ދުޅަހެޔޮ ސިއްޙަތެއްގައި ހުރުމަށްޓަކައި ބަރުދަން ލުއިކުރުމަކީ ގިނަ ބަޔަކު ކުރަން ބޭނުންވާ ކަމެކެވެ. ނަމަވެސް، ކަސްރަތުކޮށްގެންނާއި ކެއުމަށް ބަލައިގެން ބަރުދަން ލުއިކުރާއިރު، ބައެއް ފަހަރު މީހާ މާ ބޮޑަށް ވަރުދެރަވެ، “ބަލި” ގޮތަކަށް ފެންނަން މެދުވެރިވެއެވެ. މިއީ ވަރަށް ގިނަ ބަޔަކަށް ދިމާވާ މައްސަލައެކެވެ. މިގޮތަށް މެދުވެރިވާ މައިގަނޑު ސަބަބުތަކާއި އެކަމުން ސަލާމަތްވުމަށް ކުރެވިދާނެ ކަންކަން އެނގުމަކީ ދުޅަހެޔޮ ބަދަލެއް ހަށިގަނޑަށް ގެނައުމަށްޓަކައި ކޮންމެހެން މުހިންމު ކަމެކެވެ.
މިގޮތަށް ބަލި ސިފައެއް ޖެހެން މެދުވެރިވާ އެންމެ ބޮޑު އެއް ސަބަބަކީ ހަށިގަނޑުގެ މަސްތައް ލޫޒްވުމެވެ. ހަމައެކަނި ކާ އެއްޗެހި މަދުކޮށްލުމުން ނުވަތަ މާ ގިނައިން ކާޑިއޯ ކަސްރަތުތައް ކުރުމުން، ހަށިގަނޑުގައި ހުންނަ ސަރުބީގެ އިތުރުން މަސްތައްވެސް ވިރިގެންދެއެވެ. މީގެ ސަބަބުން މޫނާއި ހަށިގަނޑުގެ ވަރުދެރަވެ، ތާޒާކަން ގެއްލި ބަލި މީހެއްގެ ސިފަ ޖެހެއެވެ. މީގެ އިތުރުން، މާ ކުރު މުއްދަތެއްގެ ތެރޭގައި ގިނަ ކިލޯތަކެއް ލުއިވުމަކީވެސް މީހާގެ ސިފައަށް ނޭދެވޭ ބަދަލުތައް އަންނަ ކަމެކެވެ. މިގޮތަށް ބަރުދަން ލުއިވުމުން ހަންގަނޑު ދޫވެ، މޫނުމަތީގެ ތާޒާކަން ގެއްލިގެންދެއެވެ.
ހަމައެއާއެކު، ބަރުދަން ލުއިކުރުމުގެ ތެރޭގައި ހަށިގަނޑަށް ބޭނުންވާ މުހިންމު ނިއުޓްރިޝަންތައް މަދުވުމަކީ މޫނުމަތި މިލައި، ލޮލުގެ ވަށައިގެން ކަޅުވުން ފަދަ ކަންކަން މެދުވެރިވާ ސަބަބެކެވެ. ޚާއްސަކޮށް ވިޓަމިންސް، މިނަރަލްސް އަދި ޕްރޮޓީން ބޭނުންވާ މިންވަރަށް ނުލިބޭނަމަ މީހާގެ ހަކަތަ ދަށްވެއެވެ. އަދި ހަށިގަނޑަށް ބޭނުންވާ ވަރަށް ފެން ނުބޮވޭނަމަ، ހަންގަނޑު ހިކި، މީހާ މާ ބޮޑަށް ވަރުބަލިކޮށް ފެންނަން މެދުވެރިވެއެވެ.
މި މައްސަލަތަކަށް އޮތް ހައްލަކީ ހަށިގަނޑަށް ބޭނުންވާ މާއްދާތައް ހަމަކޮށް، ރަނގަޅު އުސޫލުތަކަކަށް އަމަލުކުރުމެވެ. އެގޮތުން ހަމައެކަނި ކާޑިއޯގެ ބަދަލުގައި “ސްޓްރެންގްތު ޓްރޭނިންގް” ނުވަތަ ބަރު އުފުލުން ފަދަ މަސްތައް ވަރުގަދަކުރާ ކަސްރަތުތައް ހިމެނުން މުހިންމެވެ. މީގެ ސަބަބުން ހަށިގަނޑު ބައްޓަންވެ، ދުޅަހެޔޮ ސިފައެއް ލިބޭނެއެވެ. އަދި ކެއުމުގައި ޕްރޮޓީން ގިނަކުރުމަކީ މަސްތައް ދެމެހެއްޓުމަށާއި ހަންގަނޑުގެ ދިރުމަށް ވަރަށް ބޭނުންތެރި ކަމެކެވެ.
ބަރުދަން ލުއިކުރަންވާނީ އަވަސް އަރުވާލައިގެންނެއް ނޫނެވެ. ސިއްޙީ މާހިރުން ލަފާދޭ ގޮތުގައި ހަފުތާއަކު 0.5 އާއި 1 ކިލޯއާ ދެމެދުގެ މިންވަރަކަށް ބަރުދަން ލުއިކުރުމުން ހަށިގަނޑަށް އެ ބަދަލުތަކަށް ހޭނުމުގެ ފުރުސަތު ލިބޭނެއެވެ. މީގެ އިތުރުން، ދުވާލަކު މަދުވެގެން 2-3 ލިޓަރު ފެން ބުއިމާއި، ހަށިގަނޑު އާރާސްތުވުމަށްޓަކައި 7-8 ގަޑިއިރުގެ ނިދި ހަމަކުރުމަކީ ކޮންމެހެން ކުރަންޖެހޭ ކަމެކެވެ. ހަމައެހެންމެ، މޭވާ އާއި ތަރުކާރީ ހިމެނޭހެން މިންހަމަހަމަ ކެއުމެއް އިޚްތިޔާރުކުރުމަކީ މޫނުމަތީގެ ތާޒާކަން ދެމެހެއްޓުމަށް އެހީތެރިވެދޭނެ ކަމެކެވެ.
ބަރުދަން ލުއިކުރުމުގެ މަޤުސަދަކީ ހަމައެކަނި ހިކުމެއް ނޫނެވެ. އެއީ ދުޅަހެޔޮ، ފިޓު އަދި ހަކަތަ ހުރި ހަށިގަނޑެއް ހޯދުމެވެ. މަތީގައި ބަޔާންކުރެވުނު ކަންކަމަށް ސަމާލުކަން ދީގެން ބަރުދަން ލުއިކުރުމުން، ބަލިކޮށް ފެނުމުގެ ބަދަލުގައި، ހަށިގަނޑު ފިޓުވެފައި ތާޒާކަންމަތީ ހުރުމުގެ ފުރުސަތު ބޮޑުވާނެއެވެ.
