ރިއަލިޓީ ޝޯވ “ބިގް ބޮސް 20” ގެ ބައިވެރިއެއް ކަމަށްވާ ޓީވީ ބަތަލާ މާހީ ވިޖް، އޭނާގެ ކެރިއަރުގެ ކުރީކޮޅުގެ މުހިންމު ސިއްރެއް ހާމަކޮށްފިއެވެ. މާހީ ހާމަކުރި ގޮތުގައި މަޝްހޫރު ޑައިރެކްޓަރު މަނީ ރަތުނަމްގެ 2004 ވަނަ އަހަރުގެ ފިލްމު “ޔުވާ” އިން އޭނާއަށް ރޯލެއް ހުށަހެޅިއެވެ.
ބިގް ބޮސް ގޭތެރޭގައި އެހެން ބައިވެރިއެއް ކަމަށްވާ ކަނިކާ މަންއާއެކު ވާހަކަދައްކަމުން މާހީ ބުނީ، އޭނާގެ ކެރިއަރު ފެށީ ވީޑިއޯ ލަވަތަކުން ކަމަށެވެ. އެގޮތުން “ތޫ ތޫ ހޭ ވަހީ” ގެ ރީމިކްސް ލަވައިގެ އިތުރުން ކާމިޔާބު ގިނަ ވީޑިއޯ ލަވަތަކަކާއި ޕްރަބޫ ދޭވާ އާއެކު ދެކުނު އިންޑިއާގެ ފިލްމުތަކެއްވެސް ކުޅުނު ކަމަށް އޭނާ ކިޔައިދިނެވެ.
މާހީ އިތުރަށް ހާމަކުރި ގޮތުގައި، “ޔުވާ” ފިލްމުގައި ވިވެކް އޮބެރޯއީގެ ލޯބިވެރިޔާ “މީރާ” ގެ ރޯލަށް މަނީ ރަތުނަމް އެންމެ ފުރަތަމަ ފައިނަލް ކުރީ އޭނާއެވެ. ނަމަވެސް، އެ ޕްރޮޖެކްޓާ ގުޅުންހުރި މީހަކާ ދެމެދު އުފެދުނު ހިތްހަމަނުޖެހުމެއްގެ ސަބަބުން އެ ފުރުސަތު ގެއްލި، ފަހުން އެ ރޯލު ދިޔައީ ބޮލީވުޑްގެ މަޝްހޫރު ތަރި ކަރީނާ ކަޕޫރު ޚާން އަށެވެ.
“ޔުވާ” ގެ ފުރުސަތު ގެއްލުމަށްފަހު އިތުރު ދެތިން ފިލްމަކުން ލިބުނު ފުރުސަތުތައްވެސް އެންމެ ފަހު ވަގުތު ކެންސަލްވުމުން، މާހީ ނިންމީ ޓީވީ ޑްރާމާތަކަށް ބަދަލުވާށެވެ. މި ނިންމުމަކީ އޭނާގެ ހަޔާތް ބަދަލުކޮށްލި ނިންމުމެކެވެ. “ލާގީ ތުޖްސޭ ލަގަން” އަދި “ބާލިކާ ވަދޫ” ފަދަ މަޤުބޫލު ޑްރާމާތަކުން އޭނާ ބޮޑު މަޝްހޫރުކަމެއް ހޯދިއެވެ. އަދި އޭގެ ފަހުން “ޖަލަކް ދިކްލާ ޖާ”، “ޚަތުރޯން ކޭ ކިލާޅީ” އަދި ފިރިމީހާ ޖޭ ބަނުޝާލީއާއެކު ކާމިޔާބުކުރި “ނަޗް ބަލިޔޭ 5” ފަދަ ރިއަލިޓީ ޝޯވތަކުންވެސް އޭނާ ފެނިގެންދިޔައެވެ.
އޭ.އާރު ރަހްމާން މިއުޒިކް ތައްޔާރުކޮށްދިން “ޔުވާ” އަކީ އަޖޭ ދޭވްގަން، އަބީޝެކް ބައްޗަން، ވިވެކް އޮބެރޯއީ، ރާނީ މުކަރްޖީ، ކަރީނާ ކަޕޫރު ޚާން އަދި އީޝާ ޑިއޯލް ފަދަ ވަރުގަދަ ތަރިންތަކަކާއެކު ތަފާތު ތިން ޒުވާނެއްގެ ދިރިއުޅުމުގެ ވާހަކަ ދެއްކި ފިލްމެކެވެ.
މާހީ ވިޖް މިހާރު ވާދަކުރަމުންދާ “ބިގް ބޮސް 20” އަންނަނީ ޖިއޯހޮޓްސްޓާ އަދި ކަލާޒް ޓީވީ މެދުވެރިކޮށް ދައްކަމުންނެވެ.
