“ޔޭ ރިޝްތާ ކިޔާ ކެހްލާތާ ހޭ” ގެ އެކްޓަރު މުހްސިން ޚާން، ތަމަންނާއާ އެކު ކުރިއަށްދިޔަ ކައިވެނީގެ އުފާވެރި ހަފުލާއެއްގެ މަންޒަރެއް ހިއްސާކުރުމާ ގުޅިގެން، އޭނާ ކައިވެނިކުރިކަމުގެ އަޑުތައް ވަނީ ގަދަވެފައެވެ. މުހްސިން، ތަމަންނާއާ އެކު ނަގާފައިވާ ފޮޓޯއެއް ހިއްސާކުރަމުން ކެޕްޝަންގައި ލިޔެފައިވަނީ “މިއީ އެ ދުވަސް، މާޝާﷲ” އެވެ.
މި ފޮޓޯއިން ފެންނަ ގޮތުގައި މުހްސިން ހުރީ ކަޅާއި ހުދު ކުލައިގެ ސޫޓެއްގައެވެ. އަދި ތަމަންނާ ފެންނަނީ ސަގާފީ ހެދުމެއްގައި ވަރަށް ފުރިހަމަކޮށެވެ. ދެމީހުން އެކުގައި ފޮޓޯއަށް ހުއްޓިލައިގެން ތިބިއިރު، އެމީހުންގެ ހަޔާތުގެ މި ޚާއްސަ ދުވަސް ވަރަށް ބޮޑަށް އުފާވެރިކަމާއެކު ފާހަގަކުރަމުންދާކަން ހާމަވެއެވެ.
މުހްސިން މި ފޮޓޯ ހިއްސާކުރިތާ މާގިނަ އިރުތަކެއް ނުވެ، އެ ހަފުލާގެ އެކި މަންޒަރުތައް ފެންނަ ވީޑިއޯތައް ސޯޝަލް މީޑިއާގައި ވަނީ އާންމުވާން ފަށާފައެވެ. މި ވީޑިއޯތަކުން ފެންނަ ގޮތުގައި މުހްސިން އާއި ތަމަންނާ އެމީހުންގެ ގާތްތިމާގެ މީހުންނާއި ރައްޓެހިންނާއެކު ނަށައި، ވަރަށް އުފާވެރި ވަގުތުތަކެއް ހޭދަކުރަމުންދެއެވެ. މި މަންޒަރުތަކަށް ގިނަ ބައެއްގެ ސަމާލުކަން ހުއްޓިފައިވާއިރު، ފޭނުން ދަނީ އެ ދެމަފިރިންނަށް މަރުހަބާގެ މެސެޖުތައް ފޮނުވަމުންނެވެ.
މުހްސިން އާއި ތަމަންނާ އެންގޭޖްވީ މިއަހަރުގެ އޮގަސްޓް މަހުގެ ތެރޭގައެވެ. އެންގޭޖްމަންޓްގެ ފޮޓޯތައް ހިއްސާކުރަމުން މުހްސިން ވަނީ ތަމަންނާއަކީ އޭނާގެ “ހަޔާތުގެ ބައިވެރިޔާ” ކަމަށް ބުނެ އަސަރުގަދަ ލިޔުމެއް އޭރު އާންމުކޮށްފައެވެ.
އޭނާ ލިޔެފައިވަނީ، “އެންމެ ފުރަތަމަ އެކަކު އަނެކަކަށް ބަލައިލި ވަގުތުން ފެށިގެން، އަދި އެންމެ ފުރަތަމަ އަތުގައި ހިފާލި ވަގުތުން ފެށިގެން، ހަމް ތޯ ބާއި ޖޭސޭ ހޭ ވޭސޭ ރަހޭންގޭ މި ލަވަ ތަމަންނާ ކިޔައިދިން ވަގުތާ ހަމައަށް، އަހަރެންގެ ހިތަށް ބޮޑު ހަމަޖެހުމެއް ލިބުނެވެ. އަހަރެންގެ ހަޔާތުގެ އަސްލު ބައިވެރިޔާ މިވަނީ ފެނިފައެވެ.”
މުހްސިން އެންމެ ބޮޑަށް މަޤުބޫލުވެގެން ދިޔައީ “ޔޭ ރިޝްތާ ކިޔާ ކެހްލާތާ ހޭ” ގައި ކާތިކް ގޮއެންކާގެ ރޯލުންނެވެ. މި ޑްރާމާގައި ޝިވާންގީ ޖޯޝީއާއެކު އޭނާ ދެއްކި ފުރިހަމަ އެކްޓިންއަށް ގިނަ ބައެއްގެ ލޯބި ވަނީ ލިބިފައެވެ.
