1989 ވަނަ އަހަރު ބެއިޖިންގްގެ ތިއަނަންމަން މައިދާނުގައި ކުރި މުޒާހަރާތަކުގެ ތެރެއިން، ޖެފް ވައިޑްނަރ ނަގާފައިވާ މަޝްހޫރު “ޓޭންކް މޭން” ފޮޓޯއަކީ ނުހަނު ފުން މާނައެއް އެކުލެވޭ، ތާރީޚީ ގޮތުން މުހިންމު ފޮޓޯއެކެވެ. މި ފޮޓޯއިން ރަމްޒުކޮށްދެނީ އަނިޔާވެރިކަމާއި ފިއްތުންތަކާ ދެކޮޅަށް ފަރުދަކު ދައްކުވައިދިން ގުޑުމެއްނެތް ސާބިތުކަމާއި ހިތްވަރެވެ.
މި ފޮޓޯގެ ފަހަތުގައިވާ ހާދިސާ:
1989 ވަނަ އަހަރު ބެއިޖިންގްގެ ތިއަނަންމަން މައިދާނުގައި ކުރި މުޒާހަރާތަކުގެ ތެރެއިން / ފޮޓޯ: ޖެފް ވައިޑްނަރ
މި އަސަރުގަދަ ފޮޓޯ ނަގާފައިވަނީ 5 ޖޫން 1989 ގައެވެ. އެއީ ތިއަނަންމަން މައިދާނުގައި ޑިމޮކްރަސީއަށް ގޮވާލައި ކުރަމުންދިޔަ މުޒާހަރާތައް ހުއްޓުވުމަށް، ޗައިނާ ސަރުކާރުން ސިފައިންނާއި ޓޭންކްތައް ފޮނުވައިގެން ހިންގި ލޭއޮހޮރުވުން ބޮޑު އޮޕަރޭޝަނަށް ފަހު ޖެހިގެން އައި ދުވަހެވެ. ސަރުކާރުގެ އެ ފިޔަވަޅާއެކު މުޅި މައިދާން އޮތީ ސުންނާފަތިވެ، ކުނިބުންޏާއި ވީރާނާކަމުގެ ތެރޭގައެވެ.
އެސޯސިއޭޓަޑް ޕްރެސް (އޭޕީ)ގެ ފޮޓޯގްރާފަރެއް ކަމަށްވާ ޖެފް ވައިޑްނަރ ބެއިޖިންގްގައި ހުރީ އެ މުޒާހަރާތަކުގެ މައުލޫމާތު ދުނިޔެއަށް ފޯރުކޮށްދިނުމަށެވެ. މައިދާން އޮތީ ނޫސްވެރިންނަށް ނުވަދެވޭގޮތަށް ބަންދުކޮށްފައި ނަމަވެސް، އެތަނުގައި ކޮންމެވެސް ކަމެއް ހިނގަމުންދާކަމުގެ މައުލޫމާތު އޭނާއަށް ލިބުނެވެ. އެއާއެކު، ވައިޑްނަރާއި އިތުރު ނޫސްވެރިންތަކަކު ބެއިޖިންގް ހޮޓަލަށް ދިޔައެވެ. އެ ހޮޓަލަކީ މަތިން މައިދާން ރީތިކޮށް ފެންނަން ހުރި ތަނެކެވެ.
ހޮޓަލުގެ ފަސްވަނަ ފަންގިފިލާގެ ބެލްކަނީގައި ހުރިއިރު، ވައިޑްނަރަށް މައިދާން ފެންނަމުންދިޔައީ އެއްވެސް ހުރަހެއް ނެތިއެވެ. މި ތާރީޚީ ފޮޓޯ އޭނާ ނެގީ އެތަނުގައި ހުރެގެންނެވެ. ފޮޓޯއިން ފެންނަނީ ކާކުކަން ނޭނގޭ ޗައިނާގެ ފިރިހެނަކު، ކުރިއަށް ދަތުރުކުރަމުންދިޔަ ޓޭންކް ބަރިއެއްގެ ކުރިމަތީގައި ހިތްވަރާއެކު ހުއްޓި، އެ ތަކެތީގެ ދަތުރަށް ހުރަސްއަޅާ މަންޒަރެވެ.
މުޒާހަރާތަކާއި އޭގެ ފަހުން ހިނގި ކަންކަމުގެ މައުލޫމާތު ޗައިނާ ސަރުކާރުން ވަރަށް ބޮޑަށް ސިއްރުކޮށްފައިވާތީ، މި “ޓޭންކް މޭން” އަކީ ކާކުކަން މިއަދާ ހަމައަށްވެސް ވަނީ ނޭނގިފައެވެ.
ފޮޓޯ ނެގިގޮތް:
ޖެފް ވައިޑްނަރ މި ފޮޓޯ ނެގުމަށް ބޭނުންކުރީ 300 މިލިމީޓަރުގެ ޓެލެފޮޓޯ ލެންސެއް ހަރުކޮށްފައިވާ ނިކޯން އެފް.އީ.2 ކެމެރާއެކެވެ. ފޮޓޯގްރާފަރާއި އެ މަންޒަރު ހިނގި ތަނާ ދެމެދު ހުރި ދުރުމިނުގެ ސަބަބުން، އެކަނިހުރި ފަރުދަކާއި އޭނާގެ ކުރިމަތީގައި އޮތް ބާރުގަދަ އަސްކަރީ ލަޝްކަރާ ދެމެދު ހުރި ތަފާތު ވަރަށް ބޮޑަށް ހާމަވެގެންދިޔައެވެ.
ވައިޑްނަރގެ މި ފޮޓޯއަށް ވަރަށް އަވަހަށް ބައިނަލްއަގުވާމީ ސަމާލުކަން ލިބި، އިންސާނީ ހައްގުތަކާއި މިނިވަންކަމަށްޓަކައި ކުރާ މަސައްކަތުގެ ދެމިއޮޮތް ރަމްޒަކަށް މި ފޮޓޯ ވެގެންދިޔައެވެ. މިއީ ތިއަނަންމަން މައިދާނުގެ މުޒާހަރާތަކުގެ ހަނދާންތައް އާކޮށްދޭ، އަދި އަނިޔާވެރިކަމާ ދެކޮޅަށް ފަރުދަކު ދައްކުވައިދޭ ހިތްވަރުގަދަކަމުގެ ނަމޫނާއެއްގެ ގޮތުގައި ތާރީޚުގައި ބަޔާންވެގެންވާ ފޮޓޯއެކެވެ.
