ވަރަށް އާދައިގެ ދުވަހެއްގެ ފެށުމެކެވެ. ހެނދުނުގެ ނާސްތާ އާއި ސްކޫލަށް ދާން ތައްޔާރުވުމުގެ އަވަސްއަރުވާލުމެއް ނެތެވެ. އޭގެ ބަދަލުގައި، ގޭތެރޭގައި އޮތީ ރޯދަމަހުގެ ހަމަހިމޭންކަމެވެ. އާންމުކޮށް، ކޮށްއުޅޭ ގޭތެރޭ މަސައްކަތްތަކެވެ. ކުނިކަހައި، އެއްޗެހި ފަތްޖަހައި، މޮޕު ލުމާ.. އަމިއްލައަށް އެއްޗެހި ފަތްޖެހި އިސްތިރިވާނެ ނަމައޭ ހިތަށް އަރާ ފަދަ ވަގުތެކެވެ.

އަހަރެންގެ ދަރިފުޅު މަސައްކަތުގައި އެހީވަމުން ދިޔައިރު، އޭނާގެ ޓެބްލެޓަށް ބަލަމުން، ވަރަށް ހަލުވިކަމާއެކު ޕާސްޓް ޕޭޕަރސް ވެސް ހަދަމުން ދިޔައެވެ. އޭނާގެ އިނގިލިތައް ހަރަކާތްކުރަމުން ދިޔަ ހަލުވި މިނުން ހީވަނީ އޮލިމްޕިކްސްގައި ޓައިޕްކުރުމުގެ މުބާރާތެއްގައި ބައިވެރިވެގެން އުޅޭ ހެނެވެ.

އުފެދުނު ކުޑަކުޑަ ޝައުޤުވެރިކަމެއްގެ ސަބަބުން، އަހަރެން އޭނާއާ ސުވާލެއް ކޮށްލީމެވެ.

“ދަރިފުޅާ، ޓިކްޓޮކް ކޮމެންޓްތަކުގައި މި ފެންނަ ‘FRFR’ އަކީ ކޮބައިތަ؟”

އޭނާ އަހަންނާ ދިމާލަށް ބަލާލުމަށްފަހު، ކުޑަވަގުތުކޮޅަކަށް މަޑުޖެހިލާފައި، ބާރަށް ހޭން ފެށިއެވެ.

“މަންމާ… މަންމަ ހާދަ މުސްކުޅިއޭ ދޯ!”

“ކީކޭ؟ މުސްކުޅިއޭ ؟ މަންމަޔާ ދިމާކޮށް މަލާމަތްކޮށްލީ ދޯ! ހޫން….”

ނަމަވެސް، އަހަރެންގެ ދިފާޢުގައި ވާހަކަދެއްކުމުގެ ބަދަލުގައި، އިތުރަށް އޮޅުންފިލުވަން އަހަރެން ނިންމީމެވެ.

“އެހެންވީމާ OOTD އަކީ ކޮބައި؟ GRWM އަކީ؟ އަދި ކަމެއް ބުނެފައި ޝައްކުވާ ގޮތަކަށް JK އޭ މި ލިޔަނީ ކީއްވެ؟”

މި ހިސާބަށް ދިޔައިރު އޭނާއަށް ހެވޭވަރުން ވާހަކަވެސް ނުދެއްކެއެވެ. އެނގިގެން ދިޔަ ގޮތުގައި، މިހާރު އިންޓަނެޓްގައި މީހުން ވާހަކަދައްކަނީ ހުސް ކެޕިޓަލް އަކުރުތަކުން އެކުލެވޭ ސިއްރު ބަހުރުވަޔަކުންނެވެ.

އަހަރެން ވަގުތުން މި ބަސްތައް ނޯޓުކުރަން ފެށީމެވެ.

އެހެންކަމުން، ދަރިންގެ ފޯނަށް ބަލާފައި އެކުދިން މުޢާމަލާތް ކުރަނީ ފަހަރެއްގައި އެހެން ދުނިޔެއެއްގެ ބަހަކުން ބާވައޭ ހިތަށް އަރާ މައިންބަފައިންނަށްޓަކައި، މިޒަމާނުގެ ކުދިން ބޭނުންކުރާ ބައެއް ބަސްތައް ތިރީގައި މިވަނީއެވެ:

FR: For real, for real (ހަމަ އަސްލަށްވެސް).
ކަމަކާ ވަރަށް ބޮޑަށް އެއްބަސްވާއިރު ބޭނުންކުރާ ބަހެކެވެ.

IKR: I know, right? (އަހަންނަށްވެސް އެނގެއޭ ދޯ؟).
މީހަކު ބުނާ އެއްޗަކާ ވަރަށް ބޮޑަށް އެއްބަސްވާކަން ހާމަކުރުމަށް ބޭނުންކުރާ ބަހެކެވެ.

NGL: Not gonna lie (ދޮގަކަށް ނުބުނާނަން).
ތެދަށް ބުނާނަމަ ނުވަތަ ކަމެއް ސާފުކޮށްދޭން އުޅޭއިރު ބޭނުންކުރާ ބަހެކެވެ.

TBH: To be honest (ތެދަށް ބުނާނަމަ).

AMA: Ask me anything
(ކޮންމެ ސުވާލެއްވެސް ކުރޭ). ސުވާލުކުރަން ފުރުޞަތު ހުޅުވާލާއިރު ބޭނުންކުރާ ބަހެކެވެ.

SUS: Suspicious (ޝައްކު އުފެދޭ)
ކަމަކާމެދު ޝައްކުވުމުން ނުވަތަ ކަމެއް ގޯސްކޮށް ހިނގާހެން ހީވުމުން ބޭނުންކުރާ ބަހެކެވެ.

ICYMI: In case you missed it
ފަހަރުގައި ނުފެނިދާނެތީ. ކުރިން ހިނގާފައިވާ ކަމެއް އަލުން ހިއްސާކުރާއިރު ބޭނުންކުރާ ބަހެކެވެ.

WBU: What about you?
(ކަލެއަށް ފެންނަނީ ކިހިނެއް؟).

OOTD: Outfit of the Day
(މިއަދުގެ ހެދުން). މީހަކު ލައިގެން ހުރި ހެދުން ދައްކާލާއިރު ބޭނުންކުރާ ބަހެކެވެ.

GRWM: Get Ready With Me
(އަހަރެން ތައްޔާރުވާ ގޮތް ބަލާލަން އާދޭ). ތައްޔާރުވާ މަންޒަރު ދައްކުވައިދޭ ވީޑިއޯތަކަށް ކިޔާ ނަމެކެވެ

JK –
މިއީ ސަމާސާއަކަށް ބުނާ އެއްޗެކެވެ. އާންމުކޮށް މި ބޭނުންކުރަނީ ސީރިއަސް ނުވަތަ ކުއްލި ސިހުމެއް ލިބޭ ފަދަ ވާހަކައެއް ބުނުމަށްފަހުގައެވެ.

POV –
މިއީ “ޕޮއިންޓް އޮފް ވިއު” ނުވަތަ ތިމާގެ ނަޒަރިއްޔާތުން ކަންކަން ފެންނަ ގޮތެވެ. މިއީ އާންމުކޮށް ކުރު ވީޑިއޯތަކުގައި ވާހަކަ ކިޔައިދިނުމަށް ބޭނުންކުރާ އުކުޅެކެވެ.

IDK –
މީގެ މާނައަކީ “އަހަންނަކަށް ނޭނގެ” އެވެ. (މިއީ އަހަންނަށް ކުރިންވެސް އެނގޭ އެއްޗަކަށް ވާތީ އަހަންނަށް ވަރަށް ބޮޑު ހިތްހަމަޖެހުމެއް ލިބުނެވެ.)

ބެލެވޭ ގޮތުގައި، މިހާރު އިންޓަނެޓް ބޭނުންކުރާ މީހުންގެ ތެރެއިން ދެބައިކުޅަ އެއްބައި މީހުން މުއާމަލާތް ކުރަނީ މިފަދަ ގޮތަކަށެވެ.

ދަރިން ބަލާބޮޑުކުރުމާއި، ގޭތެރޭގެ ކަންކަން ބެލެހެއްޓުމާއި، އަދި ކޮޓަރިއަކަށް ވަދެވުނީ ކޮން ބޭނުމަކުތޯ ހަނދާންކުރަން އުޅުމުގެ ތެރޭގައި، ބަހުގެ މި އާ އޮއިވަރުގައި މައިންބަފައިން ތިބީ ކުޑަކޮށް ފަހަތުގައެވެ.

އެހެންނަމަވެސް، އެއީ މައްސަލައެއް ނޫނެވެ. ސަބަބަކީ ދަރިންގެ ދުނިޔެ ދަސްކުރުމަކީވެސް ލިބޭ ވަރަށް ބޮޑު އުފަލަކަށް ވާތީއެވެ.

އެހެންކަމުން، ދަރިފުޅު “ސްކޫލަށް ދާން GRWM” އޭ ބުނާ އަޑު އިވުނަސް، ނުވަތަ “FR” އޭ ލިޔެ ކޮމެންޓް ކުރިޔަސް، ނުވަތަ “IKR” އޭ ލިޔެލިޔަސް ހާސްނުވާށެވެ. އެއީ އެކުދިން ސިއްރު ކޯޑެއް ބޭނުންކުރަނީކީ ނޫނެވެ.
އެއީ ހަމައެކަނި އިންޓަނެޓާ އެކު ދުވަހުން ދުވަހަށް ބަދަލުވަމުންދާ ބަހުރުވައެވެ.

މި ލިޔުން ކިޔަމުންދާ ހުރިހާ މައިންބަފައިންނަށް މި ކުރު މަޢުލޫމާތުކޮޅުގެ ބޭނުން ހިފޭނެ ކަމަށް އުންމީދު ކުރަމެވެ.

އެހެން ނޫން ނަމަ… ދެން…

JK 😉 …

އަދި ކޮބައިތޯ، ފަހަރުގައި އަހަރެންގެ ކުރިއަށް އޮތް މަޝްރޫޢަކީ ދިވެހި ބަހުން މިފަދަ ކުރު ގޮތްގޮތަށް ލިޔާނެ ބަސްތަކެއް އުފެއްދުން ކަމަށްވެސް ވެދާނެއެވެ…
ވަރަށް މަޖާ ކަމަކަށް ވާނެ ދޯ؟ 😉