ކުރީގެ މަޝްހޫރު ފިލްމީތަރި ޝިރާނީގެ ސައިކަލް ފެނިއްޖެ އެވެ. ޝިރާނީގެ ސައިކަލް ގެއްލިގެން އެކަން އާއްމުންނާ ހިއްސާކުރީ މިމަހު 08 ދުވަހު، ހުޅުމާލޭ ފޭސް ދޭއްގެ އެޗް14ގެ ބޭސްމެންޓްގައި ޕާކްކޮށްފައި ހުއްޓާ އޭނާގެ ސައިކަލް ގެއްލުމާގުޅިގެންނެވެ.
ކުރީގެ އެކްޓްރެސް، އަދި މުނިއަވަސް ޓީމުގެ މެންބަރު ޢާއިޝަތު ޝިރާނީ ބުނީ އޭނާގެ ސައިކަލް މިއަދު ފެނުނީ ހުޅުމާލޭ ފޭސް ދޭއްގެ އޮރެންޖް ޓަވަރުގެ އެޗް11ގެ ބޭސްމެންޓްގައި ޕާކްކޮށްފައި ހުއްޓާ ކަމަށެވެ.
“އަލްޙަމްދު ލިﷲ. ސައިކަލަށް އެއްވެސް ގެއްލުމެއް ދީފައެއް ނެތް.” ޝިރާނީ އިތުރަށް ބުނީ ސައިކަލްގެ ޕެޓްރޯލް ހުސްވާތީ ބަހައްޓާފައި ހުރީކަމަށް ބެލެވޭ ކަމަށެވެ.
ޝިރާނީގެ ސައިކަލް ގެއްލިގެން އޭނާ އާއްމުކުރި ޕޯސްޓާއި މުނިއަވަސް އިން އާއްމުކުރި އާޓިކަލް ވަރަށް ގިނަ ބަޔަކު އެކިއެކި މަންސަތަކުގައި ހިއްސާކޮށްފައިވެ އެވެ.
ފިލްމުކުޅުން ހުއްޓާލުމަށްފަހު އާދައިގެ ދިރިއުޅުމެއް އުޅެމުން އަންނަ ޝިރާނީގެ އަޑުގެ ހުނަރުވެރިކަން މުނިއަވަސްގެ ކުލަބްހައުސް ބައެއް ޕްރޮގްރާމުތަކުގެ އިތުރުން، ވާހަކަ އަދި އިޝްތިހާރުތަކުންނާއި ލަވައިން މާނަ ފަދަ ޚާއްޞަ ކަންތައްތަކުން އިވެމުން އަންނަކަން ފާހަގަކޮށްލެވެއެވެ.
