ޝާހިދުގެ ނުބައި ރޭވުންތަކުން ސަލާމަތްވެ، ހަގީގަތް ހާމަވުމާއެކު ޖަޒްލާންއާއި ޒީނިޔާގެ ދިރިއުޅުމަށް އާދަޔާ ހިލާފު ހަމަޖެހުމެއް އަތުވެއްޖެއެވެ. މި ބޮޑު އިމްތިހާނުގެ ސަބަބުން އެ ދެމަފިރިންގެ ދެމެދުގައި އޮތް ގުޅުން ކުރިއަށްވުރެ އެތައް ގުނައެއް ބަދަހިވެގެން ދިޔައެވެ. އެކަކު އަނެކަކަށް އޮތް އިތުބާރު އިތުރުވެ، ދިރިއުޅުމުގެ ކޮންމެ ގޮންޖެހުމަކާވެސް އެކުގައި ކުރިމަތިލުމުގެ ސާބިތުކަމާއި ހިތްވަރު އެމީހުންނަށް ލިބުނެވެ.
ޖަޒްލާންގެ ވަޒީފާގެ މާހައުލުގައިވެސް އޭނާއަށް ކުރިން އޮތް ގަދަރާއި އިހުތިރާމް އަލުން ލިބިގެން ދިޔައެވެ. އޮފީހުގެ މެނޭޖްމަންޓުން އޭނާގެ އިހުލާސްތެރިކަން ބަލައިގަނެ، ކުރިއަށްވުރެ ބޮޑެތި މަސްއޫލިއްޔަތުތައް އޭނާއާ ހަވާލުކުރިއެވެ. މިއީ ޖަޒްލާންއަށް ލިބުނު ވަރަށް ބޮޑު ހިތްހަމަޖެހުމެކެވެ. އޭނާގެ މަސައްކަތުގެ ދާއިރާގައި ކުރިން އޮތް ނުތަނަވަސްކަން ފިލައިގޮސް، އާ އުއްމީދުތަކަކާއެކު މަސައްކަތް ކުރަން ފެށިއެވެ.
ޖަޒްލާންގެ އެކުވެރިން ކަމަށްވާ ޒަޔާންއާއި އައިމަންވެސް މި ހާދިސާއިން ވަރަށް ބޮޑު ފިލާވަޅެއް ލިބިގަތެވެ. އެމީހުންނަށް ވިސްނުނީ، ތެދުވެރި ލޯތްބަކީ ހަމައެކަނި އުފާވެރި ވަގުތުތަކުގައި އެކުގައި ސަކަރާތްޖަހައި އުޅުމެއް ނޫން ކަމެވެ.
“ލޯތްބަކީ ހަމައެކަނި އުފާވެރި ވަގުތުތަކުގައި އެކުގައިވުމެއް ނޫން. އެއީ ދަތި ވަގުތުތަކުގައި އެކަކު އަނެކަކަށް ހިމާޔަތް ދިނުން. ޒީނިޔާ ދެއްކި ހިތްވަރުން އަހަރެމެން އެންމެންނަށްވެސް ވަރަށް ބޮޑު އެއްޗެއް ދަސްވެއްޖެ،” އެއްދުވަހަކު އެކުގައި ކޮފީއެއްގައި ތިބެފާ ޒަޔާން ބުންޏެވެ. އައިމަންވެސް އެކަމަށް އެއްބަސްވިއެވެ. އެމީހުންނަށް ފެނުނީ ޒީނިޔާގެ ކެތްތެރިކަމާއި، ޖަޒްލާންއަށް އޮތް ފުރިހަމަ އިތުބާރެވެ.
މި އުފާވެރި ދުވަސްވަރު ޒީނިޔާއަށް އުފާވެރިކަން އިތުރުވެގެން ދިޔައީ އޭނާގެ ކިޔެވުމުގެ ނަތީޖާ ލިބުމުންނެވެ. ޒީނިޔާއަކީ އަބަދުވެސް ކިޔެވުމަށް ލޯބިކުރާ، މުސްތަގުބަލުގައި ކުރިއަށްދާން ބޭނުންވާ ކުއްޖެކެވެ. އޭނާ ކުރި ބުރަ މަސައްކަތުގެ ނަތީޖާއެއްގެ ގޮތުން، އޭނާ އެންމެ ބޭނުންވި ދާއިރާއިން މަތީ ތައުލީމު ހާސިލުކުރުމަށްޓަކައި ބޭރު ގައުމަކުން ފުރުސަތު ލިބުނެވެ. މިއީ މުޅި އާއިލާއަށް ލިބުނު ވަރަށް ބޮޑު އުފަލެކެވެ.
ޖަޒްލާން ނިންމީ ޒީނިޔާގެ މި ހުވަފެން ހަގީގަތަކަށް ހެދުމަށްޓަކައި އޭނާއަށް ދެވެން އޮތް ހުރިހާ އެހީތެރިކަމެއް ދިނުމަށެވެ.
“ޒީނިޔާ، ޒީ އަހަރެންގެ ދަތި ވަގުތުގައި އަހަންނާއެކު ހުރި ފަދައިން، ޒީގެ ކުރިއެރުމަށްޓަކައި އަހަރެން ހުންނާނީ ޒީގެ ފަހަތުގަ. އަހަރެން ނިންމައިފިން ޒީއާއެކު ބޭރަށް ދާން،” ޖަޒްލާން މިހެން ބުނުމުން ޒީނިޔާގެ ދެލޮލުން އުފާވެރިކަމުގެ ކަރުނަ ފާޅުވިއެވެ. މިއީ ޒީނިޔާ ހީކުރި ވަރަށްވުރެ ބޮޑު ގުރުބާނީއެކެވެ. ޖަޒްލާން އޭނާގެ ރަނގަޅު ވަޒީފާ ދޫކޮށްލާފައި ޒީނިޔާގެ ކިޔެވުމަށްޓަކައި ބޭރަށް ދާން ނިންމުމަކީ އޭނާގެ ލޯބީގެ ފުންމިން ދޭހަކޮށްދިން ކަމެކެވެ.
(ނުނިމޭ)
