މި ހުރިހާ ކަމެއް ފެށުނީ ވަރަށް ބާރުގަދަ ލޯބީގެ ތޫފާނެއް ފަދައިންނެވެ. ނަމަވެސް މިކަން ހަޤީޤަތަކަށް ވުމަށް އަހަރުތަކެއް ނެގިއެވެ.
އެންމެ ފުރަތަމަ ފެށުނީ ފޭސްބުކުން ފޮނުވި ރަހުމަތްތެރިކަމުގެ ރިކުއެސްޓަކުންނެވެ. އާދައިގެ “ހާއި.. ހެލޯ..” އެކެވެ. އަބަދުވެސް އޮންނަނީ އަދަބުވެރިކަމާއި، ދުރުމިނާއި، ހައްދު ފަހަނަޅައި ނުދިއުމަށް ސަމާލުކަން ދީފައެވެ.
ދެން ފެނުނީ އެހެން މަންސައެއްގައި މާޝާ ހިއްސާކުރި ވީޑިއޯއަކަށް ކޮށްފައިވާ އާދަޔާ ޚިލާފު ކޮމެންޓެކެވެ. އެއީ ނުރަނގަޅު ވާހަކައެއް ނޫނެވެ. ނަމަވެސް އޭގައި އޮތީ ވަރަށް ފުންކޮށް ކަންކަން ފާހަގަކޮށްފައެވެ. އެ ކޮމެންޓުގެ އަސަރު ހިތުގައި ގިނައިރު ހުއްޓެވެ. އޭގެ ފަހުން އިތުރު ކޮމެންޓެކެވެ. ދެން ރިއެކްޝަނެކެވެ. އޭގެ ފަހުން އެ ކޮމެންޓާ ބެހޭގޮތުން މެސެޖެކެވެ. ފެންކޮޅެއް މަޑުމަޑުން ރެނދުތަކުގެ ތެރެއިން ދެމިގެންދާ ފަދައިން، އެއް ކަމަކަށް ފަހު އަނެއް ކަމެއް ހިނގަމުން ދިޔައެވެ.
ވާހަކަދެއްކުންތައް އިތުރުވަމުން ދިޔައެވެ. އަވަސްއަރުވާލުމެއް ނެތެވެ. މަޖުބޫރުކަމެއް ނެތެވެ. ދުވަހުގެ ކަންކަމާއި، ވަޒީފާއާއި، އާއިލާއާ ބެހޭގޮތުން އޭނާ ސުވާލުކުރެއެވެ. ނަމަވެސް ބިރުގަންނަވާލާ ވަރަކަށް ނޫނެވެ. އޭނާގެ އަޅާލުން ހުރިކަން އިޙުސާސްވާ މިންވަރަށެވެ.
މާޝާއަށް ހީވީ ކަންކަން އޮތީ އޭނާގެ ބާރުގެ ދަށުގައި ކަމަށެވެ. އޭނާ އަމިއްލަ ނަފުސަށް އެކަން ތަކުރާރުކޮށް ހަނދާންކޮށްދިނެވެ. މާޝާއަކީ އޭނާއަށް ވުރެން އުމުރުން ދުވަސްވީ، ހޭލުންތެރި، ތަޖުރިބާހުރި އަންހެނެކެވެ. އޭނާއަށް މިއީ ނުރައްކަލެއް ނެތް، ރައްކާތެރި، އަދި ހުދޫދުތަކެއްގެ ތެރޭގައި އޮތް އެކުވެރިކަމެކެވެ.
އެހެންނަމަވެސް، މިއީ ތަފާތު ކަމެއްކަމުގެ އިޙުސާސް އޭނާއަށް ކުރެވެމުން ދިޔައެވެ. ދެމީހުންނަކީވެސް އެކަނިވެރިންނެވެ. އުނދަގޫ ދިރިއުޅުމެއް ތަހައްމަލުކުރަމުންދާ ދެމީހުންނެވެ. ދެމީހުންގެވެސް ބަލަދުއަރާ ކުދިން ތިއްބެވެ. އެކުދިންނަށްޓަކައި ދުވާލުގެ ވަގުތުތައް ހުސްކޮށް، ރޭގަނޑުގެ ވަގުތުތައް ޒިންމާތަކާއި ވަރުބަލިކަމުގައި ހޭދަކުރާ ދެމީހުންނެވެ.
މި ހިއްސާކުރެވޭ އެކަނިވެރިކަމުގެ ތެރެއިން، މިއީ ނަސީބުގައި ލިޔެވިފައިވާ ކަމެއް ކަމަށް އިޙުސާސްވާން ފެށިއެވެ. ދެމީހުންވެސް ތަފާތު ތޫފާންތައް ކަޑަތުކުރުމަށްފަހު، އެކަކު އަނެކަކުގެ ފަރާތުން ހިޔާވަހިކަން ހޯދަނީއެވެ. ހީވަނީ މިއީ ކުރިންވެސް ނިންމާފައިވާ ކަމެއްހެންނެވެ.
މިކަން މިހެން އޮއްވައި، އޭނާއަކީ ވަރިވެފައިވާ މީހެއްކަން މާޝާ އޭނާއަށް ކިޔައިދިނެވެ. އެއީ ނަފުސާނީ ގޮތުން ބަލިކަށިވެފައި ހުރި ވަގުތެއްގައި، އުނދަގޫ ދުވަސްތަކެއްގެ ތެރޭގައި ކުރެވުނު އިޢުތިރާފެކެވެ. މާޝާ އަބަދުވެސް އެކަން ސިއްރުކުރެއެވެ. އެއީ ފިރިހެނުންނަށް އޭނާއަކީ ފަސޭހައިން ހާސިލުކުރެވޭނެ މީހެއްގެ ގޮތުގައި ނުފެނުމަށްޓަކައެވެ.
ނަމަވެސް އޭނާ އެވާހަކަ ބުންޏެވެ. އަދި އެވަގުތުން ފެށިގެން ހުރިހާ ކަމެއް ބަދަލުވިއެވެ.
އޭނާ އެކަން ދެކުނީ ދަޢުވަތެއްގެ ގޮތުގައެވެ. ފުރަތަމަ އެކަން އޮތީ ކުރިއަށްވުރެ ވެސް އޯގާތެރިކޮށެވެ. އޭނާގެ ބަސްތައް މަޑުމޮޅިވެ، ފުންވިއެވެ. އޭނާ ވާހަކަދެއްކީ ނުހަނު ލޯތްބާއެކުގައެވެ. އޭނާއަކީ ހިތްވަރުގަދަ މީހެއް ކަމަށާއި، އޭނާގެ ދިރިއުޅުމުގެ ކަންކަން ޤަދަރާއެކު ބަލަހައްޓަމުންދާ ގޮތަށް ތަޢުރީފުކުރިއެވެ. މާޝާއަށް އިޙުސާސްވީ އޭނާގެ އަގު ވަޒަންކުރާ މީހަކު ފެނުނު ކަމަށެވެ.
ދިގު ވާހަކަތަކާއި ހިމޭން ވަގުތުތަކުގެ ތެރެއިން، ދެމީހުންގެ މެދުގައި ގާތްކަން އުފެދުނެވެ. އިތުބާރު އުފެދި، އާދައިގެ ލޯބީގެ ގުޅުމެއްގައި ކަންކަން ހިނގާ ފަދައިން ކަންކަން ހިނގަމުން ދިޔައެވެ.
ނަމަވެސް އޭނާއާއެކު އުފެދުނު މި ގާތްކަމުން އުފެދުނީ ހަމައެކަނި ލޯތްބެއް ނޫނެވެ. އޭގެ ބަދަލުގައި އެހެން ކަމެއް އުފަންވިއެވެ. ނުބައި، އަނދިރި ކަމެކެވެ. ފަރުދާގެ ފުރަގަހުގައި ފޮރުވިފައި އޮތް ކަމެކެވެ.
އޭގެ ފަހުން އޭނާގެ އުޅުން ބަދަލުވީ މާޝާއަށް ވަގުތުން ދެނެގަންނަން އުނދަގޫ ގޮތަކަށެވެ. އެއް ދުވަހު އޭނާ ރޮއި ހަދާނެއެވެ. މާޝާއާ ނުލައި ދިރިނޫޅެވޭނެ ކަމަށާއި، ދުރުގައި ހުންނަން ޖެހުމުން ކެތްނުވާ ކަމަށް ބުނާނެއެވެ. އަނެއް ދުވަހު އޭނާ އިޢުތިރާފުވާނީ މުޅި ރޭ ނުނިދާ ހުރި ކަމަށެވެ. މާޝާ ހުރި ތަނަކާއި، ކުރާ ކަމަކާއި، ހުރީ ކާކާ އެކުކަން ނޭނގޭނަމަ އޭނާގެ ސިކުނޑިއަށް އަރާމެއް ނުލިބޭ ކަމަށް ބުނާނެއެވެ.
ފުރަތަމަ އެއީ ލޯބީގެ ފުންކަން ކަމަށް ހީވިއެވެ. ދެން އެއީ އެކަކު އަނެކަކަށް ބަރޯސާވުން ކަމަށް ހީވިއެވެ. ނަމަވެސް ފަހުން އެއީ ކަންކަން ކޮންޓްރޯލް ކުރުން ކަމަށް އިޙުސާސްވާން ފެށިއެވެ.
ފެނުގެ ތެރެއަށް ފެތުރިދާ ވިހައެއް ފަދައިން، އޭނާގެ ހުރިހާ ކަމެއް މާޝާގެ ވަށައިގެންވާ ކަންކަން ހަލާކުކުރަން ފެށިއެވެ. ފުރަތަމަ ފެށީ ރަހުމަތްތެރިންނާ ހިސާބުންނެވެ. “އެމީހުން މާޝާއަކަށް ރަނގަޅެއް ނޫން.” އޭނާ ބުނާނެއެވެ. “އެމީހާ އެއުޅެނީ މާޝާގެ ކިބައިން ކަމަކަށް ބޭނުންވެގެން.” ނުވަތަ “އެ އަންހެން މީހާ މާޝާގެ ފުރަގަހުގައި ދައްކަނީ ނުބައި ވާހަކަ.” މިފަދަ ބަސްތައް ބުނަން ފެށިއެވެ.
ފިރިހެން ރަހުމަތްތެރިއަކު ގާތްވެއްޖެނަމަ ޝައްކު އުފައްދައެވެ. އަންހެން ރަހުމަތްތެރިއަކު އަޅާލައިފިނަމަ އެއީ ދޮގުވެރިއެއް ނުވަތަ އެއީ އަންހެން**އެއް ކަމަށް ބުނެއެވެ. މާޝާ އެކަމާ ދެބަސްވެއްޖެނަމަ، އޭނާ ޒުވާބެއް ނުކުރެއެވެ. އޭގެ ބަދަލުގައި ހިތުގައި ޝައްކު އުފައްދަނީއެވެ. “އޭނާ މާޝާއާ ބެހޭގޮތުން މިހެން ބުނި.. އޭނާ އަހަރެން ގާތު ބުނީ އާދަޔާ ޚިލާފު ވާހަކައެއް.. އަހަރެން އަޑުއެހިން މާޝާ ކޮންމެވެސް މީހަކާއެކު ކޮންމެވެސް ތަނަކުން ފެނުނު ކަމަށް.” މި ވާހަކަތަކަކީ އަބަދުވެސް ސާބިތު ނުކުރެވޭ ފަދަ މާނަފުން ވާހަކަތަކެކެވެ. ނަމަވެސް އެއީ ހިތް ނުތަނަވަސްކުރުވައި، އެކަނިވެރިކުރުވަން ފުދޭވަރުގެ ވާހަކަތަކެކެވެ.
ދެން މިކަން ފެތުރިގެން ދިޔައީ ވަޒީފާގެ މާހައުލަށެވެ. އެކުގައި މަސައްކަތްކުރާ މީހުންނާމެދު ޝައްކު އުފެދި، ވާހަކަދައްކަން އުނދަގޫވިއެވެ. ކޮންމެ މުއާމަލާތަކީ ސަބަބު ދައްކައި، ދިފާއުވާން ޖެހޭ ކަމަކަށް ވިއެވެ. މާޝާގެ ހަމަޖެހިފައިވާ ދުނިޔެ ބިނދިގެންދާން ފެށިއެވެ.
ނަމަވެސް ކަންކަން މިއަށްވުރެ ގޯސްވީ އޭނާ ދެން ކުރި ކަމަކުންނެވެ. އޭނާ ހަމައެކަނި މާޝާ މީހުންނާ ދުރުކުރީއެއް ނޫނެވެ. އޭނާ މާޝާގެ ރަހުމަތްތެރިންނާއި، ދަންނަ މީހުންނާއި، އާއިލާގެ މީހުންގެ ތެރެއަށް ވަނެވެ. އެމީހުންނަށް ގުޅައި، ބައްދަލުކޮށް، ފޮޓޯ ނަގައި، އޭނާއަކީ އެމީހުންގެ މީހެއް ކަމަށް ދެއްކިއެވެ. މާޝާ ދުވަހަކުވެސް ނުދޭ ފުރުސަތެއް އޭނާ އަމިއްލައަށް ހޯދިއެވެ.
އަދި އެ ފޮޓޯތަކާއި މެސެޖުތައް އެހެން މީހުންނަށް ދައްކައެވެ. “ފެނޭތަ؟ އެމީހުން އަހަރެން ދެކެ ލޯބިވޭ. އެމީހުން އަހަރެންނަށް ޤަދަރުކުރޭ. އަހަރެން މާޝާދެކެ ލޯބިވާ މިންވަރު އެމީހުންނަށް އެނގޭ.” އޭނާ ބުނެއެވެ. އެހެން މީހުންގެ ކުރިމަތީގައި އޭނާ ކުރަހައިދިނީ އޭނާއަކީ މާޝާގެ ގާތް، އިތުބާރު ހިފޭ، އަދި އެންމެންގެ ލޯބި ލިބިފައިވާ މީހެއްގެ ގޮތުގައެވެ. އޭނާ ބިނާކުރި މި ސޫރައިގެ ސަބަބުން މާޝާ އިތުރަށް ނުތަނަވަސްވިއެވެ. އެއީ ހަމައެކަނި އޭނާގެ ދުނިޔެ ފާރަލުމެއް ނޫނެވެ. އެއީ މާޝާގެ އަމިއްލަވަންތަކަން އައު ގޮތަކަށް ލިޔެ ބަދަލުކުރުމެވެ.
މާޝާގެ ދިރިއުޅުމަކީ އޭނާއަށް އަމިއްލައަށްވެސް ވަކިކުރަން ނޭނގޭވަރުގެ އޮޅުންބޮޅުންގަނޑަކަށް ވިއެވެ. ފޯނު ކޯލްތައް މެދުނުކެނޑި އަންނަން ފެށިއެވެ. މެސެޖުތަކުގެ ކޮޅެއް ނެތެވެ. މާޝާ ޖަވާބު ނުދީފިނަމަ، އޭނާގެ ރާގު ބަދަލުވެއެވެ. ކަންބޮޑުވުމުން ފެށިގެން، ތުހުމަތުތަކަށާއި، ރުޅިވެރިކަމަށެވެ. އަދި މާޝާ ކަމެއް ސާފުކޮށްދީފިނަމަ، އޭނާ އަލުން މަޑުމޮޅިވެއެވެ. މާފަށް އެދެއެވެ. ބުނަނީ އެހެން އުޅެވެނީ މާ ބޮޑަށް ލޯބިވާތީ ކަމަށެވެ. “މާ ބޮޑަށް.” ކޮންމެ ފަހަރަކުވެސް އެ ބަސްތައް ބާރަށް އިވިއިވި ހުރެއެވެ. އެންމެ ފަހުން އެއީ ލޯބީގެ އަޑެއް ކަމަކަށް ނުވިއެވެ. އެއީ އިންޒާރެއްގެ އަޑަށް ވިއެވެ.
އެއް ދުވަހެއްގެ އިރުއޮއްސުނު ވަގުތު، އެތައް ކޯލަކާއި މެސެޖަކަށް ޖަވާބު ނުދީ މާޝާ އެކަނި އިނެވެ. ފޯނު ބާއްވާލައިގެން، ވަށައިގެން އޮތް ބަރު ހިމޭންކަމުގެ ތެރޭގައެވެ. އެ ހިމޭންކަމުގެ ތެރެއިން، އޭނާގެ އަމިއްލަ ފިކުރުތައް އަލުން އެނބުރި އަންނަން ފެށިއެވެ. ކުދިކުދި ހަނދާންތަކެވެ. ކުރިން އޭނާ ފަރާތުން ފެނުނު ކަންކަމެވެ. ބިރުވެރި ނިޝާންތަކެވެ.
އޭނާއަށް ހަނދާންވީ، އެމީހުންގެ ރަހުމަތްތެރިކަން ބަދަހިވުމުގެ ކުރިންވެސް، އޭނާ އޮންލައިންކޮށް އެހެން އަންހެނުންނަށް މަލާމާތްކޮށް، ފުރައްސާރަކޮށް ހަދާ ގޮތެވެ. ސަމާސާއެއްގެ ނަމުގައި އެހެން މީހުންގެ އަގު ވައްޓާލާ ގޮތެވެ. އޭރުވެސް އެއީ މާޝާއަށް ވަރަށް ހުތުރު ކަމަކަށް ވިއެވެ. އެހެން މީހުންގެ އަމިއްލަ ސިއްރުތައް އެނގޭކަމަށް ބުނެ އޭނާ ފޮނިކަނޑާނެއެވެ. “އަހަރެން އެމީހާ ދަންނަން.. އޭނާއަކީ ނުބައި މާޒީއެއް އޮތް މީހެއް.” ނުވަތަ “އެއީ ވަރަށް ދަށު ދަރަޖައިގެ ބައެއް.” މިފަދައިން ބުނެއެވެ. އެހެން މީހުންގެ އަގު ވައްޓާލުމަކީ އޭނާއަށް މާ ބޮޑު ކަމެއް ނޫންކަން މާޝާ ހަނދާންވިއެވެ.
ދެން އެހެން ހަނދާނެއް އައެވެ. ގާތް ރަހުމަތްތެރިއަކަށް ގަސްތަކާ ނުލައި ބުނެވުނު ވާހަކައެކެވެ. އޭނާ މާޝާއާ ބެހޭގޮތުން އެހެން މީހުންގެ ގާތުގައި ވާހަކަދައްކާކަމެވެ. ހަމައެކަނި އާދައިގެ ވާހަކައެއް ނޫނެވެ؛ ނުހަނު އަމިއްލަ، ސިއްރު ވާހަކަތަކެވެ. ދުވަހަކުވެސް ބޭރުވާން ނޭދޭ ފަދަ އަމިއްލަ ކަންކަމެވެ. ހީވަނީ އެމީހުންގެ ދެމެދުގައި ހިނގާ ކަންކަމަކީ އޭނާގެ ފިރިހެންވަންތަކަން ދައްކަން ބޭނުންކުރާ ހަތިޔާރެއްހެންނެވެ.
މާޝާއަށް އިޙުސާސްވީ ބޮޑު ލަދުވެތިކަމެކެވެ. އޭނާއަކީ މިނިވަން އަންހެނަކަށް ވީ ނަމަވެސް، އޭނާއަށް އެނގެއެވެ. އިސްލާމްދީނުގެ ހުދޫދުތަކުން ބޭރުގައި، މިފަދަ ޤަދަރެއް ނެތް ގުޅުމެއް ބޭއްވުމަކީ ދީނީ ގޮތުން ހަރާމް ކަމެކެވެ. އެ ހަޤީޤަތް އެނގުމުން އޭނާގެ ހިތަށް ބާރުވިއެވެ. އެއީ ހަމައެކަނި ކުށްވެރިކަމުގެ އިޙުސާސެއް ނޫނެވެ. އެއީ ހިތާމައެވެ. ދުވަހަކުވެސް ހިއްސާކުރަން ނުޖެހޭ ފަދަ ގޮތަކަށް އަމިއްލަ ނަފުސު ހުށަހެޅުނުކަމުގެ ހިތާމައެވެ.
އަދި އެހެން ހަނދާނެއް އައެވެ. އޭނާގެ ކުރީގެ އަނބިމީހާއާ ބެހޭގޮތުން އޭނާ ދެއްކި ވާހަކައެވެ. އޭނާ ފަޚުރުވެރިކަމާއެކު ބުނި ގޮތުގައި، އޭނާ އެ އަންހެން މީހާދެކެ މާ ބޮޑަށް ލޯބިވާތީ، ތިން ދުވަސް ވަންދެން އޭނާގެ ގޭގެ ބޭރުގައި އިންތިޒާރުގައި އިނެވެ. އޭރު އެއީ ލޯބީގެ ވަރުގަދަކަން ކަމަށް މާޝާއަށް ހީވިއެވެ. ނަމަވެސް މިހާރު އެއީ އޭނާ ދިން ބިރުވެރި އިންޒާރެއްކަން ވިސްނުނެވެ. ހުރިހާ ނިޝާންތަކެއް ހުރީ ފެންނާށެވެ. ވަރަށް ސާފުކޮށެވެ. ނަމަވެސް އޭނާއަށް އެކަން ނުފެނުނީއެވެ. ނުވަތަ ފެންނަން ބޭނުން ނުވީއެވެ.
އެރޭ މާޝާގެ ހިތަށް ބޮޑު ބަދަލެއް އައެވެ. މިއީ ލޯތްބެއް ނޫނެވެ. ލޯތްބަކީ އިންސާނާ ބަލިކޮށްލާ އެއްޗެއް ނޫނެވެ. ލޯތްބަކީ މީހުންނާ އެކަހެރިކުރާ އެއްޗެއް ނޫނެވެ. ލޯތްބަކީ ވަށައިގެންވާ ކަންކަމުގައި ވިހަލާ އެއްޗެއް ނޫނެވެ. މިއީ މުޅިން އެހެން ކަމެކެވެ.
އެރޭ އޭނާގެ ކޯލްތަކަށް މާޝާ ޖަވާބެއް ނުދެއެވެ. ފުރަތަމަ ކޯލަކަށްވެސް ނޫނެވެ. ދިހަވަނަ ކޯލަކަށްވެސް ނޫނެވެ. އޭގެ ފަހުން އައި މެސެޖުތަކުގައި ހުރީ އޮޅުންބޮޅުމެވެ. އާދޭހެވެ. ރުޅިވެރިކަމެވެ. އަދި އެންމެ ފަހުން އިހާނެތި ބަސްތަކެވެ. “ކަލޭ ހީކުރަނީ ކަލޭ އަހަރެންނަށްވުރެ މާ މޮޅު ކަމަށްތަ؟”، “ކަލޭ ތިޔަ އުޅުނީ ދޮގު ހަދައިގެން”، “އަހަރެންނަށް އެނގޭ ކަލެއަކީ އިތުބާރު ކުރެވޭނެ މީހެއް ނޫންކަން.” ކޮންމެ ބަހަކުންވެސް ހާމަވަމުން ދިޔައީ އޭނާގެ އަސްލު ސޫރައެވެ.
ދުވަސްތައް ފާއިތުވަމުން ދިޔައެވެ. އޭނާ ހުރިހާ ގޮތަކުން މަސައްކަތް ކުރިއެވެ. މާފަށް އެދުމާއި، ވަޢުދުވުމާއި، ބިރުދެއްކުމެވެ. އޭނާ އެއްފަހަރު މާޝާއާ ބައްދަލުކުރަންވެސް އައެވެ. އަނދިރި ދަންވަރު ވަގުތުގައެވެ. 4-5 ގަޑިއިރު ގޭ ބޭރުގައި އިންތިޒާރު ކުރިއެވެ. އެންމެފަހުން ގާތް އެކުވެރިންނަށް ދަންވަރު ގުޅާ އުނދަގޫކޮށް އާދޭސްކުރުމުން މާޝާ އޭނާއާ އަނެއްކާވެސް ބައްދަލުކުރިއެވެ. ނަމަވެސް ހިތާމައަކީ ބައްދަލުކޮށްފިނަމަ ގައިގޯޅިނުވެ ކައިރިނުވެ ނުތިބެވޭތީއެވެ. ކޮންމެ ފަހަރަކުވެސް އެންމެ ފަހު ފަހަރުކަމަށް ބުނެއެވެ. އޭގެފަހުން މާޝާ އޭނާއާ ބައްދަލެއް ނުކުރެއެވެ. މަޑުމަޑުން އޭނާގެ ހިޔަނި ފަނޑުވަމުން ދިޔައެވެ.
އެހެންނަމަވެސް، ހިތުގެ ޒަޚަމްތައް ފަސޭހަވީ އެއްފަހަރަކުން ނޫނެވެ. ބައެއް ފަހަރު ހިތްވަރު ލިބެއެވެ. އަނެއްބައި ފަހަރު ޝައްކު އުފެދެއެވެ. ބައެއް ވަގުތުތަކުގައި އޭނާގެ ހަނދާންތައް އާވެއެވެ. ނަމަވެސް މާޝާ ހިފެހެއްޓީ ހަޤީޤަތުގައެވެ. ސާފު ސީދާ ވިސްނުމުގައެވެ.
މަސްތަކެއް ފަހުން، ގޮނޑުދޮށުގައި ހުރެ ރާޅުތައް ބިންދާލާ މަންޒަރު ބަލަން ހުރިއިރު، މާޝާއަށް ކުރިން ނުކުރެވޭ ފަދަ އިޙުސާސެއް ކުރެވުނެވެ. އެއީ އޭނާގެ އަމިއްލަ ނަފުސު އަލުން ފެނުނުކަމުގެ އިޙުސާސެވެ. މުޅިން ފަސޭހަ ނުވި ނަމަވެސް، އޭނާ މިހާރު މަގުއޮޅިފައެއް ނުވެއެވެ. އޭނާއަށް މިހާރު ވިސްނިއްޖެއެވެ. ލޯތްބަކީ ދުވަހަކުވެސް ވިހައަކަށް ވެގެން ނުވާނެއެވެ. އެއީ ވަށައިގެންވާ ދުނިޔެ އަނދިރިކުރާ އެއްޗަކަށް ވެގެން ނުވާނެއެވެ. އަދި އަމިއްލަ އެދުމާއި ކޮންޓްރޯލް ކުރުމަށް ލޯތްބޭ ކިޔާ ކޮންމެ މީހަކު އެ ދަސްކޮށްދެނީ، ތިމާގެ އަމިއްލަ ނަފުސު ގެއްލުވާލާނެ ގޮތެވެ.
އެހެންކަމުން މާޝާ އިޚްތިޔާރުކުރީ ތަފާތު ގޮތެކެވެ. އެންމެ ފަހުގެ ނިންމުމެވެ. އޭނާ ހުރިހާ ތަނަކުން އެމީހާ ބްލޮކް ކުރިއެވެ. އިތުރަށް އަޑުއެހުމެއް ނެތެވެ. ޖަވާބުދާރީވުމެއް ނެތެވެ. އެއްވެސް ގޮތަކުން އޭނާގެ އަޑު އިވުމަށް ފުރުސަތެއް ނުދިނެވެ. އަދި މީހަކު ސުވާލުކޮށްފިނަމަ، އޭނާ އެކަން ސިއްރެއް ނުކުރެއެވެ. ދޮގެއް ނަހަދައެވެ. ހަޤީޤަތް ފޮރުވައެއް ނުލައެވެ. އޭނާ ބުނާނީ ހަމައެކަނި “އާނ.. އެއީ އެއްދުވަސްވަރެއްގައި އަހަރެންނާ ގުޅުން އޮތް މީހެއް. ނަމަވެސް މިހާރު ނެތް.” މިހެންނެވެ.
އިތުރު ތަފުސީލެއް ނެތެވެ. ބަހަނާއެއް ނެތެވެ. އަމިއްލަ ނަފުސު ދިފާއުކުރާކަށް ނުޖެހެއެވެ. އޮތީ ހަމައެކަނި ތެދުބަހެވެ. ސަބަބަކީ އޭނާއަށް އެންމެ ފަހުން އެނގުނީތީއެވެ. ކަމެއް ނިންމުމަކީ އަނެކާގެ ފަރާތުން ލިބޭ އެއްޗެއް ނޫނެވެ. އެއީ އަމިއްލަ ނަފުސުން ނިންމާ ނިންމުމެކެވެ.
ކަމެއް ނިންމާލުމަށްޓަކައި އަބަދު ސަބަބެއް ދައްކާކަށް ނުޖެހެއެވެ. ނުވަތަ ޒުވާބުކޮށް މުޅި ދުނިޔެއަށް އެކަން އިޢުލާން ކުރާކަށްވެސް ނުޖެހެއެވެ. އެންމެ ފަހުން އޭނާ އިޚްތިޔާރުކުރީ އަމިއްލަ ނަފުސެވެ. އަދި އޭނާ އެނބުރި ފަހަތަކަށް ނުބަލައެވެ.
އާނއެކެވެ. ކަމެއް ނިންމާލުމަށްޓަކައި އަބަދު ސަބަބެއް ދައްކާކަށް ނުޖެހެއެވެ. ނުވަތަ ޒުވާބުކޮށް މުޅި ދުނިޔެއަށް އެކަން އަންގާކަށްވެސް ނުޖެހެއެވެ. އަމިއްލަ ހިތުގެ ހަމަޖެހުމަށްޓަކައި ހިމޭންކަމާއެކު ދުރަށް ދިއުމަކީވެސް ފުދޭވަރުގެ ނިންމުމެކެވެ.
(ނިމުނީ)
