ޖެހިގެން އައި ދުވަހު މާލޭގެ ޚަބަރުތަކުގައި އޮތީ “ބޮޑޭ” ގޭންގުގެ މީހަކު މަރާލާފައި އޮއްވާ ފެނުނު ވާހަކައެވެ. ޒައިނާ ހުރީ އާދައިގެ މަތިން މަސައްކަތުގައެވެ. އޭނާ މިއަދު ސާފުކުރަމުން ދިޔައީ އެހެން ފްލެޓެކެވެ.

ޓީވީން އެ ޚަބަރު ފެނުމުން، ގޭގެ ވެރިމީހާ ބުންޏެވެ. “ބަލާބަލަ ޒައިނާ. މި މާލޭގައި މިހާރު ހާދަ ބިރުވެރި ކަންތައްތަކޭ އެ ހިނގަނީ.”

ޒައިނާ ބިއްލޫރިގަނޑު ފޮހެލަމުން ބުންޏެވެ. “ލައްބަ ދައްތާ. ވަރަށް ބިރުވެރި.”

އެ ވަގުތު ޒައިނާގެ ފޯނަށް މެސެޖެއް އަޔެވެ. އެއީ ނުދަންނަ ނަންބަރަކުން އައި މެސެޖެކެވެ. “ކަލޭ ކުރި ކަންތައް އަހަންނަށް އެނގޭ. މިރޭ 10 ޖަހާއިރު އާޓިފިޝަލް ބީޗަށް އާދޭ.”

ޒައިނާގެ ހިތް ތެޅިގަތެވެ. އޭނާ ކުރި ކަންތައް ދުށް މީހަކު ހަމަ އަސްލުވެސް ހުރީ ހެއްޔެވެ؟

ފަސްވަނަ ބައި: ހިޔަނިތަކުގެ ބައްދަލުވުން

އެ މެސެޖާއެކު ޒައިނާގެ މުޅި ހަށިގަނޑު ފިނިވެގެން ދިޔައެވެ. އަތުގައި އޮތް ސާފުކުރާ ފޮތިގަނޑު ބިމަށް ވެއްޓުނެވެ. އޭނާ ހީކުރީ އޭނާއަކީ އެއްވެސް މީހަކަށް ފެންނަ މީހެއް ނޫން ކަމަށެވެ. ނަމަވެސް، ކޮންމެވެސް މީހަކު އޭނާއަށް ފާރަލަމުން ދިޔައީއެވެ.

“ޒައިނާ، ކިހިނެއްވީ؟” ގޭގެ ވެރިމީހާ ސުވާލުކުރިއެވެ.

“ކަމެއް ނުވޭ ދައްތާ. ކުޑަކޮށް ބޯ އަނބުރައިގަތީ،” ޒައިނާ އަމިއްލަ ނަފްސު ހަމައަކަށް އަޅުވަމުން ބުންޏެވެ. “މިއަދަށް މިވަރުން ނިންމާލިޔަސް އެންމެ ރަނގަޅުތޯ؟”

——-

ގެއަށް ދިޔަ މަގުމަތީގައި ޒައިނާގެ ސިކުނޑީގައި އެނބުރެމުން ދިޔައީ އެކި ޚިޔާލުތަކެވެ. އެއީ ފުލުހުން ބާވައެވެ؟ ނޫނީ ބޮޑޭގެ މީހެއް ބާވައެވެ؟ އޭނާ ގެއަށް ވަދެ، ކުޑަކުޑަ ކޮޓަރީގެ ދޮރު ތަޅުލިއެވެ. އެއީ މާލޭގެ ބާވެފައިވާ ގެއެއްގެ ތިރީގައި ހުންނަ ކުޑަ ކޮޓަރިއެކެވެ. ކޮޓަރީގެ އެއްކަނެއްގައި ހުރި އައިޝްގެ ކުޅޭ އެއްޗެއްސަށް ބަލައިލުމުން އޭނާގެ ހިތް ކުދިކުދިވިއެވެ.

“ދަރިފުޅާ… މަންމަ މި ކުރަނީ ކީއް؟” އޭނާ މަޑުމަޑުން ބުންޏެވެ. ނަމަވެސް އޭނާގެ ހިތުގެ އެހެން ދިމާއަކުން ބުނަމުން ދިޔައީ، ޒަހީންއަށް ވީގޮތެއް ހޯދަން ޖެހޭނެ ކަމަށެވެ. އެމީހުން ޒަހީން މަރާލި ނަމަ، އެކަމުގެ ބަދަލު ހިފަން ޖެހޭނެއެވެ.

ރޭގަނޑު 10 ޖެހިއިރު ޒައިނާ ހުރީ އާޓިފިޝަލް ބީޗުގައެވެ. ތަނުގައި މީހުން ގިނަ ނަމަވެސް، އަނދިރި ހިސާބުތައް ވެސް މަދެއް ނޫނެވެ. އޭނާ މަޑުކޮށްލީ ބެންޗެއްގެ ކައިރީގައެވެ. ކުއްލިއަކަށް އޭނާގެ ފަހަތުން މީހަކު ވާހަކަދެއްކިއެވެ.

“ޒައިނާ. ކަލޭ ހާދަ ހިތްވަރުގަދައޭ.”

ޒައިނާ އެނބުރުނެވެ. އެއީ އުމުރުން ދުވަސްވީ، އެކަމަކު ހަށިގަނޑު ވަރުގަދަ މީހެކެވެ. އޭނާގެ ލޮލުގައި ހުރީ ތޫނުކަމެކެވެ.

“ކާކު ތީ؟” ޒައިނާ އެހިއެވެ.

“މަށަށް ކިޔަނީ ޔޫސުފް. އަހަރެން މަސައްކަތް ކުރަނީ ބޮޑޭގެ ވާދަވެރި ކުންފުންޏެއްގައި. އަހަރެން ވަރަށް ގިނަ ދުވަހު ސޮބާއަށް ފާރަލައިފިން. އެކަމަކު އޭނާ ނިންމާލާނީ ކަލޭ ކަހަލަ އަންހެނަކު ކަމަކަށް ދުވަހަކުވެސް ހީއެއް ނުކުރަން،” ޔޫސުފް ބުންޏެވެ.

“އަހަރެން… އަހަރެން ގަސްތުގައެއް ނޫން،” ޒައިނާ ތުރުތުރުލާ އަޑަކުން ބުންޏެވެ.

“ގަސްތުގައި ނޫނަސް، ކަލޭ ކުރި ކަމަކުން އަހަރެމެންނަށް ވަރަށް ބޮޑު ފައިދާއެއް ވެއްޖެ. ސޮބާއަކީ ބޮޑޭގެ ހުރިހާ ސިއްރެއް ދަންނަ މީހާ. އޭނާ ނެތުމުން ބޮޑޭ މިހާރު ހުރީ ހާސްވެފައި،” ޔޫސުފް ޒައިނާއާ ގާތަށް ޖެހިލިއެވެ. “ކަލޭ ބޭނުންވަނީ ޒަހީން ވީތަނެއް އެނގެން ނޫންތަ؟”

ޒައިނާ ބޯ ޖަހާލިއެވެ.

“ޒަހީން މަރައެއް ނުލާ. އެކަމަކު އޭނާ އޮތީ ބަންދުކޮށްފައި. ބޮޑޭ ހީކުރަނީ ޒަހީން އަތުގައި އޭނާގެ ވަރަށް އަގުބޮޑު ‘މުދަލެއް’ އެބައޮތް ކަމަށް. އެ ހޯދަންވެގެން އޭނާ އެކަހެރި ތަނެއްގައި ބަހައްޓާފައި ހުރީ،” ޔޫސުފް ކިޔައިދިނެވެ.

“އެއީ ކޮން ތަނެއް؟ އަހަރެން ކިހިނެއް އޭނާ ސަލާމަތް ކުރާނީ؟” ޒައިނާ އަވަސް އަވަހަށް އެހިއެވެ.

“އެތަނަށް ދެވޭނީ ބޮޑޭގެ އިތުބާރު ހޯދައިގެން. ކަލެއަކީ މީހުންނަށް ފެންނަ މީހެއް ނޫން. ކަލެއަށް އެގެއަށް ވަދެވޭނެ. ސާފުކުރާ މީހެއްގެ ގޮތުގައި،” ޔޫސުފްގެ ރޭވުން ހާމަކުރިއެވެ. “ބޮޑޭ މިހާރު އައު މީހަކު ހޯދަން އެބަ އުޅޭ އޭނާގެ ގަނޑުވަރު ސާފުކުރަން. އަހަރެން ކަލޭ އެތަނަށް ވައްދާނަން. އެކަމަކު ބަދަލުގައި، ކަލޭ އަހަންނަށް ކަމެއް ކޮށްދޭން ޖެހޭނެ.”

“ކޮން ކަމެއް؟”

“ބޮޑޭގެ ކޮޓަރީގައި ހުންނަ ސޭފްގެ ތަޅުދަނޑި ނުވަތަ އޭގެ ކޯޑު ހޯދައިދޭންވީ. އެއީ ޒަހީންއާ ބެހޭ މައުލޫމާތުވެސް އޭގައި ހުންނާނެތީ،” ޔޫސުފް ބުންޏެވެ.

ޒައިނާއަށް އެނގުނެވެ. މިއީ ނުރައްކާތެރި ކުޅިވަރެކެވެ. ނަމަވެސް ޒަހީން ދިރިހުރިކަން އެނގުމުން އޭނާގެ ހިތަށް އާ ދިރުމެއް އަތުވެއްޖެއެވެ. “އަހަރެން އެކަން ކުރާނަން.”

ހަވަނަ ބައި: ގަނޑުވަރުގެ ތެރޭގައި

ޖެހިގެން އައި ހަފުތާގައި ޒައިނާ ހުރީ ބޮޑޭގެ މުއްސަނދި ވިލާގެ ދޮރުމަތީގައެވެ. އެއީ މާލޭގެ އެންމެ އަގުބޮޑު އެއް ބިމުގައި ހަދާފައިވާ، އުސް ފާރުތަކަކުން ވަށާލެވިފައިވާ ތަނެކެވެ. ޔޫސުފްގެ އެހީތެރިކަމާއެކު، އޭނާއަށް އެގޭގެ ‘ހައުސްކީޕިންގ’ ވަޒީފާ ލިބުނެވެ.

އެގޭގެ އެތެރެއަށް ވަދެވުމުން ޒައިނާ އަންތަރީސްވިއެވެ. ތަޅުންގަނޑު އޮފްވެފައިވަނީ މުތީތަކެއް ފަދައިންނެވެ. ނަމަވެސް އެ އޮފްކަމުގެ ފަހަތުގައި ވަނީ ކިލަނބު ސިއްރުތަކެކެވެ.

“ތިއީ ޒައިނާ ދޯ،” ގޭގެ ބޮޑު މީހާ، އިސްމާއީލް (ބޮޑޭ)، އޭނާގެ ގޮނޑީގައި އިށީނދެލައިގެން އިނދެ ބުންޏެވެ. އޭނާގެ އަތުގައި އޮތީ ރަނުގެ އަނގޮޓިތަކެކެވެ. “ސޮބާ މަރުވުމުން އަހަރެމެންނަށް ވަރަށް އުނދަގޫވެއްޖެ. މިގޭގެ ކަންތައްތައް ބަލަހައްޓަން އިތުބާރު ހިފޭ މީހަކު ބޭނުން.”

ޒައިނާ އިސްދަށަށް ޖަހާލިއެވެ. “އަޅުގަނޑު މަސައްކަތް ކުރާނީ ވަރަށް އިޚްލާޞްތެރިކަމާއެކު.”

“އަހަރެން ބޭނުންވަނީ މަޑުމައިތިރި، ލޯ ހުޅުވައިގެން ހުންނަ، އެކަމަކު އަނގަ ބަންދު މީހެއްގެ ގޮތުގަ މަސައްކަތްކުރާ މީހެއް،” ބޮޑޭ ބުންޏެވެ. “ކަލޭގެ ފިރިމީހާ ޒަހީންއަކީ އަހަރެންގެ ވަރަށް ގާތް މީހެއް. އޭނާ މިހާރު ވަނީ ‘ޗުއްޓީއެއްގަ’. އޭނާ އަންނަންދެން ކަލޭ މިގޭގައި އުޅޭ.”

ޒައިނާގެ ހިތަށް އެރިއެވެ.’ ޗުއްޓީއެއްގައޭ؟ ކަލޭ އޭނާ ބަންދުކޮށްފައި ބަހައްޓާފައި ހުރީ!’ ނަމަވެސް އޭނާ ބޭރުފުށުން އެއްވެސް އަސަރެއް ނުދައްކައެވެ.

——

ދުވަސްތައް ފާއިތުވަމުން ދިޔައެވެ. ޒައިނާ ވެގެން ދިޔައީ އެގޭގެ ‘ރޫހަށެވެ’. އޭނާ ކޮންމެ ކޮޓަރިއެއް ސާފުކުރެއެވެ. ކޮންމެ މޭޒެއް ފޮހެއެވެ. އޭނާގެ ހަރަކާތްތައް ހުންނަނީ އެއްވެސް މީހަކަށް އުނދަގޫ ނުވާނެހާ ހަމަހިމޭންކޮށެވެ. މީހުން އޭނާގެ ކުރިމަތީގައި ސިއްރު ވާހަކަދައްކައެވެ. އެމީހުން ހީކުރަނީ ޒައިނާއަކީ އެއްޗެއް ދޭހަނުވާ، އާދައިގެ ‘ނޯކަރެއް’ ކަމަށެވެ.

އެއް ދުވަހު ބޮޑޭގެ އޮފީސް ކޮޓަރި ސާފުކުރަން ހުއްޓާ، ޒައިނާއަށް ފެނުނީ ބޮޑޭ ފޯނުން ވާހަކަދައްކަނިކޮށެވެ.

“އާނ، އޭނާ އަދިވެސް އަނގައެއް ނުހުޅުވާ. އެ ޕެންޑްރައިވް އޮތް ތަނެއް ބުނަންދެން އޭނާ ބަހައްޓާ އެތަނުގައި. ކާން ނުދިނަސް ހެޔޮ،” ބޮޑޭ ހަރުކަށިކަމާއެކު ބުންޏެވެ.

ޒައިނާގެ އަތުގައި އޮތް ފޮތިގަނޑު ބާރަށް ފިތާލެވުނެވެ. އޭނާގެ ޒަހީންއަށް ކާންވެސް ނުދެނީ ހެއްޔެވެ؟ ރުޅިވެރިކަން އޭނާގެ ލޭގައި ކެކެން ފެށިއެވެ. ނަމަވެސް އޭނާ ކެތްތެރިވިއެވެ.

އެރޭ، އެންމެން ނިދުމުން ޒައިނާ މަޑުމަޑުން ބޮޑޭގެ ކޮޓަރިއާ ދިމާއަށް ހިނގައިގަތެވެ. އޭނާގެ އަތުގައި އޮތީ ސާފުކުރާ ސާމާނު އަޅާފައިވާ ދަބަހެވެ. އޭގެ ތެރޭގައި ޔޫސުފް ދީފައިވާ ކުޑަކުޑަ ކެމެރާއަކާއި ތަޅު ހުޅުވާނެ ސާމާނު ހުއްޓެވެ.

ކޮޓަރީގެ ދޮރު ހުޅުވާލިއިރު ބޮޑޭ އޮތީ ގަދަ ނިދީގައެވެ. ޒައިނާ ފައިގެ އިނގިލިތަކުގެ ކުރި ޖައްސައިގެން ހިނގާފައި ގޮސް ފާރުގައި ހުރި ބޮޑު ތަސްވީރެއްގެ ފަހަތަށް ބަލައިލިއެވެ. އެތަނުގައި ސޭފް ހުއްޓެވެ.

އޭނާ ތަޅު ހުޅުވަން މަސައްކަތް ކުރަނިކޮށް، ކުއްލިއަކަށް ބޮޑޭ ފުރޮޅިލިއެވެ. ޒައިނާ ހުއްޓުން އެރިއެވެ. އޭނާގެ ނޭވާ ހިފަހައްޓާލިއެވެ. ބޮޑޭ ލޯ ހުޅުވާލިއެވެ.

“ކާކު؟” ބޮޑޭގެ އަޑު އިވުނެވެ.

ޒައިނާ އަވަހަށް އަތުގައި އޮތް ފޮތިގަނޑު ނަގާ މޭޒު ފޮހެން ފެށިއެވެ. “ސާހިބު… މައާފް ކުރައްވާ. މި މޭޒުމަތީގައި ފެން އެޅިފަ ހުރީމަ، އެ ހިކުމުގެ ކުރިން ފޮހެލަންވެގެން…”

ނުނިމޭ