ކޮންމެ އެޕިސޯޑެއްގައި މުޅިން އައު މައްސަލައެއް ގެނެސްދޭ ގޮތަށް، ޖުމްލަ 10 އެޕިސޯޑުގައި 10 ތަފާތު ވާހަކަ އެކުލެވޭ ކްރިއޭޓިވް ނެޓްވޯކްގެ އާ ކްރައިމް ތްރިލަރ ސީރީޒް “ޖުންޖުލާ” އަންނަ އޮކްޓޯބަރު 3 ގައި މީޑިއާނެޓްގެ ވީޑިއޯކްލަބުން ޕްރިމިއަރ ކުރަން ހަމަޖެހިއްޖެއެވެ.
އަޒްހާން އިބްރާހީމް ޑައިރެކްޓްކޮށްފައިވާ މި ސީރީޒްގައި މައިގަނޑު ގޮތެއްގައި ފެނިގެންދާނީ އިންސްޕެކްޓަރ ޒާރާ (ވާޝިޔާ މުޙައްމަދު) އާއި އޭނާގެ ޕާޓްނަރު ޒުހައިރު (ސާމީ ހުސެއިން ދީދީ) ކޮންމެ އެޕިސޯޑެއްގައިވެސް އައު މައްސަލައެއް ތަޙުޤީޤުކުރާ މަންޒަރެވެ. ނުތަނަވަސް އިންޓަރޮގޭޝަންތަކާއި ފްލޭޝްބެކްތަކުގެ އެހީގައި މި މައްސަލަތަކުގެ ޙަޤީޤަތް ހޯދަމުންދާއިރު، މި ތަޙުޤީޤުތަކުގެ ތެރެއިން ޒާރާގެ އަމިއްލަ މާޒީގެ ސިއްރުތައްވެސް މަޑުމަޑުން ހާމަވާން ފަށާނެއެވެ.
މި ސީރީޒްގެ ފުރަތަމަ އެޕިސޯޑު ކަމަށްވާ “ފަހު ފިލާވަޅު”އިން މި ތަޙުޤީޤީ ޓީމު ތަޢާރަފުކޮށްދީ، މުޅި ސީޒަނުގެ މިސްރާބު ކަނޑައަޅައިދޭނެއެވެ. އެގޮތުން އެއްވެސް މީހަކީ ބޭރުފުށުން ފެންނަ ކަހަލަ މީހަކަށް ނުވެދާނެކަން މި އެޕިސޯޑުތަކުން ދައްކުވައިދޭނެއެވެ. މީގެ އިތުރުން، ރައްޔިތުންގެ މަޖިލީހުގެ މެމްބަރު ހަޝްމާ މި މައްސަލަތަކުގެ ތެރެއަށް ވަނުމާއެކު ފުލުހުންގެ އިދާރާއަށް ސިޔާސީ ނުފޫޒުތައްވެސް ކުރިމަތިވާން ފަށައެވެ.
ސީރީޒްއާ ބެހޭ ގޮތުން ވާހަކަދައްކަމުން އަޒްހާން ބުނީ، މުޅި ސީރީޒް ބިނާވެފައިވަނީ ވަރަށް އާދައިގެ ސުވާލެއްގެ މައްޗަށް ކަމަށެވެ. އެއީ،
“ސުވާލުކުރަން އިންނަ މީހާގެ އަމިއްލަ ސިއްރެއް ފޮރުވަން އޮވެއްޖެނަމަ ދެން ވާނީ ކިހިނެއް؟” މި ސުވާލެވެ.
“ޖުންޖުލާގެ ކޮންމެ އެޕިސޯޑަކީ ވަކި މައްސަލައެއް. އަދި ކޮންމެ މައްސަލައަކީވެސް ކޮންމެވެސް ކަމެއް ސިއްރުކުރުމަށް މީހުން ހަދާ ދޮގުތަކެއްގެ މައްޗަށް އެކުލެވޭ މައްސަލައެއް. މުޅި ސީޒަންގައި ޒާރާ އުޅޭނީ ދޮގުހަދާ މީހުން ހޯދަން. އެކަމަކު އޭނާގެ އަމިއްލަ ސިއްރުތަކެއްވެސް ވާކަން ބެލުންތެރިންނަށް މަޑުމަޑުން އެނގެން ފަށާނެ. ޝޯގެ އަސްލު ފޯރިއަކީ އެއީ،” އަޒްހާން ބުންޏެވެ.
ފީޗަރ ފިލްމަކުން ސީރީޒްއަކަށް ބަދަލުވުމަކީ ތަފާތު ގޮންޖެހުމެއްކަން ފާހަގަކުރަމުން އަޒްހާން ބުނީ،
“ލީލީގައި އޮތީ އެއްފަހަރާ ކިޔައިދޭންޖެހޭ އެންމެ ވާހަކައެއް. އެކަމަކު ޖުންޖުލާގައި ކޮންމެ ހަފްތާއަކު އާ މައްސަލައަކާއި، އޭގެ އަޑީގައި ފޮރުވިފައިވާ ބޮޑު ސިއްރަކާއެކު ބެލުންތެރިން ޝައުޤުވެރިކަންމަތީ ހިފަހައްޓަން ޖެހޭ. މިއީ މުޅި ޓީމަށްވެސް ކުރިމަތިވި ވަރަށް ބޮޑު ޗެލެންޖެއް،”ކަމަށެވެ.
“އަޅުގަނޑުމެން ބޭނުންވީ ބޭރުގެ ކޮޕީއަކާ ނުވައްތަރު، ދިވެހިވަންތަ ކްރައިމް ތްރިލަރއެއް އުފައްދަން. ޕޮލިސް ސްޓޭޝަންތަކާއި، ރަށްތަކާއި، އާއިލީ ޕްރެޝަރުތަކާއި، ސިޔާސީ ކަންކަން، މިއީ ހުސް ރާއްޖޭގެ މާޙައުލާ ގުޅޭ ކަންކަން.” އޭނާ ކިޔައިދިނެވެ.
މިއީ މިދިޔަ އަހަރު ކްރިއޭޓިވް ނެޓްވޯކުން ޕްރޮޑިއުސްކޮށް އަޒްހާން ޑައިރެކްޓްކުރި ފީޗަރ ފިލްމު “ލީލީ” އަށްފަހު އެ ކުންފުނިން ގެނެސްދޭ އެންމެ ފަހުގެ އުފެއްދުމެވެ. މި ސީރީޒްގެ ފުރަތަމަ ދެ އެޕިސޯޑު އޮކްޓޯބަރު 3 އިން ފެށިގެން މީޑިއާނެޓްގެ ‘އެމް.އެސް ލައިޓް’ އަދި ‘އެމް.އެސް ޑިޖިޓަލް’ އެޕް މެދުވެރިކޮށް ވީޑިއޯކްލަބުން ލިބެން ހުންނާނެއެވެ. އަދި އޭގެ ފަހުން ކޮންމެ ހަފްތާއަކު އާ އެޕިސޯޑެއް ނެރެމުންދާނެއެވެ.
