ޒިމާންގެ އަތުގައި ދޭނެ ޖަވާބެއް ނެތެވެ.
“އަހަރެމެންގެ ދެމެދުގައި އޮތީ އެއްބަސްވުމެއް.” މީރާ އޯގާތެރިކަމާއެކު ބުންޏެވެ. “އަހަރެމެން އެއް ގެއެއްގައި، އެއް ކޮޓަރިއެއްގައި ދިރިއުޅުނީމު. ޒިމާންގެ އުނދަގޫ ރޭތަކުގައި އަހަރެން އެހީތެރިވިން، އަދި އަހަރެމެންގެ އާއިލާއަށް ބޭނުންވި ދަނޑިވަޅުގައި ޒިމާން އެހީތެރިވި. އެއީ ވަރަށް ރީތި ހަނދާންތަކެއް، އަހަރެން އަބަދުވެސް އެކަން ހަނދާން ބަހައްޓާނަން. އެކަމަކު، އާއިލާއެއްގެ ގޮތުގައި ދިރިއުޅޭނެކަމުގެ ވަޢުދެއް އަހަރެމެންގެ ދެމެދުގައި ދުވަހަކުވެސް ނުވޭ.”
“އަހަންނަށް ބަދަލުވެވިދާނެ.”
“އުއްމީދު ކުރިން ތިހެން ވާނެކަމަށް.”
“މީރާ ބޭނުންވާ ކޮންމެ އެއްޗެއް އަހަންނަށް ދެވިދާނެ.”
މީރާ ބޯހޫރުވާލިއެވެ.
“މައްސަލައަކީ ތީ. އަދިވެސް ތި ބުނަނީ ޒިމާންއަށް ދެވޭނެ އެއްޗެއްގެ ވާހަކަ. އެކަމަކު، އަހަރެން ބޭނުންވަނީ ކޮން އެއްޗެއްތޯ އެންމެ ފަހަރަކުވެސް އަހާނުލާ.”
ޒިމާން ހިމޭނުން ހުއްޓެވެ. ފުރަތަމަ ފަހަރަށް އޭނާއަށް މީރާ ފެނުނީ ހަމައެކަނި އޭނާ ބޭނުންވާ ވަގުތު އެހީތެރިވާ މީހެއްގެ ގޮތުގައެއް ނޫނެވެ. އޭގެ ބަދަލުގައި، އޭނާގެ އަމިއްލަ ދިރިއުޅުމެއް އޮތް، އަމިއްލަ މިނިވަންކަން އޮތް އަންހެނެއްގެ ގޮތުގައެވެ. މީރާގެ އަމިއްލަ ހުވަފެންތަކެއް ހުއްޓެވެ. އަމިއްލަ ބިރުވެރިކަމެއް ހުއްޓެވެ.
ޒިމާންގެ ދިރިއުޅުމާ ގުޅުމެއް ނެތް މުސްތަޤުބަލެއް އިޚްތިޔާރު ކުރުމުގެ ފުރިހަމަ ޙައްޤު މީރާއަށް އޮތެވެ.
“މިތަނުގައި އުޅޭއިރު އުފާވޭތަ؟” އެންމެ ފަހުން ޒިމާން އަހާލިއެވެ.
މީރާ ކަނޑާ ދިމާލަށް ބަލާލިއެވެ.
“އުފަލުގައި އުޅެން ދަސްކުރަނީ.”
“އަދިވެސް އަހަންނާމެދު ވިސްނާ އަޅާލަންތަ؟”
މީރާ ކުޑަ ވަގުތުކޮޅަކަށް ލޯ މަރާލިއެވެ. “އާނ.”
ޒިމާންގެ މޫނުމަތިން އުއްމީދުގެ އަސަރު ފެނުނެވެ.
“އެކަމަކު، ޒިމާންއާމެދު އަޅާލުމުގެ މާނައަކީ، ޒިމާންގެ ގާތުގައި ހުރެވެސް އަހަރެން އެކަނިވެރިވާންޖެހޭ ދިރިއުޅުމަކަށް އަލުން ރުޖޫޢަވުމެއް ނޫން.”
އެ އުއްމީދު ގެއްލިގެން ދިޔައެވެ. ޒިމާން އިސްޖަހާލިއެވެ. ވޭތުވެދިޔަ އަހަރުތަކުގައި އޭނާއަށް ހީވެފައި އޮތީ، ލޯތްބަކީ ތިމާއަށް ހިތްހަމަޖެހުން ހޯދައިދޭނެ މީހަކު ގާތުގައި ހުރުން ކަމަށެވެ. ނަމަވެސް، އަނެކާގެ އަމިއްލަ މިނިވަންކަމަށް އިޙްތިރާމްކޮށް، އެމީހަކު ދުރަށްދާން ބޭނުންވާ ވަގުތު އެ ފުރުސަތު ދިނުމަކީ ވެސް ލޯބީގެ ބައެއްކަން އޭނާއަށް މިއަދު ދަސްވާން ފަށައިފިއެވެ.
މީރާ ދޮރު ހުޅުވާލިއެވެ.
“މަންމަ ސައި ތައްޔާރުކުރަނީ. ބޭނުންނަމަ އެތެރެއަށް އާދެވިދާނެ، އެކަމަކު ޒިމާންގެ ގެއަށް އަހަރެން އެނބުރި ނުދާނެކަން ޤަބޫލުކުރަންވާނެ.”
ޒިމާން މީރާއަށް ބަލަހައްޓައިގެން ހުއްޓެވެ. އޭނާގެ ހިތް ބުނަމުންދިޔައީ ބަހުސްކޮށް، މީރާގެ ނިންމުން ބަދަލުކުރުވުމަށް އެކި ހުށަހެޅުންތައް ހުށަހެޅުމަށެވެ. އެކަމަކު، އޭނާ ފުން ނޭވާއެއްލުމަށްފަހު ބުންޏެވެ. “ރަނގަޅު.”
މީރާ ހައިރާންވިއެވެ. އޭނާ ބޭނުންނުވާ ނިންމުމެއް ޒިމާން އެހާ ފަސޭހައިން ޤަބޫލުކުރި މިއީ ފުރަތަމަ ފަހަރެވެ.
“އެނބުރި އައުމަކަށް އަހަރެން ދެން މަޖުބޫރެއް ނުކުރާނަން.” ޒިމާން މަޑުމަޑުން ބުންޏެވެ.
މިއަދު ފުރަތަމަ ފަހަރަށް މީރާ ހިނިތުންވެލިއެވެ. އެއީ ހިތާމައިގެ އަސަރު އެކުލެވިފައިވީ ނަމަވެސް، އިޚްލާޞްތެރި ހިނިތުންވުމެކެވެ.
“އެހެންވީއިރު، އެތެރެއަށް ވަދެ ސައިބޯން އާދޭ.”
ޒިމާން އޭނާގެ ފަހަތުން ގޭތެރެއަށް ވަނެވެ. އޭނާ މީރާގެ އާއިލާއާއެކު އިށީނދެ، ސައިބޮމުން، ޖެހިގެން އަންނަ ދުވަހަށް ތައްޔާރުކުރަންޖެހޭ ކާތަކެތީގެ އޯޑަރުތަކާ ބެހޭގޮތުން މީރާގެ މަންމަ ދައްކަމުންދިޔަ ވާހަކަތައް އަޑުއަހަން އިނެވެ. އެ ވިޔަފާރި ގަނެދޭނެ ކަމަކަށް އޭނާ ނުބުނެއެވެ. މިއަށްވުރެ ބޮޑު ގެއެއް ހޯދައިދޭނެކަމުގެ ވަޢުދެއްވެސް ނުވެއެވެ. އޭނާ ހަމައެކަނި ކޮށްދިން ކަމަކީ ކަނުލައި އަޑުއެހުމެވެ. އަދި ފާއިތުވި ދިހަ އަހަރު ދުވަހުގެ ތެރޭގައި ފުރަތަމަ ފަހަރަށް، މީރާގެ ދިރިއުޅުން އޭނާގެ ބޭނުންތަކާ އެއްގޮތަށް ބައްޓަންކުރުމަށް އުންމީދުކުރުމެއް ނެތި، އޭނާ މީރާގެ ދިރިއުޅުމުގައި ބައިވެރިވިއެވެ.
*****
އެރޭ ޒިމާން އެނބުރި މާލެ ދިޔައެވެ. އަދި އެއަށްފަހު އޭނާ މީރާގެ އާއިލާއަށް އަގުބޮޑު ހަދިޔާތަކެއް ނުފޮނުވައެވެ. އޭނާގެ ނިންމުން ބަދަލުކުރުމަށް މީރާއަށް ވިސްނައިދިނުމަށް އެއްވެސް މީހަކަށް ނާންގައެވެ. އަދި މީރާ އޭނާގެ އެދުންތަކަށް އިޖާބަދޭނެކަމުގެ އުންމީދުގައި ތަކުރާރުކޮށް ފޯނުންވެސް ނުގުޅައެވެ. އޭގެ ބަދަލުގައި، އޭނާ ފެށީ މާ އުނދަގޫ ކަމެއް ކުރާށެވެ. އޭނާ އަމިއްލަ ނަފްސު އިސްލާހުކުރަން ފެށިއެވެ.
ނިދިނައުމުގެ މައްސަލައަށް އޭނާ ހޯދަމުންދިޔަ ފަރުވާ ކުރިއަށް ގެންދިޔައެވެ. އަދި އޭނާގެ ބޮޑުބޭބެގެ މަރުގެ ހިތާމައާ ގުޅިފައިވާ ކަންކަމާ ކުރިމަތިލުމަށް އެންމެ ފަހުން އެއްބަސްވިއެވެ.
ތެރަޕީގެ އެހީގައި، އޭނާގެ ނިދީގައި ފެންނަ ބިރުވެރި ހުވަފެންތަކަކީ ހައްލުނުކުރެވި ހުރި ނަފްސާނީ އަސަރުތަކާއި، ކުށްވެރިކަމުގެ އިޙުސާސާއި، ކަންކަން އަތުން ބީވެގެން ގޮސްފާނެކަމުގެ ބިރާ ގުޅިފައިވާ ކަންކަންކަން އޭނާއަށް ވިސްނެން ފެށިއެވެ.
އެތައް އަހަރެއް ވަންދެން އޭނާ މަސައްކަތްކުރަމުން ދިޔައީ އޭނާގެ ބަސްއަހާ މީހުން ގާތުގައި ބައިތިއްބައިގެންނާއި، އިޙުސާސްތައް ފޮރުވައިގެންނާއި، އަމިއްލަ ނަފްސުގެ ނިކަމެތިކަން ހާމަވެދާނެ ފަދަ ވާހަކަތަކުން ދުރުހެލިވެގެން އެ އިޙުސާސްތައް ކޮންޓްރޯލް ކުރުމަށެވެ.
މީރާއަކީ އޭނާއަށް ހިތްހަމަޖެހުން ލިބުނު ވަސީލަތެކެވެ. ނަމަވެސް، އޭނާގެ އަމިއްލަ ނަފްސަށްޓަކައި ކުރަންޖެހޭ މަސައްކަތުގެ ބަދަލުގައި، މަޑުމަޑުން އޭނާ މީރާއަށް ބަރޯސާވާން ފެށިއެވެ.
މީރާ ގާތުގައި ހުރުމުން އޭނާއަށް ރައްކާތެރިކަން އިޙުސާސްވިއެވެ. އެހެންނަމަވެސް، އެ ގުޅުމަކީ ދެމީހުންގެ ނަފްސާނީ ދުޅަހެޔޮކަމަށް އެންމެ ރަނގަޅު ގޮތްތޯ ބަލާކަށް އޭނާއަކަށް ނޭނގުނެވެ. އެކަން ޤަބޫލުކުރަން އޭނާއަށް އުނދަގޫވިއެވެ. ބައެއް ރޭރޭ އޭނާއަށް ފުދޭވަރަކަށް ގިނައިރު ނިދެއެވެ. އަނެއްބައި ރޭރޭ، ފަތިސްވަންދެން ނުނިދި އޮންނައިރު، މީރާ ނޭވާލާ އަޑާއި، ބިރުވެރި ހުވަފެންތަކުން ހޭލެވޭ ވަގުތު އޭނާއަށް ދޭ ހިތްހަމަޖެހުން ހަނދާންވެއެވެ.
މީރާގެ ނިންމުމަށް އިޙުތިރާމް ކުރުމުގެ އަޒުމަށްވުރެ ކުރީގެ އާދަކާދަތައް ވަރުގަދަވެ، އޭނާއަށް ގުޅާލަން ބޭނުންވާ ވަގުތުތައް އާދެއެވެ. ނަމަވެސް، އޭނާގެ އުނދަގޫތައް ފިލުވައިދިނުމަށް އެހެން މީހަކަށް ބަރޯސާވުމުގެ ބަދަލުގައި، އެ އުނދަގޫތަކާއެކު ކެތްތެރިވާން އޭނާ ދަސްކުރިއެވެ.
އޭނާ ނިދުމުގެ ވަކި ތަރުތީބަކަށް އަމަލުކޮށް، ސިއްޙީ މާހިރުންގެ އިރުޝާދުގެ ދަށުން ތަފާތު އުކުޅުތައް ބޭނުންކޮށް، އެތައް އަހަރެއް ވަންދެން ހިތުގައި ފޮރުވާފައިވާ ހިތާމަތަކާ ބެހޭގޮތުން ތެދުވެރިކަމާއެކު ވާހަކަދައްކަން ފެށިއެވެ.
އެއީ އަވަސް ނުވަތަ ފަސޭހަ މަރުހަލާއެއް ނޫނެވެ. އޭނާގެ ކެތްތެރިކަން އަދިވެސް ކޮޅުންލައެވެ. ރުޅި އިސްކުރެވޭ ވަގުތުތައް އާދެއެވެ. މީރާ އެނދުގެ އަނެއް ފަރާތުގައި ނެތްކަން ހަނދާންވުމުގެ ކުރިން، ކުއްލިއަކަށް ހޭލެވިގެން މީރާ ހޯދަން އަތްފިލާ ރޭރޭ އަދިވެސް އާދެއެވެ. ނަމަވެސް މަޑުމަޑުން، މީރާގެ ވަކިވުމަކީ އޭނާއަށް ދިން އަދަބެއްގެ ގޮތުގައި ދެކުން ހުއްޓާލިއެވެ.
މީރާ އެއްވެސް ވަޢުދަކާ ޚިލާފެއް ނުވެއެވެ. އޭނާ އެއްވެސް ޒިންމާއަކުން ރެކިފައެއްވެސް ނުވެއެވެ. އޭނާ ހަމައެކަނި ކުރި ކަމަކީ، އެއްބަސްވުމެއްގެ ނިމުމަށް އައުމަށްފަހު، އެއަށްވުރެ ބޭރުގައި އަމިއްލަ ދިރިއުޅުމެއް ބިނާކުރުމަށް ނިންމުމެވެ.
ކުށް ކުރެވުނީ އޭނާއަށެވެ. ޒިމާންއަށް އޮޅުނީ، ދަންނަފަރިތަކަމަކީ ދާއިމީ ކަމެއް ކަމަށާއި، ބަރޯސާވުމަކީ ގާތްކަން ކަމަށާއި، އަދި އަންހެނަކު އޭނާގެ ގާތުގައި ހުންނަން ބޭނުންވުމަކީ އެމީހަކު ދާނެ އެހެން ތަނެއް ނެތުމުން ކުރާ ކަމެއް ކަމުގައެވެ.
*****
މި ދަނޑިވަޅުގައި، ފިނިހާގައި މީރާގެ ދިރިއުޅުން އާރާސްތުވާން ފެށިއެވެ. އޭނާގެ މަންމަގެ ކޭޓަރިންގ ވިޔަފާރި ފުޅާކުރުމަށް އެހީތެރިވެ، އާއިލީ ބައްދަލުވުންތަކަށާއި، ރަށުގެ އެކި ހަރަކާތްތަކަށާއި، ކައިރި ގެސްޓްހައުސްތަކުގައި ތިބޭ ފަތުރުވެރިންނަށް ދިވެހި ކާނާ ތައްޔާރުކޮށްދިނުމުގައި ބައިވެރިވިއެވެ.
މީރާ ގެސްޓްހައުސްގެ ވަޒީފާއާ ހަވާލުވެ، މީހުންނާ ގުޅިގެން މަސައްކަތްކުރުމަށާއި، އެކި ހަރަކާތްތައް ރޭވުމަށާއި، ފަތުރުވެރިންނަށް ރަށުގެ ދިރިއުޅުމުގެ އުފާވެރިކަން އިޙުސާސްކޮށްދިނުމަކީ އޭނާ ކުރާހިތްވާ ކަމެއްކަން ދެނެގަތެވެ.
މީރާގެ ދުވަސްތައް ތަފާތު ގޮތަކަށް ބިޒީވާން ފެށިއެވެ. ޒިމާންގެ ތާވަލާ އެއްގޮތަށް ދިރިއުޅުން ބައްޓަންކުރުމުގެ ބަދަލުގައި، އޭނާ ނިންމުންތައް ނިންމަމުން ދިޔައީ އަމިއްލަ އިސްކަންދޭ ކަންކަމަށް ބަލައިގެންނެވެ. އޭނާ މައިންބަފައިންނާއެކު ވަގުތު ހޭދަކުރިއެވެ. ފޯނުން ގުޅައިގެން އޭނާގެ ކޮއްކޮއާއެކު ސަމާސާކޮށް ހީނހެދިއެވެ. ހަވީރުގެ ވަގުތުތަކުގައި މަންމައާއެކު ސައިބޯން އިށީނދެ، ކުރިން މާ މުހިންމު ނޫން ކަމަށް ހީވި އާދައިގެ ކަންކަމާ ބެހޭގޮތުން ވާހަކަދައްކައި ހެދިއެވެ.
ބައެއް ފަހަރު، އޭނާ ޒިމާންގެ މަތިން ހަނދާންވެއެވެ. ޒިމާންގެ އޯގާތެރިކަމާއި، އޭނާގެ ހިތާމަތަކާއި، އޭނާގެ ހިތުގެ ނާޒުކުކަން ހާމަވި މަދު ވަގުތުކޮޅުތައް އޭނާ ހަނދާންކުރެއެވެ. އަދި އޭނާއަށް ކުރެވުނު އެކަނިވެރިކަމުގެ އިޙުސާސްވެސްމެއެވެ.
އެޅުނީ ރަނގަޅު ފިޔަވަޅެއްތޯ މީރާ ބައެއްފަހަރު އަމިއްލަ ނަފްސާ ސުވާލުކުރެއެވެ. ލޯބިވާ މީހަކު ދޫކޮށްލުމަކީ އެ ލޯބި ފިލައިގެންދާނެ ކަމެއް ނޫނެވެ. އަދި މިނިވަންވުމަކީ ހިތުން ކުރީގެ ހަނދާންތައް ފޮހެލެވޭނެ ކަމެއްވެސް ނޫނެވެ.
ނަމަވެސް އަމިއްލަ ނަފްސާމެދު ސުވާލު އުފެދޭ ކޮންމެ ހިނދެއްގައި، ވޭތުވެދިޔަ ދިހަ އަހަރު ދުވަހުގެ ތެރޭގައި އޭނާގެ ހާލަތު ހުރި ގޮތް ހަނދާންވެއެވެ. އެއީ އަމިއްލަ ހިތާމަތައް ފޮރުވައި، އަމިއްލަ ބޭނުންތައް ދޫކޮށްލައި، ހަމައެކަނި އެހެން މީހަކަށް ބޭނުންތެރި މީހަކަށް ވުމުން ފުދޭނެކަމަށް އަމިއްލަ ނަފްސަށް ވިސްނައިދީގެން އުޅުނު އަންހެނެކެވެ. އެގޮތަށް ދިރިއުޅެން މީރާ ދެން ބޭނުމެއް ނޫނެވެ.
(ނުނިމޭ)
