“މި ފިލްމު ވަރަށް ތަފާތުވާނެ!….. މިއީ ހަމަ ގައިމުވެސް މީގެ ކުރިން ދިވެހި ސިނަމާއިން ފެނިފައި ނުވާފަދަ ތަފާތު ފިލްމަކަށް ވެގެންދާނެ ފިލްމެއް!”
މިފަދަ ވާހަކަތަކަކީ ދިވެހި ފިލްމެއް ރިލީޒްކުރުމުގެ ކުރިން ފިލްމު އުފައްދާ ފަރާތްތަކުން އަބަދުވެސް ދައްކަމުން އަންނަ ވާހަކަތަކަކެވެ. ނަމަވެސް ފިލްމު ރިލީޒްވާއިރު އެ ބުނާ ފަދަ ބޮޑު ތަފާތެއް ނުފެންނަ ކަމަށް ގިނަ ބަޔަކު ބުނެއެވެ.
ކަން މިހެން އޮތް ނަމަވެސް، މިރޭ އޮލިމްޕަހުގެ ހޯލުތެރެއިން ފެނިގެންދާނެ “ދޯދި” ފިލްމަކީ ތަފާތު ފިލްމަކަށް ވެގެންދާނެ ކަން، ފިލްމުން އާއްމުކޮށްފައިވާ މަންޒަރުތަކުންނާއި މި ފިލްމުގެ މަސައްކަތްތަކުގައި ހިއްސާވާ ޒުވާން ޓީމުގެ ވާހަކަތަކުން މާ ބޮޑަށްވެސް ސާފުވެއެވެ.
ފިލްމުގެ ރަސްމީ ޓްރެއިލާއިން ވެސް މިއީ ތަފާތު ފިލްމެއްކަން އެނގިއްޖެދޯއެވެ.
ޒުވާނުންތަކެއްގެ ދިރިއުޅުން މި ފިލްމުން މައިގަނޑުގޮތެއްގައި ފެނިގެންދާނެ ކަމަށް ހީވިޔަސް، ފިލްމުގެ މަސައްކަތްތަކާ ބެހޭގޮތުން ފިލްމުގެ ޑައިރެކްޓަރ އަދި އިތުރު ފަންނާނުން ހާމަކުރާގޮތުން މިއީ ހަމަ ހުރިހައި އުމުރުފުރާއަކަށްވެސް ރަނގަޅު މަސެޖްތަކެއް ލިބިގެންދާނެ ފިލްމަކަށް ވާނެއެވެ.
މި ފިލްމުގައި ދައްކައިދޭ މައިގަނޑު ކެރެކްޓަރ މަލްގެ މަންމަގެ ރޯލު ކުޅެފައިވާ ރާއްޖޭގެ ހުނަރުވެރި އެކްޓަރ އާމިރާ އިސްމާޢީލް ބުނީ މި ފިލްމުގައި އޭނާ ދައްކައިދީފައިވާނީ އެކަނިވެރި މައެއް، ދަރިއެއް ގެންގުޅުމުގައި ކުރިމަތިލާންޖެހޭ ގޮންޖެހުންތަކާއި މަންމައާއި ދަރިފުޅާއި ދެމެދު އޮންނަންޖެހޭ ގުޅުންތައް ކަމަށެވެ.
View this post on Instagram
މިމަހު 28 ން ފެބްރުއަރީ 15 އަށް އޮލިމްޕަސް ސިނަމާގައި ދައްކަން ތާވަލްކޮށްފައިވާ ދިވެހި ފިލްމު “ދޯދި” ވެގެންދާނީ ތަފާތު ކޮންސެޕްޓަކަށް، ތަފާތު ސްޓައިލެއްގައި ގެނެސްދޭ ފިލްމަކަށެވެ.
ޕްރޮޑަކްޝަން ދާއިރާއަށް އަލަށް ނުކުންނަ ‘ސްޓަރލިޓް ޕްރޮޑަކްޝަން’ގެ އަލަތު ފިލްމުގެ، ފިލްމިންގެ ކަންކަމުގައި ހަރަކާތްތެރިވަނީ ސެޕަރޑް ސްޓޫޑިއޯއިންނެވެ. މީގެ އިތުރުން ފިލްމު ކްރޫގައި އެހެން ސްޓޫޑިއޯތަކަށް ނިސްބަތްވާ ބައެއް ޒުވާނުން ހަރަކާތްތެރިވެފައިވެއެވެ.
މި ފިލްމުގެ ވާހަކަ އަދި ސްކްރީންޕްލޭ ލިޔުނީ މޮވަނު އެވެ.
“ދޯދި” އަކީ މަލް ނަމަކަށް ކިޔާ ޒުވާން އަންހެން ކުއްޖެއްގެ ހަޔާތުގެ މުހިއްމު މަރުހަލާއެއް ސިފަކޮށްދޭ ފިލްމެކެވެ. މި ފިލްމުގައި ފެނިގެންދަނީ ސްކޫލް ދައުރު ނިންމުމަށްފަހު، ޒުވާން އުމުރުގައި އޭނާ ކުރިމަތިލާ އައު ތަޖުރިބާތަކާއި، ދިރިއުޅުމުގެ ގޮންޖެހުންތަކުން އަރައިގަންނަ ގޮތެވެ. މީގެއިތުރުން، މަލްގެ ރަހުމަތްތެރިންނާއި އޭނާގެ މަންމައާ ދެމެދު އޮންނަ ގުޅުން، އާންމުކޮށް ފެންނަ ގޮތްތަކާ ތަފާތު، އައު ނަޒަރިއްޔާތަކުން މި ފިލްމުގައި ވަނީ ކުރަހައިދީފައެވެ.
ލީޑް ކެރެކްޓަރ މަލްގެ ރޯލުން ފެނިގެންދާނީ ފިލްމީ ދާއިރާއަށް އަލަށް ތައާރަފުވާ އެހެނަސް ހުނަރުވެރި އެކްޓަރު ލާނާ ޖަލީލެވެ. މީގެ އިތުރުން މަލްގެ ގާތް އެކުވެރިން ކަމަށްވާ ޝާ އާއި ޔައިޝްގެ ރޯލުތަކުން ފެނިގެންދާ އައިމިނަތު އިންނަ އާއި ޝަހުދާން ޝަރީފަކީ ވެސް ދިވެހި ސިނަމާއަށް މުޅިން އަލަށް ތަޢާރަފުވާ އައު ފަންނާނުންނެވެ.
