21 މެއި 2020 ވަނަ ދުވަހު ނިޔާވި، ހަތަރު މަހުގެ ތުއްތު ކުއްކާ ނިޔާވީ އެ ހޮސްޕިޓަލުގައި ފަރުވާދެމުން ދަނިކޮށް ކަމުގއި އެ ހޮސްޕިޓަލުން ހާމަކޮށްފިއެވެ. އެ ހޮސްޕިޓަލުން އެކަން ހާމަކޮށްފައި ވަނީ މި ޚަބަރު މީޑިޔާތަކުން ރިޕޯޓުކުރުމާއި ގުޅިގެން ކަން ހިނގާދިޔަގޮތް ބަޔާންކޮށްދީ މިއަދު ނެރުނު ނޫސްބަޔާނެއްގައެވެ.
ނޫސްބަޔާނުގައި ބުނެފައިވަނީ 21 މެއި 2020 ވަނަ ދުވަހު މި ހޮސްޕިޓަލުގައި ފަރުވާ ދެވެމުންދަނިކޮށް އުމުރުން ހަތަރު މަހުގެ ތުއްތު ކުއްޖަކު ވަނީ ނިޔާވެފައި ކަމަށާއި މި ތުއްތު ކުއްޖާ އެމަޖެންސީއަށް ގެނައުމާއިއެކުު، އެމަޖެންސީ ޑޮކްޓަރުން، ސްޕެޝަލިސްޓުންގެ ލަފަޔާއެކު ކުއްޖާގެ ފަރުވާ ކުރިއަށް ގެންދިޔަ ކަމަށެވެ.
ކުއްޖާގެ ބަލި ދެނެގަތުމަށްޓަކައި އަލްޓްރާސައުންޑް އާއި، ސީޓީ ސްކޭނެއް ވެސް ހަދާފައިވާ ކަމަށާއި، ކުއްޖާގެ ހާލަތު ބަދަލުވުމާ ގުޅިގެން ފުރާނަ ސަލާމަތްކުރުމަށްޓަކައި، އެމަޖެންސީ ފިޒީޝަނަކާއެކު ކުޑަކުދިންގެ ހާއްސަ ޑޮކްޓަރުންނާ އޮޕަރޭޝަން ޑޮކްޓަރުންނާ އަދި ހޭނައްތާ ޑޮކްޓަރުންގެ ޓީމަކުންވެސް ފަރުވާދެއްވާފަައިވާ ކަމަށް އޭޑީކޭ އިން ނެރުނު ބަޔާނުގައިވެއެވެ.
އެ ހޮސްޕިޓަލުން ބުނެފައިވަނީ މި ހިތާމަވެރި ހާދިސާއާ ގުޅިގެން ކަން ހިނގާދިޔަ ގޮތުގެ މައުލޫމާތު އާއިލާއާއި ހިއްސާކޮށްފައިވާނެ ކަމަށާއި، އަދި މިފަދަ ހާލަތެއް ދިމާވެއްޖެނަމަ އަމަލުކުރަން އެ ހޮސްޕިޓަލުގައި ކަނޑައަޅާފައިވާ އެސްއޯޕީތަކާ އެއްގޮތްވާ ގޮތުގެ މަތިން ތަފްސީލް ރިވިއު އެއް ހަދަން ވާނީ ފަށާފައި ކަމަށެވެ. އަދި މި ދެންނެވުނު ރިވިއު ނިމުމުން އެ މައުލޫމާތު އާއިލާއާ ހިއްސާކުރާނެ ކަމުގައިވެސް އޭޑީކޭއިން ބުނެފައިވެއެވެ.
“މި ހިތްދަތި ދަނޑިވަޅުގައި، ތުއްތު ކުއްޖާގެ އާއިލާއަށް ކެތްތެރިކަން ދެއްވާ މަރްހޫމްގެ ފުރާނައަށް ސުވަރުގޭގެ މަތިވެރި ނިއުމަތް ދެއްވުންއެދި މާތް ﷲ އަށް ދުއާ ދަންނަވަމެވެ. އަދި ހޮސްޕިޓަލުގެ މެނޭޖްމަންޓާއި މުވައްޒަފުންގެ ފަރާތުން އާއިލާއަށް އިހްލާސްތެރި ކަމާއެކު ތައްޒިޔާ ދަންނަވަމެވެ.”
އޭޑީކޭގެ ނޫސްބަޔާން ނިންމާލަމުން ބުނެފައިވެއެވެ
