📰 ޒިންމާދާރު ގޮތެއްގައި ތަފާތު މީޑިއާ ވަސީލަތްތައް އުފައްދަން ދަސްކުރުމަކީ ސާނަވީ ތަޢުލީމު ހާސިލުކުރާ ދަރިވަރުންނަށް އޭގެ ފައިދާ ކުރާނެ ކަމެއް.

މީޑިއާއަކީ އަދުގެ ދުނިޔޭގައި އާންމުވެފައިވާ އެއްޗަކަށް ވުމުން، ދަރިވަރުންގެ ތަޢުލީމީ ޙަޔާތުގައި އެއީ ވަރަށް މުހިންމު ދައުރެއް އަދާކުރާ އެއްޗެކެވެ. ފުރާވަރުގެ ކުދިން މީޑިއާ ބޭނުންކުރާ މިންވަރު އިތުރުވުމާ ނަފްސާނީ ދުޅަހެޔޮކަން ކުޑަވުމާ ގުޅުމެއްވާކަން ފާހަގަކުރެވިފައިވާއިރު، މީޑިއާގެ މަޢުލޫމާތުތަކާމެދު ފުންކޮށް ވިސްނައި، ހޭލުންތެރިކަމާއެކު އެ ވަސީލަތްތައް ބޭނުންކުރާ ބަޔަކަށް ދަރިވަރުން ހެދުމަކީ ކޮންމެހެން ބޭނުންތެރި ކަމެކެވެ.

ކެލިފޯނިއާގެ ސެން ޖަސިންޓޯ ހައިސްކޫލްގެ މަލްޓިމީޑިއާ މުދައްރިސެއް ކަމަށްވާ ޖެރެމީ މަރްފީ ފާހަގަކުރައްވާ ގޮތުގައި، ދަރިވަރުންނަކީ އަބަދުވެސް ތަފާތު މީޑިއާ ޕްލެޓްފޯމްތަކުން ފޮނުވާ މެސެޖުތަކަށް ހުށަހެޅިފައިވާ ބަޔެކެވެ. އެހެންކަމުން، މީޑިއާގެ އުފެއްދުންތައް ތައްޔާރުކުރުމުގައި ނިންމާ ނިންމުންތަކާއި، އޭގެ މަރުހަލާތަކާއި، އަދި ހިފަހައްޓަންޖެހޭ އަޚްލާޤީ މިންގަނޑުތައް ދަރިވަރުންނަށް ދަސްކޮށްދިނުމަކީ، މީޑިއާގެ މަޢުލޫމާތުތައް ވަކިކޮށް ދެނެގަތުމުގެ ޤާބިލުކަން އެކުދިންގެ ކިބައިގައި އިތުރުކޮށްދޭނެ ކަމެކެވެ.

މީގެ އިތުރުން، އެކުދިންގެ އަމިއްލަ ވާހަކަތައް ހެޔޮ ގޮތުގައި ހާމަކޮށްދޭ ފައިދާހުރި އަދި މާނަވީ މީޑިއާ އުފެއްދުންތައް ތައްޔާރުކުރުމުގެ ފުރުސަތު ދަރިވަރުންނަށް ދޭންޖެހެއެވެ. ހަމައެކަނި ފިލާވަޅުތަކުގެ ގޮތުގައި މީޑިއާ ބޭނުންކުރުމުގެ ބަދަލުގައި، ސްކޫލްތަކުގައި ދަރިވަރުން އިސްވެ ހަރަކާތްތެރިވާ މީޑިއާ ޕްރޮގްރާމްތައް ހިންގިދާނެއެވެ. މިކަމުގެ ސަބަބުން ދަރިވަރުންގެ ކުރިމަގަށް ބޭނުންވާނެ ޢަމަލީ ހުނަރުތައް ލިބުމުގެ އިތުރުން، ފުންކޮށް ވިސްނުމުގެ ހުނަރާއި މީޑިއާގެ ނުފޫޒުތަކުން ރައްކާތެރިވުމުގެ ޤާބިލުކަން މިއަދު އަށަގަންނުވައިދޭނެއެވެ.

ދަރިވަރުން އިސްވެ ހިންގާ މީޑިއާގެ މުހިންމުކަން
ނިއުޔޯކްގެ ސައުތުހޯލްޑް އެންޑް ގްރީންޕޯޓް ސްކޫލްސްގެ ކުރީގެ ސުޕްރިންޓެންޑެންޓް ޑޭވިޑް ގޭމްބާގް ވިދާޅުވާ ގޮތުގައި، ޓީވީ ބްރޯޑްކާސްޓިންގް ފަދަ ހަރަކާތްތަކުގެ ސަބަބުން ދަރިވަރުންގެ އަޑު އިއްވުމުގެ ފުރުސަތު ލިބުމުގެ އިތުރުން، ވާހަކަ ކިޔައިދިނުމުގެ ހުނަރާއި، ޑިޖިޓަލް ސިޓިޒަންޝިޕް ނުވަތަ ޑިޖިޓަލް މާހައުލުގައި ޒިންމާދާރުވުމާއި، އަދި އިޖުތިމާޢީ ކަންކަމުގައި ބައިވެރިވުމުގެ ރޫޙު އާލާވެގެންދެއެވެ.

މީޑިއާ ކޯސްތަކުން ދަސްކޮށްދޭ ޙަޤީޤީ ހުނަރުތަކަކީ އެހެން ކުލާސްތަކުން ހޯދައިދެވޭނެ ހުނަރުތަކެއް ނޫނެވެ. އޭގެ އެއް ސަބަބަކީ މީޑިއާއަކީ އަބަދުވެސް އެހެން މީހުންނާ ހިއްސާކުރުމަށް އުފައްދާ އެއްޗަކަށް ވުމެވެ. ތިމާ ކުރާ މަސައްކަތަކީ ގިނަ ބަޔަކަށް ފެންނާނެ އެއްޗެއްކަން އެނގުމުން، އެ މަސައްކަތަކަށް ދަރިވަރުން ބަހައްޓާ ޝައުޤުވެރިކަން އިތުރުވެއެވެ. ހަމައެކަނި މުދައްރިސަށް ދައްކާލާ އެސައިންމަންޓެއްގެ ބަދަލުގައި، މިއީ އާންމުންނަށް ފެންނާނެ އުފެއްދުމެއްކަން އެނގުމުން، ޒިންމާދާރުކަމާއެކު ފެންވަރު ރަނގަޅު މަސައްކަތެއް ކުރުމަށް ދަރިވަރުން ބާރުއަޅާނެއެވެ.

ދަރިވަރުން އިސްވެ ހިންގާ މީޑިއާގެ ސަބަބުން ސްކޫލާއި އިޖުތިމާޢީ މާހައުލާ އޮންނަ ގުޅުން ބަދަހިވެ، ކްލަބް ޖަމްޢިއްޔާތަކާއި ދަރިވަރުންގެ ވާހަކަތައް އާންމުންނާ ހަމައަށް ގެނެސްދެވޭކަން ގޭމްބާގް އަދި މަރްފީ ފާހަގަކުރައްވައެވެ. މީގެ އިތުރުން، ކުޅިވަރު މުބާރާތްތަކާއި އެހެނިހެން ހަރަކާތްތައް ވަގުތުން ދުރަށް ދެއްކުމުގެ ފުރުސަތު ލިބި، އެ ހަރަކާތްތަކަށް ޙާޟިރުނުވެވޭ ފަރާތްތަކަށްވެސް އެކަންކަމުގައި ބައިވެރިވުމުގެ ފުރުސަތު ލިބިގެންދެއެވެ.

ފަށާނީ ކިހިނެއް؟
ކުރިން މީޑިއާ ކޯހެއް ފެށުމަކީ އަގުބޮޑު ކެމެރާތަކާއި ޚާއްޞަ ތަމްރީނު ބޭނުންވާ ކަމެއް ނަމަވެސް، މިއަދު މިކަމަށް ބޭނުންވާ ވަސީލަތްތައް ވަރަށް ފަސޭހައިން ލިބެން އެބަހުއްޓެވެ. އަތުގައި އޮންނަ ފޯނަކުންވެސް މި މަސައްކަތް ފެށިދާނެއެވެ.

މިދާއިރާގެ ތަޖުރިބާކާރު މަރްފީ ވިދާޅުވާ ގޮތުގައި، ފައިސާއަށްވުރެ ބޮޑަށް ބޭނުންވަނީ މިފަދަ ޕްރޮގްރާމެއް ފެށުމަށް ޝައުޤުވެރިވާ ދަރިވަރުންގެ ގުރޫޕެކެވެ. ޚާއްޞަ އިސްކަމެއް ދީގެން މަސައްކަތްކުރާ ކުދިން ތިބިނަމަ، މާ ބޮޑު ޚަރަދަކާ ނުލައިވެސް ފެންވަރު ރަނގަޅު މީޑިއާ ޕްރޮގްރާމެއް ފެށިދާނެއެވެ. ގިނަ ކުދިންގެ އަތުގައި މިހާރުވެސް ފެންވަރު ރަނގަޅު ވީޑިއޯ އަދި އޯޑިއޯ ރެކޯޑު ކުރެވޭނެ ވަސީލަތްތައް އެބަހުއްޓެވެ.

މީޑިއާގެ ދާއިރާގައި މަސައްކަތްކުރާ ބައިނަލްއަޤްވާމީ ޖަމްޢިއްޔާތަކުން މުދައްރިސުންނަށް ބޭނުންވާ އެހީތެރިކަމާއި ތަމްރީނު ފޯރުކޮށްދެއެވެ. މިސާލަކަށް ޕީ.ބީ.އެސް ގެ ‘ސްޓޯރީމޭކަރ’ ފަދަ ވަސީލަތްތަކުން ފިލާވަޅުތަކާއި އިރުޝާދުތައް ލިބެން ހުރެއެވެ. މިފަދަ ވަސީލަތްތަކުގެ އެހީގައި، މުދައްރިސަކީ މީޑިއާގެ ތަޖުރިބާ ނެތް މީހަކަށް ވީނަމަވެސް، މާއްދާތަކުގެ ތެރެއަށް މީޑިއާގެ މަސައްކަތްތައް ލާމެހިގެން ކުރިއަށް ގެންދެވިދާނެއެވެ.

ސްކޫލްގެ ސޯޝަލް މީޑިއާ އެކައުންޓްތަކާއި ޔޫޓިއުބް ފަދަ ހިލޭ ލިބޭ ވަސީލަތްތައް ބޭނުންކޮށްގެން ދަރިވަރުންގެ އުފެއްދުންތައް އާންމުންނާ ހިއްސާކުރެވިދާނެއެވެ. ނަމަވެސް، ދަރިވަރުންނަކީ ޓެކްނޮލޮޖީއަށް އަހުލުވެރި ބަޔަކަށް ވިޔަސް، ޑިޖިޓަލް މާހައުލުގައި ހިފަހައްޓަންޖެހޭ އަޚްލާޤީ އަދި ޤާނޫނީ މިންގަނޑުތަކަށް އެކުދިން ހޭލުންތެރި ނުވެދާނެއެވެ. އެހެންކަމުން، މިކަންކަމަށް ދަރިވަރުން ހޭލުންތެރިކުރުވުމަކީ އެންމެ މުހިންމު ފިޔަވަޅެވެ.

ޙަޤީޤީ މަސައްކަތާއި ފައިދާހުރި ފާޑުކިޔުން
މީޑިއާގެ މަސައްކަތްތަކުން ދަރިވަރުންނަށް ލިބޭ އެންމެ ބޮޑު ކުރިއެރުމަކީ އާންމުންގެ ފަރާތުން ލިބޭ ޚިޔާލާއި ފާޑުކިޔުންތަކެވެ. ޕޮޒިޓިވް ފީޑްބެކް ނުވަތަ ރަނގަޅު ޚިޔާލުތަކުގެ ސަބަބުން ދަރިވަރުންގެ އިތުބާރު ބޮޑުވެ، މަސައްކަތް އިތުރަށް ރަނގަޅުކުރުމަށް ހިތްވަރު ލިބެއެވެ.

އަދި ލިބޭ ފާޑުކިޔުންތަކާމެދު ވިސްނައި، އެއީ ޙަޤީޤަތެއް އޮތް ފާޑުކިޔުމެއްތޯއާއި، އޭގެ ސަބަބުން މަސައްކަތް އިތުރަށް ފުރިހަމަކުރެވޭނީ ކިހިނެއްތޯ ދެނެގަތުމަށް ދަރިވަރުންނަށް ފުރުސަތު ލިބެއެވެ. މިއީ ޢަމަލީ މައިދާނުގައި ކަންކަން ހިނގާ ގޮތް ދަރިވަރުންނަށް ތަޖުރިބާކޮށްދޭ ކަމެކެވެ.

މީގެ އިތުރުން، ތަފާތު މުބާރާތްތަކުގައި ބައިވެރިވެ، ދަރިވަރުންގެ ހުނަރު ދައްކާލުމުގެ ފުރުސަތުވެސް އޮވެއެވެ. މިފަދަ މުބާރާތްތަކުން ދާއިރާގެ ތަޖުރިބާކާރުންގެ ފަރާތުން ލިބޭ އިރުޝާދުތަކަކީ ދަރިވަރުންނަށާއި މުދައްރިސުންނަށް ލިބޭ ވަރަށް ބޮޑު އެހީތެރިކަމެކެވެ.

ޚުލާޞާ
މީޑިއާގެ މަސައްކަތްތައް ދަސްކުރުމަކީ ދިރިއުޅުމުގެ މުހިންމު ހުނަރެކެވެ. މީގެ ސަބަބުން ދަރިވަރުންނަށް ތެދު މަޢުލޫމާތު ދެނެގަތުމާއި، މާނަވީ ގޮތެއްގައި މެސެޖުތައް ފޯރުކޮށްދިނުމާއި، އަދި އާންމުންނާ މުޢާމަލާތްކުރާނެ ގޮތުގެ އަގުހުރި ފިލާވަޅުތަކެއް ލިބިގެންދާނެއެވެ.

ކުރީގެ ސުޕްރިންޓެންޑެންޓް ގޭމްބާގް ވިދާޅުވާ ގޮތުގައި، މީޑިއާ ޕްރޮގްރާމްތަކަކީ ދަރިވަރުންނަށް ޢަމަލީ ގޮތުންނާއި ޙަޤީޤީ މާހައުލެއްގައި ކަންކަން ދަސްކުރުމަށް ލިބޭ ރަނގަޅު ފުރުސަތެކެވެ. މިއީ އެކުދިންގެ ކުރިމަގަށް އޭގެ ނުފޫޒު ފޯރާނެ، އަދި އެކުދިންނަށް މުހިންމު ކަންތައްތަކެއް ކުރުމަށް މަގުފަހިކޮށްދޭ ކަމެކެވެ.

މިއަދު ދަރިވަރުން ތިބީ މީޑިއާގެ ތަފާތު ވަސީލަތްތަކުގެ ތެރޭގައެވެ. އަދި އާޓިފިޝަލް އިންޓެލިޖެންސް (އޭއައި) ގެ ސަބަބުން މި ދާއިރާ އިތުރަށް އޮޅުންބޮޅުންވެ، ދެނެގަންނަން އުނދަގޫވާނެކަމަށް ބެލެވެއެވެ. މިފަދަ ދަނޑިވަޅެއްގައި ދަރިވަރުން އަމިއްލައަށް ގޮތް ހޯދަން ދޫކޮށްލުމުގެ ބަދަލުގައި، މީޑިއާ ބޭނުންކުރާނެ ގޮތާއި އުފައްދާނެ ގޮތުގެ ހުނަރުތައް އެކުދިންނަށް ދަސްކޮށްދޭންޖެހެއެވެ. މީޑިއާގެ މަޢުލޫމާތުތައް ވަކިކޮށް ދެނެގަތުމުގެ ޤާބިލުކަން ދަސްކޮށްދީ، މުޖުތަމަޢާ ގުޅުން ބަދަހިކުރުމަށް އެހީތެރިވެދޭނެ ހެޔޮ މަގުތައް ދައްކައިދޭންޖެހެއެވެ.

ދަރިވަރުންގެ ވާހަކަތަކަށް އިޙްތިރާމްކޮށް، އެކުދިންގެ އަޑު އުފުލުމަށް އެހީތެރިވެދެވިދާނެއެވެ. ހިލޭ ލިބެން ހުރި ގިނަ ވަސީލަތްތަކާއި އެހީތެރިކަން ފޯރުކޮށްދޭނެ ނިޒާމުތައް ހުރިއިރު، ސްކޫލްތަކުގައި މީޑިއާގެ މަސައްކަތްތައް ފެށުމަށް މިއީ އެންމެ އެކަށީގެންވާ ވަގުތެވެ.

ރާއްޖޭގެ ސްކޫލުތަކުގައި މިހާރުވެސް މީޑިއާ ކްލަބް، ޖާނަލިސްޓް އެސޯސިއޭޝަން ފަދަ ބޮޑީތައް ހުރެއެވެ. ނަމަވެސް ގިނަ ފަހަރަށް މި ތަންތަނަކީ ނަމެއްގައި ހުންނަ ތަންތަނެވެ. އެހެންކަމުން މިފަދަ ބޮޑީތައް ރަނގަޅަށް ހަރަކާތްތެރިކުރުމަށް ދަރިވަރުން ތަމްރީނުކޮށް، ދަރިވަރުން ހިންގާ ދަރިވަރުންގެ މީޑިއާ ޕްރޮގްރާމުތަކެއް ކުރިއަށް ގެންދިއުމަކީ ސްކޫލުތަކުން ސީރިއަސްކޮށް ވިސްނަން ވެއްޖެ ކަމެއް ކަމަށް ފެނެއެވެ.