އިންޑިއާގެ ގުޖުރާތު ސްޓޭޓްގެ ދިތާލާ އަވަށަށް ނިސްބަތްވާ އުމުރުން 70 އަހަރުގެ ދަނޑުވެރިއެއް ކަމަށްވާ އުކާބާއީ ބަޓީ ވަނީ، އެންމެ އަނބުގަހެއްގައި 14 ތަފާތު ބާވަތެއްގެ އަނބު ހައްދައި، ދަނޑުވެރިކަމުގެ ދާއިރާގެ މާހިރުން ހައިރާންކޮށްލާފައެވެ. މިއީ އޭނާ ފާއިތުވި 25 އަހަރު ދުވަހު ދެއްކި ސާބިތުކަމާއި، އައު އީޖާދުތައް ހޯދުމަށް ކުރި ބުރަ މަސައްކަތުގެ ފޮނި ނަތީޖާއެވެ.
އުކާބާއީ މި ކާމިޔާބީ ހާސިލުކުރީ “މަލްޓިޕަލް ޓޮޕް ވޯކިން” ނަމަކަށް ކިޔާ، ގަސް ގުޅުމުގެ (ގްރާފްޓިނޮގް) ކުރިއަރާފައިވާ އުކުޅެއް ބޭނުންކޮށްގެންނެވެ. އޭނާ ވަނީ އިންޑިއާގެ އެކި ކަންކޮޅުތަކުން މޮޅު ބާވަތްތަކުގެ އަނބު ގޮފިތައް ހޯދައި، ވަރަށް ފަރުވާތެރިކަމާއެކު އަމިއްލަ ރަށުގެ އާދައިގެ އަނބުގަހަކާ ގުޅުވާފައެވެ. މިއަދު އެ ގަހުން ފެންނަނީ ގިރް ކޭސަރް، އަލްފޮންސޯ (ހާޕޫސް)، ލަންގްރާ، އަމްރަޕާލީ، ތޯތާޕޫރީ، ބަދާމީ އަދި ގުލާބީ ފަދަ މަޝްހޫރު އެތައް ބާވަތެއްގެ އަނބުތަކެކެވެ.
އަނބު މޫސުމުގައި މި ގަސް ފެންނަނީ ޤުދުރަތީ ރީތި ކުލަބޮކިތަކެއް ފަދައިންނެވެ. އެކި ބައްޓަމާއި، ތަފާތު ކުލަކުލައިގެ އަދި އެކި މީރު ރަހަތަކުގެ އަނބުތައް އެއްގަހަކުން ފެނުމަކީ ލޮލަށް ލިބޭ ވަރަށް ބޮޑު އުފަލެކެވެ.
މި މަސައްކަތަކީ ހަމައެކަނި ބަލާލަން ރީތި މަންޒަރެއް ނޫނެވެ. ދަނޑުވެރިކަމުގެ މާހިރުން ދެކޭގޮތުގައި މިއީ ނެތެމުންދާ ބާވަތްތައް ހިމާޔަތްކުރުމަށް ކުރެވޭ ވަރަށް މުހިންމު މަސައްކަތެކެވެ. އެއް ގަހެއްގެ މުލަކުން އެތައް ބާވަތެއްގެ ނާދިރު އަދި ސަގާފީ އަނބުތަކަށް ދިރުން ދިނުމަކީ، ޒަމާނީ ދަނޑުވެރިކަމުގެ ސަބަބުން ނެތިގެންދާ ބާވަތްތައް ރައްކާތެރިކޮށްދޭ “ދިރިހުރި ލައިބްރަރީ” އެއް ފަދަ ކަމެކެވެ.
އުކާބާއީގެ މި ވާހަކައަކީ ކެތްތެރިކަމާއި، އުނގެނުމާއި، މަސައްކަތަށް ހުންނަ ޝައުޤުވެރިކަމުގެ ސަބަބުން ދަނޑުވެރިކަމަށް އިންޤިލާބީ ބަދަލެއް ގެނެވޭނެކަމުގެ ހެއްކެކެވެ. އަދި މިއީ އަންނަން އޮތް ޖީލުތަކަށްޓަކައި ޤުދުރަތީ މުއްސަނދިކަން ހިމާޔަތްކުރުމަށް ލިބުނު ވަރަށް ބޮޑު ހިތްވަރެކެވެ.
