ޗައިނާގެ ނޯތު އީސްޓް ފޮރެސްޓްރީ ޔުނިވާސިޓީގެ ދިރާސާވެރިން ވަނީ ތިމާވެއްޓާ ރައްޓެހި ތަކެތި އުފެއްދުމުގެ ދާއިރާއިން އިންޤިލާބީ ކުރިއެރުމެއް ހޯދާފައެވެ. އެ ފަރާތްތަކުން ވަނީ މުޅިންވެސް އޮނު ބޭނުންކޮށްގެން، ސިނާއީ މަސައްކަތްތަކަށް ބޭނުންވާ ވަރުގަދަކަން ހުރި، އަދި ހަމައެހެންމެ ވަރަށް އަވަހަށް ފަނާވެދާ ފަދަ ބަޔޯޕްލާސްޓިކެއް އުފައްދާފައެވެ.
މީގެ ކުރިން އޮނު ބޭނުންކޮށްގެން ތައްޔާރުކުރާ ޕްލާސްޓިކާ ޚިލާފަށް، މި އައު މާއްދާ އުފައްދާފައިވަނީ މޮލިކިއުލާ ފެންވަރުގައި އޭގެ އޮނިގަނޑަށް ބަދަލުތަކެއް ގެނެސްގެންނެވެ. ސައިންސްވެރިން މިކަމުގައި ބޭނުންކުރަނީ ވިހަ ނޫން އަލްކަހޯލް ސޮލްވެންޓެކެވެ. މީގެ އެހީގައި އޮނު ސެލިއުލޯސްއަށް ބަދަލުކޮށް، ކެމިކަލް މަރުހަލާތަކެއްގެ ތެރެއިން ވަރުގަދަ އަދި ދެމެހެއްޓެނިވި އޮނިގަނޑަކަށް މިއީ ބަދަލުކޮށްލައެވެ.
މި ބަޔޯޕްލާސްޓިކްގެ ވަރުގަދަކަން 110 މެގަޕާސްކަލްއަށް އަރާއިރު، މިއީ މިހާރު އާންމުކޮށް ބޭނުންކުރާ ޕީ.އެލް.އޭ އާއި ޕޮލިސްޓައިރީން ފަދަ ޕްލާސްޓިކަށްވުރެ މާ ވަރުގަދަ އެއްޗެކެވެ. އެހޭންކަމުން، މިއީ އުޅަނދުފަހަރާއި، އިލެކްޓްރޯނިކް ސާމާނުގެ އިތުރުން ގޭތެރޭގައި ބޭނުންކުރާ ތަކެތި އުފެއްދުމަށްވެސް އެކަށީގެންވާ މާއްދާއެކެވެ.
މި އީޖާދުގެ އެންމެ ޚާއްސަ ސިފައަކީ ތިމާވެއްޓަށް މީގެ ސަބަބުން ކުރާ ފައިދާއެވެ. އާދައިގެ ޕްލާސްޓިކް ފަނާވުމަށް އެތައް ސަތޭކަ އަހަރެއް ނަގާއިރު، މި މާއްދާ ފަސްގަނޑުގެ ތެރޭގައި އެންމެ 50 ދުވަސް ތެރޭ އެއްކޮށް ފަނާވެދެއެވެ. މީގެ އިތުރުން، މިއީ އޭގެ އަސްލު ވަރުގަދަކަމުގެ 90 އިންސައްތަ ހިފަހައްޓައިގެން ތަކުރާރުކޮށް ރިސައިކަލް ކުރެވޭ އެއްޗެކެވެ. އަދި ފަނާވެދާއިރު ތިމާވެއްޓަށް ގެއްލުންދޭ މައިކްރޯޕްލާސްޓިކް ނުވަތަ އެހެނިހެން ވިހަ މާއްދާތަކެއް މީގެއިން ބޭރެއް ނުވާނެއެވެ.
ދުނިޔޭގައި ޕްލާސްޓިކް ތަޣައްޔަރުވުން އިންތިހާއަށް އިތުރުވަމުންދާ މި ދަނޑިވަޅުގައި، އޮނުން އުފެއްދި މި އައު މާއްދާއަކީ ތިމާވެއްޓާ ރައްޓެހި، ސާފު އުފެއްދުންތެރިކަމަކަށް ދުނިޔެ އެނބުރިގަތުމަށް ލިބުނު މުހިންމު ފުރުސަތެކެވެ.
