އިސްތަށިގަނޑު ތުނިވާކަން ފާހަގަކުރެވޭނަމަ، ތިޔައީ އެކަނި މިކަން ތަހައްމަލުކުރާ މީހެއް ނޫނެވެ. ތަފާސްހިސާބުތަކުން ދައްކާގޮތުގައި 50 އަހަރުން މަތީގެ ކޮންމެ ފަސް އަންހެނަކުން ދެމީހަކީ އިސްތަށި ފޭބުމުގެ މައްސަލަ ކުރިމަތިވާ މީހުންނެވެ. އިސްތަށިގަނޑު ގުދުރަތީ ގޮތުން ވަރުގަދަކޮށް، ބޯކޮށް ދެއްކުމަށްޓަކައި އިސްތަށިގަނޑުގެ މާހިރުން ދޭ ބައެއް މުހިންމު އިރުޝާދުތައް ތިރީގައި އެވަނީއެވެ.
އިސްތަށިގަނޑު ތުނިވުމަށް މެދުވެރިވާ ގިނަ ސަބަބުތަކެއް ހުރެއެވެ. އޭގެ ތެރޭގައި ޖެނެޓިކްސް، އުމުރު، ހޯރމޯނަށް އަންނަ ބަދަލުތައް، ދިރިއުޅުމުގެ އާދަކާދަ، ޞިއްޙީ މައްސަލަތައް، ނަފްސާނީ ފިއްތުންތައް ނުވަތަ އިސްތަށިގަނޑަށް ދޭންޖެހޭ ފަރުވާ ރަނގަޅު ގޮތުގައި ނުދެވުން ހިމެނެއެވެ. އެންމެ ފުރަތަމަ ކުރަންޖެހޭ ކަމަކީ އިސްތަށި ފައިބާ ސަބަބު ދެނެގަތުމެވެ. މީގެ އިތުރުން، އިސްތަށިގަނޑު ތުނިވަނީ އާއިލީ ގޮތުން ވާރުތަވާ ކަމެއްގެ ސަބަބުންތޯ ނުވަތަ ބައްޔެއްގެ ސަބަބުންތޯ ބެލުން މުހިންމެވެ.
1. އިސްތަށިގަނޑު ބޯކޮށްދޭ ޝޭމްޕޫއާއި ކޮންޑިޝަނަރ ބޭނުންކުރުން
އިސްތަށިގަނޑު ބޯކޮށް ދެއްކުމަށްޓަކައި “ވޮލިއުމައިޒިންގ” ނުވަތަ “ތިކެނިންގ” ޝޭމްޕޫއާއި ކޮންޑިޝަނަރ ބޭނުންކުރުން މުހިންމެވެ. މިފަދަ އުފެއްދުންތަކުގައި އިސްތަށިގަނޑު ބަރުކޮށްލާ މާއްދާތައް މަދުވުމުން، އިސްތަށިގަނޑު ފުފިފައި ހުންނަ ގޮތް މެދުވެރިކޮށްދެއެވެ.
2. ބޮލުގެ ނާށިގަނޑާއި އިސްތަށިގަނޑުގެ ދުޅަހެޔޮކަން ދެމެހެއްޓުން
އިސްތަށިގަނޑަށް ގެއްލުންދޭ ކަންކަމުން ދުރުހެލިވުމަކީ ކޮންމެހެން ކުރަންޖެހޭ ކަމެކެވެ. މީގެ ތެރޭގައި މާ ގިނައިން ހޫނުކޮށްގެން އިސްތަށިގަނޑު ސްޓައިލްކުރުން މަދުކުރުމާއި، ކޮންޑިޝަނަރ މާ ގިނައިން ބޭނުންނުކުރުން ހިމެނެއެވެ. އަދި އިސްތަށިގަނޑު މާ ބާރަށް އައްސާފައި ބެހެއްޓުމުގެ ބަދަލުގައި، އިސްތަށިތައް ބިނދުމުން ސަލާމަތްކުރުމަށް ސަމާލުކަން ދޭންވާނެއެވެ.
3. ކާނާގެ ތެރެއިން އިސްތަށިގަނޑަށް ފައިދާހުރި މާއްދާތައް ހޯދުން
އިސްތަށިގަނޑު ވަރުގަދަކުރުމަށްޓަކައި ޕްރޮޓީން، އޮމެގާ-3 ފެޓީ އެސިޑްސް، ވިޓަމިން ބީ، އަދި ދަގަނޑުގެ ބައި އެކުލެވޭ ކާނާ ބޭނުންކުރުން މުހިންމެވެ. އިސްތަށިގަނޑުގެ ދުޅަހެޔޮކަމަށްޓަކައި ސަލްމަން މަސް، ބިސް، ޕީނަޓްސް (ބަދަން)، ސްޕިނިޗް އަދި އެވަކާޑޯ ފަދަ ތަކެތި ކެއުމުގައި ހިމެނުން ރަނގަޅެވެ.
4. އިސްތަށިގަނޑު ބޯކޮށްދޭ އުފެއްދުންތައް ބޭނުންކުރުން
އިސްތަށިގަނޑު ވަގުތުން ބޯކޮށް ދެއްކުމަށްޓަކައި ލީވް-އިން ސްޕްރޭ، މޫސް، ނުވަތަ ޑްރައި ޝޭމްޕޫ ބޭނުންކުރެވިދާނެއެވެ. މިފަދަ ތަކެތީގެ ސަބަބުން އިސްތަށިތައް އެކަތި އަނެކައްޗާ ވަކިވެ، ބޯކޮށް ދެއްކުމަށް އެހީތެރިވެދެއެވެ.
5. ކުލަޖެއްސުމުގެ އެހީގައި ބޯކޮށް ދެއްކުން
އިސްތަށިގަނޑުގައި ހައިލައިޓްސް ޖެއްސުމުން، އިސްތަށިގަނޑުގެ ފުންމިން ފެންނަގޮތްވެ، އިސްތަށިގަނޑު ބޯކޮށް ދައްކުވައިދެއެވެ. އަދި ބޮލުގެ ނާށިގަނޑު ހާމައަށް ފެންނަ ތަންތަން ފޮރުވުމަށް އިސްތަށިގަނޑުގެ ކުލައާ ގުޅޭ “ޕައުޑަރ ރޫޓް ޓަޗް-އަޕް” ބޭނުންކުރެވިދާނެއެވެ.
6. އެކަށޭނަ ގޮތަކަށް އިސްތަށިގަނޑު ބުރިކުރުން
އިސްތަށިގަނޑު މާ ބޮޑަށް ދިގުވުމަކީ ބައެއް ފަހަރު އިސްތަށިގަނޑު ތުނިކޮށް ދައްކާ ކަމެކެވެ. އެހެންކަމުން، ކުރުކޮށް ނުވަތަ މެދު މިންވަރަކަށް ބުރިކުރުމުން (މިސާލަކަށް ބޮބް ކަޓް) އިސްތަށިގަނޑު ބޯކޮށް ދައްކައިދެއެވެ.
7. ޑަރމަޓޮލޮޖިސްޓެއްގެ ލަފާ ހޯދުން
އިސްތަށި ފޭބުމުގެ މައްސަލަ ބޮޑުނަމަ، ހަންގަނޑާއި އިސްތަށިގަނޑުގެ ޚާއްޞަ ޑޮކްޓަރަކަށް ދެއްކުން މުހިންމެވެ. ބައެއް ފަހަރު ބޭސް ބޭނުންކޮށްގެން ނުވަތަ ޕީ.އާރް.ޕީ ފަދަ ޒަމާނީ ފަރުވާތަކުން އިސްތަށިގަނޑު އަލުން ބޯކުރެވިދާނެއެވެ.
ނަތީޖާ ފެންނަން ކިހާ ދުވަހެއް ނަގާނެ؟
އިސްތަށިގަނޑު ބޯކުރުމަށް ކުރާ މަސައްކަތުގެ ނަތީޖާ ފެންނަން ފަށާނީ ގާތްގަނޑަކަށް ތިން މަސް ދުވަހުގެ ތެރޭގައެވެ. އެންމެ ފުރިހަމަ ނަތީޖާއެއް ފެންނަން 18 މަހާއި 24 މަހާ ދެމެދުގެ މުއްދަތެއް ނަގާފާނެއެވެ. މީގައި އެންމެ މުހިންމީ ކެތްތެރިކަމާއެކު ގަވާއިދުން ފަރުވާ ކުރިއަށް ގެންދިއުމެވެ.
