މަޝްހޫރު އެކްޓްރެސް ރޫޕާލީ ގަންގޫލީ، އޭނާ “ސެމީ އެޑޮޕްޓެޑް” ނުވަތަ ދަރިއެއްގެ ގޮތުގައި ބަލަމުން އަންނަ އަންހެން ކުއްޖަކާ ބެހޭގޮތުންނާއި، އެ ކުއްޖާއާ ދެމެދު އޮތް ވަރުގަދަ އިހުސާސްތަކާ ބެހޭގޮތުން ފުރަތަމަ ފަހަރަށް ވާހަކަދައްކައިފިއެވެ. ރޫޕާލީ ހާމަކުރި ގޮތުގައި އޭނާއަކީ އެ ކުއްޖާގެ ޤާނޫނީ ބެލެނިވެރިޔާވެސް މެއެވެ.
ފިލްމު އުފައްދާ ފަރާތެއް ކަމަށްވާ ފަރާ ޚާންގެ ޔޫޓިއުބް ވްލޮގްގައި ވާހަކަދައްކަމުން ރޫޕާލީ ވަނީ މި ގުޅުން އުފެދިގެން އައި ގޮތުގެ ތަފްޞީލު ހިއްސާކޮށްފައެވެ. އޭނާ ބުނި ގޮތުގައި އެ ކުއްޖާގެ މަންމަ އަނީތާއަކީ، ރޫޕާލީގެ ދަރިފުޅު ރުދްރާންޝްގެ އުމުރުން އެންމެ އަހަރަކުން ފެށިގެން އެގޭގައި މަސައްކަތްކުރާ މީހެކެވެ. “އަނީތާ ބޮޑުވީވެސް އަދި ކައިވެނިކުރީވެސް ހަމަ މަގޭ ކުރިމަތީގައި، މަގޭ ގޭގައި އުޅެމުން،” ރޫޕާލީ ބުންޏެވެ.
އެ ކުއްޖާ އުފަންވި ދުވަހުގެ ހަނދާންތައް އައުކުރަމުން ރޫޕާލީ ބުނީ، “މި ކުއްޖާ އުފަންވީވެސް އަހަރެންގެ ކުރިމަތީގައި. އެންމެ ފުރަތަމަ އެ ކުއްޖާ އަތަށްލީވެސް އަހަރެން. އޭނާގެ މަންމަ ވިހަން އުޅޭ ކަމުގެ ޚަބަރު ލިބުމުން، ޝޫޓިންގްގެ މަސައްކަތްތައް ދޫކޮށްލާފައި އަހަރެން ދިޔައީ އެވަގުތު އެތަނުގައި ހުންނަން ބޭނުންވާތީ،” ކަމަށެވެ.
ދުވަސްތައް ފާއިތުވަމުން ދިޔަ ވަރަކަށް އެ ކުއްޖާއާ މެދު އޮތް ގުޅުން އަމިއްލަ ދަރިއަކަށް ވުރެ ބަދަހިވެފައިވާ ކަމަށް ރޫޕާލީ ފާހަގަކުރިއެވެ. “އަހަންނަށް އިހުސާސްކުރެވެނީ އެއީ ހަމަ އަހަރެންގެ އަމިއްލަ ދަރިއެއްގެ ގޮތުގަ. އަހަރެންނަކީ އޭނާގެ ޤާނޫނީ ބެލެނިވެރިޔާ، އަދި ކޮންމެ ގޮތަކުން ބެލިޔަސް އެއީ ހަމަ މަގޭ ދަރިއެއް،” އޭނާ ބުންޏެވެ.
މި ވްލޮގްގައި އާދިޔާ ނަމަކަށް ކިޔާ މި ކުއްޖާ ފެނިގެންދިޔައިރު، ގޭތެރޭގައި އެ ކުއްޖާ އުޅޭ ލޯބި އަދި މަޖާ ގޮތްތަކުގެ ވާހަކަވެސް ރޫޕާލީ ކިޔައިދިނެވެ. ރޫޕާލީގެ މަސައްކަތުގެ ދާއިރާގައި ބާއްވާ އެކި ހަފުލާތަކުންނާއި ބޭރުތެރެއިންވެސް އާދިޔާ އާންމުކޮށް ފެނެއެވެ. މިއީ އެ ދެމީހުންގެ މެދުގައި އޮތް ގާތްކަން ހާމަކޮށްދޭ ކަމެކެވެ.
ޒާތީ ދިރިއުޅުމަށް ބަލާއިރު، ރޫޕާލީ ކައިވެނިކޮށްގެން އުޅެނީ އަޝްވިން ވަރްމާއާއެވެ. މި ދެމަފިރިންގެ ދަރިއަކީ ރުދްރާންޝްއެވެ.
ކެރިއަރަށް ބަލާއިރު، ރޫޕާލީއަކީ ފާއިތުވި 30 އަހަރު ދުވަހު ފިލްމީ ދާއިރާގައި ފާހަގަކޮށްލެވޭ މަސައްކަތްތަކެއް ކޮށްފައިވާ ފަންނާނެކެވެ. ފިލްމުތަކުން ފެށި ނަމަވެސް، އޭނާ ބޮޑު މަޤުބޫލުކަމެއް ހޯދީ “ސާރާބާއި ވާސަސް ސާރާބާއި” އަދި “ޕަރުވަރިޝް” ފަދަ ޓީވީ ޑްރާމާތަކުންނެވެ. މިހާރު އޭނާ ފެންނަނީ ވަރަށް ބޮޑު ތަރުޙީބެއް ލިބެމުންދާ “އަނޫޕަމާ”ގެ މައި ރޯލުންނެވެ.
