މިހާރު ކުރިއަށްދާ އެފްއޭއެމް ވެޓެރަންސް ކަޕް 2026 ފުޓްބޯޅަ މުބާރާތުގައި މިއަދު ހަވީރު ނިއުރޭޑިއަންޓާއި ދިވެހި ސިފައިންގެ ކުލަބު ބައްދަލުކުރި މެޗު އެއްވަރުވެ ގުރޫޕްގެ ފޯރި ގަދަވެއްޖެއެވެ. މި ގުރޫޕުން ވިލިމާލެ ޔުނައިޓެޑް ސެމީ ފައިނަލްގެ ޖާގައެއް ޔަގީން ކޮށްފައިވާއިރު، ދެން ސެމީ ފައިނަލުން ޖާގަ ލިބޭ ޓީމެއް އެނގޭނީ ނިއުރޭޑިއަންޓާއި މުއިވެޔޮ ފުރެންޑްސް ބައްދަލުކުރާ މެޗު ނިމުމުންނެވެ.
6 ޕޮއިންޓާއިއެކު ގުރޫޕްގެ ދެވަނައިގައި މުއިވެޔޮ ފުރެންޑްސް އޮތްއިރު 4 ޕޮއިންޓާއިއެކު ނިއުރޭޑިއަންޓް އޮތީ ގުރޫޕްގެ ތިން ވަނައިގައެވެ.
މިއަދުގެ މެޗު 2-2 އިން އެއްވަރުވިއިރު މެޗުގެ ފުރަތަމަ ދެ ލަނޑު ޖެހީ ނިއުރޭޑިއަންޓުންނެވެ. ފުރަތަމަ ލަނޑު 15 ވަނަ މިނެޓުގައި މުޚުތާރު ނަސީރު (ޓޫކިލޯ) ޖަހައިދިންއިރު، ދެވަނަ ލަނޑު 18 ވަނަ މިނެޓުގައި ޖަހައިދިނީ އިއްޒަތު އަބްދުލް ބާރީއެވެ.
ފޮޓޯ: ނިއުރޭޑިއަންޓް އެފްބީ ޕޭޖް
ދިވެހި ސިފައިންގެ ކުލަބުން އެ ޓީމުގެ ފުރަތަމަ ލަނޑު ޖެހީ ފުރަތަމަ ހާފުގެ ފަހު މިނެޓުގައި އިސްމާއިލް މުހައްމަދުއެވެ.
ލަނޑު ޖަހާނެ ގިނަ ފުރުސަތުތަކެއް ނިއުރޭޑިއަންޓުން ފަހިކުރި މި މެޗްގައި އެ ޓީމަށް އިތުރު ލަނޑެއް ނުޖެހުނެވެ. އެ ޓީމުން އުފެއްދި ހަމަލާތައް ހުއްޓުވުމުގައި ދިވެހި ސިފައިންގެ ކުލަބުގެ ކީޕަރު ވަނީ މޮޅު ކުޅުމެއް ދައްކައިފައެވެ.
ދިވެހި ސިފައިންގެ ކުލަބުން ނަތީޖާ ހަމަހަމަ ކުރީ 50 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ އަހްމަދު ރަޝީދު އެވެ.
މި މުބާރާތުގެ މެޗެއް މާދަމާ ވެސް އޮންނާނެއެވެ. މާދަމާގެ މެޗުގައި ބައްދަލުކުރާނީ ހުއްރިއްޔާ ސްޕޯޓްސް ކްލަބާއި ޕޮލިސް ކްލަބެވެ.
