ހިމޭންކަމާއެކު އާ ދިރުމެއް

ކޮންމެ ދުވަހެއްގެ އިރުއޮއްސޭ ވަގުތު އަޙުމަދަށް އެންމެ ފުރަތަމަ ފާހަގަކުރެވެނީ އަންހެނަކު އެތާ އުޅޭ އުޅުމެއް ނޫނެވެ. އެއީ ބަރިބަރިއަށް ފަތިޖަހާފައި ހުރި ހަރުގަނޑުތަކެވެ. ދުވަހެއްގެ މައްޗަށް ކިތައް ފުޅި ނުވަތަ ކިތައް ދަޅު ތައްޔާރުކުރިތޯ އެއްވެސް އިރަކު އަޙުމަދު އޭނާ ގާތު ނާހައެވެ. އަޑުހަރުކޮށް އެތަކެތި ގުނައެއް ނުހަދައެވެ. އެ މަސައްކަތުގެ ހިމޭން ހަރަކާތްތަކަށް ތަޢުރީފެއް ނުވަތަ ސުވާލެއްވެސް ނުކުރެއެވެ.

ނަމަވެސް، ކޮންމެ ދުވަހަކުވެސް ގެއަށް ވަންނަ ހިނދު، އެހެން ދިމާއަކަށް ބަލައިލުމުގެ ކުރިން އަޙުމަދުގެ ދެލޯ އަމާޒުވަނީ ބަދިގޭގެ ފާރުގައި ހުރި ލަކުޑި ހަރުގަނޑުތަކަށެވެ. އެއީ އޭނާގެ ހިތުގެ ކޮންމެވެސް ކަނެއްގައި، ބިއްލޫރި ފުޅިތަކާއި، ލޮނާއި، އަދި ކުރާ ބުރަ މަސައްކަތުން ދުވަސްތައް ގުނަމުންދާ ކަހަލަ ގޮތަކަށެވެ. ފުރަތަމަ ހަފުތާގައި ފަނަރަ ފުޅިއެވެ. އޭގެ ފަހުން އެ އަދަދު އިތުރުވަމުން ދިޔައެވެ. ތިންވަނަ ހަފުތާވީއިރު، ބަދިގޭގެ ހަރުގަނޑުތައް އެއްކޮށް ފުރިއްޖެއެވެ. ރީތިކޮށް އޭނާގެ އަތުން ލިޔެ ލޭބަލް ޖަހާފައި ހުރި ފުޅިތަކުގެ ދެމެދުގައި އެއްވެސް ހުސްތަންކޮޅެއް ނެތެވެ. އަދި ބާ ފޮށިތަކުގެ ކައިރީގައި ހުރި ގުދަން ތެރެއަށްވެސް އޭނާގެ ހިންމަތްތެރިކަމުގެ ނިޝާންތައް ފެތުރެން ފަށައިފިއެވެ. އެތައް ސަފަކަށް އަތުރާފައި ހުރި ހިއްކި މަސް، ވަޅޯ މަސްތަކާއި އެކި ބާވަތުގެ ހަވާދުތަކަކީ، އެ އަންހެންމީހާގެ މުރާލިކަމާއި، ކެތްތެރިކަމާއި، އަދި ހިތުގައި އޮތް ވަރުގަދަ އަޒުމުގެ ހިމޭން ހެއްކެކެވެ.

ގޭގެ ވަށައިގެންވާ މާހައުލަށްވެސް ބަދަލުތަކެއް އަތުވެއްޖެއެވެ. އެކަން ފެށުނު ސީދާ ވަގުތެއް އެކަކަށްވެސް ނޭނގެއެވެ. ކުރިން އެ ސަރަހައްދުގައި ހުންނަނީ އަވީގައި މާގިނައިރު ބަހައްޓާފައި ހުރި ކަނޑުމަހުގެ ހުތް ކުނިވަސް ނަމަވެސް، މިހާރު ދުވަނީ މާ ހިތްގައިމު، މާ ފުރިހަމަ ވަހެކެވެ. އެއީ އިހުމާލުވުމުގެ ބަދަލުގައި، ހަނދާންތަކާ ގުޅިފައިވާ ވަހެކެވެ. މަޑުގިނީގައި ކައްކާ ވަހާއި، ތެލުގެ ތެރޭގައި ހޫނުވަމުންދާ ހަވާދުގެ ވަހެވެ. އެއީ އަމިއްލައަށް ކުނިވާން ދޫކޮށްލުމުގެ ބަދަލުގައި، ފަރުވާތެރިކަމާއެކު އެއްޗެއް ތައްޔާރުކުރާ ވަހެވެ. އަނެއްކާވެސް އެ ތަނުން ހަޤީޤީ ގެއެއްގެ ވަސް ދުވަން ފަށައިފިއެވެ. އެއީ ހަމައެކަނި އާދައިގެ ގެއެއް ނޫނެވެ. އެއީ ރޯދި ބަރަކާތް އިތުރު މޫސުމެއްގައި، ކާބޯތަކެތި ތިޔާގި، އަތްތައް މަސައްކަތުގައި އަވަދިނެތި އުޅޭ، އަދި ހިމޭންކަމުގެ ތެރޭގައިވެސް މާނަފުން މެސެޖުތަކެއް އެކުލެވޭ ދިވެހި އާއިލާއެއްގެ ހަލަބޮލިކަން އިޙުސާސްވާ ފަދަ ގެއެކެވެ.

އަޙުމަދަށް ފާހަގަ ކުރެވުނެެވެ. ޚަދީޖާގެ ހަރަކާތްތަކަށް މިހާރު ބަދަލު އަތުވެއްޖެއެވެ. ލަސްވެ، ބަލިކަށިވީއެއް ނޫނެވެ. ނަމަވެސް، އޭނާގެ ހަށިގަނޑަށް އައިސްފައިވާ ބަދަލުތަކާއެކު، ވަރަށް ފަރުވާތެރިކަމާއެކު ކުރާ ހަރަކާތްތަކެކެވެ. އެއް އަތް ބޮޑުވަމުން އަންނަ ބަނޑުގައި ޖައްސާލައިގެން ހުންނައިރު، އަނެއް އަތުން މޭޒުގައި ހިފަހައްޓާލައެވެ. އެއީ ކޮންމެ ހަރަކާތެއް ކުރުމުގެ ކުރިން، އޭނާގެ ހަށިގަނޑާއި އެ ހަށިގަނޑުގައި އުފެދެމުންދާ އާ ދިރުމާ ދެމެދު ހިމޭން އެއްބަސްވުމެއް ގާއިމުކުރާ ފަދަ ގޮތަކަށެވެ. ފެންޑާގެ ހަރުފަތްތަކުން ތިރިއަށް ފައިބާއިރު، ދެބައިކުޅަ އެއްބައިގައި އޭނާ މަޑުކޮށްލައެވެ. އެއީ ޖެހިލުންވެގެންނެއް ނޫނެވެ.

ނަމަވެސް އުފުލަމުންދާ ބަރުދަނަށް އަންނަ ބަދަލުތަކުގެ ސަބަބުން، އިރުއޮއްސޭ ވަގުތު ބުރަކަށީގައި ރިއްސައި، ނޭވާލާން އުނދަގޫވާތީއެވެ. އެކަމަކު އެވާހަކައެއް ޚަދީޖާ ދުވަހަކުވެސް ނުދައްކައެވެ. އޭނާ ޝަކުވާއެއް ނުކުރެއެވެ. ތެލިތައް ކައިރީ ގިނަ ވަގުތު ހުންނަން އުނދަގޫވެ ވަރުބަލިވެއްޖެނަމަ، އުނދުުން ކައިރިއަށް ކުޑަ ގޮނޑިއެއް ކައިރިކޮށްލައިގެން އިށީނދެ އިނދެ މަސައްކަތް ކުރިއަށް ގެންދެއެވެ. އޭނާގެ ހަރަކާތްތައް ލަސްވި ނަމަވެސް، އެ މަސައްކަތަކަށް ހުއްޓުމެއް ނާދެއެވެ. އެއްޗެއް މާ ބަރުވެއްޖެނަމަ، އެހީތެރިކަމަކަށް ނުގޮވައެވެ. އެހެން ގޮތެއް ހޯދައި، ކަންކަން ތަރުތީބުކޮށްގެން މަސައްކަތް ނިންމާލައެވެ.

ގިނަ ދުވަސްދުވަހު، އަޙުމަދު އުޅެނީ މިކަންކަން ނޭނގޭ ކަމަށް ހެދިގެންނެވެ. ނުވަތަ ފަހަރުގައި އެކަންކަން ފާހަގަކުރެވުނަސް، އޭނާ އެންމެ އިތުބާރުކުރާ ބަހަކީ ހިމޭންކަން ކަމުގައި ވާތީއެވެ. އެއްދުވަހެއްގެ ހެނދުނު، ކުކުޅުތަކާއި ބަކަރިތައް ބަލާލުމަށްފަހު އޭނާ ގެއަށް ވަނެވެ. އެއީ އެންމެ ދަތި ދުވަސްވަރުވެސް އޭނާ ވަރަށް ފަރުވާތެރިކަމާއެކު ބަލަހައްޓަމުން އައި ޖަނަވާރުތަކެވެ. އެވަގުތު ގޭތެރެ ވަނީ ކެއްކުމުގެ ހޫނުން ހޫނުވެފައެވެ. ކަބަޑުގެ އެންމެ މަތީ ހަރުފަތުގައި ހުރި ބޮޑު ތެއްޔެއް ނަގަންވެގެން، ކޮޅަށް ހުއްޓި، ދެއަތް މައްޗަށް ނަގައިގެން އޭނާ ހުއްޓާ އަޙުމަދަށް ފެނުނެވެ.

ޚަދީޖާ އެ މަސައްކަތް ކުރަމުން ދިޔައީ ބުރަކަށީގެ ރިހުމަށް އިތުރު ބާރެއް ނުލައި ވޭތޯ ވަރަށް ފަރުވާތެރިކަމާއެކުގައެވެ. ކުޑަ ވަގުތުކޮޅަކަށް އަޙުމަދު ހުއްޓުން އެރިއެވެ. ދެން، އެއްވެސް ބަހެއް ނުބުނެ، ދެތިން ފިޔަވަޅަކުން ބަދިގެ ހުރަސްކޮށް ގޮސް، ވަރަށް ފަސޭހަކަމާއެކު އެ ތެލި ތިރިކޮށް، އޭނާގެ ކައިރީގައި ބެހެއްޓިއެވެ. އެއްވެސް އެއްޗެއް ނުބުނެއެވެ. އޭނާއަށް އަތް ނުފޯރާ ހިސާބުގައި ހުރި ކަމެއް ފުރިހަމަކޮށްދިނީއެވެ.

ޚަދީޖާ އެނބުރިލައި އެއްޗެއް ބުނުމުގެ ކުރިން، އަޙުމަދު ގޮސް ސިންކު ކައިރީގައި އަތް ދޮންނަން ފެށިއެވެ. އެއީ ހީވާގޮތުން އޭނާ ބަދިގެއަށް ވަނީވެސް ހަމައެކަނި އެ ބޭނުމުގައިކަމަށް ހަދާށެވެ.

ޚަދީޖާ ތެއްޔަށް ބަލައިލިއެވެ. ދެން އަޙުމަދަށް ބަލައިލިއެވެ.

ނަމަވެސް އޭނާ އޭރު ހުރީ މަހަށްދާ ސާމާނުތައް ހިފައިގެން، ހެނދުނުގެ އަލިކަމުގެ ތެރެއަށް ނުކުންނަން ތައްޔާރުވެގެންނެވެ. ފަހަތަށް ދޫކޮށްލީ ހަމައެކަނި އޭނާގެ އަތުން ތިކިޖަހަމުން ދިޔަ ފެނުގެ އަޑެވެ.

ކުޑަ އިރުކޮޅެއް ފަހުން، ޚަދީޖާ ވަޅި ނަގައި މަސް ސާފުކުރަން ފަށައިފިއެވެ. ދިރިއުޅުން ކުރިއަށް ދެއެވެ.

ހޫނު އަވިގަދަ ބުދަ ދުވަހެއްގައި ވިޔަފާރިވެރިޔަކު އެގެއަށް އައެވެ. ރަށުގެ އެންމެ ބޮޑު ފިހާރައިގެ ބޮޑު މީހާއެެވެ. އައި މީހަކީ ޒަކަރިއްޔާއެވެ. އުމުރުން ފަސްދޮޅަހުގެ އަހަރުތައް ގުނަމުންދާ، ކަނޑާއި އެއްގަމުގެ ތަޖުރިބާ ލިބިފައިވާ މީހެކެވެ. އޭނާ ލައިގެން ހުރީ ބާވެފައިވާ އަޅިކުލައިގެ މަސްވެރިންލާ ޓީޝާޓެކެވެ. އޭނާގެ މޫނުމަތިން ފެންނަން ހުރީ ވަރުބަލިކަމެވެ. އޭނާ އަވަސް އަރުވާލައިގެންނެއް ނޫޅެއެވެ. ގުދަން ތެރޭގައި އޭނާ ހިނގަމުން ދިޔައީ ވަރަށް ލަހުންނެވެ. ކުޑަދޮރުން ވަންނަ އަލިކަމަށް އޭނާގެ ލޯ ހޭނުމުން، އޭނާގެ އިނގިލިތަކުން ޚަދީޖާ އަތުން ލިޔެފައިވާ ލޭބަލްތަކުގައި ފިރުމާލިއެވެ. އާދައިގެ ކަރުދާހާއި އާދައިގެ ދެއްޔެވެ. ނަމަވެސް ކޮންމެ އެއްޗެއްގައި ވަރަށް ފަރުވާތެރިކަމާއެކު ނަން ޖަހާފައިވެއެވެ. ރިހާކުރު، ތެލުލި ރިހާކުރު، ހިކި މަސްކުނޑި، މަސް ސަންބޯލް، ކަނޑުމަސް. އޭނާ އެއް ފުޅި ނަގައި، ކުޑަދޮރުން ފޭދިގެން އަންނަ އަލިކަމަށް ދިއްކޮށްލިއެވެ. އޭގެ ބޯމިނާއި، ކުލައާއި، އޮލަކަން ބަލާލުމަށްޓަކައި އެ ފުޅި ކުޑަކޮށް އަނބުރާލިއެވެ. އެއީ ހަމައެކަނި ކާއެއްޗަކަށް ބަލާލުމެއް ނޫނެވެ. އެއީ އެ މަސައްކަތުގެ ފަހަތުގައިވާ ބުރަ އުފުލުމާއި ކެތްތެރިކަމަށް ދިން ސަމާލުކަމެކެވެ.

ވަރަށް ގިނައިރު ހިމޭނުން ހުރުމަށްފަހު އޭނާ ވާހަކަދެއްކިއެވެ. “ކަލޭގެ މަންމަ ނިޔާވި ފަހުން މިތަނުން މި ފެންވަރުގެ މުދާ އުފެއްދުން ހުއްޓާލާފައިވާ ކަމަށް އަހަރެން ހީކުރީ.”

އެ ބަސްތައް ޖައްވުގެ ތެރޭގައި ގުގުމާލިއެވެ. އަޙުމަދު ހުރީ ދޮރުމަތީގައެވެ. އޭނާގެ މޫނުމަތިން އެއްވެސް އަސަރެއް ފާޅެއް ނުވެއެވެ. ކުޑަ ވަގުތުކޮޅަކަށް އޭނާ އެއްވެސް އެއްޗެއް ނުބުނެ މަޑުކޮށްލިއެވެ. ދެން، ވަރަށް މަޑުމައިތިރިކަމާއެކު، އޭނާގެ ހިތުގެ އަޑިން ނުކުތް ބަސްތަކެއް ފަދައިން ޖަވާބު ދިނެވެ. “އަހަންނަށްވެސް ހީކުރެވުނީ ހަމަ އެހެން.”

ޒަކަރިއްޔާ ބޯޖަހާލިއެވެ. އިތުރު ބަސްތަކަކަށް ބޭނުމެއް ނުވިއެވެ. ނިކުމެގެން ދިއުމުގެ ކުރިން، އެއްވެސް މަޝްވަރާއެއް ނުވަތަ ފަސްޖެހުމެއް ނެތި، ކުރީ އަހަރުގެ އޯޑަރަށްވުރެ ދެގުނަ އިތުރަށް އޭނާ މުދަލަށް އޯޑަރު ދިނެވެ. އެއީ އެ ކޮޓަރިއަށް ވަން ހިނދުވެސް އޭނާ ނިންމާފައިވާ ނިންމުމެއް ފަދައިންނެވެ.

އޭނާގެ ބާ ސައިކަލުގެ އަޑު ކެނޑިގެން ދިޔަ ފަހުންވެސް އަޙުމަދު ހުރިތަނުން ގުޑައެއް ނުލައެވެ. ގުދަން ތެރެއަށް މިހާރު ވަނީ ދިރުމެއް އައިސްފައެވެ. ފަތިފަތިޖަހާފައި ހުރި ފުޅިތަކުން ހަވީރުގެ އިރުގެ އަލިކަން ދައުރުވަމުން ދިޔައިރު، އެއީ އައިސްފައިވާ ބޮޑު ބަދަލުގެ ހިމޭން އިޢުތިރާފެއް ފަދައެވެ. އޭނާ ވަރަށް ގިނައިރު އެތަކެތީގެ ފުރިހަމަކަމަށް ބަލަން ހުއްޓެވެ. ދެން އެނބުރި ބަދިގެއަށް ހިނގައިގަތެވެ.

ޚަދީޖާ ހުރީ މޭޒު ކައިރީގައި ރޮށި ފިހަން ފުށްގަނޑު މޮޑޭށެވެ. ބަނޑުގެ ބަރުދަނާއެކުވެސް އޭނާގެ ހަރަކާތްތައް ހުރީ ސާބިތުކޮށެވެ. ބަދިގޭގެ ހޫނުގެ ސަބަބުން އޭނާގެ ކޮލުގައި އިސްތަށިކޮޅެއް ތަތްވެފައި ހުރިއިރު، އަތާއި ހެދުމުގައި ވަނީ ފުށް ބުރައިފައެވެ. ލިބުނު އޯޑަރެއްގެ ޚަބަރެއް އޭނާއަކަށް ނޭނގެއެވެ. ދެކެވުނު ވާހަކައެއްވެސް ނޭނގެއެވެ. އޭނާ ހަމައެކަނި އޭނާގެ މަސައްކަތް ކުރިއަށް ގެންދަނީއެވެ. އަޙުމަދު ދޮރުމަތީގައި ކުޑަ ވަގުތުކޮޅަކު މަޑުކޮށްލިއެވެ. ދެން، އެއްވެސް ބަހެއް ނުބުނެ، އެނބުރި ބޭރަށް ނުކުމެގެން ދިޔައެވެ.

**********

ދެވަނަ ހަފުތާވީއިރު، ބަކަރިވެސް މައިތިރިވެއްޖެއެވެ. ފުރަތަމަ އެ ޖަނަވާރު ހުންނަނީ ވަރަށް ބިރުންނެވެ. ކޮންމެ ހަރަކާތަކަށް ނުވަތަ އަޑަކަށް ސަމާލުވެ، ކޮންމެވެސް ނުރައްކަލަކަށް އިންތިޒާރުކުރާ ފަދައިންނެވެ. ނަމަވެސް ޚަދީޖާގެ އަތްތިލައިގެ އޯގާތެރިކަމަކަށް ބަދަލެއް ނާދެއެވެ. އެއީ ހަމަޖެހޭ، ސާބިތު، އަދި އޯގާތެރި އަތެކެވެ. އޭނާ އެއްވެސް ކަމެއް އަވަސްއަރުވާލައިގެންނެއް ނުކުރެއެވެ. އަޑުގަދައެއް ނުކުރެއެވެ. ނަތީޖާއެއްގެ ގޮތުން، ބަކަރިވެސް އޭނާއަށް އިތުބާރުކުރަން ފަށައިފިއެވެ.

ބަދިގޭގެ ހަރުގަނޑުތަކަށް މިހާރު ތާޒާ ކިރުވެސް އިތުރުވާން ފަށައިފިއެވެ. ކުޑަދޮރު ކައިރީގައި ކިރުން ތައްޔާރުކުރެވޭ ބާަތްތައް އަތުރާލެވިއްޖެއެވެ. ޔޯގަޓު، ފަރުވާތެރިކަމާއެކު ފޮތިގަނޑެއްގައި އޮޅާފައިވާ ބަޓަރުވެސް ހުއްޓެވެ. ފިނިވައިގެ ތެރޭގައި ހަރުކުރުމަށްޓަކައި ޗީޒްކޮޅުތައްވެސް ހަރުގަނޑުގައި އަތުރާލާފައިވެއެވެ.

މިއިން އެއްވެސް ކަމަކީ އަޑުގަދަކޮށް އިޢުލާނުކުރި ކަންކަމެއް ނޫނެވެ. އެއީ ހަމައެކަނި އެ ގޭގެ، އެ ރަށުގެ ދިރިއުޅުމުގެ ބަޔަކަށް ވެގެން ދިޔައީއެވެ. އެއީ އަލަށް ފެނުނު ކަމެއް ނަމަވެސް، ވަރަށް ޤުދުރަތީ ކަމެއް ފަދައެވެ. ކުޑަ ރަށެއްގައި މިފަދަ ކަންކަން ސިއްރެއް ނުވާނެއެވެ. އަމިއްލަ އަތުން ތައްޔާރުކުރާ ތާޒާ ކިރުގެ ބާވަތްތަކާމެދު މީހުންގެ މެދުގައި ޝައުޤުވެރިކަން އުފެދުނެވެ. ނަމަވެސް ކަދީޖާ މީހުންގެ ސަމާލުކަމަކަށް ނޭދެއެވެ. އޭނާ ހަމައެކަނި މަސައްކަތް ކުރަނީއެވެ. މަޑުމަޑުން، ދުވަހަކަށްފަހު ދުވަހެކެވެ.

********

ވިޔަފާރިވެރިޔާ ޒަކަރިއްޔާއަށް އެކަން އެންމެ ފުރަތަމަ ފާހަގަކުރެވުނެވެ. އެއްދުވަހެއްގެ ހަވީރު، އެއްވެސް އެންގުމަކާ ނުލައި އޭނާ އަތުވެއްޖެއެވެ. އޭނާ އާދައިގެ މަތިން ގުދަނަށް ވަނީ ކުރިން ފެންނަ މުދާތައް ހުންނާނެކަމަށް އުންމީދުކޮށްގެންނެވެ. ނަމަވެސް މިފަހަރު އޭނާގެ ލޮލުގައި އަޅައިގަތީ ތަފާތު އެއްޗެކެވެ. އޭނާ މަޑުކޮށްލިއެވެ. ކުރިއަށް ޖެހިލައި، ކުޑަ ޗީޒްކޮޅެއް ނެގިއެވެ. އޭނާގެ އަތުގެ ތެރޭގައި އެ ފިއްތާލުމަށްފަހު، އަލިކަމަށް ދިއްކޮށްލައިގެން ބަލަން ހުރީ ހަމައެކަނި ޝައުޤުވެރިކަމަކާއެކުއެއް ނޫނެވެ. އެއީ ހައިރާންކަމެއް އެކުލެވިގެންވާ ބަލާލުމެކެވެ.

އޭނާގެ ޝައުޤުވެރިކަމެއް އަޙުމަދާއި އެއްކޮށް ހުސްވަގުތު މަހަށް ދިއުން. އެރޭ މަހުން އައުމަށްފަހު, އޭނާ ރޭގަނޑުގެ ކެއުމަށް މަޑުކުރިއެވެ. ދޮރުމަތީގައި އޭނާގެ މަސްވެރިކަން ކުރާ ކޯޓާއި ބޫޓު ބޭލުމަށްފަހު، ގޭގެ ހިމޭން ހޫނުކަމުގެ ތެރޭގައި އިށީނދެލިއެވެ. ކެއުން ވަރަށް އާދައިގެއެވެ. ތާޒާއެވެ. ތެދުވެރިކަން އެކުލެވިގެންވެއެވެ. އޭނާ އަވަސްއަރުވާލުމެއް ނެތި ކެއުމުގެ އުފާ ހޯދިއެވެ. ކައި ނިމުމުން، ބޭރަށް ނުކުތުމުގެ ކުރިން ދޮރުމަތީގައި މަޑުކޮށްލިއެވެ. “ޚަދީޖާ.” އޭނާ ވަރަށް އޯގާތެރިކަމާއެކު ބުންޏެވެ. “ކަލޭ ތިޔަ ކުރަނީ ވަރަށް ރަނގަޅު މަސައްކަތެއް. ކަލޭ ތީ ވަރަށް ހިންމަތްތެރި ކުއްޖެއް. އަމިއްލަ ނަފުސަށް ފަރުވާތެރިވައްޗޭ.. އަދި މި ފުރިހަމަ ކެއުމަށްޓަކައި ޝުކުރިއްޔާ.”

އެއީ ޒަކަރިއްޔާ އޭނާއާ އެފަދަ ގާތްގޮތަކަށް ވާހަކަދެއްކި ފުރަތަމަ ފަހަރެވެ. ވިޔަފާރިވެރިއެއްގެ ހައިސިއްޔަތަކުން ނޫނެވެ. ނަމަވެސް އާއިލާގެ މީހަކު ފަދައިންނެވެ. އޭގެ ފަހުން އޭނާ ގިނަގިނައިން އަންނަން ފެށިއެވެ. އަންނާނެކަން ކުރިއަކުން ނާންގައެވެ. މާ ގިނައިރަކު މަޑެއްވެސް ނުކުރެއެވެ. ނަމަވެސް އަބަދުވެސް އަންނަނީ ކޮންމެވެސް ހަދިޔާއެއް ހިފައިގެންނެވެ. އެއީ އެއްވެސް ބަހަކާ ނުލައި ދެވޭ އެހީތެރިކަމެކެވެ.

ނޭނގި ހުއްޓާ، އެ ގެއަށް ކުރިން ނެތް އާ ދިރުމެއް އަތުވެއްޖެއެވެ. އެއީ ހަމައެކަނި ކުރާ މަސައްކަތެއް ނޫނެވެ. ދިރިހުރުމަށްޓަކައި ކުރާ ހަނގުރާމައެއްވެސް ނޫނެވެ. އެއީ ގުޅުމެކެވެ. އެއްރޭ، ފެންޑާގެ ނެއްޓިފައި އޮތް ހަރުފަތް މަރާމާތު ކުރެވިއްޖެއެވެ. އެކަކުވެސް އެވާހަކައެއް ނުދައްކައެވެ. ޖެހިގެން އައި ދުވަހު މަސް ތެލިތައް ހިފައިގެން އެތެރެއަށް ވަންނަނިކޮށް ޚަދީޖާއަށް އެކަން ފާހަގަކުރެވުނެވެ. ކުރިން ލޮޅުން އަރާ ހަރުފަތް މިހާރު އޮތީ ވަރަށް ވަރުގަދަކޮށެވެ. ބާވެފައިވާ ލަކުޑިގަނޑުގެ ބަދަލުގައި އާ ލަކުޑިގަނޑެއް ޖަހާފައިވާއިރު، އާ މޮހޮރުތަކުގެ ވިދުން ފިޔަވައި އެހެން ނިޝާނެއް ނެތެވެ. އޭނާ މަޑުކޮށްލިއެވެ. ބަކަރި ކޮށްޓާ ދިމާއަށް ބަލައިލިއެވެ. ދެން ހިނގައިގަތެވެ.

**********

ޖެހިގެން އައި ދުވަހު, ހުކުރު ދުވަހުގެ ހެނދުނު، ބަދިގޭގެ ދޮރުމަތީގައި ރީތިކޮށް ފަޅާފައި ހުރި ދަރުތައް އަތުރާލާފައި ހުއްޓެވެ. ވާރޭގެ ތެތްކަމުން ސަލާމަތްކުރުމަށްޓަކައި ރަބަރު ސީޓަކުން އޮތީ ނިވާކޮށްފައެވެ. އެއީ އެތައް ދުވަހަކަށް ފުދޭވަރުގެ ދަރެވެ. އެތަކެތި ގެނައީ ކާކުތޯ އޭނާ ސުވާލެއް ނުކުރެއެވެ. އެއީ ސުވާލުކުރަން ޖެހޭ ކަމެއްވެސް ނޫނެވެ.

ގޭގެ ތެރޭގައި ހަރުގަނޑުތައް ދިޔައީ ފުރެމުންނެވެ. ބޭރުގައިވާ ބިމަށް ދިޔައީ ބަދަލުތައް އަންނަމުންނެވެ. އަދި މި ހުރިހާ ކަމެއްގެ ތެރެއިން، ހިމޭންކަމާއެކު އާ ދިރުމެއް އުފެދެމުން ދިޔައެވެ. އެއީ ހަމައެކަނި އޭނާގެ ބަނޑުގައިވާ ދަރިފުޅެއް ނޫނެވެ. އެއީ ކުރިން ބަނގުރޫޓުވެ، ނެތިގެންދާން ކައިރިވެފައި އޮތް ދިރިއުޅުން، ވަރަށް ނާޒުކު ނަމަވެސް ސާބިތުކަމާއެކު އަލުން ބިނާވަމުން ދިޔަ ދިއުމެވެ.

އެކަމާ ބެހޭގޮތުން އެކަކުވެސް ދުލުން ބަހެއް ބޭރުނުކުރި ނަމަވެސް، އެ ދެމީހުންނަށްވެސް އެކަން އިޙުސާސް ކުރެވެއެވެ. އެ ހިމޭންކަމުގެ ތެރެއިންނެވެ. ކުރާ މަސައްކަތުގެ ތެރެއިންނެވެ. އަދި ބަަހަކުން ބުނެދެވޭނެ ވަރަށްވުރެ ބޮޑަށް، އެކަކު އަނެކަކަށްޓަކައި ކޮށްދޭ ކުދިކުދި އޯގާތެރި ކަންތައްތަކުގެ ތެރެއިންނެވެ.

(ނުނިމޭ)