މިހާރު ކުރިއަށްދާ އެފްއޭއެމް ވެޓެރަންސް ކަޕް 2026 ފުޓްބޯޅަ މުބާރާތުގައި ޔުނައިޓެޑް ވިކްޓަރީ (ޔޫވީ) އާއި ހުއްރިއްޔާ ސްޕޯޓްސް ކްލަބް ބައްދަލުކުރި މެޗުން ފަސޭހަކަމާއިއެކު ހުއްރިއްޔާ މޮޅުވެއްޖެއެވެ.
މިއަދު ހަވީރު ކުޅުނު މިމެޗުން ހުއްރިއްޔާ މޮޅުވީ 4-1 އިންނެވެ.
މިމެޗުގެ ފުރަތަމަ ލަނޑު ޖެހީ ހުއްރިއްޔާއިންނެވެ. 10 ވަނަ މިނެޓުގައި ހުއްރިއްޔާއަށް މި ލަނޑު ޖަހައިދިނީ އަލީ އުމަރުއެވެ.
ފުރަތަމަ ހާފު ނިމުމުގެ ކުރިން ހުއްރިއްޔާ އިން އިތުރު ދެލަނޑު ޖެހިއިރު، އެ ދެ ލަނޑު ވެސް ޖަހައިދިނީ، ކުރިން ފުރަތަމަ ޑިވިޝަންގައި ކުޅެ ރަންބޫޓު ވެސް ހޯދާފައިވާ އަލީ ސިހާމު (ހުރާ އައްޔަ) އެވެ.
ދެވަނަ ހާފުގައި ވެސް ހުއްރިއްޔާގެ ކުޅުން ފެނުނީ ޔޫވީ އަށްވުރެ ވަރުގަދަކޮށެވެ. ލަނޑު ޖަހާނެ ރަނގަޅު އެތައް ފުރުސަތެއް ލިބުނުއިރު މިހާފުގައި ހުއްރިއްޔާއަށް ޖެހުނީ އެންމެ ލަނޑެކެވެ. 47 ވަނަ މިނެޓުގައި އަލީ ސިހާމު ޖެހި މިލަނޑާއިއެކު އޭނާ ވަނީ މުބާރާތުގައި ހެޓްރިކް ހެދި ދެވަނަ ކުޅުންތެރިޔާއަށް ވެފަ އެވެ.
ޔޫވީއިން މިމެޗްގައި ޖެހި ލަނޑު، 53 ވަނަ މިނެޓުގައި އެޓީމަށް ޖަހައިދިނީ މުހައްމަދު ހަސަން އެވެ.
މި މުބާރާތުގެ މެޗެއް މާދަމާ ވެސް އޮންނާނެއެވެ. މިމެޗުގައި ބައްދަލުކުރާނީ މުއިވެޔޮ ފުރެންޑްސް އާއި ވިލިމާލެ ޔުނައިޓެޑް އެވެ.
