“އާރުޓީއެލް” ފެރީގެ ޚިދުމަތް ލާމު އަތޮޅުގައި ރަސްމީކޮށް ފަށައިފިއެވެ. މި ޚިދުމަތް ފެށުމަށްޓަކައި އިއްޔެ ލ. ފޮނަދޫގައި ބޭއްވި ޚާއްޞަ ރަސްމިއްޔާތެއްގައި މިކަން ވަނީ އިފްތިތާޙުކޮށްފައެވެ.
މި ޚިދުމަތް ފެށުމާއެކު، ލާމު އަތޮޅުގެ މީހުން ދިރިއުޅޭ ހުރިހާ ރަށެއް މި ނެޓްވޯކުން ވަނީ ގުޅާލެވިފައެވެ. ސަރުކާރުން ބޭނުންވަނީ ރާއްޖޭގެ ދަތުރުފަތުރުގެ ނިޒާމު ހަރުދަނާކޮށް، ރައްޔިތުންނަށް ފަސޭހަކަމާއެކު އެއްރަށުން އަނެއްރަށަށް ދަތުރުކުރެވޭނެ މަގު ތަނަވަސްކޮށްދިނުމަށެވެ.
ޚިދުމަތް ފެށުމުގެ ގޮތުން ފުރަތަމަ ހަފުތާގައި ދަތުރުތައް ކުރިއަށްދާނީ ހިލޭ ކަމަށް އެމްޓީސީސީން މަޢުލޫމާތުދެއެވެ. މިއީ ރައްޔިތުން މި ޚިދުމަތަށް އަހުލުވެރިކުރުވުމަށާއި، ދަތުރުތަކުގެ ތާވަލަށް އާންމުން ހޭނުމަށް ދެވޭ ފުރުޞަތެކެވެ.
ލާމު އަތޮޅުގައި އާރުޓީއެލް ފެރީގެ ޚިދުމަތް ފެށުމަކީ އެ އަތޮޅުގެ އިޤްތިޞާދީ އަދި އިޖުތިމާޢީ ތަރައްޤީއަށް ލިބުނު ބޮޑު ކުރިއެރުމެކެވެ. ޚާއްޞަކޮށް ސިއްޙީ ޚިދުމަތް ހޯދުމަށާއި ތަޢުލީމީ ބޭނުންތަކަށް އެއްރަށުން އަނެއްރަށަށް ދަތުރުކުރާ ފަރާތްތަކަށް މިކަމުގެ ސަބަބުން ބޮޑެތި ލުއިތަކެއް ލިބިގެންދާނެއެވެ.
ސަރުކާރުން އަމާޒު ހިފާފައިވަނީ މުޅި ރާއްޖެ މި ފެރީ ނެޓްވޯކުން ގުޅާލުމަށެވެ. މި މަޝްރޫޢުގެ ދަށުން މިހާރުވެސް ރާއްޖޭގެ އުތުރުގެ ގިނަ އަތޮޅުތަކެއްގައި އަންނަނީ ކާމިޔާބުކަމާއެކު މި ޚިދުމަތް ދެމުންނެވެ.
