ކުރީގެ ވީޑިއޯއެއްގައި ޑައިރެކްޓަރު ދަރްމޭޝް ދަރްޝަން ހާމަކޮށްފައިވާ ގޮތުގައި، އާމިރު ޚާނަށް އޭރު ހުށަހަޅާފައި އޮތް “ރާޖާ ހިންދުސްތާނީ” ގެ މައި ރޯލު ކުޅުމަށް ޝާހުރުކް ޚާން ޝައުގުވެރިކަން ފާޅުކުރިއެވެ.
އާމިރު ޚާން އަދި ޝާހުރުކް ޚާނަކީ ފާއިތުވި އެތައް އަހަރެއްގެ ތެރޭގައި ބޮލީވުޑްގައި އެކަކު އަނެކަކާ ވާދަކުރަމުން އަންނަ ދެ ސުޕަސްޓާރުންނެވެ. މި ދެ ތަރިންނަކީ ވާދަވެރިން ކަމުގައި ވިޔަސް، އެ މީހުންގެ މޮޅު ހުނަރާއެކު ގިނަ ބައެއްގެ ލޯބި ވަނީ ހޯދާފައެވެ. ނަމަވެސް 1996 ވަނަ އަހަރު ނުކުތް ދަރްމޭޝް ދަރްޝަންގެ މަޝްހޫރު ފިލްމު “ރާޖާ ހިންދުސްތާނީ” އިން ފުރުސަތު ހޯދުމަށް މި ދެ ތަރިންވެސް މަސައްކަތް ކުރިކަން އެނގޭ ހެއްޔެވެ؟ އާމިރު ޚާނަށް މި ފިލްމުގެ ރޯލު ލިބުނު ގޮތުގެ ތަފްސީލަށް ބަލާލަމާ ހިނގާށެވެ.
ޝާހުރުކް ޚާން ބޭނުންވީ ރާޖާ ހިންދުސްތާނީގެ ބަތަލުގެ ރޯލު ކުޅުމަށް:
ރާޖާ ހިންދުސްތާނީގެ ސްކްރިޕްޓް ނިމުމުން، ފިލްމު އުފައްދާ ފަރާތްތަކުން އެންމެ ފުރަތަމަ ގުޅީ އާމިރު ޚާނާއެވެ. ނަމަވެސް، އާމިރު އާއި ޕްރޮޑިއުސަރުންނާ ދެމެދު ބައެއް ކަންކަމުގައި އެއްބަސްވުމަކަށް ނާދެވުމުގެ ސަބަބުން އެ ވަގުތަށް ފިލްމުގެ މަސައްކަތް އޮތީ ހުއްޓިފައެވެ. “ބޮލީވުޑް ޓިކާނާ” އަށް ދިން އިންޓަވިއުއެއްގައި ޑައިރެކްޓަރު ދަރްމޭޝް ހާމަކުރި ގޮތުގައި، އެ ދުވަސްވަރު ޝާހުރުކް ޚާން އަމިއްލައަށް އިސްނަގައިގެން އެ ފިލްމުގެ ރޯލު ބޭނުންވާކަމަށް ބުންޏެވެ.
ދަރްމޭޝް ހަނދާން އާކުރަމުން ބުނި ގޮތުގައި، އެއްރެއަކު ޝާހުރުކް ޚާން އޭނާގެ ގެއަށް ގޮސް އެ ފިލްމުގެ މައި ރޯލު ކުޅުމަށް ޝައުގުވެރިކަން ފާޅުކުރިއެވެ. ނުވަދިހައިގެ އަހަރުތަކުގެ އެންމެ މަޝްހޫރު އެއް ތަރި އޭނާގެ ފިލްމަކަށް ޝައުގުވެރިވުމުން ދަރްމޭޝް ހުރީ ވަރަށް ބޮޑަށް އުފާވެފައެވެ.
ނަމަވެސް، މިއީ ޑައިރެކްޓަރަށް ކުރިމަތިވި ބޮޑު ގޮންޖެހުމަކަށް ވިއެވެ. ސަބަބަކީ އޭރުވެސް އޭނާ ދިޔައީ އާމިރު ޚާނާއެކު އެ ފިލްމުގެ މަޝްވަރާތައް ކުރަމުންނެވެ. ޝާހުރުކްގެ ހުށަހެޅުން ލިބުމާއެކު، ދަރްމޭޝް އަވަސްވެގަތީ އާމިރުގެ ގާތަށް ދިއުމަށެވެ. އަދި އާމިރު ގާތު ބުނީ، “ކަލޭ ތިހާ ގިނަ ދުވަހު ވިސްނަން ހުންނަނަމަ، ފަހުން މައްސަލައެއް ދިމާވެދާނެތީ އަހަރެން ޝާހުރުކާ މެދު ވިސްނާލަން ހުއްދަ ދީ. ކަލޭ މި ފިލްމު ކުޅެން ބޭނުން ނޫން ނަމަ…” މިހެންނެވެ.
ޝާހުރުކް ޚާންވެސް މި ރޯލަށް ޝައުގުވެރިވާކަން އެނގުމާއެކު އާމިރު ޚާން ވަގުތުން ސަމާލުވިއެވެ. ނަސީބަކުން، ޖެހިގެން އައި ދުވަހު އާމިރު އާއި ޕްރޮޑިއުސަރުންނާ ދެމެދު ހުރި ހިޔާލުތަފާތުވުންތައް ހައްލުވެ، ކަރިޝްމާ ކަޕޫރާއެކު ފިލްމުގެ ބަތަލުގެ ރޯލު އާމިރު ކުޅޭގޮތަށް ނިމުނެވެ.
ފާހަގަކޮށްލަންޖެހޭ އަނެއް ކަމަކީ، ކަރިޝްމާ ކަޕޫރު ފައިނަލް ކުރުމުގެ ކުރިން، އައިޝްވާރިޔާ ރާއީ، ޖޫހީ ޗާވްލާ އަދި ޑައިރެކްޓަރުގެ އަމިއްލަ ކޮއްކޮ ޕޫޖާ ބަޓްއާ މެދުވެސް ޑައިރެކްޓަރު ވިސްނާފައިވާ ކަމެވެ.
މިހާރުގެ މަސައްކަތްތަކަށް ބަލާއިރު، ޝާހުރުކް ދެން އެންމެ އަވަހަށް ފެންނާނީ “ކިންގް” އިންނެވެ. އަދި އާމިރު މިހާރު ބިޒީކޮށް އުޅެނީ “އެކް ދިން” އަދި “ލާހޯރު 1947” ފަދަ ފިލްމުތައް އުފެއްދުމުގެ މަސައްކަތުގައެވެ.
