ހިންދީ އަދި ޕަންޖާބީ ފިލްމީ ދާއިރާގައި މަޤުބޫލު އެކްޓްރެސް ސަރްގުން މެހެތާ ބަލިވެ އިންކަމަށް ބުނާ ޚަބަރުތައް އޭނާ ދޮގުކޮށްފިއެވެ.
މަޝްހޫރު ޓީވީ އެކްޓަރު އަދި ޕްރޮޑިއުސަރު ރަވީ ދޫބޭއާ ކައިވެނިކޮށްގެން އުޅޭ ސަރްގުން މި ވާހަކަތައް ދޮގުކޮށްފައިވަނީ އޭނާގެ އިންސްޓަގްރާމް ސްޓޯރީ މެދުވެރިކޮށެވެ. އޭނާ ބުނެފައިވަނީ “ވޭތުވެދިޔަ ދެއަހަރުގެ ތެރޭގައި އަހަރެން ބަނޑުބޮޑުވުމުގެ ޚަބަރު އަހަރެމެންނަށްވުރެ ކުރިން ނޫސްތަކަށް އެނގިއްޖެ” ކަމަށެވެ. މި ޕޯސްޓްގައި އޭނާ ވަނީ މީހުން ހަމަޖެހިގެން ތިބުމަށާއި އެއްވެސް އަސާސެއް ނެތް ޚަބަރުތައް ފެތުރުން ހުއްޓާލުމަށް އެދިފައެވެ. އަދި އޭނާއާއި ފިރިމީހާ ރަވީއަށްވެސް ނޭނގޭ ކަމެއްގެ ޚަބަރު ނޫސްތަކަށް އެނގެނީ ކިހިނެއްތޯ އޭނާ ސުވާލުކުރިއެވެ.
“އަހަރެން ބަނޑުބޮޑުވާތާ މިހާރު ދެއަހަރު ވެއްޖެ. އަހަރެން ހިތަށްއަރާ މި ދަރިންތައް ދަނީ ކޮންތާކަށް އަދި އަހަރެން މި ވިހަނީ ކިހާ އަވަހަކަށްބާއޭ.” މަޖާޒީ ގޮތަކަށް ސަރްގުން ބުނެލިއެވެ. ނޫސްވެރިންނަށް އޭނާގެ ޑޮކްޓަރު އެނގެނީތޯ ނުވަތަ ސެލޫނަކަށް ނުވަތަ ކެފޭއަކަށް ތަނަކަށް ދާތަން ފެނުމުން އަމިއްލައަށް ވާހަކަ ހަދަނީތޯވެސް އޭނާ ސުވާލު އުފެއްދިއެވެ. އަދި އެމީހުންނަށް ނޭނގޭ އެމީހުންގެ ޒާތީ ކަމެއްގައި އެހާ ހޭލުންތެރިވެގެން ތިބީތީ ވަރަށް ބޮޑަށް ޝުކުރު އަދާކުރަމުން އޭނާ ބުނެފައިވަނީ މިއީ ހަމައެކަނި އަސާސެއްނެތް ވާހަކަތަކެއް ކަމަށެވެ. އަދި ޚަބަރު ލިޔުމުގެ ކުރިން އެއީ ތެދު ޚަބަރެއްތޯ އޭނާ ނުވަތަ އޭނާގެ ޓީމާ ސުވާލުކޮށްލުމަކީ މާ ގިނަ ވަގުތު ނަގާނެ ކަމެއް ނޫންކަމަށްވެސް އޭނާ ބުނެފައިވެއެވެ.
ކުޅަދާނަ އެކްޓްރެސްއެއްގެ އިތުރުން ސަރްގުން ވަނީ އޭނާގެ ފިރިމީހާ ރަވީ ދޫބޭއާއެކު ޑްރީމިޔާތާ އެންޓަޓެއިންމެންޓް ޕްރައިވެޓް ލިމިޓެޑްގެ ނަމުގައި ފިލްމު ކުންފުންޏެއް އުފައްދާފައެވެ. އަދި އެ ކުންފުނީގެ ދަށުން ކާމިޔާބު ސިލްސިލާ ޑްރާމާތަކާއި ފިލްމުތައް އަންނަނީ އުފައްދަމުންނެވެ.
