ދިވެހި ފިލްމު އުފެއްދުމުގައި އަބަދުވެސް ތަފާތު އަދި މޮޅު މަސައްކަތްތަކެއް ދައްކަމުން އަންނަ އައިފިލްމްސްގެ އައު ފިލްމު “ޕާޓީ” އޮލިމްޕަސް ސިނަމާއަށް ގެންނާނެ ތާރީޚް ރަސްމީކޮށް އިޢުލާނުކޮށްފިއެވެ. މިއީ #ނުދައްކާވާހަކައެއް ކަމަށް އެއްގޮތަކަށްވެސް ހީނުކުރާށެވެ.
މި ފިލްމު ރިލީޒްކުރުމަށް ހަމަޖެހިފައިވަނީ 2027 ވަނަ އަހަރުގެ ޖެނުއަރީ މަހުގެ 13 ވަނަ ދުވަހު އޮލިމްޕަސް ސިނަމާގައެވެ. “ޕާޓީ” އަކީ މުޖުތަމަޢުގައި އާންމުކޮށް ނުދައްކާ، ފޮރުވިފައިވާ މުހިންމު ވާހަކަތަކެއް ބެލުންތެރިންނާ ހަމައަށް ތިލަކޮށްދިނުމަށް ތައްޔާރުކޮށްފައިވާ ފިލްމެއްކަން، ފިލްމު ރިލީޒްކުރާ ތާރީޚް އިޢުލާނުކުރުމަށް މިއަދު އާންމުކުރި ވީޑިއޯކޮޅުންވެސް ވަރަށް ބޮޑަށް ހާމަވެއެވެ.
View this post on Instagram
ފިލްމުގެ ތާރީޚު ހާމަކުރުމަށް ދޫކޮށްލި ވީޑިއޯއިން ފެނިގެންދަނީ ރާއްޖޭގެ ކުށުގެ ވެށީގައި ހިނގާފައިވާ ބޮޑެތި، ނުރައްކާތެރި ހާދިސާތަކުގެ ޚަބަރުތަކާއި ސުރުޚީތައް އަރަމުންދާ ނިއުސް ކަޓިންތަކެކެވެ. މިއީ މުޖުތަމަޢުގެ އަނދިރި ފަރާތްތަކަށް އަލިއަޅުވާލާނެ ފިލްމެއްކަމުގެ އިޝާރާތެކެވެ.
މި ފިލްމު ވެގެންދާނީ ދިވެހި ފިލްމީ ދާއިރާގެ އެންމެ ފުންނާބު އުސް އަދި ހުނަރުވެރި ބަތަލާ ނިޢުމާ މުޙައްމަދު، ފިލްމީ މަސައްކަތްތަކާ ދުރުގައި އެތައް އަހަރަކު ހުރުމަށްފަހު އަލުން އެކްޓިންގ ދާއިރާއަށް އެނބުރި އަންނަ ފިލްމަށެވެ. މީގެ ކުރިން އާންމުކުރި ވީޑިއޯއެއްގައި، “އެރޭ ޕާޓީގަ މަގޭ ދަރިއަށް ކިހިނެއްހޭ ވީ؟” އޭ ބުނެ، ނުހަނު އަސަރާއި ރުޅިވެރިކަމާއެކު ނިޢުމާ ސުވާލުކުރާ މަންޒަރު ފެނިގެންދެއެވެ. މި ވަރުގަދަ ސުވާލުން މި ފިލްމުގައި ގެނެސްދޭ ‘ނުދައްކާ ވާހަކަ’ ބިނާވެފައިވަނީ ކޮން ކަމެއްގެ މައްޗަށްކަން ވަރަށް ބޮޑަށް އަންދާޒާކޮށްލެވެއެވެ.
ފިލްމު “ޕާޓީ”ގައި ވަރުގަދަ ރޯލަކުން، ހުނަރުވެރި އެކްޓަރު އިސްމާޢީލް ރަޝީދު ކޮޕީ އިއްސެ ފެނިގެންދާނެއެވެ. މި ފިލްމުގައި އިއްސެ ދައްކާފައިވާ އެކްޓިންއަށް އައިފިލްމްސް އިން ތަޢުރީފުކޮށްފައިވާއިރު، އިއްސެގެ މަންޒަރުތައް ނިންމާލުމަށްފަހު އިއްސެ ބުނެފައިވަނީ:
“މި ފިލްމަކީ ޒުވާނުންގެ މެދުގައި ވަރަށް ބޮޑު މަގުބޫލުކަމެއް ލިބި، އެ ފަރާތްތަކުން ސިނަމާތަކަށް ޖަމާވާނެ ފިލްމެއްކަމުގެ ފުރިހަމަ އިތުބާރު އަޅުގަނޑަށް އެބައޮތް. މިފަދަ ފުރިހަމަ ފުރުސަތެއް އަޅުގަނޑަށް ދެއްވިކަމަށްޓަކައި ނުހަނު އިޚްލާޞްތެރިކަމާއެކު ޝުކުރު ދަންނަވަން. ފިލްމުގެ ކޮންމެ މަންޒަރަކީވެސް އަޅުގަނޑަށް ވަރަށް ކަމުދިޔަ މަންޒަރުތަކެއް. އަދި ޝޫޓިންގްގެ ކޮންމެ ވަގުތަކީވެސް އަޅުގަނޑު ނުހަނު ގަޔާވެގެން ހޭދަކުރި އުފާވެރި ވަގުތުތަކެއް. މި ފިލްމުގެ ޖާދޫ ބޮޑު ސްކްރީނުން ފެންނާނެ ވަގުތަކަށް އަޅުގަނޑު މިހުރީ ނުހަނު އިންތިޒާރުގަ.” މި ފިލްމާއިމެދު ކޮޕީ އިއްސެ ބުންޏެވެ.
މި ފިލްމުގައި މަޝްހޫރު ފިލްމީ ތަރި ޢަލީ ޢާޒިމް (ދޮން އައްޔަ)ގެ މުހިންމު ރޯލެއްވެސް ފެނިގެންދާނެކަން ވަނީ އެނގިފައެވެ.
ދިވެހި ސިނަމާއަށް ކާމިޔާބު އަދި ތަފާތު ގިނަ ފިލްމުތަކެއް ހަދިޔާކޮށްފައިވާ ހުނަރުވެރި ޑައިރެކްޓަރ އިލްޔާސް ވަހީދު (އިއްލެ) ލިޔެ ޑައިރެކްޓްކޮށްފައިވާ މި ފިލްމަކީ ގިނަ ބަޔަކު މިހާރުވެސް އިންތިޒާރުކުރަމުން އަންނަ އުފެއްދުމެކެވެ.
