެރިއެއް ނުކުރެވޭނެ. އަދި އެ ގޭގަ ނިދާކަށްވެސް އަހަންނަކަށް ނުކެރޭނެ.” އޭނާގެ ލޮލުން ކަރުނަ ފޭބިއެވެ.
ނިޝާ އޭނާގެ އަތުގައި ހިފަން އުޅުނެވެ. ނަމަވެސް ރިޔާޒް މަޑުމަޑުން އަތް ދަމައިގަތެވެ.
“މާފުކުރޭ.” ފަތިސްވުމުގެ ކުރިން އޭނާ ނުކުމެގެން ހިނގައްޖެއެވެ.
ނިޝާ ބަލަހައްޓައިގެން ހުރެ ވިސްނައިލިއެވެ. އެ ނުފެންނަ ބާރު އެ އަތުލަނީ ހަމައެކަނި އޭނާގެ ހަމަޖެހުމެއް ނޫނެވެ. އެ އެތި އެ ގެންދަނީ އޭނާ ލޯބިވާ އެންމެންނެވެ.
*****
ޕްރޮފެސަރ ޝައުޤަތު ޤަބޫލުކުރި ގޮތުގައި އެ އެތި ހަރަކާތްތެރިވަނީ އެއަށް ފާރަލައި ދިރާސާކުރަން އުޅޭ ވަގުތުތަކުގައެވެ.
“މީގަ ތަކުރާރުވާ އުސޫލެއް އެބައޮތް. އެ އެތި ހަރަކާތްތެރިވަނީ ނިޝާ ބިރުގަންނަ ވަގުތުތަކުގައްޔާއި، މީހަކު ނިޝާގެ ވާހަކަތަކާމެދު ސުވާލު އުފައްދާ ހިނދު. ނުވަތަ އަހަރެމެން އެ އެތީގެ ހަރަކާތްތައް ރެކޯޑުކުރަން އުޅޭ ވަގުތު.” އޭނާ ނިޝާއަށް ކިޔައިދިނެވެ.
“ކީއްވެ އަހަރެން؟”
“އަހަންނަކަށް ނޭނގެ.”
“އެ އެތި އަހަންނަށް ހަމަލާދެނީ ކީއްވެ؟”
ޝައުޤަތުގެ މޫނުމަތިން ފެނުނީ ކަންބޮޑުވުމެވެ. “އަހަރެމެން ހޯދަންވީ އެ ސުވާލުގެ ޖަވާބު.”
އޭނާ ހުށަހެޅީ ތަހުލީލެކެވެ. ރައްކާތެރި ދިރާސާ މަރުކަޒެއްގެ ތެރޭގައި ނިޝާގެ ކޮޓަރީގެ އަސްލާ އެއްފަދަ ކޮޕީއެއް ހެދުމަށެވެ. އެ ކޮޓަރީގައި ތަފާތު ސެންސަރުތަކާއި، ކެމެރާތަކާއި، އަދި ފިނިހޫނުމިން ބަލާ ޚާއްސަ ވަސީލަތްތައް ހަރުކުރެވޭނެއެވެ. ސައިންސްވެރިން އުއްމީދުކުރީ އެ ހަމަލާތައް ދިމާވާ ހާލަތްތައް އަލުން އުފައްދައި، އެކަމުގެ ފަހަތުގައިވާ އެއްޗެއްގެ ހެކި ހޯދުމަށެވެ.
މި ރޭވުމަކީ ނުރައްކާތެރި ކަމެކެވެ. އެކަމަކު ނިޝާ ހުރީ ވަރުބަލިވެފައެވެ.
“އެކަން ކުރޭ.” އޭނާ ބުންޏެވެ.
ޑރ. ވަޙީދު ވަގުތުން ދެކޮޅުހެދިއެވެ. “މިއީ ބޮޑު ގޯހެއް. ތިމާއަށް ނޭނގޭ ބާރަކަށް ގަސްތުގައި ގޮންޖަހައި ހޭލައްވާކަށް ނުވާނެ.”
ޕްރޮފެސަރ ޝައުޤަތު ހަމަޖެހިލިއެވެ. “އަހަރެމެންނާއެކު ކުއްލި ހާލަތްތަކުގައި ހަރަކާތްތެރިވާނެ މީހުން ތިބޭނެ. އަދި ކޮންމެ ވަސީލަތެއް ދުރުން ކަނޑާލެވޭނެ ނިޒާމު ހުންނާނެ.”
“އޭގެ މާނައަކީ އެއީ ރައްކާތެރި ކަމެކޭ ނޫން.”
ނިޝާ ޑޮކްޓަރާ ދިމާއަށް އެނބުރުނެވެ. “އަހަންނަށް އެހީވާން ޑޮކްޓަރަށް އެތައް މަހެއް ލިބުނު. އެކަމަކު ޑޮކްޓަރު ކުރިހާވެސް ކަމަކީ މިއީ އަހަރެން ހިތަށްއަރާ ކަންތައްތަކެކޭ ބުނުން.”
“އަހަރެން އުޅުނީ ނިޝާ ރައްކާތެރިކުރަން.”
“އެހެންވިއްޔާ މިފަހަރު އަހަންނަށް އިތުބާރުކުރޭ.”
ފުރަތަމަ ފަހަރަށް ޑރ. ވަޙީދުގެ އަނގައިން ބަހެއް ނުނިކުތެވެ.
ތަހުލީލު ކުރުމަށް ހަމަޖެހުނީ ދަންވަރު ބާރަ ޖަހާއިރެވެ. ނިޝާގެ ކޮޓަރި ކޮޕީކޮށް ހެދީ ސިނާއީ ބަނދަރު ކައިރީގައި ހުރި ބަންދު ލެބޯޓްރީއެއްގައެވެ. އޭގެ ފާރުތަކާއި، ދޮރުފޮތިތަކާއި، ބާ ލަކުޑި އެނދު ހުރީ އަސްލު ކޮޓަރިއާ އެއްގޮތަށެވެ. ތަޅުންގަނޑުގެ ދަށުގައި ތާމަލް ކެމެރާތަކާއި ޕްރެޝަރ ސެންސަރުތައް ހަރުކުރެވުނެވެ. ރައްކާތެރި ފާރެއްގެ ފުރަގަހުގައި ދިޔާ ހީލިއަމް އެޅި ދެ ޓޭންކު ބެހެއްޓުނެވެ. އެއީ އެ އެތި ފެނިއްޖެނަމަ އެ ސަރަހައްދު ކުއްލިއަކަށް ގަދައަށް ފިނިކޮށްލުމަށްޓަކައެވެ.
އެތަނުގައި ތިބި އެންމެންނަށް ނުރައްކާތައް ކިޔައިދެވުނެވެ. މިނިވަން މެޑިކަލް އޮބްޒާވަރެއްގެ ގޮތުގައި ޑރ. ފަޒީލް އިބްރާހީމް ބައިވެރިވިއެވެ. އޭނާ ބުނަމުންދިޔައީ މިއީ ހަމައެކަނި ބިރާއި ނަފްސާނީ ވިސްނުމުގެ ސަބަބުން ލޮލަށް ސިފަވާ ކަންތައްތަކެއްކަން ސާބިތުވާނެ ތަހުލީލެއް ކަމަށެވެ.
“އެއްވެސް ކަމެއް ނުވީމަ ތިޔަބޭފުޅުން ހެކީގެ ގޮތުގައި ދައްކަނީ ކޮން އެއްޗެއްތޯ ބަލަން އަހަރެން ހުންނާނަން.” އޭނާ މަލާމާތުގެ ރާގެއްގައި ބުންޏެވެ. ޕްރޮފެސަރ ޝައުޤަތު އޭނާއަށް ސަމާލުކަމެއް ނުދެއެވެ.
ރޭގަނޑު 11:55 ގައި ނިޝާ އެ ކޮޓަރިއަށް ވަނެވެ. އޭނާގެ އަތްފައި ފިނިވެފައި ހުއްޓެވެ. އޭނާ އެނދުގެ އަރިމަތީގައި އިށީނދެ، މެޝިންތަކުގެ މަޑު އަޑު އަހަން އިނެވެ. ދޮރުތައް ބަންދުކުރުމުގެ ކުރިން ޑރ. ވަޙީދު އޭނާގެ ކައިރިއަށް އައެވެ.
“ނިޝާއަށް އަދިވެސް މިތަނުން ނުކުމެވިދާނެ.”
ނިޝާ އޭނާއަށް ބަލައިލިއެވެ. “ތިހެން ތި ބުނަނީ އަހަންނާމެދު ކަންބޮޑުވާތީތަ؟ ނުވަތަ އަހަރެންގެ ވާހަކަ ތެދަކަށް ވެދާނެތީ ބިރުންތަ؟”
އޭނާ އިސްޖަހާލިއެވެ. “ދެކަމާވެސް އެކު ކަންނޭނގެ.” ފުރަތަމަ ފަހަރަށް އޭނާގެ މޫނުމަތިން ހަޤީޤީ ބިރުވެރިކަން ފެނުނެވެ.
“ކޮންމެ ގޮތެއް ވިޔަސް، އެކަނި ތިކަމާ ކުރިމަތިނުލާތި.”
ނިޝާ ހިނިތުންވެލިއެވެ. “އަހަރެން އެކަނިވެރިވެފައި ހުންނަތާ އެތައް ހަފުތާއެއް ވެއްޖެ.”
ދަންވަރު ބާރަ ޖެހުމާއެކު ޕްރޮފެސަރ ޝައުޤަތު އިޝާރާތް ކުރިއެވެ. ބޮކިތައް ފަނޑުވިއެވެ. ސެންސަރުތައް މަސައްކަތް ފެށިއެވެ. އިރުކޮޅަކަށް އެއްވެސް އަޑެއްބަޑެއް ނީވި ދިޔައެވެ. ދެން ކުއްލިއަކަށް ކޮޓަރީގެ ފިނިހޫނުމިން ދަށްވާން ފެށިއެވެ.
ކެމެރާގެ މަންޒަރު ފުސްވިއެވެ. އެއް މޮނިޓަރުން ފެންނަން ހުރީ އެނދު ކައިރީގައި ހުރި ސޫރައެކެވެ. އަނެއް މޮނިޓަރުތަކުން ފެންނަނީ ހުސް ކޮޓަރިއެކެވެ.
“އެ ފެންނަނީ ކޯއްޗެއް؟” ފަޒީލް ސިއްރުސިއްރުން އެހިއެވެ.
ޕްރޮފެސަރ ޝައުޤަތު ސްކްރީނާ ކައިރިވެލިއެވެ. އެ ސޫރަ އާދަޔާ ޚިލާފަށް ދިގެވެ. އޭގެ ބޯ ގޮސް ސީލިންގުގައި ޖެހެއެވެ. ދެއަތް ކަކުލުން ތިރިއަށް އެލިފައި އޮތެވެ. މޫނުގައި ލޮލެއް ނެތް، ހުދުކުލައިގެ ބޮޑު ބައެއް ފިޔަވައި އެހެން އެއްޗެއް ނެތެވެ.
ނިޝާ ދޮރާ ދިމާއަށް ބަލަހައްޓައިގެން އިނެވެ. “އަހަންނަށް އިޙުސާސް އެބަވޭ.”
ތަޅުންގަނޑު ތަޅުވައިގަތެވެ. ހުރިހާ ސްޕީކަރަކުން އެއްފަހަރާ އަޑެއް އިވުނެވެ. “ކުޑަ ނިޝާ.”
އޭނާ ތުރުތުރުއަޅަން ފެށިއެވެ. “އަހަންނަށް ތިހެން ނުކިޔާ.”
މޮނިޓަރުން ފެންނަ ސޫރަ ބޯ އަރިކޮށްލިއެވެ. “ކަލޭގެ މަންމައަށްވެސް މަގޭ އަޑު އިވުނު.”
ނިޝާ ހުއްޓުން އެރިއެވެ. “ކީކޭ؟”
(ނުނިމޭ)
