މަސްތުކުރުވަނިވި ވަސް
އެ އޮތް ހަމަހިމޭން ނުތަނަވަސްކަމުގެ ތެރޭގައި ކިޔާރާ މަދު ސިކުންތުކޮޅަކަށް މަޑުމަޑުން ހުއްޓިލައިގެން ހުއްޓެވެ. އޭނާގެ ހިތުގެ ފުންމިނުގައި އުފެދެމުންދިޔަ އާދަޔާ ޚިލާފު މަޑުމޮޅިކަމާއި، ލަދުވެތިކަމާއި، އަދި އިޙުސާސްވަމުންދިޔަ ކަންކަން އެއްފަރާތްކޮށްލުމަށް އޭނާ ވަގުތުކޮޅެއް ހޯދިއެވެ. އަދި އޭނާ އެންމެ އިތުބާރުކުރާ އޭނާގެ އަސްލު ސިފައަށް ރުޖޫޢަވިއެވެ. އެއީ ނަރުހެއްގެ ސިފައެވެ. ވަޒީފާއަށް ކަމޭހިތާ، ކަންކަން ކުރަންވީ ގޮތާއި ބުނަންވީ ބަސްތައް ދަންނަ ކެރޭ އަންހެނެއްގެ ސިފައެވެ.
އޭނާ ފުން ނޭވާއެއްލުމަށްފަހު، މެޑިކަލް ދަބަހުގެ ކައިރީގައި އިނގިލިތައް ޖައްސާލިއެވެ. އޭނާ ބެލީ އާދައިގެ މަތިން ކުރަންޖެހޭ ކަންކަމުގެ ތެރެއަށް ވަދެ ހަމަޖެހިލެވޭތޯއެވެ. “އަޅުގަނޑު ބަލަންޖެހޭ ކަންކަން ބަލަން ފަށަންވީ ދެއްތޯ.” މަޑުމައިތިރި ނަމަވެސް ސާބިތު އަޑަކުން އޭނާ ބުންޏެވެ. އޭނާގެ ހިތުގެ އުދާސްތައް އޭނާއަށް ނޭނގުނު ކަމުގައިވިޔަސް، އޭނާގެ މަސައްކަތާމެދު އޮތް ޔަގީންކަން އެ އަޑުން ހާމަވެއެވެ.
ޒިމާން އެކަމަކަށް ދެކޮޅެއް ނުހަދައެވެ. އޭނާ ހަމައެކަނި ބޯޖަހާލުމަށްފަހު، އިން ތަނުން ކުޑަކޮށް ގުޑިލިއެވެ. އޭނާގެ ހަރަކާތްތައް ހުރީ ވަރަށް މަޑުމައިތިރިކޮށް، ކޮންޓްރޯލް ކުރެވިފައެވެ. އޭނާގެ ހަށިގަނޑުގައި ހުރި ޒަޚަމަކީ ތަދުވާނެ އެއްޗެއް ކަމުގައި ވިޔަސް، އޭނާގެ ފަރާތުން ކެތްތެރިކަން ކުޑަވުމުގެ ނުވަތަ އުނދަގޫވާކަމުގެ އެއްވެސް ނިޝާނެއް ނުފެނެއެވެ. އޭގެ ބަދަލުގައި އޭނާ އިނީ ވަރަށް ހަމަޖެހިލައިގެން، ކިޔާރާގެ ކޮންމެ ހަރަކާތަކަށް ފަރުވާތެރިކަމާއެކު ބަލާށެވެ.
ކިޔާރާ އަނެއްކާވެސް ގާތަށް ޖެހިލިއެވެ. އަދި އޭނާގެ އަންގި ލައްވާފައިވާ އަތުން ވަރަށް ފަރުވާތެރިކަމާއެކު ޒީމާންގެ ވިންދު ބަލަން ފެށިއެވެ. ޒީމާންގެ އަތުގެ މުލައްދަނޑީގައި އަތް ޖައްސާލައިގެން އިނދެ، އޭނާގެ ވިންދު ގުނަމުންދިޔައިރު، ޒިމާންގެ ހަށިގަނޑުގެ ހޫނުކަން އޭނާއަށް އިޙުސާސްވަމުންދިޔައެވެ. އެ ވަގުތުކޮޅު ކިޔާރާގެ ސަމާލުކަން ކުޑަކޮށް ކަސިޔާރުވީ ކުރަން އިން މަސައްކަތުގެ ސަބަބަކުން ނޫނެވެ. ނަމަވެސް ޒިމާންގެ ހާޒިރުކަން އޭނާއަށް އިޙުސާސްވީލެއް ބޮޑުކަމުންނެވެ.
އޭނާ ވަގުތުން އަމިއްލަ ނަފުސު ހަމައަކަށް އެޅުވިއެވެ. ކަމަށް ކަމޭހިތުމާއެކު ފަރުވާތެރިވިއެވެ. ލޭގެ ޕްރެޝަރު ބަލައި، ހުރިހާ ނަތީޖާއެއް އޭނާ ނޯޓުކުރަމުން ދިޔައެވެ. އަދި ޒަޚަމްވެފައިވާ ތަން ބަލައި، އިންފެކްޝަނެއް ނުވަތަ ދުޅަވުމެއް ހުރިތޯ ވަރަށް ރަނގަޅަށް ޗެކްކުރިއެވެ. ހުރިހާ ކަމެއްވެސް ދިޔައީ ރަނގަޅަށެވެ. ބޭނުންވާ މިންވަރަށްވުރެ ވެސް މާ ރަނގަޅަށެވެ.
“ފާރުގަނޑު ވަރަށް ރަނގަޅަށް ފަސޭހަވަމުން އެބަދޭ.” ކިޔާރާ މަޑުމަޑުން ބުންޏެވެ. “ޒަޚަމް ހުރީ ސާފުކޮށް. އެއްވެސް މައްސަލައެއް ނެތް. އަދި ހަށިގަނޑުގެ ބަލަންޖެހޭ މިންގަނޑުތައް ހުރީ ހަމަޔަށް.” އޭނާ ކުޑަކޮށް މަޑުޖެހިލުމަށްފަހު އަހާލިއެވެ. “ޤަވާއިދުން ބޭސް ބޭނުންކުރައްވަންތޯ؟”
“އާނ.” ޒީމާން ޖަވާބު ދިނެވެ.
“އާދައިގެ މަތިން ވާ ތަދަށްވުރެ އިތުރު ތަދެއް އިޙުސާސްވޭތޯ؟”
“ނޫން.”
ޒިމާންގެ ޖަވާބުތައް ކުރުވެފައި ސާދާއެވެ. ނަމަވެސް އޭނާގެ މުޅި ސަމާލުކަން ހުރީ ކިޔާރާއަށެވެ. ޒިމާންގެ ވިސްނުން ހުރީ އެ ބެލުމުގެ މަރުހަލާތަކާ މާ ދުރުގައެވެ. ކިޔާރާ ދައްކަމުންދިޔަ ވާހަކަތަކާއި އިރުޝާދުތައް އޭނާގެ ކަންފަތަށް އިވުނު ކަމުގައިވިޔަސް، އޭނާގެ ހިތް ހުއްޓިފައިވަނީ ކިޔާރާގެ ސޫރައަށެވެ. އޭނާ މަސައްކަތްކުރާ ގޮތާއި، ކަމެއްގައި މަސްއޫލުވެގެން އިންނައިރު އޭނާގެ މޫނުމަތިން ފެންނަ ސިފަތައް ޒިމާން ދިޔައީ ބަލަމުންނެވެ.
އަދި އެއާއެކު ކިޔާރާގެ ހަށިގަނޑުން ދުވަމުންދިޔަ މީރުވަސް ޒިމާންއަށް އިޙުސާސްވިއެވެ. އެއީ ވަރަށް މަޑުމައިތިރި ނަމަވެސް ހިތްދަމައިގަންނަ ވަަހެކެވެ. ވެނީލާގެ ވަހާއި މަސްކުގެ ވަސް އެކުވެފައިވާ، ހޫނުކަމެއް އެކުލެވޭ އެ ވަހަކީ ކޮންމެހެން ޚާއްސަވެގެން ލައިގެން އުޅޭ ވަހެއް ނޫނެވެ. އެއީ ހަމަ ކިޔާރާގެ އަމިއްލަ ވަހެވެ. ބަހުގެ ތެރެއިން ބައްދަލުވި ރޭވެސް އެ ވަސް އޭނާގެ ހަނދާނުގައި ހަރުލާފައި ހުއްޓެވެ. މިހާ ގާތުން އެ ވަސް އިޙުސާސްވުމުން، އެއީ ހަޤީޤަތެއްތޯ އޭނާ އިޙުސާސްކުރަމުން ދިޔައެވެ.
އެ ވަހުން ޒިމާންގެ ހިތަށް އުނދަގޫވިއެވެ. ސަބަބަކީ އެއްވެސް އެއްޗަކަށް އޭނާގެ ހިތް މިގޮތަށް ލަންބުވައެއް ނުލައެވެ. އޭނާ މީގެ ކުރިން ބައިވަރު އަންހެނުން ދެކެފިއެވެ. ރީތިކަމަށްޓަކައި ނަލަހެދިގެން، މީހުންގެ ސަމާލުކަން ހޯދަން ދަންނަ އަންހެނުންނެވެ. ނަމަވެސް ކިޔާރާއަކީ އެފަދަ މީހެއް ނޫނެވެ. އޭނާ މީހުންނަށް ދެއްކެން މަސައްކަތެއް ނުކުރެއެވެ. އެހެނަސް ޒިމާންއަށް އޭނާ ފެންނަނީ މާ ބޮޑަށެވެ. އޭނާގެ ކިބައިގައި ހުރީ މަޑުމައިތިރި ނަމަވެސް ސާބިތު ހިތްވަރެކެވެ. ހޮސްޕިޓަލުގައި އޭނާ އަމަލުކުރި ގޮތާއި، ފަސްޖެހުމެއް ނެތް ހަރަކާތްތަކުން އެކަން ހާމަވެއެވެ.
ކޮޓަރީގެ އަނެއް ފަރާތުގައި، ދޮރު ކައިރީ ފާރުގައި ލެނގިލައިގެން އެންޒޯ ހުއްޓެވެ. އޭނާ ހުރީ ވަރަށް ހަމަޖެހިލައިގެން ކަމަށް ދެއްކިޔަސް، އޭނާގެ ތޫނު ދެލޮލަށް އެއްވެސް ކަމެއް ސިއްރެއް ނުވެއެވެ. އޭނާގެ ކައިރީގައި ފާތިމާ ހުރީ ވަރަށް މަޑުމައިތިރިކޮށެވެ. ނަމަވެސް ޒިމާންއާއި ކިޔާރާއާ ދެމެދު އޮތް ގުޅުން އޭނާއަށް ވިސްނޭކަން އޭނާގެ މޫނުމަތިން އެނގެއެވެ.
“މިކަހަލަ ޗެކްއަޕެއްގައި އޭނާ ދުވަހަކުވެސް މިހާ މަޑަކުން ނީނދޭ.” އެންޒޯ ވަރަށް މަޑުމަޑުން ބުންޏެވެ. ފާތިމާގެ ތުންފަތްމައްޗަށް ލުއި ހިނިތުންވުމެއް އައެވެ. “އޭނާގެ ވިސްނުން ހުރީކީ ޗެކްއަޕަކަށް ނޫން.” އޭނާ ބުންޏެވެ. އެ ދެމީހުން އިތުރު ވާހަކައެއް ނުދައްކައެވެ. އެއީ އޭގެ ބޭނުމެއް ނެތީމައެވެ.
ކިޔާރާ އޭނާގެ އަންގި ބޭލުމަށްފަހު، ސާމާނުތައް ދަބަހަށް އެޅިއެވެ. އަދި ހަމަޖެހިލުމަށްފަހު ބުންޏެވެ. “ހުރިހާ ކަމެއްވެސް ރަނގަޅު. ކަންބޮޑުވާންޖެހޭ ކަމެއް މިވަގުތަކު ނެތް.” އޭނާ ކުޑަކޮށް މަޑުޖެހިލިއެވެ. “އެކަމަކު އަދިވެސް އިތުރު ޓެސްޓުތަކެއް ހަދަން އަޅުގަނޑު ބޭނުން. ޚާއްސަކޮށް ލޭގެ ޓެސްޓުތައް. އެކަމަށްޓަކައި ހޮސްޕިޓަލަށް ވަޑައިގަންނަވަން ޖެހޭނެ.”
އެއަށްފަހު އުފެދުނީ ބަރު ހަމަހިމޭންކަމެކެވެ. ޒިމާން އޭނާގެ ނަޒަރު ކިޔާރާގެ މޫނުން ދުރަކަށް ނުގެންދެއެވެ. “ނޫން.” ޒިމާންގެ ޖަވާބު ކުރުވެފައި ސާބިތެވެ.
ކިޔާރާ ހައިރާންވިއެވެ. “ކީކޭތޯ؟”
“އަހަރެން ހޮސްޕިޓަލަކަށް ނުދާނަން.” ޒިމާން ބުންޏެވެ. އޭނާގެ ރާގުގައި އެއްވެސް ޖެހިލުންވުމެއް ނެތެވެ.
“މި ޓެސްޓުތަކަކީ ވަރަށް މުހިންމު ޓެސްޓުތަކެއް.” ކިޔާރާ ވިސްނައިދޭން މަސައްކަތްކުރިއެވެ. “މިކަންކަމަށް އިހުމާލުވެވިގެން ނުވާނެ.”
“އަހަރެން ބޭނުމީ އެކަން މިތަނުގައި ކުރަން.” ޒިމާން ބުންޏެވެ. އެއީ އަމުރެއް ނޫނެވެ. ނަމަވެސް އެއީ ބަދަލުނުކުރެވޭނެ ނިންމުމެކެވެ. “ތިބޭފުޅާއަށް އަނެއްކާވެސް މިތަނަށް އާދެވިދާނެ. އަހަރެން ޑޮކްޓަރ މަހްމޫދުއާ ވާހަކަދައްކާނަން.”
ކިޔާރާއަށް ކުއްލިއަކަށް ކަމެއް ވިސްނުނެވެ. މިއީ ހަމައެކަނި ފަސޭހައަކަށް ނުވަތަ ބޭނުންވާ ގޮތަކަށް ކުރާ ކަމެއް ނޫނެވެ. މިއީ ކޮންޓްރޯލް ކުރުމެވެ. އަދި މިއަށްވުރެ މާ ޒާތީ ކަމެކެވެ.
“ހޮސްޕިޓަލަށް ނުގޮސް އަބަދަކު ނުހުރެވޭނެ.” ކިޔާރާ މަޑުމަޑުން ބުންޏެވެ. ނަމަވެސް އޭނާ ބޭނުންވި ވަރުގެ ސާބިތުކަމެއް އެ އަޑަކު ނެތެވެ.
“އަހަންނަށް ހުރެވޭނެ.” ޒިމާން ޖަވާބު ދިނެވެ. އަދި ކުޑަ ވަގުތުކޮޅަކަށް މަޑުޖެހިލުމަށްފަހު ބުންޏެވެ. “އަހަރެން ބޭނުންވަނީ މިގޮތް.”
އެ ބަސްތައް މަޑުވި ނަމަވެސް، އޭގައި ބޮޑު މާނައަކާއި މަޤުސަދެއް އެކުލެވިގެންވިއެވެ. ކިޔާރާ ޒިމާންގެ މޫނަށް ބަލާލިއެވެ. އޭނާ އެ ބަލަނީ ޖަވާބެއް ހޯދާކަށް ނޫނެވެ. ނަމަވެސް ހަޤީޤަތް ދެނެގަންނާށެވެ. އެ ވަގުތު އޭނާއަށް އެކަން ވިސްނުނެވެ. މުޅިއަކުން ނޫނެވެ. އެކަމަކު ފުދޭވަރަކަށެވެ. މި ހުރިހާ އިންތިޒާމަކާއި، މި ބާރުއެޅުމަކީ ބޭސްވެރިކަމާ ގުޅުންހުރި ކަމެއް ނޫންކަން އޭނާއަށް އެނގުނެވެ. މީގެ އަސްލަކީ ހަމަ އޭނާއެވެ.
ނޯޓުތައް ލިޔެ ނިންމާލުމަށްފަހު، ކިޔާރާ މަޑުޖެހިލިއެވެ. އޭނާގެ އިނގިލިތައް ފައިލުގެ އަރިމަތީގައި މަޑުމަޑުން ޖައްސާލައިގެން ހުރީ، އަމިއްލަ ނަފުސު ހަމައަކަށް އަޅުވައި، ކަންކަމާ ކުރިމަތިލެވޭ ފަދަ ޤާބިލު މީހެއްގެ ގޮތުގައި ދެމިހުރުމަށް ހިތްވަރު ހޯދުމަށެވެ. އެއީ އޭނާ ޒިމާންއާ ގާތުގައި ހުންނަ ކޮންމެ ފަހަރަކު ހިތުގައި އުފެދޭ ބާރުގަދަ ޖަޒުބާތުތަކުން ސަލާމަތްވުމަށްޓަކައެވެ. އޭނާ ފުން ނޭވާއެއް ދޫކޮށްލުމަށްފަހު، ވިސްނުންތައް ތަރުތީބުކޮށް، ރައްކާތެރިކަމުގެ އިޙުސާސެއްގެ ތެރެއަށް ރުޖޫޢަވިއެވެ.
ބަލަންޖެހޭ ކަންކަން ބަލައި ނިމިއްޖެއެވެ. ހުރިހާ ކަމެއްވެސް ދިޔައީ ރޭވިފައިވާ ގޮތަށެވެ. އެހެންނަމަވެސް.. ހުރިހާ ކަމެއްވެސް ހީވަނީ އާދަޔާ ޚިލާފު ކަމެއްހެންނެވެ.
އޭނާ މަޑުމަޑުން ފައިލު ލައްޕާލުމަށްފަހު، ވަރަށް މަޑުމައިތިރި އަޑަކުން، އިތުރަށް ހަދަންޖެހޭ ޓެސްޓުތަކާ ބެހޭގޮތުން ވާހަކަދެއްކިއެވެ. އޭނާގެ އިރުޝާދުތަކަށް ޒިމާން ދޭނެ ޖަވާބު ކުރިންވެސް ކިޔާރާއަށް އެނގެއެވެ. ޒިމާންގެ އެ މަޑުމައިތިރި އިންކާރުކުރުމާއި، އޭނާގެ އަޑުގައިވާ ޔަގީންކަމާއި، އަދި ކިޔާރާ އެނބުރި އައުމަށް އެދޭ އެދުން އެތަނުގައި ހަރުލާފައި ހުއްޓެވެ.
ކިޔާރާއަށް އެކަމާ އިތުރަށް ބަހުސްކުރާކަށް ނުކެރުނެވެ. އޭނާ އެތަނުން ދިއުމަށް ހުއްދައަށް އެދެން އުޅެނިކޮށް، އޮމާން ތަޅުންގަނޑުމަތީގައި ފުރޮޅުލީ އެއްޗެއް ދުއްވާލި އަޑަށް އެ ހިމޭންކަން މެދުކެނޑުނެވެ. ކިޔާރާއާއި ޒިމާންވެސް އެދިމާލަށް އެނބުރި ބަލާލިއެވެ.
އެތަނަށް ވަދެގެން އައީ ފާތިމާއެވެ. އޭނާގެ ހަރަކާތްތަކުގައިވާ ފުރިހަމަކަމާއި ކެތްތެރިކަމުން، އެވަގުތު އުފެދިފައިވާ ނުތަނަވަސްކަން ފިލައިދިޔަ ފަދައެވެ. އޭނާ އައީ ވަރަށް ފުރިހަމައަށް ތައްޔާރުކޮށްފައިވާ ސައި ޓްރޭއެއް ހިފައިގެންނެވެ. އޭގައި ހުރި ތަށިތަކުގެ އަޑު މަޑުމަޑުން އިވެމުންދިޔައެވެ.
ސައިގެ މީރުވަސް ކިޔާރާއަށް ދުވިއެވެ. ކަޅު ސަޔާއެކު ކުޑަ ހުވަނދުމާ ވަހެއް އެކުލެވިފައިވާ އެ ސަޔަކީ ހިތަށް ހަމަޖެހުން ގެނެސްދޭނެ ފަދަ ވަހެކެވެ. އޭގެ އިތުރުން، ވަރަށް ފަރުވާތެރިކަމާއެކު ތައްޔާރުކޮށްފައިވާ ހެދިކާ ހުއްޓެވެ. ރީތި ރަންކުލައިގެ ބަޖިޔާއާއި، ކުދިކުދި ގުޅަ އަދި މީރުވަސްދުވާ ކަޓްލެޓްސް, މަސްރޮށި އަދި ބޮނޑިބަތެވެ. އެއީ ސާދާ ނަމަވެސް، ވަރަށް ބޮޑު އިޙުތިރާމަކާއެކު ތައްޔާރުކޮށްފައިވާ ހެދިކާތަކެކެވެ.
“ސައި ބޯނަންތަ؟” ފާތިމާ މަޑުމައިތިރިކަމާއެކު އަހާލިއެވެ. އޭނާ ބަލާލި ގޮތުން ކޮންމެވެސް ކަމެއް ދެނެގަނެވުނު ފަދައެވެ.
ކިޔާރާ ވަގުތުން ބޯހޫރާލިއެވެ. އޭނާ ބޭނުންވީ އެތަނުން އަވަހަށް ދާށެވެ. “އޯހް ނޫން. އަޅުގަނޑު މިއުޅެނީ..”
“ސައި ބޯނީ ބަގީޗާގައި.” ފާތިމާ ވަރަށް ޔަގީންކަމާއެކު ބުންޏެވެ. އޭނާ އެކަން ނިންމައިފިކަން އެނގެއެވެ.
ކިޔާރާ ހައިރާންވެފައި ބަލަހައްޓައިގެން ހުއްޓެވެ. “ނޫން، އަސްލުވެސް އަޅުގަނޑު..”
“މިހާރު ހުރީ ތައްޔާރުކޮށްފައި.” ފާތިމާ ހިނިތުންވުމަކާއެކު ބުންޏެވެ. އެ ހިނިތުންވުމުގައި “ނޫނެކޭ” ބުނުމުގެ ފުރުސަތެއް ނެތެވެ.
އޭނާގެ އަޑުގައިވާ އޯގާތެރިކަމާއި ސާބިތުކަމުގެ ސަބަބުން ކިޔާރާ މަޑުޖެހުނެވެ. އެ މަޑުޖެހުމުގެ ތެރޭގައި އޭނާގެ ނިންމުން ބަދަލުވެއްޖެއެވެ. އިރުކޮޅެއް ފަހުން، އޭނާ އެމީހުންގެ ފަހަތުން ބޭރަށް ނުކުތެވެ. އޭނާގެ ހިތުގައި ސުވާލު އުފެދުނީ، ދާން ބޭނުންވެފައި ހުރި މީހަކު މިހާ ފަސޭހައިން އެއްބަސްވީ ކިހިނެއްބާއެވެ؟
ކިޔާރާގެ ކުރިމަތިން ފެންނަން އޮތީ ބޮޑު، ހިމޭން ބަގީޗާއެކެވެ. އެތަނުން ފެންނަނީ ނޫކުލައިގެ ފުން ކަނޑެވެ. ކަނޑުގެ ރާޅުތަކުގެ އަޑު އިވެމުންދިޔައީ ހިތަށް ފިނިކަން ގެނެސްދޭފަދަ ރާގަކަށެވެ. ހަވީރުގެ ރަންއަލި ގަސްތަކަށާއި މޭޒުމައްޗަށް އެޅިފައިވާއިރު މުޅި މާހައުލު ފެންނަނީ ވަރަށް ހިތްގައިމުކޮށެވެ.
ޖެހެމުންދިޔަ މަޑު ފިނި ރޯޅިތަކުން ކިޔާރާއަށް ހިތްހަމަޖެހުން ލިބުނެވެ. އޭނާގެ ކޮނޑުމަތިން ބުރަކަން ކެނޑި، ހަށިގަނޑު ހަމައަކަށް އެޅުނެވެ. އެވަގުތު އޭނާ އަމިއްލަ ނަފުސުގެ މަތިން ހަނދާންނެތުނު ފަދައެވެ. ކިޔާރާ ދެލޯ މަރާލިއެވެ. އަދި އެ މާހައުލުގެ ސާފުވައިގެ ތެރެއަށް ނޭވާލައި، ހިތްހަމަޖެހުން އިޙުސާސް ކުރިއެވެ. އެ ގެއަށް ވަނީއްސުރެ އޭނާގެ ހިތުގައި އުފެދިފައިވާ ނުތަނަވަސްކަން އެކަމުގެ ސަބަބުން ފިލައިދިޔައެވެ.
ދެން އޭނާ ލޯ ހުޅުވާލިއިރު، ޒިމާން އިނީ އޭނާއާ ދިމާލަށް ބަލަހައްޓައިގެންނެވެ. ޒިމާން އިނީ ވަރަށް ހަމަޖެހިލައިގެން ކަމަށްވިޔަސް، އޭނާގެ ބެލުމުގައި ވަނީ ސީދާކަމެވެ. އެ ބެލުމުގެ ސަބަބުން ކިޔާރާއަށް އަނެއްކާވެސް އޭނާގެ އަމިއްލަ ނަފުސާމެދު ވިސްނާލެވުނެވެ. އޭނާ ލޯ މަރާލައިގެން ހުރި ގޮތާއި، އެވަގުތު އޭނާ ފެންނާނެ ގޮތާމެދު ވިސްނާލެވުމުން ލަދުގަތެވެ. އޭނާ އަވަހަށް ދުރު ބަލާލިއެވެ.
ފާތިމާ ހިމޭންކަމާއެކު ސައި އަޅައިދިނެވެ. އޭނާ ކިޔާރާއާއި ޒިމާންގެ ކުރިމަތީގައި ސައިތަށި ބެހެއްޓުމަށްފަހު، އެމީހުންނަށް ފުރުސަތު ދިނުމުގެ ގޮތުން ކުޑަކޮށް ދުރަށް ޖެހިލިއެވެ. އެންޒޯވެސް ބަގީޗާގެ އެއްފަރާތެއްގައި ހުއްޓެވެ. އޭނާގެ ބެލުންތައް ހުރީ ވަރަށް ފަރުވާތެރިކަމާއެކު މުޅި މާހައުލަށް ހުއްޓިފައެވެ.
ކިޔާރާ ސައި ތަށީގައި އަތްލިއެވެ. ތަށީގެ ހޫނުކަމުން އޭނާގެ ހިތް ހަމައަކަށް އެޅޭތޯ މަސައްކަތް ކުރިއެވެ. ސައިގެ މީރު ވަހުން ހިތް މަޑުޖެހޭތޯ ބެލިއެވެ. ނަމަވެސް އެކަން އެއްކޮށް ކާމިޔާބެއް ނުވިއެވެ. އެއީ އަދިވެސް ޒިމާންގެ ބެލުންތައް އޭނާއަށް އިޙުސާސް ކުރެވޭތީއެވެ.
ކިޔާރާ މަޑުމަޑުން އިސްއުފުލާލައި، ޒިމާންގެ ލޮލަށް ބަލާލިއެވެ. އެމީހުންގެ މެދުގައި އޮތީ ބަޔާންކުރަން ނޭނގޭ ފަދަ ހިމޭންކަމެކެވެ. އެއީ ފޫހި ހިމޭންކަމެއް ނޫނެވެ. އެއީ އަދި ބުނެދެވިފައިނުވާ ގިނަ ވާހަކަތަކަކުން ފުރިގެންވާ ހިމޭންކަމެކެވެ.
ޒިމާން ގޮނޑީގައި ލެނގިލިއެވެ. އޭނާ ސައިތަށީގައި ހިފަހައްޓައިގެން އިން ނަމަވެސް ސައިފޮދެއް ނުބޮއެވެ. އޭނާގެ ބެލުން ހުރީ ސީދާ ކިޔާރާއަށެވެ.
“އަހަރެން ސުވާލެއް ކޮށްލަންތަ؟” އެންމެ ފަހުން ޒިމާން ބުންޏެވެ. އޭނާގެ އަޑުގައިވަނީ ސާބިތުކަމެވެ.
ކިޔާރާ ސައި ތަށީގައި ބާރަށް ހިފަހައްޓާލިއެވެ. އޭނާގެ ހިތުގެ ތެޅުމަށް ބަދަލު އައެވެ. އޭނާއަށް ނޭނގުނަސް، އެވަގުތު އޭނާއަށް އިޙުސާސް ކުރެވުނީ ޒިމާން ކުރަން އެއުޅޭ ސުވާލުން ކޮންމެވެސް ކަމެއް ބަދަލުވާނެ ކަމެވެ. އެކަމަށް އޭނާ ތައްޔާރު ނޫން ކަމަށް ވިޔަސްމެއެވެ.
(ނުނިމޭ)
