މާލޭގެ ކާރޫބާރޫ ބޮޑު މަގުތަކުގެ ތެރޭގައި، ޒައިނާ އަކީ ހަމައެކަނި ފެންނަ ހިޔަންޏެކެވެ. އުމުރުން ބާވީސް އަހަރުގެ އެ ހިތްތިރި، މަޑުމައިތިރި އަންހެން މީހާއަކީ މާލޭގެ ބޮޑެތި އިމާރާތްތަކާއި، މުއްސަނދި ގޭގެ ފޮޅާ ސާފުކޮށްދޭން އުޅޭ މީހެކެވެ. އޭނާގެ އަތުގައި އަބަދުވެސް އޮންނާނީ ކުނިކަހާ ފިހިގަނޑަކާއި، ސާފުކުރާ ސާމާނު އަޅާފައިވާ ދަބަހެކެވެ. މީހުންނަށް އޭނާ ފެނުނަސް، އޭނާގެ ހިތުގެ ތެޅުމުގައި ހިނގަމުންދާ ތޫފާނެއް އެކަކަށްވެސް ނޭނގެއެވެ.
އެ ދުވަހުގެ އިރު އޮއްސެމުން ދިޔައިރު، ޒައިނާ ހުރީ ހުޅުމާލޭގެ މުއްސަނދި ފްލެޓެއްގެ ބެލްކަނީގައި ބިއްލޫރިތައް ފޮހޭށެވެ. އޭނާގެ ލޮލުން ފެންނަނީ ވަރުބަލިކަމެވެ. ނަމަވެސް އެ ވަރުބަލިކަމުގެ ފަހަތުގައި ވަނީ ފުން އިންތިޒާރެކެވެ. އޭނާގެ ފިރިމީހާ، ޒަހީން، ޖަލުން މިނިވަންވިތާ މިހާރު ދިހަ ދުވަސް ވެއްޖެއެވެ. އެކަމަކު އޭނާ ގެއަކަށް ނާދެއެވެ. ޒަހީންއަކީ ކުށެއް ނެތި، ނުބައި ބައެއްގެ މަކަރުވެރި ރޭވުމެއްގެ ތެރެއިން ޖަލަށް ދާންޖެހުނު މީހެކެވެ. ނުވަތަ ޒައިނާ ގަބޫލުކުރާ ގޮތަކީ އެއީއެވެ.
“ޒައިނާ! އެބަ ނިމޭތަ؟” ގޭގެ ވެރިމީހާ، ސަރާ، ކޮޓަރިން ނުކުންނަމުން އެހިއެވެ.
ޒައިނާ ސިހިފައި ބަލައިލިއެވެ. “ލައްބަ، ދައްތާ. މި ނިމެނީ.” އޭނާގެ އަޑުގައި ހުރީ މަޑުމޮޅިކަމެވެ.
“ޒަހީންގެ ޚަބަރެއްވިތަ؟” ސަރާ އެހިއެވެ. އޭނާއަށް ޒައިނާގެ ހާލަތު ކޮންމެވެސް ވަރަކަށް އެނގެއެވެ.
ޒައިނާ އިސްދަށަށް ޖަހާލިއެވެ. “ނޫން… އަދިވެސް ފޯނެއް ނުކުރޭ. އަޅުގަނޑު މިދަނީ އޭނާ ހޯދަން.”
ސަރާ ފުން ނޭވާއެއް ދޫކޮށްލިއެވެ. “ޒައިނާ، ބަލައިގެން އުޅޭތި. މި މާލެއަކީ ކުރީގެ މާލެއެއް ނޫން. މީހުން ވަރަށް ގޯސްވާނެ.”
ޒައިނާ ހިނިތުންވެލިއެވެ. އެއީ ހިތާމައިން ފުރިގެންވާ ހިނިތުންވުމެކެވެ. “އަޅުގަނޑަކީ އެއްވެސް މީހަކަށް ފެންނަ މީހެއް ނޫން ދައްތާ. ފެންނަން ނެތް މީހަކަށް ކާކުތޯ ގޯނާއެއް ދޭނީ؟”
ފްލެޓުން ނުކުމެގެން ޒައިނާ ދިޔައީ ސީދާ މާލެއަށެވެ. ފެރީގައި އިނދެ އޭނާ ވިސްނަމުން ދިޔައީ ޒަހީން އުޅެފާނެ ތަނަކާ މެދުގައެވެ. ޒަހީން މަސައްކަތް ކުރީ މާލޭގެ ނުފޫޒުގަދަ ވިޔަފާރިވެރިއެއް ކަމަށްވާ “ބޮޑޭ” ކިޔާ މީހެއްގެ ދަށުގައެވެ. ޒަހީން ޖަލަށް ދިޔައީވެސް ބޮޑޭގެ ކުންފުނީގެ މައްސަލައެއްގައެވެ.
ޒައިނާ މިސްރާބު ޖެހީ ބޮޑޭގެ އޮފީސް ހުންނަ ދިމާއަށެވެ. އެއީ މާލޭގެ އެންމެ ހަލަބޮލި އެއް މަގުގައި ހުންނަ އުސް އިމާރާތެކެވެ. އޭނާ އެތަނަށް ދިޔައިރު އިރުއޮއްސި އަނދިރިވެއްޖެއެވެ. އިމާރާތުގެ ތިރީގައި ތިބި ސެކިއުރިޓީ ގާޑުންނަށް ޒައިނާ ފެނުނު ހެނެއް ހީއެއް ނުވެއެވެ. އޭނާ މަޑުމަޑުން ގޮސް ލިފްޓަށް އެރިއެވެ.
ފަސްވަނަ ފަންގިފިލާގެ ދޮރު ހުޅުވުނުއިރު، ޒައިނާގެ ހިތް ބާރަށް ތެޅެމުން ދިޔައެވެ. އޭނާ ދުވަހަކުވެސް މިފަދަ ތަނަކަށް ނާދެއެވެ. އޮފީސް ތެރޭގައި ތިބި މީހުން ތިބީ ސިނގިރޭޓު ބޯށެވެ. ދުންތަކުގެ ތެރެއިން އޭނާއަށް ފެނުނީ ބޮޑޭގެ ކަނާތްކަމަށްވާ “ސޮބާ” އެވެ.
“ކާކު؟” ސޮބާ ހަރުކަށި އަޑަކުން އެހިއެވެ.
“އަޅުގަނޑު… އަޅުގަނޑަކީ ޒަހީންގެ އަންހެނުން ޒައިނާ،” ޒައިނާ މަޑުމަޑުން ބުންޏެވެ.
ސޮބާ މަލާމާތުގެ ހިނިތުންވުމެއް ދޫކޮށްލިއެވެ. “އޯހް، ޒަހީންގެ އަންހެނުންތަ؟ ޒަހީން ޖަލުން ނުކުތް ފަހުން އަހަރެމެންނަކަށްވެސް ނުފެނޭ. އޭނާ އަތުގައި އަހަރެމެންގެ އެއްޗެހިތަކެއް އެބަހުރި.”
“އޭނާ ވީތަނެއް އެނގޭތަ؟” ޒައިނާ އާދޭހާއެކު އެހިއެވެ.
ސޮބާ ޒައިނާއާ ގާތަށް ޖެހިލިއެވެ. “އޭނާ ވީތަނެއް އަހަރެމެންނަށް އެނގޭނީ އޭނާ އަހަރެމެންގެ ފައިސާ އަނބުރާ ދިނީމަ. ޒައިނާ، ކަލޭގެ ފިރިމީހާއަކީ ވަގެއް. އޭނާ ވަނީ އަހަރެމެންގެ ވަރަށް ގިނަ ފައިސާއަށް ޚިޔާނާތްތެރިވެފައި.”
ޒައިނާގެ ލޮލުން ކަރުނަ ހިލުނެވެ. “ނޫން، ޒަހީން އެހެންނެއް ނުހަދާނެ. އޭނާ މާލެއަށް އައީ އަޅުގަނޑުމެންގެ ދަރިފުޅަށްޓަކައި މަސައްކަތް ކުރަން.”
ޒަހީންގެ ވާހަކަ ދެއްކުމުން ޒައިނާގެ ހިތުގައި އުފެދުނީ ބަޔާންކުރަން ދަތި ވޭނެކެވެ. އެމީހުންގެ ކުޑަކުޑަ ދަރިފުޅު، އައިޝް، ނިޔާވީ ޒަހީން ޖަލުގައި ހުއްޓައެވެ. އެއީ ޒައިނާގެ ދިރިއުޅުމުގައި ކުރިމަތިވި އެންމެ ބޮޑު ހިތާމައެވެ.
“ދަރިފުޅު؟ އޭނާ ކޮބާ؟” ސޮބާ މަލާމާތް ކުރިއެވެ.
“އޭނާ ނިޔާވެއްޖެ،” ޒައިނާ ކުރުކޮށް ބުންޏެވެ.
ސޮބާގެ މޫނުމަތިން އެއްވެސް އަސަރެއް ނުފެނުނެވެ. “އެންމެ ރަނގަޅު. ޒަހީން ފެނިއްޖެއްޔާ ބުނޭ އަހަރެމެން އޭނާ ހޯދަން އުޅޭ ވާހަކަ. ދެން މިރޭ ކަލޭ މިތަނުން ދާން އުޅޭ!!.”
ޒައިނާ އެތަނުން ނުކުތުމަށް އެނބުރުނު ވަގުތު، އޭނާގެ ލޮލުގައި އަޅައިގަތީ މޭޒުމަތީގައި އޮތް ޒަހީންގެ ގަޑިއެވެ. އެއީ ކައިވެނީގެ ހަދިޔާއަކަށް ޒައިނާ ދިން ގަޑިއެވެ.
“އެ… އެއީ ޒަހީންގެ ގަޑި،” ޒައިނާ އިނގިލި ދިއްކޮށްލިއެވެ.
ސޮބާ ގަޑި ނަގާ އޭނާގެ ޖީބަށް ލިއެވެ. “މީގެ ފަހުން މިކަހަލަ ތަންތަނަށް ނާންނާތި. މިއީ ކަލޭ ކަހަލަ އަންހެނުންނަށް އޮތް ތަނެއް ނޫން.”
ޒައިނާ އޮފީހުން ނުކުމެގެން ދިޔައީ ވަރަށް ބޮޑަށް ދެރަވެފައި ހުރެއެވެ. ނަމަވެސް އޭނާގެ ހިތުގައި އާދަޔާ ޚިލާފު ރުޅިވެރިކަމެއް އުފެދެން ފެށިއެވެ. ޒަހީންގެ ގަޑި އެމީހުން އަތުގައި އޮތުމުން މާނައަކީ ޒަހީން އެމީހުންގެ ކައިރީގައި ހުރި ކަމެވެ. ނުވަތަ އެމީހުން އޭނާއަށް ކޮންމެވެސް ކަމެއް ކުރީއެވެ.
ޒައިނާ އެ އިމާރާތަކުން ނުދިޔައެވެ. އޭނާ މަޑުކޮށްލީ އިމާރާތުގެ ތިރީގައި ހުރި އަނދިރި ކަނެއްގައެވެ. ގަޑިއެއްހާއިރު ފަހުން ސޮބާ އެކަނި ނުކުމެގެން ހިނގައިގަތެވެ. އޭނާ ދިޔައީ މާލޭގެ ހަނި ގޯޅިތަކުގެ ތެރެއަށެވެ. ޒައިނާ ފަހަތުން ދިޔައެވެ. އޭނާގެ ހިނގުން ހުރީ އެއްވެސް މީހަކަށް ފާހަގަ ނުވާނެހާ މަޑުންނެވެ.
ސޮބާ މަޑުކޮށްލީ މީހުން މަދު، އަނދިރި ގޯޅިގަނޑެއްގައެވެ. އޭނާ ފޯނެއް ކުރަން ހުއްޓާ ސޮބާ އާ ގާތަށް ޒައިނާ ދިޔައެވެ.
“ޒަހީން ކޮބާ؟” ޒައިނާގެ އަޑުގައި މިފަހަރު ހުރީ ސާބިތުކަމެވެ.
ސޮބާ ސިހިފައި އެނބުރުނެވެ. “ކަލޭ އަދިވެސް މިތާ އެބަ އުޅެންތަ؟ ދާން އުޅޭ މިތަނުން!” އޭނާ ޒައިނާ ކޮއްޕާލިއެވެ.
ޒައިނާ ބިމަށް ވެއްޓުނެވެ. އޭނާގެ އަތުގައި ޖެހުނީ ބިމުގައި އޮތް ބަރު ދަގަނޑު ބުރިއެކެވެ. އެއީ ކައިރީގައި ހުރި އިމާރާތެއްގެ މަސައްކަތަށް ގެނެސްފައި ހުރި އެއްޗެކެވެ.
ސޮބާ ޒައިނާގެ ކަރުގައި ހިފިއެވެ. “ޒަހީން ވީތަން ބަލަން ބޭނުންތަ؟ އޭނާ ވީ ކަނޑު އަޑީގައި. އޭނާ އަހަރެމެންނަށް ދޭންޖެހޭ އެއްޗެހި ނުދިނީމަ އަހަރެމެން އޭނާގެ ކަންތައް ނިންމާލައިފިން.”
ޒައިނާގެ ދުނިޔެ ހުއްޓުނު ކަހަލައެވެ. ޒަހީން މަރާލީ ހެއްޔެވެ؟ އޭނާގެ ހުރި ހަމައެކަނި އުންމީދު ފުނޑުފުނޑުވީއެވެ. ކުއްލިއަކަށް ޒައިނާގެ ހަށިގަނޑަށް އާދަޔާ ޚިލާފު ބާރެއް އައެވެ. އޭނާގެ އަތުގައި އޮތް ދަގަނޑު ބުރިން ސޮބާގެ ބޮލުގައި ބާރަށް ޖެހިއެވެ.
ސޮބާ އަރި އަޅާލައިގެން ވެއްޓުނެވެ. އޭނާގެ ބޮލުން ލޭ އޮހެން ފެށިއެވެ. ޒައިނާ ބިރުން ހަޅޭއްލަވައިގަންނަން އުޅުނެވެ. ނަމަވެސް އޭނާގެ އަޑެއް ނުނުކުތެވެ. އޭނާ ބަލަހައްޓައިގެން ހުއްޓާ ސޮބާގެ ހަރަކާތް ހުއްޓުނެވެ.
ޒައިނާއަށް ކުރެވުނު ކަންތައް އިހުސާސްވީ އިރުގަނޑެއް ފަހުންނެވެ. އޭނާ މީހަކު މަރާލީއެވެ. އާދައިގެ، މަޑުމައިތިރި ޒައިނާ މީހަކު މަރާލައިފިއެވެ. ނަމަވެސް އޭނާގެ ހިތަކަށް ބިރުވެރިކަމެއް ނުވަދެއެވެ. އޭނާއަށް އިހުސާސްވީ ހަމައެކަނި ހުސްކަމެވެ.
އޭނާ ތެދުވެ، ސޮބާގެ ޖީބުން ޒަހީންގެ ގަޑި ނެގިއެވެ. އަދި އޭނާގެ ދަބަހުން ސާފުކުރާ ފޮތިގަނޑު ނަގާ، އޭނާގެ އަތްދަބަހާއި ހެދުމުގައި ހުރި ލޭތައް ފޮހެލިއެވެ. އޭނާ މަޑުމަޑުން އެ ގޯޅިން ނުކުމެގެން ހިނގައިގަތެވެ. އެއްވެސް މީހަކަށް އޭނާ ފާހަގައެއް ނުވިއެވެ. އޭނާއަކީ ހަމައެކަނި ސާފުކުރާ މީހެކެވެ. ފެންނަން ހުރި ނުފެންނަ ހިޔަންޏެކެވެ.
ޖެހިގެން އައި ދުވަހު މާލޭގެ ޚަބަރުތަކުގައި އޮތީ “ބޮޑޭ” ގޭންގުގެ މީހަކު މަރާލާފައި އޮއްވާ ފެނުނު ވާހަކައެވެ. ޒައިނާ ހުރީ އާދައިގެ މަތިން މަސައްކަތުގައެވެ. އޭނާ މިއަދު ސާފުކުރަމުން ދިޔައީ އެހެން ފްލެޓެކެވެ.
ނުނިމޭ
