އަހަރެންގެ ނަމަކީ އައިޝަތު ރާނިޔާއެވެ. އަހަރެމެންގެ ގޭގެ ފާރުތަކުގެ ތެރޭގައި ފޮރުވިފައިވާ ހަޤީޤަތް ދުނިޔެއަށް ހާމަވިއިރު އަހަރެންގެ އުމުރަކީ ފަނަރަ އަހަރެވެ. ނަމަވެސް އެ ދުވަހުގެ މާ ކުރިންވެސް، ބިރުވެރިކަމަކީ އަހަރެންގެ ނޭވާގެ ބައެއްކަމުގައި ވެއްޖެއެވެ. އަހަރެމެން ދިރިއުޅުނީ މާލެއާ މާ ދުރު ނޫން ކުޑަ ރަށެއްގައެވެ. ގެތައް ހުންނަނީ ވަރަށް ކައިރިކައިރީގައެވެ. ކޮންމެ މީހަކަށްވެސް އަނެކާގެ ދިރިއުޅުން އެނގޭކަމަށް ޤަބޫލުކުރެވެއެވެ. ބޭރުފުށުން ބަލާއިރު އަހަރެމެންގެ ގެއަކީ އާދައިގެ ތަނެކެވެ. ދޮން ފާރުތަކެވެ. ކުޑަ ފެންޑާއެކެވެ. މޫދު ރޯޅިއާއެކު ހޫރޭ ހުދު ދިދަތަކެއް ފަދައިން ހިއްކަން އަޅާފައި ހުންނަ ފޭރާމެވެ. އެތެރޭގައި ވަނީ މުޅިން ތަފާތު ކަމެކެވެ. އެއީ ސަލާމަތްވުމަށްޓަކައި ހިމޭނުން ހުންނަން ޖެހޭ ތަނެކެވެ.
އަހަރެންގެ ދޮންބައްޕަ، ހަސަން ރިޔާޒް، އަހަރެމެންގެ ދިރިއުޅުމުގެ ތެރެއަށް އައީ އަހަރެންގެ އުމުރުން އަށް އަހަރުގައެވެ. އަހަރެންގެ އަސްލު ބައްޕަ ނިޔާވީ ކަނޑުމަތީގެ ހާދިސާއެއްގައެވެ. އެއީ ދިޔަ ގޮތަށް އެނބުރި ނައި މަސްދަތުރެކެވެ. އޭގެ ފަހުން މަންމައަށް ހުރިހާ ކަމެއް ދަތިވިއެވެ. ބިލްތަކެވެ. ކާބޯތަކެއްޗެވެ. ސްކޫލް ފީއެވެ. އެކަނިވެރިކަމެވެ.
ހަސަން ކައިވެންޏަށް އެދުމުން، މީހުން ބުނީ މަންމައަކީ ނަސީބުވެރިއެއް ކަމަށެވެ. އޭނާއަކީ ބަނދަރުގައި ދާއިމީ ވަޒީފާއެއް އޮންނަ މީހެކެވެ. އޭނާ ވާހަކަދައްކަނީ ޔަގީންކަމާއެކުގައެވެ. އޭނާ ހަދިޔާ ގެނެސްދެއެވެ. ކައިވެނީގެ ދުވަހު އޭނާ އަހަރެންގެ ބޮލުގައި އަތް ބާއްވާލާފައި ހިނިތުންވިއެވެ. “މިއަދުން ފެށިގެން، މިއީ މަގޭ ދަރިއެއް.” އޭނާ ބުންޏެވެ. އަހަރެން އެކަން ޤަބޫލުކުރީމެވެ. ދުވަސްކޮޅަކަށެވެ.
ބަދަލު އައީ އެއް ރެއަކުންނެއް ނޫނެވެ. އެކަން ދުވަހަކުވެސް އެހެނެއް ނުވެއެވެ. ފުރަތަމަ އައީ ޤަވާއިދުތަކެވެ. ދެން އިތުރު ޤަވާއިދުތަކެވެ. ދެން އަދަބުތަކެވެ. ދެން އެއަށްވުރެ މާ ގޯސް ކަންތައްތަކެވެ.
ނިދާ ކޮޓަރީގެ ދޮރު ލެއްޕުމުގެ ހުއްދައެއް ނޯވެއެވެ. ހުއްދަ ނެތި ރައްޓެހިންނާ ބައްދަލުކުރުމުގެ ހުއްދައެއް ނޯވެއެވެ. ބާރަށް ވާހަކަދެއްކުމުގެ ހުއްދައެއް ނޯވެއެވެ. ސުވާލުކުރުމުގެ ހުއްދައެއް ނޯވެއެވެ. އަމިއްލަ އިޚްތިޔާރުން ކަންކަން ނިންމުމުގެ ހުއްދައެއް ނޯވެއެވެ.
އަހަރެންގެ ފައިވާން ނުބައި ތަނެއްގައި ބެހެއްޓިއްޖެނަމަ، އަހަރެންގެ މޫނުމަތީގައި ޖަހައެވެ. އޭނާގެ ސައި ރަނގަޅަށް ހޫނު ނުކުރެވިއްޖެނަމަ، އަހަރެންގެ ގައިގައި ތަޅައެވެ. ސްކޫލުން ގެއަށް އަންނަން ކުޑަ މިނެޓުކޮޅެއް ލަސްވި ނަމަވެސް، އަހަރެންގެ މައްޗަށް ހުތުރު ތުހުމަތުތައް ކުރެއެވެ. ކޮންމެ ކުޑަ ކުށަކީ އަނިޔާކުރުމަށް ދައްކާ ބަހަނާއަކަށް ވިއެވެ. އެންމެ ފަހުން، އަނިޔާކުރުމަށް ބަހަނާއެއް ބޭނުމެއް ނުވިއެވެ.
މަންމައަށް އަބަދުވެސް އެނގެއެވެ. ހުރިހާ އަޑެއް މަންމައަށް އިވެއެވެ. ކޮންމެ ރުއިމެއްގެ އަޑެވެ. ކޮންމެ ހަމަލާއެއްގެ އަޑެވެ. ކޮންމެ އާދޭހެއްގެ އަޑެވެ. ނަމަވެސް މަންމަ ހުންނާނީ ދޮރުމަތީގައި ކޮޅަށެވެ. ބުރުގާގެ ކޮޅުގައި އަތުން އޮޅާލަ އޮޅާލައެވެ. މަންމަގެ ލޮލުން އޭރު އަހަންނަށް ފެންނަނީ އަހަންނަށް ނޭނގޭ އިޙުސާސެކެވެ. އެއީ ބިރުވެރިކަމެވެ.
އޭގެ ފަހުން، މަންމަ އަހަރެންގެ ޒަޚަމްތައް ސާފުކޮށްދީ، ބޭސްއަޅައިދީ، މަޑުމަޑުން ބުނެއެވެ. “ރާނިޔާ، އޭނާ ރުޅިނާރުވާ.” އަހަރެން އަހަމެވެ. “އަހަރެން ކުރީ ކީއްހެއްޔެވެ؟” މަންމަ ދުވަހަކުވެސް ޖަވާބެއް ނުދެއެވެ. އޭގެ ބަދަލުގައި، މަންމަ ބުނަނީ އަހަރެންގެ ހިމޭންކަން ބައްޓަންކުރި ވާހަކަތަކެވެ. “އޭނާ ހުންނަނީ ފިކުރުބޮޑުވެފައި.” “އޭނާ މަސައްކަތްކުރަނީ އަހަރެމެންނަށްޓަކައި.” “އޭނާ ބޭނުންވަނީ ކަލޭ ރައްކާތެރިކުރަން.” “ދުނިޔެއަކީ އަންހެން ކުދިންނަށް ނުރައްކާތެރި ތަނެއް.” އަދި ކޮންމެވެސް ގޮތަކުން.. އޭނާގެ އަނިޔާވެރިކަމަކީ އަހަރެންގެ ކުށްކަމުގައި ވިއެވެ.
އުމުރުން ސާދަ އަހަރުވީއިރު، ހުރިހާ ކަމެއް ފޮރުވަން އަހަރެން ދަސްކޮށްފީމެވެ. ގަދަ ހޫނުގައިވެސް އަތްދިގު ހެދުން ލަމެވެ. ސްކޫލުގައި ހިނިތުންވެލައިގެން ހުންނަމެވެ. އަހަރެންގެ ތަދު އެއްވެސް މީހަކަށް ފާހަގަ ނުވާނެހެން ވަރަށް ފަރުވާތެރިކަމާއެކު ހަރަކާތްތެރިވަމެވެ. އަހަންނާމެދު ތަފާތު ނަޒަރަކުން ބެލީ ހަމައެކަނި އެއް ޓީޗަރެވެ. ޝިފާނާ މިސްއެވެ.
އެއް ދުވަހަކު އެސެމްބްލީގައި ހުއްޓާ، އަހަރެންގެ އަތް މައްޗަށް ނެގުމަށް ދަތިވިއެވެ. މިސްއަށް އެކަން ވަގުތުން ފާހަގަވިއެވެ. “އަތަށް ތަދުވީތަ؟” މިސް އެހިއެވެ. އަހަރެން އަވަސްއަވަހަށް ބޯ ޖަހާލީމެވެ. “ގޭގައި އުޅެނިކޮށް ކުޑަކޮށް ކަހާލީ.” އެހެން މީހަކު ނުބަލާހާ ފަރުވާތެރިކަމާއެކު މިސް އަހަންނާ ދިމާލަށް ބަލަހައްޓައިގެން ހުއްޓެވެ. “ކަލޭ ވަރަށް ގިނައިން ކަހާލާ ދޯ؟” އަހަރެންގެ ހިތް ބާރަށް ތެޅެން ފެށިއެވެ. އެ ވަގުތަކީ ހުރިހާ ކަމެއް ބަދަލުކޮށްލެވިދާނެ ވަގުތެކެވެ. އަހަންނަށް ހަޤީޤަތް ކިޔައިދެވުނީހެވެ. ނަމަވެސް ބިރުވެރިކަމުގެ ތެރޭގައި ބޮޑުވާއިރު، ހިތްވަރަށްވުރެ ބާރީ ބިރުވެރިކަމުގެ އަޑެވެ. އެހެންކަމުން އަހަރެން ހިނިތުންވެލީމެވެ. “އަހަރެން މިއީ ވަރަށް ފަރުވާކުޑަ ކުއްޖަކީން. މިސް.” މިސް އެކަން ޤަބޫލެއް ނުކުރެއެވެ. ނަމަވެސް އަހަރެން ދިޔަދިނެވެ. އަދި އަހަރެން އެނބުރި ގެއަށް ދިޔައީ އަހަރެންގެ ހިމޭންކަން ހިފައިގެންނެވެ.
ހުރިހާ ކަމެއް ބަދަލުވި ދުވަސް ފެށުނީ އުއްމީދަކުންނެވެ. ނާދިރު، ނުރައްކާތެރި ކަހަލަ އުއްމީދަކުންނެވެ. އަހަރެން ޤައުމީ ފެންވަރުގެ މަޒުމޫނު ލިޔުމުގެ މުބާރާތަކުން މޮޅުވީއެވެ. އަހަރެން ލިޔުނީ އަންހެނުންގެ ތައުލީމާ ބެހޭގޮތުންނެވެ. މާލޭގައި ބާއްވާ ފައިނަލް ބުރަށް އަހަރެންގެ ނަން ހޮވުނެވެ. ފުރަތަމަ ފަހަރަށް އަހަންނަށް އިޙުސާސްވީ އަހަރެންގެ އަގު ވަޒަންކުރެވޭކަމެވެ. ހޮވުނުކަމެވެ. ޤަދަރުވެރިވިކަމެވެ.
އަހަރެން މަންމައަށް އެ ސިޓީ ދެއްކުމުން، އެތައް އަހަރެއް ވަންދެން މަންމަގެ މޫނުމަތިން ނުފެންނަ އުފާވެރިކަމެއް ފެނުނެވެ. “ދަރިފުޅުގެ ބައްޕަ ވަރަށް ފަޚުރުވެރިވާނެ.” މަންމަ މަޑުމަޑުން ބުންޏެވެ. މަންމަ އެ ބުނީ އަހަރެންގެ އަސްލު ބައްޕަގެ ވާހަކައެވެ.
އަހަރެމެން ދެމީހުންނަށްވެސް އެނގެއެވެ. އެއީ ބުނެގެންވާނެ ވާހަކައެއް ނޫންކަމެވެ.
އެރޭ، ދޮންބައްޕަ އާދައިގެ ވަގުތަށްވުރެ ކުރިން ގެއަށް އަތުވެއްޖެއެވެ. މޭޒުމަތީގައި އޮތް ސިޓީ އޭނާއަށް ފެނުނެވެ. “މިއީ ކޮން އެއްޗެއް؟” އަހަރެން ޖެހިލުންވިއެވެ. މަންމަ ޖަވާބު ދިނެވެ. “ދަރިފުޅު މުބާރާތަކުން ހޮވުނީ. ފައިނަލް ބުރަށް މާލެ ދާން އެބަޖެހޭ.” އޭނާ އެ ސިޓީ ކިޔާލިއެވެ. އޭނާގެ މޫނުމަތީގެ ކުލަވަރަކަށް ބަދަލެއް ނައެވެ. “ކަލޭ ދާނެ ކަމެއް ނެތް.” އެ ބަސްތައް އައީ ފިނި އަދި އެހާމެ ހަރުކަށިކޮށްނެވެ. އަހަރެން ހީކުރީ އޭނާއަށް އޮޅުނީ ކަމަށެވެ. “ސްކޫލުން އަހަރެން ފޮނުވަނީ.” އަހަރެން މަޑުމަޑުން ބުނީމެވެ. “މަ ބުނެފީމެއްނު ނުދެވޭނެޔޭ.” މަންމަ މަސައްކަތް ކުރިއެވެ. “އެއީ ދަރިފުޅުގެ މުސްތަޤުބަލަށް ލިބޭނެ ކުރިއެރުމެއް..” އޭނާ މަންމައާ ދިމާލަށް އެނބުރުނެވެ. މުޅި ތަނަށް ބަރު ހިމޭންކަމެއް ވެރިވިއެވެ. “ދަތުރުފަތުރުކޮށް އުޅޭ އަންހެން ކުދިން ބަސްނާހާނެ.” އޭނާ ބުންޏެވެ. “މަ ތިޔަކަމަށް ހުއްދައެއް ނުދޭނަން.”
އަހަރެންގެ އެތެރެހަށިން ކޮންމެވެސް އެއްޗެއް ބިނދިގެން ދިޔައެވެ. ބާރު އަޑަކުންނެއް ނޫނެވެ. ނަމަވެސް އެކަމަކު މުޅިން ފުނޑުފުނޑުވީއެވެ. “ކަލެއަކީ މަގޭ ބައްޕައެއް ނޫން.” އަހަރެން ބުނީމެވެ. އެ ބަސްތައް އަހަރެންގެ އަނގައިން ބޭރުވި ވަގުތު، އެ ބަސްތައް އަނބުރާ ގެންދެވޭނެ ނަމައޭ ހިތަށް އެރިއެވެ. ނަމަވެސް ވަގުތު ފާއިތުވެއްޖެއެވެ.
އޭނާ ދޮރު ތަޅުލިއެވެ. ވަރަށް ލަސްލަހުންނެވެ. ގަސްތުގައެވެ. އަތުކުރީ ގަޑި ނައްޓާލިއެވެ. މޭޒުމަތީގައި ބޭއްވިއެވެ. “އަނެއްކާވެސް ބުނެބަލަ.”
އަހަރެންގެ އަތް ތުރުތުރުލާން ފެށިއެވެ. މަންމަ ކުރިއަށް ޖެހިލިއެވެ. “އޭނާ އެހެން ބުނީ ގަސްތުގައެއް ނޫން..” އޭނާ މަންމަ އެއްފަރާތަށް ކޮށްޕާލިއެވެ. މަންމަ ވެއްޓުނެވެ. އަދި ތެދުވަންވެސް ނުކުޅެދުނެވެ. އޭނާ އަހަރެންގެ ގައިގައި ހިފިއެވެ. އަދި ގޯޅިތެރެއަށް ދަމާފައި ގެންދިޔައެވެ. އަހަރެމެންގެ ބޯމަތީގައި ހުރި ފަންކާ ވަރަށް ބާރަށް އެނބުރެމުން ދިޔައެވެ. އެ ހުރިހާ ކަމެއް ހިނގަމުން ދިޔައިރު އަހަރެން ބަލަހައްޓައިގެން ހުރީ އެ ފަންކާއަށެވެ. އެ ފަންކާއަށް ބަލަން ހުރުމުން އަހަރެން ސަލާމަތްވާނެ ފަދައަކުންނެވެ.
ފުރަތަމަ ހޫނު ހަމަލާ އަހަރެންގެ މޫނަށް އެރިއެވެ. ދެން އަނެއް ހަމަލާއެވެ. އަހަރެންގެ މޫނު ސަލާމަތްކުރުމަށް އަހަރެން އަތް އުފުލީމެވެ. އޭނާ އަހަރެންގެ އަތުކުރީގައި ހިފިއެވެ. އަނބުރާލިއެވެ. ކޮއްޕާލިއެވެ. އޭގެ ފަހުން އިވުނު އަޑަކީ މާ ބާރު އަޑެއް ނޫނެވެ. ނަމަވެސް އަހަރެންގެ މުޅި ހަށިގަނޑަށް އެކަން އިޙުސާސްވިއެވެ. ކުޑަ އަޑަކާއެކު އަތް ބިނދިއްޖެއެވެ. ދެން އިޙުސާސްވީ ބަޔާންކުރަންދަތި ގަދަ ވޭނެކެވެ. ނޭވާ ހާސްވާ ފަދަ ވޭނެކެވެ. އަހަރެން ވެއްޓުނެވެ. އަހަރެންގެ އަތުކުރި އޮތީ އާދައިގެ ގޮތަކަށް ނޫނެވެ. އަހަންނަށް ހޭރުނެވެ. މަންމަ ފިރުކެމުން އަހަރެންގެ ގާތަށް އައެވެ. “އޭނާއަށް އަނިޔާވެއްޖެ.. އޭނާގެ އަތް..” “ހިމޭނުން ހުރޭ!” އޭނާ ބުންޏެވެ.
އަވަށްޓެރިއަކު ދޮރުގައި ޓަކިޖެހިއެވެ. “ހުރިހާ ކަމެއް ރަނގަޅުތަ؟” “އާނ!” އޭނާ ވަގުތުން ޖަވާބު ދިނެވެ. “ދަރިފުޅު ކަހާލައިގެން ވެއްޓުނީ!” އެ ދޮގު އައީ ވަރަށް ފަސޭހަކަމާއެކުގައެވެ. އަބަދުވެސް އަންނަ ފަދައިންނެވެ. ދެން އޭނާ މަންމައަށް ބަލާލިއެވެ. “އޭނާ ހޮސްޕިޓަލަށް ގެންދޭ.” އަދި އެއަށްފަހު.. އިރުޝާދުތައް ދިނެވެ. ސާފުކޮށް، ފިނިކޮށް، އަދި ހަރުކަށިކޮށްނެވެ. “ބުނާނީ މީހުން ގިނަ ފެރީއަކުން ފައިބަނިކޮށް ވެއްޓުނީ ކަމަށް.”
ރަށު ސިއްޙީ މަރުކަޒުގައި ވަނީ ބޭސް ވަސް ހިފާފައެވެ. ނަރުހަކު އަހަރެމެން އެތެރެއަށް ވެއްދިއެވެ. ޑިއުޓީގައި ހުންނެވީ ޑރ. މަރިޔަމް ލިޔާނާއެވެ. އޭނާއަކީ މަޑުމައިތިރި، ކަންކަމަށް ފަރުވާތެރި ބޭފުޅެކެވެ. އޭނާ އަހަރެންގެ އަތުކުރި ވަރަށް ފަރުވާތެރިކަމާއެކު ބެއްލެވިއެވެ. ނަމަވެސް އޭނާގެ ދެލޯ އެހެން ދިމާދިމާލަށް ދަތުރުކުރަމުން ދިޔައެވެ. އަހަރެންގެ އަތަށެވެ. ކޮނޑަށެވެ. ބުރަކަށްޓަށެވެ. އަހަރެން ފޮރުވައިގެން އުޅުނު ލަކުނުތަކަށެވެ. “މިކަން ވީ ކިހިނެއް؟” އޭނާ އެހިއެވެ. މަންމަ އަވަސްއަވަހަށް ޖަވާބު ދިނެވެ. “ފެރީއަކުން ވެއްޓުނީ.” ޑރ. ލިޔާނާ ޖަވާބެއް ނުދެއްވައެވެ. އޭގެ ބަދަލުގައި ބަލާލީ އަހަންނަށެވެ. “އެއީ ތެދެއްތަ؟” އަހަރެން ޖެހިލުންވިއެވެ. މަންމަ އަހަރެންގެ އަތުގައި ބާރަށް ހިފާލިއެވެ. “އާނ.” އަހަރެން މަޑުމަޑުން ބުނީމެވެ. ޑޮކްޓަރު އަހަރެންގެ ގާތަށް ޖެހިލިއެވެ. އަޑު މަޑުކޮށްލިއެވެ. “މިތާ ކަލޭ ސަލާމަތުން ހުންނާނެ.” އޭނާގެ އަޑުގެ ރާގު ތަފާތެވެ. އެއީ މަޖުބޫރުކުރުމެއް ނޫނެވެ. އެއީ ހަމްދަރުދީއެއްވެސް ނޫނެވެ. އެއީ ޔަގީންކަމެވެ.
އޭނާ ވަރަށް މަޑުމަޑުން އަހަރެންގެ އަތްކުރި މައްޗަށް ޖެއްސިއެވެ. އޭރުން ކުރީގެ ލަކުނުތައް ފެނުނެވެ. ތަފާތު ބައްޓަންތަކެވެ. ތަފާތު ވަގުތުތަކެވެ. އަހަރެންގެ ހަށިގަނޑުގައި ލިޔެވިފައިވާ ތާރީޚެކެވެ. ދެން އޭނާ ކުރި ސުވާލުން ހުރިހާ ކަމެއް ބަދަލުވިއެވެ. “ގޭގައި ރައްކާތެރިކަން އެބައޮތްތަ؟” އަހަރެން އަނގަ ހުޅުވާލީމެވެ. ނަމަވެސް ބިރުވެރިކަން ކުރި ހޯދިއެވެ. “އާނ.” އޭނާ މަންމަ އަހަރެންގެ އަތުގައި ހިފާފައި ހުރި ބާރުމިން ބެލިއެވެ. އޭނާއަށް ހުރިހާ ކަމެއް ފެނުނެވެ. އިތުރު ބަހެއް ބުނުމެއް ނެތި، އޭނާ ބޭރަށް ނިކުމެ ބޭރުން ދޮރު ތަޅުލިއެވެ. އަދި ފޯނެއް ކުރިއެވެ.
މަންމަ ބިރުގަތެވެ. “ކީއްތަ ތިޔަ ކުރަނީ؟” ޑރ. ލިޔާނާގެ އަޑުގައި ހުރީ ސާބިތުކަމެވެ.
“އަހަރެން މި ރިޕޯޓުކުރަނީ.”
“ނޫން. ޑޮކްޓަރަށް ނޭނގޭނެ..”
“އަހަންނަށް އެނގެންވާ ވަރަށް އެނގިއްޖެ.”
ދެން މަންމަގެ ފޯނު ރިންގުވިއެވެ. ދޮންބައްޕައެވެ. މަންމަ ފޯނު ނެގިއެވެ.
އޭނާގެ އަޑު މުޅި ކޮޓަރީގައި ގުގުމާލިއެވެ. “އޭނާ އެއްވެސް އެއްޗެއް ބުނިތަ؟ އަނގަ ހުޅުވައިފިއްޔާ، އޭގެ ހިތި ނަތީޖާ އޭނާއަށް ދައްކާލާނަން.” ހިމޭންކަމެވެ. ބަރު އަދި ހަޤީޤީ ހިމޭންކަމެވެ. އެތައް އަހަރެއްގެ ތެރޭގައި ފުރަތަމަ ފަހަރަށް.. މަންމައަކަށް އިތުރަކަށް އޮޅުވައެއް ނުލެވުނެވެ. ހަގީގަތް ހާމަވެއްޖެއެވެ. އަދި އެކަން އަނބުރައެއް ނުގެނެވޭނެއެވެ.
ނަމަވެސް ވާހަކަ އެހިސާބަކުން ނުނިމެއެވެ. ސަބަބަކީ އަސްލު ސުވާލަކީ ހަޤީޤަތް ހާމަވުން ނޫން ކަމަށްވާތީއެވެ. އަސްލު ސުވާލަކީ މިއެވެ. ހިމޭންކަން މުގުރާލުމަށްފަހު ދެން ވާނީ ކިހިނެއް ހެއްޔެވެ؟
އެރޭ، ފުލުހުންގެ ލޯންޗު ކަނޑު ހުރަސްކޮށް ރަށާ ދިމާލަށް އައިއިރު، އަހަރެން އިނީ އެ ކުޑަ ކްލިނިކް ކޮޓަރީގައެވެ. އަތުގައި ވަނީ ބެންޑޭޖެއް އަޅާފައެވެ. ހިތް އޮތީ ކުރިއަށްވުރެ ބާރަށް ތެޅިތެޅިއެވެ. މަންމަ އިނީ އަހަރެންގެ ގާތުގައެވެ. އަހަރެންގެ ގައިގައި އަތްލުމެއް ނެތެވެ. ވާހަކަދެއްކުމެއް ނެތެވެ.
މަންމަ ބިނާކުރި ހުރިހާ ކަމެއް.. ކޮންމެ ދޮގެއް، ކޮންމެ ބަހަނާއެއް، އަދި ކޮންމެ އުޒުރެއް.. މަންމަގެ ވަށައިގެން ހިމޭންކަމާއެކު ބިމާ ހަމަވަމުންދަނީއެވެ.
“މަންމަ މަސައްކަތްކުރީ އަހަރެމެން ސަލާމަތްކުރަން.” އެންމެ ފަހުން މަންމަ މަޑުމަޑުން ބުންޏެވެ. އަހަރެން އެއްވެސް ޖަވާބެއް ނުދެމެވެ. ސަބަބަކީ، “އަހަރެމެން” އެ ބަހުގެ މާނައަކީ މިހާރު ކޮބައިކަމެއް އަހަރެންނަށް ނޭނގޭތީއެވެ.
ބޭރުން އިވޭ އަޑުތައް ބާރުވަމުން ދިޔައެވެ. ފިޔަވަޅުތަކުގެ އަޑެވެ. ދޮރުތައް ހުޅުވޭ އަޑެވެ. ސުވާލުތަކެވެ. ބާރުވެރިކަމެވެ. ހަޤީޤަތެވެ. އަހަރުތަކެއް ވަންދެން އަހަރެމެންގެ ގެއަކީ ހަޤީޤަތް ވަޅުލެވިފައިވާ ތަނެކެވެ. ވޭންތައް ފޮރުވާފައިވާ ތަނެކެވެ. ދިރިހުރުމަށްޓަކައި ހިމޭންކަން އިޚްތިޔާރުކުރަން ޖެހިފައިވާ ތަނެކެވެ. ނަމަވެސް މިހާރު.. އެ ހިމޭންކަން ހެކިބަހަކަށް ބަދަލުވެއްޖެއެވެ. އަދި އަހަރެންގެ ބޯމަތީގައި އެނބުރެމުންދިޔަ ސީލިންގް ފަންކާގެ ދުވެލި ބާރުވެ، ލޮލަށް ފުސްވަމުން ދިޔައިރު، މީގެ ކުރިން ދުވަހަކުވެސް ނޭނގޭ ކަމެއް އަހަރެންނަށް ވިސްނުނެވެ. އަހަރެންގެ ދިރިއުޅުން ކޮންޓްރޯލް ކުރީ އޭނާގެ ސައިކަލުގެ އަޑެއް ނޫނެވެ. އެއީ އަހަރެން މަޖުބޫރުވެގެން ހިފަހައްޓަމުން އައި ހިމޭންކަމެވެ. މިހާރު އެ ހިމޭންކަން ނެތިގޮސްފިއެވެ. ނަމަވެސް މިނިވަންކަމަކީ؟ އެއީ މާ ބޮޑަށްވެސް އޮޅުންބޮޅުން ބޮޑު ކަމެކެވެ.
ސަބަބަކީ ފުލުހުން އޭނާ ގެންދިޔަ ނަމަވެސް.. ހަޤީޤަތް އެންމެންގެ ކުރިމައްޗަށް ހާމަވި ނަމަވެސް.. އަދި މުޅި ރަށު ތެރޭގައި އެކަކު އަނެކަކަށް އަހަރެމެންގެ ވާހަކަ ދެކެވެމުން ދިޔަ ނަމަވެސް.. އަހަރެންގެ ހިތުގައި އުފެދޭ ސުވާލު ހުއްޓުމެއް ނުވެއެވެ.
އަހަރެމެންނަށް ކޮށީގެ ތެރެއިން ސަލާމަތްވެވުނީ ހެއްޔެވެ؟ ނުވަތަ އަހަރެމެންނަށް މި ވަދެވުނީ މާ ނުރައްކާތެރި އެހެން ކޮށްޓަކަށް ހެއްޔެވެ؟ ސަބަބަކީ، އެމީހުން މިނިވަންކަމާއެކު އަނެއް ދުވަހު ދޫކޮށްލާތީއެވެ.
(ނިމުނީ)
