ބޮލީވުޑްގެ ސުޕަސްޓާރު ޝާހްރުކް ޚާންގެ ކުރިއަށް އޮތް ފިލްމު “ކިންގް” ރިލީޒްވުމުގެ ކުރިން ވެސް ބޮޑު ކާމިޔާބީއެއް ހޯދައި، މުޅި އިންޑިއާގެ ސިނަމާ ސިއްސުވާލައިފިއެވެ. ރިޕޯޓްތައް ބުނާގޮތުން މި ފިލްމުގެ ޑިޖިޓަލް ނުވަތަ އޯޓީޓީ ރައިޓްސް ވަނީ މިހާތަނަށް އިންޑިއާގެ ފިލްމަކަށް ނުލިބޭ ފަދަ ބޮޑު އަގަކަށް ވިއްކާލާފައެވެ.
ސުޖޯއީ ގޯޝް ޑައިރެކްޓްކޮށް، “ޕަތާން”ގެ ޑައިރެކްޓަރު ސިދާތު އާނަންދު ޕްރޮޑިއުސްކުރާ މި ފިލްމަކީ ޝާހްރުކް ޚާނާއި އޭނާގެ ދަރިފުޅު ސުހާނާ ޚާން އެކުގައި ބޮޑު ސްކްރީނުން ފެންނާނެ ފުރަތަމަ ފިލްމެވެ. މި ފިލްމުގެ ޑިޖިޓަލް ރައިޓްސް ވިއްކާލާފައިވަނީ ގާތްގަނޑަކަށް 125 ކްރޯޑް ރުޕީސްއަށް ކަމަށް މީޑިއާ ރިޕޯޓްތައް ބުނެއެވެ. މިއީ އިންޑިއާގެ ފިލްމީ ތާރީޚުގައި އޯޓީޓީ ޕްލެޓްފޯމަކުން ފިލްމެއްގެ ރައިޓްސް ގަތުމަށް ހޭދަކުރި އެންމެ ބޮޑު އެއް އަދަދެވެ.
މި ފިލްމުގެ މަސައްކަތް މިހާރު ބާރުސްޕީޑުގައި ކުރިއަށްދާއިރު، ބެލުންތެރިންގެ މެދުގައި މި ފިލްމަށް އޮތް ޝައުގުވެރިކަން އިތުރުވެފައިވަނީ މިއީ ސުހާނާ ޚާންގެ ފުރަތަމަ ފީޗާ ފިލްމަށް ވުމާއި، ޝާހްރުކް ޚާން މި ފިލްމުގައި ފެންނާނީ ވަރަށް ތަފާތު “ޑޯން” އެއްގެ ރޯލުން ކަމަށް ވާތީއެވެ.
“ކިންގް” އަކީ އެކްޝަން ތުރިލާ އެކެވެ. މި ފިލްމުގެ ޝޫޓިން ކުރިއަށްދާނީ އިންޑިއާގެ އިތުރުން ބޭރުގެ އެކި ގައުމުތަކުގައެވެ. މި ފިލްމަށް އޯޓީޓީ ޕްލެޓްފޯމްތަކުން މިހާ ބޮޑު ޝައުގުވެރިކަމެއް ލިބުނީ، ޝާހްރުކް ޚާންގެ އެންމެ ފަހުން ނުކުތް “ޕަތާން” އަދި “ޖަވާން” ފަދަ ފިލްމުތަކުން ހޯދި ބޮޑު ކާމިޔާބީގެ ސަބަބުންނެވެ.
މި ފިލްމު ސިނަމާތަކަށް ގެނައުމަށް ހަމަޖެހިފައިވަނީ އަންނަ އަހަރުގެ ތެރޭގައެވެ. އޯޓީޓީގައި މި ފިލްމު ދައްކާނީ ސިނަމާތަކުގައި ރިލީޒްކޮށް ވަކި މުއްދަތެއް ހަމަވުމުންނެވެ. މި ބޮޑު ޑީލާ އެކު، “ކިންގް” ވެފައިވަނީ ރިލީޒްވުމުގެ ކުރިން ވެސް ބޮޑު ފައިދާއެއް ހޯދާފައިވާ ފިލްމަކަށެވެ.
