ފޯނު ކޯލާއެކު މުޅި ދުނިޔެ ހަލާކުވެއްޖެ
“އަހަރެން މީ ކަލޭގެ ކަންތައްތަކަށް ވަރަށް ގާތުން ބަލަމުން އަންނަ މީހެއް.”
“އަޑުއަހާ. ކަލޭ ބޭނުންވަނީ ކޮންމެ އެއްޗެއް ކަމަށްވިޔަސް، ވަޝިއްޔާ މިކަމުގެ ތެރެއަށް ނުވައްދާ.”
އެކޮޅުން ކުރުކޮށް ހީނލި އަޑު އިވުނެވެ.
“މިހާރު އެ ޖުމްލައިގެ މާނަ ވިސްނިއްޖެ ދޯ؟”
މިރުޒާ ފޯނުގައި ބާރަށް ހިފަހައްޓާލިއެވެ.
“އަހަރެމެންގެ މި ވިޔަފާރިއާ އޭނާއާ އެއްވެސް ގުޅުމެއް ނެތް.”
“ކަލޭގެ ވިޔަފާރީގެ ތެރެއަށް ވެއްދި ގިނަ މީހުންނަކީވެސް އެކަމާ ގުޅުމެއް ހުރި ބައެއް ނޫން.”
ހިމޭންކަމުގެ ވަގުތުކޮޅެއް ފާއިތުވިއެވެ. ދެން އެ މީހާ ވާހަކަ ކުރިޔަށް ގެންދިޔައެވެ.
“މިރުޒާ، ކަލޭ ތިޔަ އުޅެނީ އެހެން މީހުންގެ ނިކަމެތިކަމުގެ ބޭނުން ހިފައިގެން ހޯދި އަރާމު ދިރިއުޅުމެއްގައި. އެމީހުންގެ އަމިއްލަ ނަފްސު ގެއްލިގެންދާނެ ފަދަ ދުނިޔެއަކަށް ވަނުމަށް ކަލޭ ހިތްވަރުދީ، ކަލޭ ހުރީ އެމީހުންގެ އަތުން ލިބުނު ފައިސާ ގުނަން.”
“އަހަރެން އަދިވެސް މިބުނަނީ ވަޝިއްޔާ މިކަމުގެ ތެރެއަށް ނުވައްދަން.”
“ކަލެއަކީ އެއްވެސް މީހަކަށް އަތްނުލެވޭނެ މީހެއް ކަމަށް ނިންމުމުގެ ކުރިން، ތިޔަ ކަމާމެދު ވިސްނަންވާނެ.”
ފޯނު މެދުކެނޑުނެވެ. މިރުޒާ ފޯނު ކަންފަތުގައި ޖައްސައިގެން ހުރި ގޮތަށް ހުއްޓެވެ. އޭނާއަށް އެ މީހާގެ ނަމެއް ނޭނގެއެވެ. އުޅޭ ތަނެއް ނޭނގެއެވެ. އެ މީހާއާ ގުޅޭނެ އެއްވެސް ގޮތެއް ނެތެވެ. އޭނާއަށް އެނގޭހާވެސް ކަމަކީ، އޭނާ އަމިއްލައަށް އުފެއްދި އަނދިރި ދުނިޔޭގެ އަދަބު ދިނުމަށްޓަކައި، ވަޝިއްޔާގެ ބޭނުން ހިފަމުންދާ ކަމެވެ.
*****
ވަޝިއްޔާއަށް އޮތީ ނުތަނަވަސް ނިންޖަކުން ނިދިފައެވެ. ކޮޓަރީގެ ދޮރު ހުޅުވުނު އަޑަށް އޭނާއަށް ހޭލެވުނެވެ. ކުރިން އައި މީހާ އަނެއްކާވެސް އެތެރެއަށް ވަނެވެ. އޭނާގެ ފަހަތުން ފޯނެއް ހިފައިގެން ހުރި އެހެން މީހަކުވެސް ވަނެވެ.
“މީހަކު ބޭނުންވޭ ކަލޭ ދެކެން.” އޭނާ ބުންޏެވެ.
ވަޝިއްޔާގެ މޫނުމަތީގެ ކުލަވަރު ބަދަލުވިއެވެ. “ކާކު؟”
އެ މީހާ ފޯނުގެ ސްކްރީން ވަޝިއްޔާއާ ދިމާލަށް އަނބުރާލިއެވެ. އެއީ މިރުޒާއެވެ. އޮފީހުން ބޭރުގައި ހުއްޓާ ނަގާފައިވާ އޭނާގެ ފޮޓޯއެކެވެ.
ވަޝިއްޔާ އެ ފޮޓޯއަށް ބަލަހައްޓައިގެން ހުއްޓެވެ. “އޭނާ އަހަރެން ހޯދަނީތަ؟”
އެ މީހާ ހިނިތުންވެލިއެވެ. “ޔަގީނުންވެސް އޭނާ އެބަ ހޯދާ.”
“އެހެންވީމާ އަހަރެން އޭނާއާ ވާހަކަދައްކަން ފުރުސަތު ދީ.”
“ތިކަން ވޭތޯ މި ބަލަނީ.”
އޭނާ ފޯނު ޖީބަށްލިއެވެ.
“އެކަމަކު އޭގެ ކުރިން ކަލޭ ކަމެއް ދެނެގަންނަން ޖެހޭ. ކަލޭ މިތާ ބެހެއްޓުމަކީ އޭނާއަށް ވަރަށް އަގުބޮޑު ކަމަކަށް މިހާރު ވަނީ ވެފައި.”
ވަޝިއްޔާ ހުރީ ވާނުވާ ނޭނގިފައެވެ.
“އާދޭސްކޮށްފައި ބުނަން، އޭނާއަށް އެއްވެސް ގެއްލުމެއް ނުދީ.”
އެ މީހާ މަޑުމަޑުން ހީނލިއެވެ. “ކަލޭ އޭނާއާމެދު ކަންބޮޑުވަނީ؟”
ވަޝިއްޔާ އިސްދަށަށް ޖެހިއެވެ. “އާދޭސްކޮށްފައި ބުނަން.”
އެ މީހާ ދޮރާ ދިމާލަށް ހިނގައިގަތެވެ.
“ވަރަށް ތަފާތު ކަމެއް. މި ހާލަތުގައިވެސް ކަލޭ ތި އުޅެނީ އަމިއްލަ ނަފްސަށްވުރެ ބޮޑަށް އޭނާއާމެދު ކަންބޮޑުވެގެން.”
އޭނާ ނުކުމެގެން ދިޔުމުން، ވަޝިއްޔާ މަޑުމަޑުން ކެމެރާއާ ދިމާލަށް ބަލާލިއެވެ. އޭނާ ހުރީ މީގެ ކުރިން ދުވަހަކުވެސް ބިރުނުގަންނަ ވަރަށް ބިރުގަނެފައެވެ. ނަމަވެސް ހިތްދަތި ހަޤީޤަތެއް އޭނާއަށް އިޙުސާސްވާން ފެށިއެވެ. މިރުޒާ އޭނާ މި ގެނައީ ދުވަހަކުވެސް އޭނާއަށް ފެނިފައި ނުވާފަދަ ނުރައްކާތެރި ދުނިޔެއަކަށެވެ. އަދި ނުކުމެވޭނެކަމުގެ އެއްވެސް ޔަގީން ކަމެއްވެސް ނެތް ހާލަތަކަށެވެ. އަދި މިހާރު، މިރުޒާއަށް އޭނާ ސަލާމަތްކުރެވުނު ކަމުގައި ވިޔަސް، އެ ދެމީހުންކުރެ އެކަކަށްވެސް އެ ރޭގެ ކުރިން އުޅުނު އާދައިގެ ދިރިއުޅުމަށް ދެން ދުވަހަކުވެސް އެނބުރި ނުދެވޭނެއެވެ.
*****
އެ ފޯނުކޯލު ނިމުނު ފަހުންވެސް މިރުޒާ އެތައް އިރަކު އެކަނިމާއެކަނި ހުއްޓެވެ. ބޭރުން ފެންނަނީ މުޅި ސިޓީގެ އާދައިގެ ހަވީރެކެވެ. މަގުތަކުގައި ދުއްވާ އެއްޗެހި ދުއްވަނީއެވެ. ކާބޯތަކެތި ވިއްކާ ތަންތަން އޮތީ ފުރިފައެވެ. މީހުން ރޭގަނޑުގެ ކެއުމަށް އެއްވެ، ބީރައްޓެހިން ދަނީ އަނެއް ދުވަހުގެ ކަންކަން ރާވަމުންނެވެ. ހަމަ އެ ސިޓީގެ ކޮންމެވެސް ތަނެއްގައި، ނުވަތަ އެއަށްވުރެ މާ ދުރުގައި، ވަޝިއްޔާ ހުރީ ކޮޓަރިއެއްގައި ބަންދުވެފައެވެ. އޭނާއާމެދު ދެން ވާނެ ގޮތެއް ނިންމާނެ ވަގުތެއްގެ އިންތިޒާރުގައެވެ.
މިރުޒާ އޭނާގެ ފޯނުގައި އިން ފޮޓޯއަށް ބަލާލިއެވެ. މިއީ އޭނާގެ ވިޔަފާރި ރައްކާތެރިކުރާނެ ގޮތަކާމެދު، ނުވަތަ ދުޝްމަނުން ބަލިކުރާނެ ގޮތަކާމެދު، ނުވަތަ އޭނާގެ ނުފޫޒު ދަމަހައްޓާނެ ގޮތަކާމެދު ނުވިސްނާ ފުރަތަމަ ފަހަރެވެ. އޭނާ މިހާރު ވިސްނަމުން ދަނީ، މި ހިސާބަށް ކަންކަން ގެނައުމަށް އޭނާއަށް ކުރެވުނު ފަރުވާކުޑަ ކޮންމެ ނިންމުމެއްގެ ނަތީޖާއާ މެދުގައެވެ. އޭނާ ބޭނުންވީ މަސްތުގެ ދުނިޔޭގައި ބާރުގަދަ މީހަކަށް ވާށެވެ. މީހުން އޭނާގެ އެހީތެރިކަމަށް ބޭނުންވެ، އޭނާގެ ގާތަށް އެނބުރި އައިސް، އޭނާގެ ގުޅުންތަކަށް ބަރޯސާވާން އޭނާ ބޭނުންވިއެވެ. ނަމަވެސް އެއް އިރެއްގައި އޭނާ ބާރުގަދަ ބައެއްގެ ގޮތުގައި ދެކުނު މީހުން، މިއަދު އެ ދުނިޔެ އޭނާއާ ދެކޮޅަށް އަނބުރާލައިފިއެވެ. އަދި އޭގެ އަދަބު ލިބެމުންދަނީ ވަޝިއްޔާއަށެވެ.
އޭނާގެ ފޯނު އަނެއްކާވެސް ވައިބްރޭޓް ވިއެވެ. އެއީ ނުދަންނަ ނަންބަރެކެވެ. ފޯނަށް އައީ އެންމެ ޖުމްލައެކެވެ.
“މާދަމާ، މިރުޒާ. އަހަރެމެން ކަންކަން ކުރަން ތިބީ ކިހާ ދުރަކަށްތޯ މާދަމާ ކަލެއަށް އެނގޭނެ.”
އޭނާ ސްކްރީނަށް ބަލަހައްޓައިގެން ހުއްޓެވެ. އެއަށްފަހު، މުޅި މަންޒަރު ބަދަލުކޮށްލާނެ ފަދަ ނިންމުމެއް އޭނާ ފުރަތަމަ ފަހަރަށް ނިންމިއެވެ. އޭނާ އެތައް އަހަރެއް ވަންދެން ސިއްރުކޮށްގެން އުޅުނު ވިޔަފާރީގެ ހަޤީޤަތް ފަޅާލަން ނިންމިއެވެ. އޭގެ ސަބަބުން އޭނާ ބަނގުރޫޓުވެ، ހަލާކުވެދިޔަ ކަމުގައި ވިޔަސްމެއެވެ.
ސަބަބަކީ އޭނާއަށް ކޮންމެ ފަދަ އަދަބެއް ލިބުނު ކަމުގައި ވިޔަސް، އޭނާގެ ފާފަތަކަށްޓަކައި ވަޝިއްޔާ މިހާރުވެސް އުފުލި ތަކުލީފު މާ ބޮޑެވެ. އޭނާގެ އިއްފަތްތެރިކަން ނަގާލެވުނީއެވެ. ބަރަހަނާ ފޮޓޯއާއި ވީޑިއޯ ނަގައިފިއެވެ. އެކި ޒާތްޒާތުގެ މަސްތުވާތަކެތި އޭނާ ގަޔަށް ޖަހާ މަސްތުގެ ތެރެއަށް އޭނާ ގަންބުވާލައިފިއެވެ. އަދި ވަރަށް އިހާނެތިކޮށް އެތައް ބައިވަރު މީހުންތަކެއް ވެގެން ޖިންސީ ގޯނާކޮށްފިއެވެ.
*****
“ހެލޯ. މިރުޒާތަ؟”
އެއީ ބީރައްޓެހި، މަޑުމައިތިރި އަދި ބަރު އަޑެކެވެ. އެއީ އަމިއްލަ ނަފްސު ކޮންޓްރޯލް ކުރުމަށްޓަކައި ގިނަ ވަގުތުތަކެއް ވަންދެން މަސައްކަތް ކޮށްފައިވާ މީހެއްގެ އަޑުގައި ހުންނާނެ ފަދަ އާދަޔާ ޚިލާފު އަސަރެއް އެކުލެވިގެންވާ އަޑެކެވެ.
“ލައްބަ. ތިއީ ކާކު؟”
ކުޑަ ވަގުތުކޮޅެއްގެ ހިމޭންކަމަށްފަހު ޖަވާބު އައެވެ. “މިއީ ވަޝިއްޔާގެ ބައްޕަ.”
މިރުޒާގެ ނޭވާ ހުއްޓުނު ކަހަލައެވެ. މިރުޒާ އުންމީދުކޮށްގެން ހުރީ އޭނާއަށް އިންޒާރުދޭ މެސެޖެއް ނުވަތަ ވަޝިއްޔާ ރަހީނުކުރި މީހުންގެ ތެރެއިން މީހެއްގެ ފޯނު ކޯލަކަށެވެ. ފަހަރުގައި އެއީ ކޮންމެވެސް ޑިމާންޑެއް ނުވަތަ އިންޒާރަކަށް ވެދާނެ ކަމަށް އޭނާ ހީކުރިއެވެ. ނަމަވެސް ވަޝިއްޔާގެ ނަމާ ގުޅުވައިގެން “ބައްޕަ” މި ލަފުޒު އިވޭނެ ކަމަކަށް އޭނާ ތައްޔާރުވެފައެއް ނުވެއެވެ.
“ވަޝިއްޔާ ބައްޕާ.” އޭނާގެ އަޑު ތުރުތުރުލާން ފެށިއެވެ. “ކޮންމެވެސް ޚަބަރެއް ލިބުނީތޯ؟ އޭނާ އޮތް ތަނެއް އެނގިއްޖެތޯ؟”
“ތިޔަ ސުވާލު އަހަރެންނާ ނުކުރޭ.”
އެ މީހާގެ އަޑުގައި ހުރި ހަރުކަށިކަމުގެ ސަބަބުން މިރުޒާ ހިމޭންވިއެވެ.
“މިއަދު އަހަރެމެންނަށް އަހަރެންގެ ދަރިފުޅުގެ ވީޑިއޯތަކެއް ލިބިއްޖެ.”
މިރުޒާގެ އަތް ފޯނުގައި ބާރުކޮށްލެވުނެވެ. އޭނާގެ ވަށައިގެންވާ މާހައުލު ފުސްވާން ފެށި ކަހަލައެވެ. އިބްރާހީމް މޭޒު ކައިރީގައި ހުރެ އެހެން ފޯނެއްގައި ކޮންމެވެސް މީހަކާ ވާހަކަދައްކަމުން ދިޔަ ނަމަވެސް، މިރުޒާއަކަށް އެ އަޑެއް ނީވެއެވެ. އޭނާގެ މުޅި ސަމާލުކަން ހުރީ ފޯނުން އިވެމުންދިޔަ ތުރުތުރުލާ އަޑަށެވެ.
“މަގޭ ދަރިފުޅު..” ވަޝިއްޔާގެ ބައްޕަ ވާހަކަދައްކަން އުނދަގޫވެފައިވާ ހާލު ކުރިއަށް ގެންދިޔައެވެ. “މަގޭ ލޯބިވާ ނުހަނު ރަނގަޅު އަންހެން ދަރިފުޅު. އެއްވެސް ބައްޕައަކު ބަލަން ބޭނުން ނުވާނެ ފަދަ މަންޒަރުތަކެއް އަހަރެމެންނަށް ފެނިއްޖެ. އެއްވެސް މަޔަކަށް، ބޭބެއަކަށް ނުވަތަ އާއިލާގެ މެންބަރަކަށް އެފަދަ ބިރުވެރި މަންޒަރުތަކެއް ފެނިގެން ނުވާނެ.”
“ވަޝިއްޔާ ބައްޕާ، އާދޭސްކޮށްފައި ބުނަން..” މިރުޒާ މަޑުމަޑުން ބުންޏެވެ.
“އެމީހުން ވަނީ އަހަރެންގެ ދަރިފުޅަށް މަސްތުވާ އެއްޗެއް ދީފައި. އެ ފިރިހެނުން ވަނީ އެކުއްޖާއަށް އަނިޔާކޮށްފައި. ގަޔަށް އަރާފައި.. އެންމެ އިހާނެތި ހާލުގައި އެކުއްޖާގެ ފޮޓޯއާއި ވީޑިއޯ އެމީހުން ވަނީ ނަގާފައި. އެކުއްޖާ އޮތީ އެއްވެސް އެހީތެރިކަމެއް ނެތް ނިކަމެތި ހާލެއްގައި. އެ ވަހުޝީން އެކުއްޖާއާމެދު އަމަލުކުރީ އިންސާނަކަށްވެސް ބަލާލުމެއް ނެތި.”
އެ މީހާ ވާހަކަ މެދުކަނޑާލިއެވެ. ފޯނުން އިވެމުންދިޔައީ އޭނާގެ ގިސްލުމުގެ އަޑެވެ.
“އަދި ކަލޭ..”
މިރުޒާ އޭނާގެ ލޯ މަރާލިއެވެ.
(ނުނިމޭ)
