“މެސެޖަށް ޖަވާބު ނުދިނީ ކީއްވެ؟”
“އަހަރެން އުޅުނީ އޮފީހުގައި. ބްރޭކް ގަޑީގައި ފޯނު ބެލިން. އެކަމަކު އެއްވެސް މެސެޖެއް ނެތް.”
އޭނާ ފޯނު ނަގައި، މީގެ އެތައް ގަޑިއިރެއް ކުރިން ފޮނުވި މެސެޖެއް ދެއްކިއެވެ. “ޖަވާބެއް ދެވުނީސް.”
“އަހަންނަކަށް ނުލިބޭ، ޔަސްނާ.”
“އަހަރެން ގާތު ދޮގުނުހަދާ.”
“އަހަރެން ދޮގެއް ނުހަދަން.”
އެ ބަސްތައް އަނގައިން ބޭރުވިތަނާހެން، އޭނާގެ އަތުގައި އޮތް ކޮތަޅުގައި ޔަސްނާ ޖެހިއެވެ. ޓޮމާޓޯތައް ތަޅުންގަނޑު މައްޗަށް ބުރައިގެން ދިޔައެވެ. ހަނޑޫ ޕެކެޓުގެ އެއްކޮޅު ފަޅައިގެން ގޮސް، ތަޅުންގަނޑު މައްޗަށް ހަނޑޫތައް ބުރައިގެން ދިޔައެވެ. ރިޝާން ބަލަހައްޓައިގެން ހުއްޓެވެ. މާހީ ހުރި ފިޔަވަޅު މަތީގައި ގަނޑުވިއެވެ. ޒާހިލްއަށް އިޙުސާސް ކުރެވުނީ އާދައިގެ މަތިން ކުރިމަތިވާ ބިރުވެރިކަމެވެ. އޭނާ ފުރަތަމަ ކުދިންނަށް ބަލާލުމަށްފަހު ޔަސްނާއަށް ބަލާލިއެވެ.
“އާދޭސްކުރަން.” އޭނާ މަޑުމަޑުން ބުންޏެވެ. “ކުދިންގެ ކުރިމަތީގައި ތިހެން ނުހަދާ.”
އެއީ ބުނެވުނު އެންމެ ނުބައި ބަހެވެ.
“ކުދިންގެ ކުރިމަތީގައޭ؟” އޭނާ ތަކުރާރުކޮށްލިއެވެ. “ދެން މިހާރު ތިއުޅެނީ ވަރަށް ފުރިހަމަ ބައްޕައަކަށް ވެގެންތަ؟”
ޒާހިލް ޓޮމާޓޯތައް ހޮވަން އުޅުނެވެ. ޔަސްނާ ފައިން އެއް ކޮތަޅުގައި ޖަހައި ފާރާއި ދިމާއަށް ވިއްސާލިއެވެ.
“އަހަރެން ވާހަކަދައްކާއިރު ތެދުވޭ!”
އޭނާ ތެދުވިއެވެ. “މި އަޑުއަހަނީ.”
“ނޫން، ތި ހުންނަނީ އަރައިކާ އެއްޗެއް ފެނިގެން ހުންނަހެން.”
ޒާހިލް އެއްވެސް އެއްޗެއް ނުބުނެއެވެ. އޭނާގެ އަޑު ބާރުވިއެވެ. “ކޮންމެވެސް އެއްޗެއް ބުނެބަލަ!”
“ކީކޭތަ ބުނަންވީ؟”
އޭނާ ކައުންޓަރު މަތީގައި ހުރި ޕްލާސްޓިކް ފުޅިއެއް ނަގައި އެއްލިއެވެ. އެ ފާރުގައި ޖެހި، ހުޅުވި، އޭގެ ތެރޭގައި ހުރި ހަވާދުތައް މުޅި ތަޅުންގަނޑަށް ބުރައިގެން ދިޔައެވެ. ރިޝާން ރޯން ފެށިއެވެ. ޒާހިލް އޭނާގެ ގާތަށް ދާން އުޅުނެވެ. ޔަސްނާ ގޮނޑިއެއްގައި ހިފައި، އެހާ ބާރަށް ފަހަތަށް ދަމައިގަތުމުން އޭގެ ފައިތައް ތަޅުންގަނޑުގައި ކޭއްތި ބާރު އަޑެއް އިވުނެވެ.
“ކަލޭ އަބަދުވެސް ބަލަނީ އަހަރެންގެ އަގު ވައްޓާލަން!”
“އަހަރެން އެއްވެސް ކަމެއް ނުކުރަން.”
“ތިޔައީ މައްސަލައަކީ! ކަލޭ އަބަދުވެސް ހުންނަނީ ތިހެން. އެއްވެސް ކަމެއް ނުކޮށް!”
އޭނާ އެ ގޮނޑި އެއްލާލިއެވެ. އެ ގޮސް ޖެހުނީ ކާ މޭޒުގެ ކަނުގައެވެ. މޭޒުމަތީގައި ހުރި ބިއްލޫރި ތަށްޓެއް ބިންމައްޗަށް ވެއްޓި ތަޅައިގެން ދިޔައެވެ. މާހީ ސިހިގެން ދިޔަ އަޑު ޒާހިލްއަށް އިވުނެވެ. އޭނާ ގޮސް ކުދިންގެ ކުރިމަތީގައި ހުއްޓުނެވެ.
“ޔަސްނާ، ހުއްޓާލާ. ކުދިން އެތިބީ ބިރުގަނެފައި.”
ޔަސްނާ އޭނާގެ މޫނުމަތީގައި ޖެހިއެވެ. އެ ޖެހި ޖެހުމުގެ ބާރުމިނުން އޭނާގެ ބޮލަށް އެނބުރުން އަރައިގެން ދިޔައެވެ. ވަގުތުކޮޅަކަށް އޭނާއަށް ފެނުނީ ހުދު ފާރާއި ފޮޓޯ ފްރޭމްގެ ހިޔަނި އެކަންޏެވެ. ދެން އަލުން ހޭވެރިކަން ވިއެވެ. އޭނާ އަމިއްލަ ކޯތާފަތުގައި އަތްލިއެވެ. ޔަސްނާ އޭނާގެ ކުރިމަތީގައި ހުރީ ބާރަށް ނޭވާލާށެވެ.
“ބަލާބަލަ ކަލެއަށް. އަނިޔާ ލިބޭ މީހަކު ހެން ތިހުންނަނީ.” އޭނާ ބުންޏެވެ.
ޒާހިލް އޭނާއަށް ބަލަހައްޓައިގެން ހުއްޓެވެ. “އަނިޔާ ލިބޭ މީހާ” އެ ބަސް އެ ދެމެދުގައި ހަރުލާފައި ހުރި ކަހަލައެވެ.
އޭނާ އެތައް އަހަރެއް ހޭދަކުރީ އެފަދަ މީހަކަށް ނުވުމަށް މަސައްކަތް ކުރުމުގައެވެ. ބިރުވެރިކަން ހިންދާލައި، އަނިޔާތައް ފޮރުވައި، ކޮންމެ ފަދަ ކަމަކަށްވެސް ކެތްކުރެވޭނެވަރުގެ ހިތްވަރު އެބަހުރި ކަމަށް އަމިއްލަ ނަފްސަށް ވިސްނައިދެމުންނެވެ. އެކަން ޤަބޫލުނުކޮށް ހުރެއްޖެނަމަ، އެކަމަކީ އޭނާގެ ސިފައެއް ކަމުގައި ނުވާނެކަމަށް އޭނާ ޤަބޫލުކުރިއެވެ. ނަމަވެސް ކުދިން ތިބީ ބަލާށެވެ. ރިޝާން މިހާރު ހުރީ ބާރަށް ރޯށެވެ. އޭނާގެ ކުޑަކުޑަ ދެއަތުން ހުރީ ކަންފަތްމަތީގައި އަތްއަޅައިގެންނެވެ. މާހީ ހުރީ އޭނާގެ ކައިރީގައެވެ. އޭނާގެ މޫނު ހުރީ ފަނޑުވެފައެވެ. ޒާހިލްގެ ހިތް ކުދިކުދިވި ކަހަލަ އިހުސާސެއް ކުރެވުނެވެ.
“ކޮއްކޮ ގޮވައިގެން ކޮޓަރިއަށް ވަދޭ.” ޒާހިލް މާހީ ގާތު ބުންޏެވެ. އޭނާ ގުޑައެއް ނުލިއެވެ.
“މާހީ، ދަރިފުޅާ. ޕްލީޒް.”
ޔަސްނާގެ ނަޒަރު މާހީއަށް އަމާޒުވިއެވެ. “އޭނާއަށް ހަދަންވީގޮތް ބުނެދޭން ނޫޅޭތި!”
“ބައްޕަ އެއުޅެނީ ހަމައެކަނި..”
“މަޑުން ހުރޭ!” މާހީ ސިހިގެން ދިޔައެވެ. ޒާހިލްއަށް އުނދަގޫވިއެވެ.
“ޔަސްނާ، އެއީ ކުޑަކުއްޖެކޭ.”
“އެހެންވީމާ އަމިއްލަ ކަންކަމާ ބެހިގެން އުޅެން އޭނާއަށް ދަސްކޮށްދީ!”
ކައުންޓަރު މަތީގައި ބާކީ ހުރި ތަކެތި އޭނާ އަތުން ޖަހައި ވިއްސާލިއެވެ. ތަށްޓެއް ބިންމަތީގައި ޖެހި ތަޅައިގެން ދިޔައެވެ. ސަމުސަލެއް އުދުހިގެން ގޮސް އައިސްއަލަމާރި ދަށަށް ވަނެވެ. އެ އަޑު ހުޅުވާފައި ހުރި ކުޑަދޮރުން ލާފައި ގޯޅިތެރެއަށް ފޯރިއެވެ. ބޭރުން މީހަކު ގޮވާލާފައި ހުރިހާ ކަމެއް ރަނގަޅުތޯ އެހިއެވެ. ޔަސްނާ ބާރަށް ހަޅޭއްލަވައިގަންނަމުން ބުނީ އެއީ އެމީހުން ބެހެންޖެހޭ ކަމެއް ނޫން ކަމަށެވެ. ކައިރި ގޭގެ ދޮރެއް ހުޅުވުނު އަޑު ޒާހިލްއަށް އިވުނެވެ. ދެން އިވުނީ އެހެން މީހެއްގެ އަޑެވެ.
“ފުލުހުންނަށް ގުޅަންވީތަ؟”
ޒާހިލް ބޭނުންވީ އާނއެކޭ ބުނެ ހަޅޭއްލަވައިގަންނާށެވެ. މީހަކު އައިސް އެތަނުގައި ހިނގާ ކަންތައް ދެކެން އޭނާ ބޭނުންވިއެވެ. ޔަސްނާއަށް އޭނާގެ އާއިލާއަށް ބިރުދައްކައި ނުހެދޭނެކަން މީހަކު ބުނެދޭން އޭނާ ބޭނުންވިއެވެ. ނަމަވެސް އޭނާގެ އަނެއްބައި އޮތީ ބިރުގަނެފައެވެ. ފުލުހުން އޭނާ ހައްޔަރުކޮށްފާނެއެވެ. ހަލާކުވެފައި ހުރި ފަރުނީޗަރާއި ބިރުގަނެފައި ތިބި ކުދިން ފެނުމުން، އެތަނުގައި ހުރި އެންމެ ބޮޑު މީހާއަކީ ކުށްވެރިޔާ ކަމަށް އެމީހުން ނިންމަފާނެއެވެ. ހަޤީޤަތް ހާމަވުމުގެ ކުރިން ނިންމުންތައް ނިންމާ ގޮތުގެ އެތައް ވާހަކައެއް އޭނާ ވަނީ އަޑުއަހާފައެވެ.
“އާދޭސްކުރަން.” ޒާހިލް ޔަސްނާ ގާތު މަޑުމަޑުން ބުންޏެވެ. “މިކަން ހުއްޓާލަމާ.”
އޭނާ ހަރުގަނޑުމަތީގައި ހުރި ފޮޓޯ ފްރޭމެއް ނެގިއެވެ. އެއީ މިދިޔަ އަހަރު ދަތުރު ގޮސް އުޅުނުއިރު ނަގާފައިވާ އާއިލީ ފޮޓޯއެކެވެ. މާހީ އިނީ އޭނާގެ މައިންބަފައިންގެ މެދުގައެވެ. ރިޝާން އިނީ ޒާހިލްގެ ކޮނޑުމަތީގައި ހޭށެވެ. ޔަސްނާ އެ ފޮޓޯ ބިންމައްޗަށް ޖެހިއެވެ. އެމީހުންގެ ހިނިތުންވެފައިވާ މޫނުތަކުގެ މައްޗަށް ބިއްލޫރިތައް ބުރުވައިގެން ދިޔައެވެ. ޒާހިލް އެ ފޮޓޯއަށް ބަލާލިއެވެ. ސިކުންތުކޮޅަކަށް އޭނާއަށް ނޭވާލާން އުނދަގޫވިއެވެ.
ދެން އިވުނީ ސައިރަންގެ އަޑެވެ. ފާރުތަކުގެ މައްޗަށް ނޫކުލައިގެ އަލި އެޅެން ފެށިއެވެ. ކޮންމެވެސް މީހަކު ފުލުހުންނަށް ގުޅީއެވެ. ޔަސްނާގެ މޫނުމަތީގެ ކުލަވަރު ބަދަލުވިއެވެ. އޭނާ ކުރިމަތީ ދޮރާ ދިމާލަށް ބަލާލުމަށްފަހު ޒާހިލްއަށް ބަލާލިއެވެ.
“މިއީ ކަލޭގެ ކުށް.” އޭނާ މަޑުމަޑުން ބުންޏެވެ. ޒާހިލް ޖަވާބެއް ނުދެއެވެ.
ފުލުހުން އެތެރެއަށް ވަންއިރު، ފެނުނީ އެފުށްމިފުށަށް ޖަހާފައިވާ ކޮޓަރިއަކާއި، ބިރުގަނެފައި ތިބި ދެ ކުދިންނާއި، ކޯތާފަތް ރަތްވެފައި ހުރި ފިރިހެނަކާއި، ރުޅިވެރިކަމުން މޫނު ބަދަލުވެފައި ހުރި އަންހެނެކެވެ. އެއް އޮފިސަރަކު އެންމެން ތިބި ތަނުގައި ތިބުމަށް އެންގިއެވެ. އަނެއް އޮފިސަރު ޒާހިލްއަށް ބަލާލިއެވެ.
“ސަރ، އަނބިމީހާއާ ދުރަށް ޖެހިލާ.”
ޒާހިލް އަށް ލިބުނީ ހައިރާންކަމެކެވެ. “ކީކޭ؟”
“އިވިއްޖެއެއްނު. ދުރަށް ޖެހިލާ.”
އޭނާ އެގޮތަށް ކަންތައް ކުރިއެވެ. ޔަސްނާ ވަގުތުން ރޯން ފެށިއެވެ.
“އޭނާ އަހަންނަށް ހަމަލާދިނީ.” އޭނާ ބުންޏެވެ.
ޒާހިލް އޭނާއާ ދިމާލަށް އެނބުރުނެވެ. ވަގުތުކޮޅަކަށް އޭނާއަށް ހީވީ ކަމެއް އޮޅުނީ ކަމަށެވެ. “ކީކޭ؟”
“އޭނާ އެއްޗެހި އުކީ. އަހަރެން ކޮށްޕާލީ. އަހަރެން މަސައްކަތް ކުރީ އަމިއްލަ ނަފްސު ސަލާމަތްކުރަން.”
އޮފިސަރު އޭނާއާ ގާތަށް ޖެހިލިއެވެ. “އަނިޔާއެއް ވިތަ؟”
“ނޫން. އެކަމަކު އޭނާ އުޅުނީ އަހަންނަށް އަނިޔާކުރަން.”
ޒާހިލް ހަލާކުވެފައި ހުރި ފަރުނީޗަރުތަކަށް ބަލާލިއެވެ. އެ ގޮނޑި އެއްލާލީ ޔަސްނާ ކަމަށާއި، ފޮޓޯ ތަޅާލީވެސް ޔަސްނާ ކަމަށާއި، އޭނާގެ ކޯތާފަތުގައި ހުރި ނިޝާނަކީ ޔަސްނާ ޖެހުމުންވީ ކަމެއްކަން ބުނެދޭން އޭނާ ބޭނުންވިއެވެ. ނަމަވެސް އޮފިސަރު ހުރީ ޝައްކުގެ ނަޒަރަކުން އޭނާއަށް ބަލާށެވެ.
“ސަރ، ވީގޮތް ކިޔައިދީ.”
ޒާހިލް އަނގަ ހުޅުވާލިއެވެ. ޔަސްނާ މާ ބާރަށް ރޯން ފެށިއެވެ.
“އޭނާ އަބަދުވެސް އުޅެނީ ތިހެން.” އޭނާ ބުންޏެވެ. “ރުޅިގަދަވެގެން ކަންތައް ކުރުމަށްފަހު އެއްވެސް ކަމެއް ނުކުރާ ކަމަށް ހެދިގެން ހުންނަނީ.”
އޮފިސަރު އޭނާ ހިމޭންވުމަށް އަތުން އިޝާރާތް ކުރި ނަމަވެސް، އޭނާގެ ސަމާލުކަން ހުރީ ޒާހިލްއަށެވެ.
“އަނބިމީހާ ގައިގައި ޖެހިންތަ؟”
“ނޫން.”
“ކޮށްޕާލިންތަ؟”
“ނޫން.”
“ދެން އޭނާ އެބުނަނީ ކީއްވެ ކަލޭ ހަމަލާދިނީއޭ؟”
ޒާހިލް ޔަސްނާއަށް ބަލާލިއެވެ. އޭނާ ޒާހިލްގެ ލޮލަކަށް ނުބަލައެވެ. އޭނާގެ ހަށިގަނޑަށް ފިނިކަމެއް އިޙުސާސް ކުރެވުނެވެ. އެއީ ހީވަނީ އޭނާގެ ހަށިގަނޑުން ބޭރުގައި ހުރެގެން އެ މަންޒަރު ބަލަމުންދާހެންނެވެ. ފުލުހުންނާއި، ތަޅައިގެން ގޮސްފައި ހުރި ބިއްލޫރިތަކާއި، ބިރުގަނެފައި ތިބި ކުދިންނާއި، އަދި އޭނާ މުޅި އުމުރަށް ލޯބިވާނެކަމަށް ވަޢުދުވި އަންހެންމީހާއެވެ. ކުއްލިއަކަށް އޭނާއަށް ވިސްނުނެވެ. ހަޤީޤަތް ކުރިމަތީގައި އޮތް ނަމަވެސް އެއީ ނުފެންނަ އެއްޗަކަށް ވެދާނެއެވެ.
“އަހަރެން އޭނާއަކަށް ހަމަލާއެއް ނުދެން.” އޭނާ އަނެއްކާވެސް ބުންޏެވެ. އޮފިސަރު އަނެއް އޮފިސަރަށް ބަލާލިއެވެ.
“ސަރ، ވީގޮތް ބެލުމަށްޓަކައި އަހަރެމެންނާއެކު ހިނގާބަލަ.”
މާހީ ކުރިއަށް ޖެހިލިއެވެ. “ނޫން!”
ޒާހިލް އެނބުރުނެވެ. “ދަރިފުޅާ..”
“ބައްޕަ އެއްވެސް ކަމެއް ނުކުރޭ!”
އެއް އޮފިސަރު އޭނާއާ ދިމާލަށް ތިރިވެލިއެވެ. “ކަމެއް ނުވޭ ކޮއްކޯ. އަހަރެމެން މި ބައްޕަ ގާތު ބައެއް ސުވާލުކޮށްލަނީ.”
“ނޫން! މަންމަ އެކަން ކުރީ!”
ޔަސްނާ އެނބުރުނެވެ. “މާހީ، ދޮގުނުހަދާ!”
ކުއްޖާ ބިރުން ފަހަތަށް ޖެހުނެވެ. ޒާހިލް އޭނާއާ ދިމާލަށް ފިޔަވަޅެއް އެޅި ނަމަވެސް، އޮފިސަރަކު އެމީހުންގެ ދެމެދަށް ވަނެވެ.
“ސަރ، ޕްލީޒް.”
“ބައްޕަ އެއްވެސް ކަމެއް ނުކުރޭ.” ތުރުތުރުލާ އަޑަކުން މާހީ ތަކުރާރުކުރިއެވެ. “ބައްޕަ ދުވަހަކުވެސް އެއްވެސް ކަމެއް ނުކުރޭ.”
އެވަގުތު އޭނާ އެބުނި އެއްޗެއް އެކަކަށްވެސް ނުވިސްނުނެވެ.
ޒާހިލް ބޭރަށް ގެންދެވުނެވެ. ހަލާކުވެފައި އޮތް ފޮޓޯ ކައިރިންލާފައި ދިޔައިރު، އޭނާގެ މޫނު ހުރި ދިމާލުން ފްރޭމް ފަޅައިގެން ގޮސްފައިވާ މަންޒަރު އޭނާއަށް ފެނުނެވެ. ބޭރުގައި، މަގުމަތީގައި އަވަށްޓެރިން ތިއްބެވެ. އެމީހުންގެ މޫނުމަތިން ފެންނަނީ ކަންބޮޑުވުމާއި ކަންކަން އޮޅުންފިލުވަން ބޭނުންވެފައި ތިބި ކަހަލަ ގޮތެކެވެ. ބައެއް މީހުން އޭނާއާ ދިމާލަށް ބަލަމުންދިޔައީ ނުރުހުމުގެ ނަޒަރަކުންނެވެ. އަނެއް ބަޔަކު ތިބީ އަތުން އަނގަ ނިވާކޮށްގެން ސިއްރުސިއްރުން ވާހަކަދައްކާށެވެ. ޒާހިލް އިސްޖަހާލިއެވެ.
މަގުބައްތީގެ އަލީގެ ދަށުގައި ފުލުހުންގެ ވެހިކަލް މަޑުކޮށްލައިގެން އޮތެވެ. އޭގެ ފަހަތު ދޮރު ހުރީ ހުޅުވާފައެވެ. އޭނާ އެއްފަހަރު ފަސްބަލާލިއެވެ. މާހީ ހުރީ ދޮރުމަތީގައެވެ. އޭނާގެ ކޯތާފަތްމަތިން ކަރުނަ ފައިބަމުން ދިޔައެވެ. ރިޝާން ހުރީ އޭނާގެ ދައްތަގެ ހެދުމުގައި ބާރަށް ހިފަހައްޓައިގެން ރޯށެވެ. ޔަސްނާ ހުރީ އެމީހުންގެ ފަހަތުގައެވެ.
ވަގުތުކޮޅަކަށް ޒާހިލް އުއްމީދުކުރީ އޭނާ ހަޤީޤަތް ބުނެފާނެ ކަމަށެވެ. ނަމަވެސް އޭނާ އެއްޗެއް ނުބުންޏެވެ. ދޮރު ލެއްޕުނެވެ. ވެހިކަލް ނައްޓާލުމާއެކު، ސިމެންތި އިމާރާތްތަކުގެ ފަހަތަށް އެ ގެ ގެއްލުނެވެ. ޒާހިލް އޭނާގެ ދެއަތް ކަކޫމަތީގައި ބާއްވައިގެން، އިންޖީނުގެ މަޑު އަޑަށް ސަމާލުކަން ދީގެން އިނެވެ. އޭނާ އެތައް އަހަރެއް ހޭދަކުރީ، އޭނާގެ ގޭތެރޭގައި ހިނގާ ކަންކަން ދުނިޔެއަށް އެނގިދާނެތީ ބިރުންނެވެ. މިއަދު ދުނިޔެ އެވަނީ އޭނާގެ ދޮރުމައްޗަށް އައިސްފައެވެ. އަދި އޭނާ ގެންގޮސްފިއެވެ.
(ނުނިމޭ)
