މިއީ ހިނގާފައިވާ ހާދިސާއެއް ކަމަށް އިންޓަނެޓްގައި ވައިރަލްވެފައިވާ ޅަބަރެކެވެ. ޙަގީގަތް ދެނެވޮޑިގަންނަވާނީ ކޮންމެ ކަމަކަށް ކުޅަދުންވަންތަ އިލާހެވެ.
މިއީ ހަމައެކަނި އާދައިގެ ޚަބަރެއް ނޫނެވެ. މިއީ އަޅުގަނޑުމެންގެ ހިތްތަކަށް ލިބިގެންދިޔަ ވަރުގަދަ ހަނދާންކޮށްދިނުމެކެވެ.
މަޣުރިބުކަރައިގެ (މޮރޮކޯގެ) މިސްކިތެއްގައި ހުކުރު ޚުޠުބާ ދެއްވަން ހުންނަވަނިކޮށް، އިމާމަކު މިދުނިޔެ ދޫކުރައްވައިފިއެވެ. އެ އިމާމު މިންބަރުމަތީގައި ހުންނަވައި، މާތްﷲގެ މަތިން މީސްތަކުންނަށް ހަނދާންކޮށްދެއްވުމުގެ މަތިވެރި ވާޖިބު އަދާކުރައްވަމުން ގެންދަވަނިކޮށް، އެ މުޤައްދަސް ވަގުތު އިމާމުގެ ފުރާނަފުޅު އެންމެމަތިވެރި ޚާލިޤުގެ ހަޟްރަތަށް ދިޔައީއެވެ.
ކިހާ ފުރިހަމަ ނިމުމެއްތޯއެވެ! ކިހާ ޝަރަފުވެރި ވަކިވުމެއްތޯއެވެ!
އިމާމު ދުނިޔެ ދޫކުރެއްވީ ޣާފިލުކަމެއްގައި ނުވަތަ ހަނު ހުންނަވައެއް ނޫނެވެ. އެ އިމާމު ވަކިވެވަޑައިގަތީ މާތްﷲގެ މާތް ބިމުގައި ހުންނަވައި، އެންމެ މަތިވެރި އަޅުކަމެއްގެ ތެރެއިން މީސްތަކުންނަށް ހެޔޮމަގަށް ގޮވާލައްވަމުންނެވެ.
އަޅުގަނޑުމެންގެ ތެރެއިން ކޮންމެ މީހަކީވެސް ހެޔޮ ނިމުމަކަށް އެދި ދުޢާކުރާ މީހެކެވެ. ނަމަވެސް މިފަދަ މަތިވެރި ނިމުމެއް ނަސީބުވަނީ ވަރަށް މަދު ބަޔަކަށެވެ. މިއީ މަރަކީ ވަކި ވަގުތެއް ނުވަތަ ދަޢުވަތު ކާޑެއް އޮންނަ ކަމެއް ނޫންކަން އަޅުގަނޑުމެންނަށް ހަނދާންކޮށްދޭ ހާދިސާއެކެވެ. މާތްﷲ އިރާދަކުރެއްވި ކޮންމެ ތަނެއްގައިވެސް މަރު ބައްދަލުކޮށްފާނެއެވެ. ބާޒާރުމަތީގައިވިޔަސް، ގޭގައިވިޔަސް ނުވަތަ މިސްކިތުގައިވިޔަސް މަރާ ބައްދަލުކުރަން ޖެހިދާނެއެވެ. އެންމެ މުހިންމު ކަމަކީ އަޅުގަނޑުމެން މަރާ ބައްދަލުކުރާ ހާލަތެވެ.
މާތްﷲ އެއިމާމުގެ އެންމެ ފަހު ވަގުތުކޮޅަކީ އީމާންކަމުގެ މަތީގައިވީ ވަގުތުކޮޅެއް ކަމުގައި ލައްވައި، އެކަލޭގެފާނަށް ސުވަރުގޭގެ އެންމެ މަތިވެރި ދަރަޖަ މިންވަރުކުރައްވާށިއެވެ. އަދި ވަގުތު ފާއިތުވުމުގެ ކުރިން އަޅުގަނޑުމެންގެ ހިތްތައް ހޭލައްވާލާނެ ފިލާވަޅެއް ކަމުގައި މި ހާދިސާ ލައްވާށިއެވެ. ސަބަބަކީ ކޮންމެވެސް ދުވަހަކުން އަޅުގަނޑުމެންގެ ވާހަކަވެސް މިފަދައިން ދެކެވޭނެތީއެވެ.
މާތްﷲ އެ އިމާމަށް ސުވަރުގޭގެ ދާއިމީ ނިޢުމަތް (ޖަންނަތުލް ފިރުދައުސް) މިންވަރުކުރައްވާށިއެވެ.
އާމީން.
