ދެކުނު ކެރޮލައިނާގެ ނޯތު ޗާލްސްޓަން ހައި ސްކޫލުގެ ޕްރިންސިޕަލް ހެންރީ ޑާބީއަށް، އެ ސަރަހައްދުގެ އާއިލާތަކަށް ކާބޯތަކެއްޗާއި، ނުދެއްކި ހުރި ބިލްތަކާއި، ކުއްޔާއި އަދި ދިރިއުޅުމުގެ ޒަރޫރީ ބޭނުންތައް ފުއްދުމުގައި ބޮޑެތި ގޮންޖެހުންތަކާ ކުރިމަތިލާންޖެހިފައިވާ މަންޒަރު ފެނުނެވެ.

އެހެންކަމުން، އޭނާ އާދަޔާ ހިލާފު ނިންމުމެއް ނިންމިއެވެ.

ސްކޫލުގެ މަސައްކަތް ނިންމުމަށްފަހު، ރޭގަނޑު ގާތްގަނޑަކަށް 10 ޖަހާއިރު އޭނާ ވޯލްމާޓްގައި ވަޒީފާއަށް ނުކުމެއެވެ. އަދި ބައެއް ރޭރޭ ހެނދުނު 7 ޖަހަންދެން އޭނާ އެތަނުގައި ހަރުގަނޑުތަކަށް މުދާ އެރުވުމުގެ މަސައްކަތުގައި ރޭގަނޑުގެ ވަގުތުތައް ހޭދަކުރެއެވެ.

އެއަށްފަހު، އޭނާ އަލުން ސްކޫލަށް ގޮސް ޕްރިންސިޕަލެއްގެ ހައިސިއްޔަތުން އޭނާގެ ދުވާލުގެ މަސައްކަތް ފަށައެވެ.

ނަމަވެސް، އޭނާ އެ ބުރަ މަސައްކަތް ކުރީ އަމިއްލަ ފައިދާއަކަށް ނޫނެވެ.

ވޯލްމާޓުން މުސާރައިގެ ގޮތުގައި ލިބޭ ހުރިހާ ފައިސާއެއް އޭނާ ހަދިޔާ ކުރީ އޭނާގެ ދަރިވަރުންނާއި އެ ދަރިވަރުންގެ އާއިލާތަކަށެވެ.

އެ ފައިސާ ބޭނުންކުރީ ކާބޯތަކެއްޗާއި، ކުއްޔާއި، ފެނާއި ކަރަންޓު ބިލްތަކުގެ އިތުރުން ދިރިއުޅުމުގެ އެހެނިހެން މުހިންމު ބޭނުންތައް ފުއްދުމަށެވެ.

ޚަބަރުތައް ބުނާގޮތުން، ބައެއް ދުވަސްދުވަހު އޭނާ ނިދަނީ މަދު ގަޑިއިރުކޮޅަކަށެވެ.

އޭނާ ކުރަމުންދިޔަ މި އޯގާތެރި އަމަލުގެ ވާހަކަ އާންމުންނަށް އެނގުމާއެކު، އެ ވާހަކަ މުޅި ދުނިޔެއަށް މަޝްހޫރުވެގެން ދިޔައެވެ.

އޭނާ މި ވަޒީފާ އަދާކުރާ ސަބަބު އެނގުމުން، ވޯލްމާޓްގެ ފަރާތުން އޭނާގެ ސްކޫލަށް 50,000 ޑޮލަރުގެ އެހީއެއް ފޯރުކޮށްދިނެވެ.

އޭނާއަކީ ދުވާލުގެ ވަގުތުތަކުގައި ދަރިވަރުންގެ މުސްތަގުބަލު ބިނާކުރުމަށް އެހީތެރިވަމުންދިޔަ މީހެކެވެ.

އަދި އެކުދިންގެ މިއަދުގެ ދިރިއުޅުން ކަށަވަރުކޮށްދިނުމަށްޓަކައި އޭނާގެ މުޅި ރޭގަނޑު ގުރުބާން ކުރިއެވެ.

ދަރިވަރުންނަށް އެހީތެރިކަން ފޯރުކޮށްދިނުމަށްޓަކައި ވޯލްމާޓް ފިހާރައެއްގައި އިތުރު ވަޒީފާ އަދާކުރި ދެކުނު ކެރޮލައިނާގެ ސްކޫލްގެ މި ޕްރިންސިޕަލްއަށް އެ ސްޓޭޓުގެ އެންމެ މަތީ މަދަނީ ޝަރަފު އަރުވާފައިވެއެވެ.

ދެކުނު ކެރޮލައިނާ ސްޓޭޓްގެ ގަވަރުނަރު ހެންރީ މެކްމާސްޓަރ ހެންރީ ޑާބީއަށް އެވޯޑް އެރުވުމަށްފަހު ވިދާޅުވީ ނޯތު ޗާލްސްޓަން ހައިސްކޫލުގެ ޕްރިންސިޕަލް ހެންރީ ޑާބީ އަކީ “ނަމޫނާ ޝަޚްސިއްޔަތެއް” ކަމަށެވެ. އަދި ޑާބީ އަކީ ސައުތު ކެރޮލީނާގެ މުޅި ރައްޔިތުން ފަޚުރުވެރިވާ ފަދަ ބޭފުޅެއް ކަމަށްވެސް ގަވަރުނަރު ވިދާޅުވިއެވެ.