މިއަހަރުގެ އޮގަސްޓް މަހުގެ 3 ވަނަ ދުވަހު ސިނަމާތަކަށް އަންނަން ތައްޔާރުވަމުންދާ ޑާކް ރެއިން އެންޓަޓެއިންމަންޓްގެ އާ ފިލްމު “ޖަންނަތު” ގެ އެންމެ އުންމީދީ އެއް ލަވަ ކަމަށްވާ “ތީ މިހިތުގެ ވިންދަކީ” ރަސްމީކޮށް ނެރެފިއެވެ.
މި ލަވައަކީ ފިލްމުގެ އޮރިޖިނަލް ސައުންޑް ޓްރެކް (އޯއެސްޓީ) ގެ ތެރޭގައި ހިމެނޭ ވަރަށް ހިތްގައިމު ލޯބީގެ ލަވައެކެވެ. މި ލަވަ ކިޔާފައިވަނީ ދިވެހި ފަންނާނުންގެ ތެރޭގައި މަގުބޫލު ދެ އަޑު ކަމަށްވާ މަރިޔަމް އަޝްފާ އަދި އަހުމަދު ނާޝިއު މުހައްމަދު (ނާޝް) އެވެ. ލަވައިގެ މިއުޒިކް ތައްޔާރުކޮށްފައިވަނީ އަލީ ޝިފާއު އެވެ.
“ތީ މިހިތުގެ ވިންދަކީ” ގެ ޅެން އެކުލަވާލާފައިވަނީ އިސްމާއިލް މުބާރަކް އެވެ. މި ލަވައިގެ ރެކޯޑިންގ އަދި މިކްސިންގ މަސައްކަތްތައް ކުރިއަށް ގެންގޮސްފައިވަނީ ހުސައިން ތައުފީގު އެވެ.
މި ފިލްމަކީ 2026 ވަނަ އަހަރުގެ އެންމެ އުންމީދީ އެއް ފިލްމުގެ ގޮތުގައި ފާހަގަކުރެވޭ، ޑާކް ރެއިން އެންޓަޓެއިންމަންޓްގެ ފަރާތުން ބެލުންތެރިންނާ ހަމައަށް ގެނެސްދޭނެ ފެންވަރު ރަނގަޅު އުފެއްދުމެކެވެ. ފިލްމު ރިލީޒްކުރުމުގެ ކުރިން ނެރުނު މި ލަވައަށް މިހާރުވެސް ގިނަ ބައެއްގެ ސަމާލުކަން ދަނީ ލިބެމުންނެވެ.
އޮގަސްޓް 3 ގައި ބެލުންތެރިންނާ ހަމައަށް އަންނަ “ޖަންނަތު” އަކީ ތަފާތު ރީތި މަންޒަރުތަކަކާއި އަސަރުގަދަ ވާހަކައެއްގެ މައްޗަށް ބިނާކޮށްފައިވާ ފިލްމެއް ކަމަށް ޕްރޮޑަކްޝަން ހައުސްއިން މައުލޫމާތު ދެއެވެ.
