މި ސުވާލަކީ މިއަދު އަހަރެމެން މި ދިރިއުޅޭ ދުނިޔޭގެ ހާލަތު ވަރަށް ބޮޑަށް ސިފަކޮށްދޭ ސުވާލެކެވެ. ސޯޝަލް މީޑިއާއަކީ މިއަދު ލޯގަނޑަކަށް ވެއްޖެއެވެ. ބައެއް ފަހަރު ވަރަށް ރީތިކޮށް، އަނެއްބައި ފަހަރު ފިލްޓަރުތަކާއެކު، އަދި ބައެއް ފަހަރު ހަޤީޤަތް އޮޅޭފަދަ ގޮތަކަށް ސިފަވާ ލޯގަނޑެކެވެ. މިގޮތަށް ހަޤީޤަތް އޮޅިގެންދާ މިންވަރު އެންމެ ބޮޑަށް ފެންނަނީ އަންހެނުންގެ ސިފައަށް ފާޑުކިޔައި، އެކަންކަން ތަހުލީލުކޮށް، އޮންލައިންކޮށް މީހުން ގޮތް ނިންމާ ގޮތުންނެވެ. ވަކިން ޚާއްސަކޮށް، ދިވެހިރާއްޖެ ފަދަ ކުޑަ މުޖުތަމަޢެއްގައި، މީހުންގެ އަމިއްލަވަންތަކަން ކުޑަވެފައި، ހަޤީޤަތަށްވުރެ ބާރަށް ފާޑުކިޔުންތަކާއި ދޮގު ވާހަކަތައް ފެތުރިގެންދެއެވެ.
އެންމެ ފުރަތަމަވެސް ސާފުކޮށްލަންޖެހޭ ކަމަކީ ފިލްޓަރު ބޭނުންކުރުމާއި، މޭކަޕް ކުރުމާއި، ފޮޓޯ އެޑިޓްކުރުން ނުވަތަ އަމިއްލަ ނަފްސު ފާޅުކަން ބޮޑުގޮތެއްގައި އޮންލައިންކޮށް ދެއްކުމަކީ އެމީހެއްގެ އަމިއްލަ އިޚުތިޔާރެކެވެ. އެއީ ކުށެއް ނޫނެވެ. އަދި އެއީ އަޚުލާޤީ ގޮތުން ދަށު ދަރަޖައިގެ ކަމެއްވެސް ނޫނެވެ. އަދި އެއީ މުޅި މުޖުތަމަޢުގެ ކުރިމަތީގައި އެމީހަކު އިންސާފުގެ ކުރިމައްޗަށް ގެންނަންޖެހޭ ސަބަބެއްވެސް ނޫނެވެ.
ނިދާ ހޭލާގޮތަށް ނުވަތަ ގޭގައި ހުންނަ ސާދާ ގޮތަށް ކޮންމެ މީހަކުވެސް ފޮޓޯ ޕޯސްޓް ކުރާނެކަމަށް އުންމީދު ކުރެވެނީ ހެއްޔެވެ؟ އެއީ މިންގަނޑު ކަމަށްވާނަމަ، ސޯޝަލް މީޑިއާ އޮންނާނީ މިއަދު ފެންނަ ގޮތަކަށް ނޫނެވެ. ކައިވެނި ހަފުލާތަކަށް ދާއިރު އަހަރެމެން ނަލަހެދެމެވެ. ވަޒީފާއަށް ދާއިރު ތައްޔާރުވަމެވެ. ހަމައެގޮތަށް އޮންލައިންކޮށް ފެންނަ ފެނުމަކީވެސް އަހަރެމެން ބޭނުންވާ ގޮތަކަށް ތަރުތީބުކުރާ ކަމެކެވެ. މިއީ “އޮޅުވާލުމެއް” ކަމަށް ބުނުމަކީ ހަޤީޤަތާ ޚިލާފު، ނާތަހުޒީބު ވިސްނުމެކެވެ.
އަހަރެން ސުވާލެއް ކޮށްލާނަމެވެ. ފިލްޓަރު ބޭނުންކުރުމުން ތިޔަހާ ބޮޑަށް އުނދަގޫވާނަމަ، ތިޔަ ފާޑުކިޔާ އަންހެނުންގެ ފޮޓޯތަކަށް ސޯޝަލް މީޑިއާގައި ބަލަނީ ކީއްވެ ހެއްޔެވެ؟ އެޑިޓްކޮށްފައިވާ ފޮޓޯތަކުގެ ސަބަބުން ރުޅި އަންނަނަމަ، އެމީހުން ފޮލޯކޮށް، ފޮޓޯ ބޮޑުކޮށް ބަލައި، ކޮމެންޓްކޮށް، އަދި އެމީހުންގެ ވާހަކަ ދައްކަނީ ކީއްވެ ހެއްޔެވެ؟ ތިޔައީ ދީނީ ގޮތުން ކަންބޮޑުވާ މީހެއް ނަމަ، މީހުންގެ ސިފަޔާ ޒާތީ ވާހަކަ ދެއްކުމާއި، ބުލީ ކުރުމާއި، ދޮގު މަޢުލޫމާތު ފެތުރުމަކީ ދީނުގައި ކޮންކަހަލަ ކަމެއް ހެއްޔެވެ؟
ދީނީ ގޮތުން ވާހަކަދައްކާނަމަ، އިސްލާމްދީނުގައި ކަން އޮތްގޮތް ވަރަށް ސާފެވެ. ކޮންމެ އިންސާނަކަށްވެސް އިންސާފު ކުރެވޭނީ އެމީހެއްގެ އަމިއްލަ އަމަލުތަކުގެ މައްޗަށެވެ. މީހުން ކުރާ ހީތަކަކަށް ނޫނެވެ. މީހުންގެ ޚިޔާލަކަށް ނޫނެވެ. ނުވަތަ އެޑިޓްކޮށްފައިވާ ފޮޓޯއަކަށްވެސް ނޫނެވެ. އަނެކުންގެ އަމިއްލަ ނިންމުންތަކަށް އިންސާފުކޮށް ގޮތް ނިންމުމަކީ ތިބާއަށް އޮތް ޙައްޤެއް ނޫނެވެ. ކޮންމެ މީހަކީވެސް އެމީހެއްގެ އަމަލުތަކާއި، ނިޔަތާއި، ޒިންމާތަކަށް ޖަވާބުދާރީވާން ޖެހޭނެ މީހެކެވެ.
މިކަން ވަރަށް ސާފުކޮށްދެމެވެ. މީހަކީ އަޚުލާޤު ނެތް މީހަކަށް ހަދަނީ ސޯޝަލް މީޑިއާއަކުން ނޫނެވެ. ފިލްޓަރަކުން، މޭކަޕަކުން، ހެދުމަކުން، ވާހަކަދައްކާ ބަހުރުވައަކުން، ހަމުގެ ކުލައަކުން، އުމުރަކުން ނުވަތަ ދީނަކުންވެސް ނޫނެވެ. އަދި އެއީ އަމިއްލަ ނަފްސަށް އޮންނަ އިތުބާރަކުން ނުވަތަ ޚިޔާލު ފާޅުކުރުމަކުން ވާކަމެއްވެސް ނޫނެވެ. އަޚުލާޤުވެރިކަމަކީ ނުވަތަ އެކަމުގެ ނެތްކަމަކީ އެމީހެއްގެ އަމިއްލަ ނަފްސުން އަންނަ ކަމެކެވެ.
އަންހެނަކީ އޭނާގެ އަސްލު ސިފައިގައި ފޮޓޯއެއް ލިޔަސް، ނުވަތަ އެޑިޓްކޮށްފައި ފޮޓޯއެއް ލިޔަސް ހަމަ އެއް އިންސާނެއެވެ. އޭނާ އިޚުތިޔާރު ކުރަނީ ޤުދުރަތީ އަލިކަން ކަމުގައިވިޔަސް ނުވަތަ ތަފާތު އިފެކްޓްތައް ކަމުގައިވިޔަސް، އޭނާގެ އަސްލު ސިފައަކީ ފޮޓޯއެއްގެ ފިކްސެލްތަކުން މިނޭނެ އެއްޗެއް ނޫނެވެ.
ދެން އޮތީ ނެގެޓިވް ކޮމެންޓްތަކާ ކުރިމަތިލާނެ ގޮތުގެ ވާހަކައެވެ. އެފަދަ ކަންކަން ފޮރުވަންވީ ހެއްޔެވެ؟ އެއަށް ރައްދު ދޭންވީ ހެއްޔެވެ؟ ނުވަތަ އެއްކޮށް އަޅާނުލާ ދޫކޮށްލާނީ ހެއްޔެވެ؟ ހަޤީޤަތަކީ، ކޮންމެ ކޮމެންޓަކީ ރައްދު ދޭންޖެހޭ އެއްޗެއް ނޫނެވެ. ކޮންމެ ޚިޔާލަކީ ތިބާއާ ގުޅުންހުރި އެއްޗެއްވެސް ނޫނެވެ. އަދި ކޮންމެ ފާޑުކިޔުމަކީ ބަލައިގަންނަން ޖެހޭވަރުގެ ކަމެއްވެސް ނޫނެވެ. ގިނަ ފަހަރަށް ނޭދެވޭ ވާހަކަދައްކާ މީހާގެ ބަސްތަކުން ހާމަވަނީ، އެ ވާހަކަ ރައްދުވާ މީހާއަށްވުރެ ބޮޑަށް، އެ ވާހަކަ ދެއްކި މީހާގެ ހާލަތެވެ.
ދުވަހުގެ ނިޔަލަށް ބަލާއިރު، ތިބާގެ ހަޤީޤަތް އެނގޭ، ތިބާއަށް ހެޔޮއެދޭ މީހުން ތިބާ ދަންނާނީ ބޭރުފުށުން ފެންނަ ފެނުމަކުން ނޫނެވެ. ސޯޝަލް މީޑިއާގައި އުޅޭ ކޮންމެ މީހަކަށް ތިބާގެ އަސްލު ހަޤީޤަތް އެނގުން ލާޒިމެއް ނޫނެވެ. އަމިއްލަ ކަންކަން ސިއްރުކުރުމަކީ މަކަރު ހެދުމެއް ނޫނެވެ. އަދި އަމިއްލަ އިންތަކެއް ކަނޑައެޅުމަކީ އޮޅުވާލުމެއްވެސް ނޫނެވެ.
އެންމެ މުހިންމު ކަމަކީ ތިބާ ތިބާގެ އަމިއްލަ ނަފްސު ގެންގުޅޭ ގޮތެވެ. އަބުރުވެރިކަމާއި، އަމިއްލަ ނަފްސަށް އޮންނަ އިތުބާރާއެކު ފެންނަ ފެނުމެވެ. އެއީ ދުނިޔެ އެދޭތީ ކުރާ ކަމަކަށް ނުވެ، ތިބާގެ އަމިއްލަ އިޚުތިޔާރުގައި ކުރާ ކަމަކަށް ވާންޖެހޭނެއެވެ. ކަންކަމުގައި އޯގާތެރިވުމަކީ ބަލިކަށިކަމެއް ނޫނެވެ. ހޭލުންތެރިވުމަކީ ހަނުހުރުމެއް ނޫނެވެ. އަދި އަމިއްލަ ނިންމުންތަކަކަށް އާންމުންގެ ރުހުން ހޯދާކަށް ނުޖެހެއެވެ.
އެހެންކަމުން، މީހެއްގެ ސިފައަށް، ނުވަތަ ބޭނުންކުރާ ފިލްޓަރަކަށް، ނުވަތަ ދިރިއުޅުމަށް ފާޑުކިޔުމުގެ ކުރިން އަމިއްލަ ނަފްސާ ސުވާލުކޮށްލާށެވެ. “އޭނާ އެފަދަ ފޮޓޯއެއް ލަނީ ކީއްވެ؟” މި ސުވާލުގެ ބަދަލުގައި، “އެކަމުގެ ސަބަބުން އަހަންނަށް މިހާ ބޮޑު އުނދަގުލެއް މިވަނީ ކީއްވެ؟” މި ސުވާލު މާ މުހިންމެވެ. އަބަދުވެސް އޯގާތެރިވާށެވެ.
